^{1 2} Efi imfumu na Hamani kabaya mu kusefya na Mukolo Estele. Pali mbu bushiku bwa bubili, ulo balokwabanya umwangashi, Imfumu kayeba Estele ati, "Cindo ici ukokabila? Cikopelwa kuli we. Cindo ici ukolomba? Ukufika na pakati ka bufumu, naco nkokupa." ³ Elo Mukolo Estele ayasukile ati, "Kani ndisangile uluse menso yenu, mwe mfumu, nakambi kani cikomusekesha, lekeni umweo wandi upelwe kuli nebo - nku e kukabila kwandi, nakambi nkolombelako na bantu bandi. ⁴ Pakuti balitushitishe, nebo na bantu bandi, ukweba tonaulwe, twipaiwe, no kutulofya. Nga balitushitisheko likoso ku busha, abasha balalume na banakashi, ngandi likoso tondolo, pakuti takupo ica bulanda nga nci icinga pokelelwa ku kupumfyanya imfumu." ⁵ Imfumu Ashuerushi kayeba Estele mukolo ati, "Mba e nani uyo? Ni pi akosangwa oyo muntu uwiswishe umutima wakwe ukucita icamusango uyu?" ⁶ Estele kalabila ati, "Umuntu walupato, umulwani, ni ngu umubi Hamani!" Elo Hamani atinine ku cinso ca mfumu na mukolo. ⁷ Imfumu kaima mu bukali ukufuma mu kunwa umwangashi pa mutebeto no kuya mwibala lya cipango, lelo Hamani kashala akopapatila umweo wakwe kuli Mukolo Estele. Kabona ukweba ati ububi bukopangilwa ye ku mfumu. ⁸ Elo imfumu yabwelele ukufuma mwi bala lya cipango ukuya mu nanda umo umwangashi wapekanishiwe. Hamani kaponena pa cipuna apaikele Estele. Imfumu kayeba ati, "Bushe akocena mokolo mu menso yandi mu nanda yandi? Penka apo nga mashiwi yalokufuma mu kanwa ka mfumu, abasha kabafimba Hamani pa menso. ⁹ Elo Habona, umo pali ba cilolo uwalo kubombela ku mfumu, kalabila ati, "Umukobeko uutalimpile imikono amakumi yasano wiminikilwe pa nanda yaku Hamani. Apangile Modekai, uyo uwalabile ukucingilila imfumu." Imfumu kayeba ayi, "Mukulikilenipo." ¹⁰ Efi batanikile Hamani pa mukobeko uwo apekanishishe Modekai. Elo ubukali bwa mfumu bwabwelele panshi.