¹ Nomba mu mwenshi we kumi na ibili, umwenshi wa Adari, pa bushiku bwe kumi na shitatu, ulo ifunde lya mfumu ne cipope fyali no kweba ati fibombwepo, pa bushiku ubo abalwani ba ba Yuda balokufwaya ukukwata amaka pali bo, ifintu kafyaluka. Aba Yuda kabakwata amaka pali mbo aba bapatile. ² Aba Yuda kababungana mu misumba yabo mu ncingo shonse isha mfumu Ashuerushi, ukubika amaboko yabo pali mbo abalokufwaya ukuleta impasase pali bo. Tapapo uwaimakene ukubalwisha, pantu umwenso wa kubatina kawikete abantu bonse. ³ Bonse bamushika bamu ncingo, ba filolo ba ncingo, abakulu ba bantu, na babomfi ba mfumu, kabalokwafwako abaYuda pantu umwenso wakutina Modekai kaubekata. ⁴ Pantu Modekai ali umukulu mu nanda ya mfumu, no kwishibikwa kwakwe kakusalangana mu ncingo shonse, Pantu uyu muntu Modekai alitampile ukukulisha. ⁵ Aba Yuda kabasansa abalwani babo ku lupanga, ilibapaya no kobonaula no kucita ifibalokufwaya kuli mbo aba bapatile. ⁶ Mu cipango ca Shushani umwine aba Yuda kabepayamo no konaula abalalume imyanda isano. ⁷ Baipeye Parishandata, Dalfoni, Aspata, ⁸ Porata, Adalia, Aridata, ⁹ Parimashta, Arisai, Aridai, Baisata, ¹⁰ na bana ikumi abakwa Hamani mwana Hammedata, umulwani waba Yuda. Lelo tabapintilepo ifipe fyabo. ¹¹ Nkalya kasuba impendwa ya mbo abaipaiwe mu cipango ca Shushani, kailetwa ku mfumu. ¹² Imfumu kailabila kuli Mukolo Estele ati, "Aba Yuda balipeye abalalume imyanda isano mu cipango ca Shushani, ukubikapo likoso na bana balalume bakwa Hamani. Mba fimbi findo bacitilepo mu ncingo shimbi isha mu bufumu? Findo fimbi ukokabila? Cikopelwa kuli we. Cindo ico ukolomba? Cikopelwa kuli we." ¹³ Estele kalabila ati, "Kani cikosekesha imfumu, lekeni aba Yuda abali mu Shushani basuminishiwe ukucita icipope ca nkano kasuba na mailo, nakambi lekeni imibili ya ba mwana Hamani ikulikwe pa mukobeko." ¹⁴ Efi imfumu yapingwile ukweba ati nci naco cilingile ukucitwa. Icipope kacilembwa mu Shushani, nabo kabatanika ba mwana Hamani ikumi. ¹⁵ Aba Yuda abalokwikala mu Shushani kabesa pamo pa bushiku bwe kumi na shine mu mwenshi wa Adari, no kwipaya abalalume imyanda itatu mu Shushani, lelo tabaiketepo pa fipe fyabo. ¹⁶ Bambi aba Yuda abalokwikala mu ncingo isha mu bufumu kabesa pamo ku kucingilila imyeo yabo, nabo kabasanga ukutushako ku balwani babo nakambi kabepayapo amakana amakumi cinelubali na yasano ya mbo aba bapatile, lelo tabaiketepo iminwe yabo pa fipe fya bantu baipeye. ¹⁷ Nci cacitikile pa bushiku bwe kumi na shitatu mu mwenshi wa Adari. Pa bushiku bwe kumi na shine kabatusha no kubupanga ubushiku bwa kusefya no kusangalala. ¹⁸ Lelo aba Yuda abalokwikala mu Shushani kababungana pamo pa bushiku bwe kumi na shitatu no bwe kumi na shine. Pa bushiku bwe kumi na shisano kabatushako no kubupanga ubushiku bwa kusefya no kusangalala. ¹⁹ Ecilenga aba Yuda ba mu mishi, abekala mu ncende sha mu mishi, balasefya ubushiku kumi na shine mu mwenshi wa Adari pakuti bwaba bushiku bwa kusangalala no kulya, nakambi e bushiku bapelana ubupe bwa filyo umo no munakwe. ²⁰ modekai alilembele mfi fintu no kutuma ba kalata ku ba Yuda bonse abalokwikala mu ncingo shonse isha mfumu Ashuerushi, abalokuli apepi no kutali, ²¹ ukubeba ukwibukisha ubushiku bwe kumi na shine no bushiku bwe kumi na shisano mu mwenshi wa Adari cina mwaka. ²² Inshi shali ni nshiku isho aba Yuda bakwatilemo ukutushako ku balwani babo, nakambi e mwenshi uwo ubulanda bwabo bwayalukile insansa, no kuloosha kakuba bushiku bwa kusefya. Bali no kushicita inshiku sha kulya no kusangalala, ne sha kupelana ubupe bwa filyo, no bupe ku baculile. ²³ Efi aba Yuda kabatwalilila kusefya uku batampile, ukucita ifi Modekai abalembele. ²⁴ Pali njilya nshita Hamani mwana Hammedata umwina Agagi, umulwani waba Yuda, kapingile aba Yuda ukubonaula, ye kateya Puri (ekweba ati, injuka), ukubapwisha no kubonaula. ²⁵ Lelo ulo umulandu wafikile ku mfumu, kaipela ubupingushi mu makalata ubwakweba ati amapinge ayabipile aya kwa Hamani paba Yuda yabwelele pa mutwi wakwe, no kweba ati ye na bana bakwe batanikwe pa mukobeko. ²⁶ Pa mulandu wa nci kabeta inshilya nshiku ati Purim, ukukonkana ne shina lya Puri. Pa mulandu wa fyonse ifyalembelwe mu nkalata, napa fibabwene ne fya bacitikile, ²⁷ aba Yuda kabasumina nci cintu ne ncito babapele, nci cishilano cali cabo abene, abakubakonkapo, na onse likoso uwailundanya kuli bo. Kaciba ukweba ati balo kusefya inshi nshiku shibili cina mwaka. Kabalo kusefesha mu nshila iipuseneko pa nshita imo yenka cina mwaka. ²⁸ Inshi nshiku kashiba shakusefya no kwibukisha mu nkulo shonse, ulupwa lonse, mu ncingo shonse, na mu misumba yonse. Mba aba Yuda na bana babo tabakalekepo ukwibukisha mu cishinka inshi nshiku sha Purim, ukweba ati bekashilabukilapo. ²⁹ Mukolo Estele umwana mwanakashi wakwa Abihaili na Modekai umu Yuda kalemba mu maka no kushinkisha pali nshi nkalata sha Purim. ³⁰ Nkalata shalituminwe ku ba Yuda mu ncingo 127 isha mu bufumu bwakwa Ashuerushi, ukulangulukila aba Yuda ubucingo ne cishinka. ³¹ Aya makalata yalokulondolola pa nshiku sha Purim pa nshita yaiko iyasontelelwe, ifi Modekai na Modekai na Mukolo Estele batumine aba Yuda. Aba Yuda kabasumina incito abene benka na bana babo, fyenka ifi basumine ukuleka ukulya no kulila. ³² Ukukonkobesha kwakwa Estele kakufikilisha nga malamuno palwa Purim, nakambi kacilembwa mu citabo.