¹ Ati fipite mfi fintu, imfumu Ashuerushi kasumbula Hamani mwana Hammedata uwaku Agagi, no kubika icipuna cakwe peulu ya ba filolo bonse abo ali nabo. ² Bonse abasha ba mfumu abalo kuba pa mulyango waku mfumu kabalo kufukama no kwinamina panshi kuli Hamani, efyo imfumu yabebele ukucita. Lelo Modekai talokufukamapo nangula ukwinama panshi. ³ Elo Abasha ba mfumu abaali pa mulyango wa ku mfumu kabepusha Modekai ati, "Nindo ukanina ifunde lya mfumu?" ⁴ Kabalokulabila nakwe cina kasuba, lelo alikene ukumfwila amalamuno yabo. Efi baebele Modekai ukweba babone kani umulandu waku Modekai wakuba fyenka mfilya, pantu alibebele ati ali mu Yuda. ⁵ Ulo Hamani abwene ati Modekai takofukamapo no kwinamina panshi kuli ye, Hamani kaisulamo ubukali. ⁶ Talokufwayapo ukwipaya enka Modekai, pantu abasha ba mfumu kabamweba abali abantu bakwa Modekai. Hamani alokufwaya ukulofya bonse aba Yuda, abantu bakwa Modekai, abali mu bufumu bonse ubwa kwa Ashuerushi. ⁷ Mu mwenshi wakubalapo (e mwenshi wa Nisani), mu mwaka wakulenga ikumi na ibili ku bufumu bwaku Ashuerushi, kabaposa Puri - ecaku teyelako injuka - kaciposwa kuli Hamani, ukusala ubushiku no mwenshi. Kabateya injuka imiku iingi mpaka kaciwila pa mwenshi we kumi na ibili(e mwenshi wa Adari). ⁸ Elo Hamani alabile ku mfumu Ashuerushi ati, "Kuliko abantu abapalanganina no kwabanikana mu ncingo shonse isha bufumu bwenu. Amafunde yenu yalipusana na mafunde ya bantu bambi, nakambi tabomfwilapo ifunde lyenu mwe mfumu, kanshi tacilingilepo ukweba ati imfumu ibaleke likoso. ⁹ Kani cawama mu menso yenu mwe mfumu, bikeniko ifunde lyakweba ati tubepaye, nande nkopima ukulema kwa matalanti amakana ikumi aya silufele kuli mbo abakobomba incito ya mfumu, pakuti bo bakabike mu cipao ca mfumu." ¹⁰ Elo imfumu yabulile ininda munwe ku munwe waiko no kupela kuli Hamani mwana Hammedata umwina Agagi, umulwani wa ba Yuda. ¹¹ Imfumu kayeba Hamani ati, "Nkashininkisha ukubona ati ndalama shabwelela kuli we na ku bantu. Wakushicita nasho ifyo wakufwaya ukucita." ^{12 13} Elo bakalemba ba mfumu baitilwe pa bushiku bwe kumi na shitatu mu mwenshi wakubalapo, nakambi icipope kacilembwa umwali fyonse ifi Hamani alabile kuli bonse abeminishi ba mfumu mu ncingo, ku beminishi ba bantu abapusene, nakuli ba filolo ba bantu bonse, ku ncingo yonse mu milembele yabo, naku bantu bonse mu mulaka wabo. Calembelwe mwishina lyaku Ashuerushi nakambi kabacikakatika ne ninda munwe yakwe. Ifyalembelwe fyapintilwe mu minwe ya bakasalanganya ku ncingo shonse isha bufumu, ukulofya, ukwipaya, no konaula aba Yuda bonse, ukutampa ku baice ukufika ku bakote, abanono na banakashi, mu kasuba kamo - pa bushiku bwe kumi na shitatu mu mwenshi we kumi na ibili (e mwenshi wa Adari)- no kupokolola ifya bunonshi fyabo. ¹⁴ Icalembelwe mu nkalata kacipangwa ukube cipope mu ncingo shonse. Mu ncingo shonse kacishibwa ku bantu bonse ukweba ati balingile ukuipekanya pali mbu bushiku. ¹⁵ Bakasalanganya kabaya balyendeshe ukusalanganya ilamuno lya mfumu. Icipope kaba cisalanganya namu cipango ca Shushani namo. Imfumu na Hamani kabekala bakonwa, lelo umusumba wa Shushani kamuli icimfulumfulu.