¹ Ati fipite mfi fintu, ulo ubukali bwa mfumu Ashuerushi bwacepeleko, katontonkanyapo pali Bashti napa fi acitile. Nakabili katontonkanyapo pa cipope ici apangile pa mulandu wa cilubo cakwe. ² Elo imisepela ya balalume abalokubombela ku mfumu balabile ati, "Kakube ukucencentelako imfumu abanakashi ifisungu abaweme abataupwapo. ³ Imfumu kaisonte ba filolo mu ncingo shaiko shonse isha bufumu, ukubunganya pamo bonse abanakashi abaweme abataupwapo ukubaleta ku cipango mu Shushani. Lekeni bese bakasungwe kuli Hegai, uubombela ku mfumu, uulolekesha pa banakashi, naye lekeni akabapele ifya kuiwamishako, ⁴ Lekeni cikashana uwakuwamina imfumu akabe mukolo mu cifulo cakwa Bashti." Nku kucinkula kakusekesha imfumu, nayo kaicita fyenkefyo. ⁵ Kwali umu Yuda umo mwi sano lya Shushani uwe shina lya Modekai mwana Yairi mwana Shimei mwana Kishi, umwina Benyamini. ⁶ Apintilwe ukufuma ku Yerusalemu pamo naba bunkole na mbo abapintilwe kumo na Yeoakimu, imfumu ya Yuda, uwo Nebukadinesari imfumu ya Babele apintile ⁷ Ewalokusunga Hadassa, uwe shina lya, Estele, umwana mwanakashi wa kwa yama wakwe, pakuti takwetepo bawishi nangula banyina. Ngu cikashana alokuboneka bwino nakambi umuweme ukuboneka. Modekai amupintile kubati mwana wakwe. ⁸ Ulo ilamuno lya mfumu ne cipope fyaumfwikile, abakashana abengi baliletelwe ku cipango ku Shushani. Hegai ewalo kubabwenenena. Estele naye kabamuleta mwisano lya mfumu naye kalokusungwa na Hegai, uwalo kubona pa banakashi. ⁹ Umukashana kaba uwakumusekesha, naye kaba ne shuko ku menso yaku Hegai. Penkapo ekumupela ne fya kuiwamishako ne filyo fyakwe. Katuma abasha banakashi cinelubali ukufuma mu cipango ca mfumu ukumubombela, no kumu tesha ye na basha banakashi ukuya ku ncende iyawamishe mu nanda ya banakashi. ¹⁰ Estele taebelepo nangula umo palwa bantu bakwe naba lupwa lwakwe, pakuti Modekai alimukonkobeshe ati ekalabilapo. ¹¹ Cina kasuba Modekai alokwendauka pa lubansa panse ya nanda ya banakashi, ukufwaya ukwishiba palwa kwa Estele ne fyakucitika kuli ye. ¹² Ulo inshita yafikile iyakweba ati cina mukashana aye ku mfumu Ashuerushi - pakufikilisha ifyatantikilwe abanakashi, cina mwanakashi kapwisha imyenshi ikumi na ibili iya kuisuka, pa myenshi mutanda ku mafuta ya murri, ne myenshi mutanda ku fya nunkila nefya kuiwamishako - ¹³ ulo umukashana aya ku mfumu, fyonse ifi alokufwaya kabalokumupa ukufuma mu nanda ya banakashi, ifyakuti ye atwale ku cipango. ¹⁴ Mu cingulo elo alokuyamo, namu lucelo kalokubwela ku nanda ya bubili iya banakashi, nakambi ku kucingililwa na Shashikas, cilolo wa mfumu, uwalo kubwenenena pa banakashi. Tekuti abwelelepo ku mfumu sembi kani imfumu yamutemwa no kumwita ishina nakabili. ¹⁵ Nomba ulo inshita yafikile iyakweba ati Estele (umwana mwanakashi wakwa Abihaili, yama wakwa Modekai, uwamupintile kubati mwana wakwe) engile ukuya ku mfumu, taipwishepo nangula cimo sembi fyenka ifi Hegai cilolo wa mfumu, uwalokubwenenena abanakashi, amwebele. Nomba Estele kasekesha bonse likoso abamubwene. ¹⁶ Estele bamutwele ku mfumu Ashuerushi ku cipango mu mwenshi we kumi, e mwenshi wa Tebeti, mu mwaka wa cinelubali ku buteko bwakwe. ¹⁷ Imfumu kaitemwisha Estele ukucila pa banakashi bambi bonse naye kapokelelwa nakambi katemwikwa ku mfumu, ukucila pali banacisungu bonse. Efi abikile icisote caku bufumu pa mutwi wakwe no kumupanga mukolo mu cifulo cakwa Bashti. ¹⁸ Imfumu kaicita umutebeto uukulu kuli ba cilolo baiko na basha baiko, "Umutebeto wakwa Estele." kabapa no kutushako ku misonko monse mu ncingo sha bufumu. Nakambi ye kapelako no bupe imipelele ya bufumu. ¹⁹ Nomba ulo banacisungu babungene pamo umuku wa bubili, Modekai kaimakene pa mulyango wa mfumu. ²⁰ Estele ninshi tangaebapo nangula umo palwa balupwa bakwe nangula abantu bakwe, ifi Modekai amukonkobeshe. Katwalilila ukukonka ifi Modekai amwebele, ifi alokucita ulo alokumusunga. ²¹ Muli nshilya nshiku, ulo Modekai alokwikele pamulyango wa mfumu, bacilolo babili aba mfumu, Bigitana na Tereshi, abalokucingilila inshila yaku mulyango, kabakalipa nakambi kabalokufwaya ukucita ifibipile ku mfumu Ashuerushi. ²² Ulo ilyashi lyaishibikilwe kuli Modekai, kaeba mukolo Estele, naye Estele kalabila kumfumu mwishina lyaku Modekai. ²³ Kabafwailisha pali ndi lyashi nakambi kabashininkisha. namba balalume babili kababatanika ku fiti. Ngu mulandu kabaulemba mu mabuku ya milandu ya cina bushiku pa cinso ca mfumu.