¹ Mu nshiku shakwa Ashuerushi (e Ashuerushi uwalokuteka ukutula ku India ukufika ku Kushi, ukufika ku ncingo ishili 127), ² muli nshilya nshiku imfumu Ashuerushi kailkala pa cipuna cakwe ica bufumu mu cipango ca Shushani. ³ Mu mwaka wa butatu uwakuteka, kapela umutebeto kuli bonse ababomfi na basha bakwe. Ifita fya ku Pesia na ku Media, bakasomo, na ba filolo ba mu ncingo kabasangwako. ⁴ Kalangisha ubunonshi no ubucindami bwa bufumu bwaiko no mucinshi wa bukulu bwakwe pa nshiku ishingi, inshiku 180. ⁵ Ulo ishi nshiku shashilile, imfumu kaipela umutebeto uwakokwele pa nshiku cinelubali. Wali wa bantu bonse aba ku cipango ca Shushani, ukutampila ku bakulu ukufika naku bacepeshe. Wacitikile mu lubansa lwe bala lyamu cipango ilya mfumu. ⁶ Ulubansa lwe bala kabaluwamya ku nsalu yakucingililako iya bushishi ubutubile na kafifi, ifikete ku myando ya kolokondwe na kafifi, pa mipeto ya silufele ne fimanikilwe ifya Marble. Kwali ifyakusaminapo fya golide na silufele apalambatikilwe amabwe ya Porfuri, na ya marble, na ya margariti, na ya sohereti. ⁷ Ifyakunwa kabapekanisha mu nkombo sha golide. Inkombo ne nkombo kashili ishicilene nakambi umwangashi kaufula pa mulandu wa nsansa sha mfumu. ⁸ Iminwene kaicitwa ukukonkana ne cipope, "Takwakabepo ukupatikisha," pakuti mfi efyo imfumu yakonkobeshe bonse ba cilolo ba kwisano lyakwe ukucita ifyo cina muntu akofwaya. ⁹ Bashti mukolo wa mfumu, naye kapela umutebeto ku banakashi mwisano lya mfumu Ashuerushi. ¹⁰ Pa bushiku bwa cinelubali, ulo umutima wa imfumu wali ucili ne nsansa pa mulandu wa mwangashi, kaeba Meumani, Bista, Haribona, Bigita, Abagita, Setari na Karikasi (ba filolo cinelubali abalokubombela kuli ye), ¹¹ ukuleta Bashti mukolo kuli ye ne citebo cakwe ica bufumu. Ye alokufwaya ukulangisha abantu na babomfi ukuwama kwakwe, pakuti ye ali muweme ukuboneka. ¹² Lelo mukolo Bashti kakana ukwisa ulo imfumu yatumine ba mushika baiko kukumwita. Elo imfumu yakalipile sana; ubukali kabulo kupya mukati mu mutima ¹³ Efi imfumu yaebele abalalume abaishibikilwe ati ba mano, abaishibile inshita (pantu efyali ubutantiko bwa mfumu kuli bonse abaishibile ifipope ne mipingwile). ¹⁴ Nomba abalokuli apepi nakwe ni Karshena, Shetari, Adimata, Tarshishi, Meresi, Marsena, na Memukani, ba shamfumu cinelubali aba ku Pesia na ku Media. Balokulanshanya ne mfumu, nakambi balikwete ififulo ifikulu mu bufumu. ¹⁵ Ukukonkana ne funde, nindo yakucitwa kuli mukolo Bashti pantu taumfwililepo ifunde lya mfumu Ashuerushi, ifi ba mushika bamuletele?" ¹⁶ Memukani kalabila pa cinso ca mfumu naba filolo baiko ati, "Takulipo kwenka ku mfumu uko Bashti alufyenye, lelo nakuli ba filolo naku bantu bonse ababa mu ncingo shonse isha mfumu Ashuerushi. ¹⁷ Pakuti ngu mulandu waku mukolo wakwishibikwa na ku banakashi bonse. Cakulenga balokucita ku balalume babo iminsula. Balokulabila ati, 'Imfumu Ashuerushi katuma abakuleta Bashti mukolo ukwisa kuli ye, lelo alikene.' ¹⁸ Apo nkano kasuba takangawa bonse abanakashi abacindeme aba ku Pesia na Media abomfwileko ngu mulandu waku mukolo balokulabila fimo fyenka kuli bonse ba filolo ba mfumu. Ninshi iminsula no bukali fyakuseeka. ¹⁹ Kani cikosekesha imfumu, kakufume ilamuno ku mfumu, nalyo lilembwe na mu fipope fya bena Pesia na bena Media, ili takalulwepo, ukweba ati Bashti takesepo nakabili ku cinso ca mfumu. Lekeni imfumu ipele bu mukolo ku muntu umbi uumucilile ukuwama. ²⁰ Ulo ilamuno lya mfumu lyakwishibwa mu ncingo shonse umwakulila ubufumu, bonse abanakashi ba lokucindika abalume babo, ukutampila ku bakulu sana ukufika ku bacepeshepo." ²¹ Imfumu na bafilolo baiko kabasekela pali nku kucinkulwa, ne mfumu kaicita fyenka ifi Memukani alabile. ²² Katuma ba kalata ku ncingo shonse isha bufumu, ku ncingo ne ncingo mu milembele yabo, naku bantu na bantu mu mulaka wabo. Kapingula ati umwalalume onse alingile ukuba umukulu waba mu nanda yakwe. Nci cipope kacipelwa mu milaka ya cina bantu ukufika umwapelele ubufumu.