¹ Teu me, meu katampa runrumi keu ngana Uso ngana Karauso Lesing , I uso palle la uru pe ngana me la Mali Saena. Mangina te meu kampe veng pe ngana la keu ngana nama yare tatao ve meu kapul tolo meu la keu ngana ulutu ngana me. ² Vei me keu ngana tena kavetul pekolo ve pateuve von gaul la kamana vanna, i teu la ngallo la ulongo keke kameu kana vale. Vei me marasuna tena, kavenga tul ke matantare ve tal toto, i teu la ngallo ulungo keke kana vale kena. ³ Arung meu kave veng pe ngana la keu ngana nama kavetul ke pekolo rumanna te meu kapele la i me,"One kwatu te komotong la motoning nei,"te arung me meu kapele la marasuna me,"One komesi laka ko,"o "one komotong ngape maa parang la keu." ⁴ Meu kave veng kana mata nei,vei me meu kakaillia keu ngana me veng kare la lomeu matana ngana. ⁵ Teu me, meu kata. Keu ngana me kemoton marasuna la keu ngana ngape maa matare, Nutu tampo kalare rong te kitutu pe palle mana rumanna la veng ve tampa runrum kare. Ngailia I pele to me, keu ngana nama kemate palle ke I rumanna, I pulre ngallo la mali ke. Mokoi te I tampo kale marasuna me rong me kela kitu ngallo mali nane. ⁶ Meu kapa valeng alle marasuna nane me. Lomeu matane. Itia vointa meu te ulle maena ngana la meu te taupa meu kala la turu ngapa? Mani tamana me mana nama kempe veng nei. ⁷ Nutu pule Karauso yana pe ngana la meu te itia pele nanne ya nei? Iri mani tamana me mana. ⁸ Nutu I taive kita te la I buk ke, I tuni potong tena la ita te pele me,"One ma komate palle ke keu ngana tena toto me one komate palle ke one som. Vei me meu kanane potong nei rumanna te kave veng pe ngana". ⁹ Vei me meu kave veng pengana la keu ngana tena ve kapul tolo meu la tena toto, euve meu kave sereng. Te potong nei paenana me meu keu ngana nama kampei susunke potong me rorol mana. ¹⁰ Vei me keu ngana tena nanne potong me rorol mana, ve i vei susunke potong kena mana, euve i kana veng puna rong. Munna kena mana me keu ngana nama vei susunke potong me rorol mana. ¹¹ Ita lora matane, Nutu pele me,"Meu leng kina me, meu sao me kampe panga lelei pallu lutu."I pele vole me,"Meu sao me kaval lia keu ngana te mate".Vei me one kove panga lelei sao ulave koval lia keu ngana tena mate, euve one kulisi keu ngana nama empei susunke potong. ¹² Meu lomeu matana kole nei. Nutu lona mantana ke potong nei te pamate sereng likina te vei ita tattu ulutu. I kaillia veng kameu, mangina te saelle meu ma kampe kao mata mata ve keu ngana veng ke ngape potong nei. ¹³ Vei me keu ngana tena lona pun ke iri naa me kala, euve votaena nama Nutu kaillia i la turu ngapa, Nutu lona palle ke i sao.Ulave keu ngana nama lolonna ke keu ngana naa me, i mua tote turu ngapa. ¹⁴ Teu me, vei me keu ngana tena pele me,"Au atampa runrumi Karauso."Ulave i sao me empe veng pe ngana, euve i tampa runrum ke ulutu mana. Arung lave tampa runrum kana mata nei valto la rae i te mule? Sao rumanna. ¹⁵ Vei me teira kiristen tena o lirapeu tena malenga ke matan tare ve i kana kaning sao, ¹⁶ akameu tena pele la i me,"One komonton te lom yate. Kola kwinne malenga te tangale vengam. Korae kaning te kokanne te komaul."Kao kana mata nei pupu kale i mantia? Meu someu ma kaunni malenga ve kaning ne empe vengana pepe. ¹⁷ Tampa runrum kana veng i mangina mana. Vei me tampa runrum tu ullutu te i sao me pamale veng pe ngana la keu ngana nama tampa runrum motoning ke sao. Euve tampa runrum ke kengana sao. ¹⁸ Arung keu ngana tena pele me,"Keu ngana panrae ketampa runrum, ve keu ngana panrae kempe veng pe ngana."Au amate me atal kolia kao nane me,"Vei me one kotampa runrum ve kompe veng pe ngana kena, mantia ne au avalto me lou matane tampa runrum kone? Au ampe veng pe ngana te nei mokoi, pae nane one ke tampa runrum kou." ¹⁹ One kotampa runrum me Nutu kasena mana tutu. I pe palle.Kannu tal ngana vei me iri kena ketampa runrum mangina te iri kivulo tonton. ²⁰ Nako, vei me one kotampa runrum mana ve kove veng pe ngana tena sao. Euve tampa runrum kone kengana sao. Arung me one komate me lomatane kao nei puna. ²¹ Ngailia nia sura Abaram pamotongia Aisak la peta te tuni i lala Nutu me tunung kama. Mangina te la votaena nane, Nutu kele i veng ke te patae i me keu ngana pe ngana. ²² Lom matane pekolo. Abaram tampa runrum ke ve veng ke pe ngana, urua tare pal mana. Veng ke pe ngana valto mane tampa runrum ke. ²³ Nutu buk ke pele me,"Abaram tampa runrumi Nutu te Nutu patae i me keu ngana pe ngana."Nutu patae Abaram me,"Au tulou".Kao puna nei Nutu veiya te iri kepasia la I buk ke. I lisi malla la veng nei Abaram veiya la Aisak. ²⁴ Sonrou meu lomeu matane, la tampa runrum ulutu ngana mana, Nutu pame patae keu ngana me i keu ngana pe ngana.Sao nia. I lona matane keu ngana empe veng pe ngana, te la puna nei, I patae i me keu ngana pe ngana. ²⁵ Vei mana me kepeu panga lelei kina Rahap pakane keu ngana nama me Josua ulala re kyatu te Rahab ulala re kela la ulu tena. Mokoi te Nutu patae i me keu ngana pe ngana. ²⁶ Ita lora matane, vei me vera kana kannu sao, i mate rong. Vei mana me keu ngana tampa runrum ullutu te sao me tampa runrum ke kumania veng pe ngana kena sao. Keu ngana nane tampa runrum ke vei me i mate rong .