¹ Mbulya bushiku imfumu tayalelepo. Kaikonkobesha abasha ukuleta ifyalembwa fya butekeshi bwakwe, nafyo kafibelengwa mu kubilikisha ku mfumu. ² Kacisangwa calilembwamo ukweba ati Modekai kashimika pali Bigitana na Tereshi, babili aba muli ba filolo ba mfumu abalokulonda umulyango, abalokufwaya ukwipaya imfumu Ashuerushi. ³ Imfumu kaipusha ati, "Cindo cacitilwepo ukulanga umucinshi no kwibukishiwa kuli Modekai pa kucita mfi?" Elo abalalume ba ku bufumu abalokumu bombela kabalabila ati, Tapapo ifyamucitilwapo." ⁴ Imfumu kailabila ati, "Ni nani uuli mu lubansa?" Nomba Hamani ninshi kaingile kunse ya lubansa lwa nanda ya mfumu mukulabila nakwe palwa kutanika Modekai pa mukobeko uwo amupangile. ⁵ Abasha ba mfumu kabayeba ati, "Ni Hamani ewimakene mu lubansa." Imfumu kailabila ati, "Mwebeni engile." ⁶ Ulo Hamani aingile, imfumu kaimweba ati, "Nindo ilingile ukucitilwa umuntu uwo imfumu yatemwa ukucindika?" Nomba Hamani kalokuilabisha mu mutima ati, "Ni nani uwo imfumu ingatemwa ukucindika ukucila pali nebo?" ⁷ Hamani kalabila ku mfumu ati, "Ku muntu uwo imfumu yatemwa ukucindika, ⁸ lekeni imingila wa bufumu uletwe, umwingila uwo imfumu yafwalako, na pali kabalwe uwo imfumu ya endelapo na oyo kumutwi wakwe pali icisote ca bufumu. ⁹ Elo lekeni imingila na kabalwe fipelwe kuli umo uwa babombesha pali bacilolo ba mfumu. Lekeni bafwike umuntu uwo imfumu itemenwe ukucindamika, nakambi lekeni bamushingulushe pali kabalwe mu misebo ya mu musumba. Lekeni balumbaishe pali ye ati, "Mfi eficitika kuli oyo uwo imfumu yatemwa ukucindamika!'" ¹⁰ Elo imfumu yalabile kuli Hamani ati, "Bula imingila na kabalwe, fyenka ifi walabila, no kucita mfi kuli Modekai umu Yuda uwikala pa mulyango wa ku mfumu. Wifilwapo nangula cimo pa fiwalabila." ¹¹ Elo Hamani kabula umwingila na kabalwe. Kafwika Modekai no kumupishanya pali kabalwe mu misebo ya mu musumba. Kalokubilikisha pali ye ati, "Mfi e ficitikilwa umuntu uwo imfumu yatemwa ukucindamika!" ¹² Modekai kabwelela ku mulyango wa ku mfumu. Lelo Hamani kabutukila ku nanda yakwe, akolosha, alifimbilishe na ku mutwi wakwe. ¹³ Hamani kashimikila Sereshi umukashi wakwe na banakwe bonse fyonse ifyamucitikile. Elo abantu bakwe abaishibikilwe ku mano yabo, na Sershi umukashi wakwe, kabamweba ati, "Kani Modekai, ewo watampa ukuwilako, mu Yuda, tawakamucimfyepo, lelo we ukawa pa ntanshi yakwe." ¹⁴ Ulo balokulabila nakwe, ba mushika ba mfumu kabafika. Kabendeshe mukuleta Hamani ku mutebeto uwo Estele apekenye.