¹ Ulo Modekai aumfwile pali fyonse likoso ifyacitikile, kalepaula ifyakufwalafyakwe nokufwala insamu namu matoi. Kafumina panse mukati ka musumba, no kulila ukwinekantu ku bukali. ² Kaya pepi likoso na ku mulyango wa ku mfumu, pakuti tapapo uwasuminishiwe ukupitapo uufwele insamu. ³ Mu ncingo shonse, konse uko icipope ca mfumu cafikile, kakuba ukulosha ukukulu muba Yuda, ukuleka ukulya, ukulila, no kulanguluka. Abengi pali bo kabafwele insamu namu matoi. ⁴ Ulo abakashana bakwa Estele na basha bakwe baishile kumweba, mukolo kaba mu bulanda ubwinekantu. Katuma ifyakufwala ukufwika Modekai (ukweba ati afuleko insamu), lelo tafipokelepo. ⁵ Elo Estele aitile Hataki, mushika wa mfumu uwo baebele ukumubombela. Kamutuma ukuya kuli Modekai mukwishiba ifyacitikile nefi fikopilibula. ⁶ Efi Hataki aile kuli Modekai ku lubansa lwa musumba ku ntanshi ya mulyango wa ku mfumu. ⁷ Modekai kalondolola fyonse ifya mucitikile, no bwingi bwa cipimo ca silufele ici Hamani alaile ukupima nokupela ku cipao ca mfumu pakweba ati epaye aba Yuda bonse. ⁸ Naye kamupela ne calembelwe ca fipope ifya pangilwe mu Shushani pa kulofya aba Yuda. Acitile mfi pakweba ati Hataki akaye kulanga Estele, no kweba ati amupele incito ya kuya kuli ba mfumu mukumulombelako uluse, no kupapatilako abantu bakwe. ⁹ Efi Hataki aile kweba Estele ifi Modekai amwebele. ¹⁰ Elo Estele alabile kuli Hataki ati abwelelemo kuli Modekai. ¹¹ Estele kalabila ati, "Bonse abasha bamfumu na bantu bamu ncingo shonse isha bufumu balishiba ati kani umwalalume nangula umwanakashi aya ku mfumu ku lubansa lwa mukati uwo batetile, kwaba likoso ifunde limo: Lyakweba ati alingile ukwipaiwa - sembi oyo uwo imfumu yasonte nkonto ya golide ukweba ati abe no mweo. Nande tabanjitapo ukwisa ku mfumu ishi nshiku amakumi yatatu." ¹² Efi Hataki alondololwele Modekai amashiwi yakwa Estele. ¹³ Modekai kabweleshapo ukutuma ndi ilyashi ati, "Ulokutontonkanyapo ati ku cipango ca mfumu, wakupusuka ukucila pali bonse aba Yuda. ¹⁴ Kani waba tondolo pali njino nshita, ukutushako no kupokololwa ukwa ba Yuda kwakufumina ku ncende imbi, lelo we naba nanda yaku wiso mwakuloba. Mba ni nani uwishibile kani eciwaishila ku bufumu pa nshita yamfi?" ¹⁵ Elo Estele atumine nga amashiwi kuli Modekai, ¹⁶ "Kabiye, kabunganye pamo bonse aba Yuda abekala mu Shushani, nakambi wendeshe kuli nebo. Muleke ukulya no kunwa pa nshiku shitatu ubushiku na kasuba. Abanakashi bandi pamo nande tukofunga mu nshila imo yenka. Nebo nkoya ku mfumu, nangula cibe ukweba ati ifunde lyalikanya, nakambi kani naloba, ninshi naloba." ¹⁷ Modekai kaya no kucita fyenka ifi Estele amwebele ukucita.