¹ Panuma ya nshiku shitatu, Estele kafwala ifyakufwala fya bufumu no kuya kwimakana mu lubansa lwa cipango ca mfumu, ku ntanshi ya nanda ya mfumu. Imfumu kailokwikele pa cipuna caiko ica bufumu mu nanda ya bufumu, kailoleshe ku bwingililo bwa nanda. ² Ulo imfumu yabwene Estele mukolo alimakene mu lubansa, kapokelelwa kumenso ya mfumu. Imfumu kaitambika kuli ye inkonto ya golide mu minwe yakwe. Efi Estele apalamine no kukumya ku mpelo ya nkonto. ³ Elo imfumu yamwebele ati, "Nindo ukofwaya, Mukolo Estele? Cindo ukonjipusha? ukufika na pakati ka bufumu bwandi, nkokupa." ⁴ Estele kalabila ati, "Kani casekesha imfumu, lekeni imfumu na Hamani bese ku mutebeto uwo njipekanishishe." ⁵ Elo imfumu yalabile ati, "Leteni Hamani bwangu, kukucita ifi Estele alabila." Efi imfumu na Hamani baile ku mutebeto uwo Estele apekenye. ⁶ Ulo balokwabanya umwangashi pa mutebeto, imfumu kailabila kuli Estele ati, "Cindo ukokabila? Cikopelwa kuli we. Cindo ukolomba? Ukufika na pakati ka bufumu bwandi, nkokupela." ⁷ Estele ka asuka ati, "Ukukabila nakambi ukulomba kwandi ni nku, ⁸ kani ndisangile insansa mu menso ya mfumu nakambi kani cikosekesha imfumu ukumpela ica kukabila kwandi no kumfwa ku kulomba kwandi, lekeni imfumu na Hamani bakese ku mutebeto uwo nakuipekanisha mailo nandebo nakwisa kwasuka icipusho ca mfumu." ⁹ Hamani abwelelemo nkalya kasuba akosekela nakambi alitemenwe mu mutima. Lelo ulo Hamani abwene Modekai pa mulyango wa ku mfumu, ukweba ati Modekai taimakenepo nangula ukututuma nangula umwenso uuli onse, Kacimukalipa pali Modekai. ¹⁰ Nangula cali mfi, Hamani kaibweshamo umwine no kuya ku nanda yakwe. Kaita abanakwe no kubabunganya pamo, na Sereshi umukashi wakwe. ¹¹ Hamani kalokulangisha ukuwama kwa bunonshi bwakwe, impendwa ya bana bakwe abalalume, konse ukumusumbula uko imfumu yacitile, na fyo alokutela ukucila bonse bacilolo na basha ba mfumu. ¹² Hamani kalabila ati, "Mukolo Estele taitilepo bambi sembi nebo ukwisa ne mfumu ku mutebeto apekenye. No bwa mailo nakabili balinjitile kuli ye ukuya ne mfumu. ¹³ Lelo mfi fyonse tafikwetepo ncito kuli nebo lonse ulo nkobona Modekai umu Yuda alikele pa mulyango wa ku mfumu." ¹⁴ Elo Sereshi umukashi wakwe kalabila kuli Hamani na ku banakwe bonse ati, "`Lekeni bapange umukobeko uutalimpile imikono amakumi yasano. Mu lucelo ukalabile ne mfumu ukweba ati bakapopelepo Modekai. Elo ukaye ne nsansa pamo ne mfumu ku mutebeto."Ici kacisekesha Hamani no mukobeko kaupangwa.