¹ Au Jems, Nutu ve Karauso Lesing kumang kare kaina. Au apasia songomini nei mokoi lala meu mata me tanna ngailu ve sio ngape lua la Israel. Meu nama kaka patalia mali kameu puna te kala katu la mali tena toto. Kae ngalua ngana la meu. ² Teu me, veime tovonga kana mata mata lisi la meu, lomeu matana me, i uru ingaru kana mana. ³ Meu lomeu matane uru tena lisi me tove tampa rurum kameu, i empei popotia veng nama tamesi tapapang te tangate maena ngana . ⁴ Saelle mana meu ma kamesi pang pang te kangate maena ngana, ngala ma veng nei mokoi lisi pang pang rumanna la meu. Mokoi nama meu katu pekolo ,ngala ma Nutu veng ke tena pame sanrae la meu sao. Sao nia. Veng kameu nge pekolo te pe rorol mana. ⁵ Vei me keu ngana tena ngalua la meu kana lomatana pe ngana sao, i ma ulokeng ke la Nutu te tuni lomatana la i, nama Nutu tuni la i.Nutu unni uru pepesa la keu ngana nama tali la I. ⁶ Keu ngana nama tampa runrum rumanna te ulo kengke la Nutu , i sao me kansalapi tampa runrum ansuna vole ve pele me,"Arung la ve Nutu tuni uru nei la au, o sao?" Ka keu ngana kana lona matana lua, i vei me peleu allo inte te lisi. ⁷ Keu ngana kana mata nei, i sao me lona matana me Nutu tuni uru tena la i. Sao. ⁸ Keu ngana nane lona matana vasan sana, te la veng rorol mana nama i empei, i sao me nanne ulu kena mana. ⁹ Vei me teira kiristen tena i marasuna,i iruru ka, la Nutu matana kanna, i yana uso palle. ¹⁰ Keu ngana nama kana uru pepesa, i iruru. La votaena nama Nutu rau sia yana, ka keu ngana nane me kemate palle me kipumpi vang tutuna pepesa ve uru me kala. Iri nge kekalil me pailil rola ngana. ¹¹ Ita lora matana, votaena nama sina lisi, i milang karisi te veiya pailil me kepopo rorol mana. Pailil rola ngana me kekan salapu te kave ngatul kare pe ngana sanrae rorol mana. Vei mana me keu ngana nama kana uru pepesa, i nge mate la votaena nama i sona tutu ke tale ne empe kumang kana mata mata nama i empe. ¹² Keu ngana mensi pang pang te ngate maena ngana la tovoa rorol mana,i ma iruru. Vei me i muo tote tovoa me rorol mana. Nutu tuni motoning la i nama tutu pekolo saelle, vei me i kilipu ke. Nutu pele rong me unni kilipu nei la keu ngana me rorol mana nama kemate palle ke i rumanna. ¹³ Vei me uru tena lopae keu ngana tena lona onna me empe sereng. I sao me pele me,"Nutu taupe au me ampe veng nei."Sao.Sereng pame taupe Nutu sao, te Nutu sao me taupe keu ngana la empei sereng ke. ¹⁴ Ulave ita kena kena lora onna loi te tauve ita.Lora matana tal ngana mana vei kolikoli ita te pasiling kala ita, te lora loi me tampe sereng. ¹⁵ Veng nama lora loi ngana, vei me kepeu sana ngana.Ngarume i empei sereng vei me kepeu linge tuna. Te votaena nama sereng lisi uso palle, I vei potia mateng. ¹⁶ Teu me,pesao te meu kataltu ke veng nei ka pasiling kala meu. ¹⁷ Uru pe ngana me rorol mana ita tararae ve tunung kama me pekolo,i rorol mana kemanan la Mali Saena. Tamara veiya lamang me rorol mana la tava.I ulalle uru nei kala sisio atatu la ita. Tamara nei sao me patatapi veng ke. I sao me veime uru tena kannuna sina veiya te lisi, i la vanrung te ngarume i la kapu muni sao. ¹⁸ La I sona matana ngana, I lisi me Tamara. I veiya ita talisi la ya kaona rumanna ngana nama ita tattu vei me iri nama kimua la kepeu tamane me urume rorol mana I veiya. ¹⁹ Teu rumanna ngana me, meu ma lomeu matana kole uru nane. Meu rorol mana ma kaullia longa meu tamonoi te katatae kao, ve meu saome kampe kao tamonoi, te meu sao me lomeu la la i tamonoi. ²⁰ Ka, keu ngana lona lalal ngana pa me pa potia Nutu veng ke pe ngana sao. ²¹ Mangina ne veng mukumuku ngana ve veng tal ngana me rorol mana kilisi te ansuna, nane meu ma kakan sallapi.Te meu ma katu yateng te karae kao nei Nutu twaeya la kapa meu. Kao nei valto la rau mule kannu meu. ²² Ulave kao nei meu karae, meu ma kananne. Meu sao me kata ulutu mane. Sao .Meu kata ulutu mane, euve meu kapa siling kala meu mana. ²³ Vei me keu ngana tena taa mane Nutu kaona ve i sao me nane, vei me keu ngana kele ramana la silong. ²⁴ I kele i sona ramana, i la te tamonoi mana lona matana sanrae ve lona matana mule ramana sao te vei mantia. ²⁵ Potong nei mokoi pamate sereng likina te vei ita tattu ulutu, i toro rorol mana.Te keu ngana tena kela masia potong nei pekolo ve nane kana kao rumanna. Ve i sao me taa uluti ve lona matana mule tamonoi sao. ²⁶ Vei me keu ngana tena lona matana me,"Au kiristen pe ngana te au aulo kengke la Nutu."Ulave i taltu ke kao sisina ngana sao. I sona pasiling alla i. Te tampa runrum ke ve ulonga keke ke raena sao. ²⁷ Veng kiristen kana tu toro rorol mana te sao me votaena vanrung ngana la tamara Nutu matana kanna, vei mokoi. Ita ma lora mantane ansingare me,nama tamare me kemate rong ,ve kepeu me nama lere tare me kemate rong. Ita ma tangate allau re ke veng kare maena ngana. Uru tena vole,ita sora ma takela masia loang kita, ngalama veng nama maa nei kana pame vei ita talisi muku muku la Nutu matana kanna.