¹ I tahoka tara bakovi i made a rana e Nikodimas,ia tara Farisi a mugamuga na maka Juda. ² Ra bakovi iea ia i valai ne Isu na rodo tara ia i taki maea e Isu,"Viridagi,mia mi lohoka maea ioe tara vinara,Deo i rudu valai ioe,mia mi matakilala na maka maki ioe o rata a bakovi kama i kara ni rata pali re Deo kama i made turana." ³ Isu i koli mule maea a ngavane Nikodimas,"Muholi hateka iau a takoe,pali ra bakovi kama ge bele karaba,ia kama i kara ni dili na harikinga ne Deo." ⁴ Lakea e Nikodimas i nana maea ia,"Ge navai a bakovi ge gele karaba tabu,na tahuna ia i dagi pali?Ge kara ni dili tabu na tamudine kinana ge poda tabu,e?" ⁵ Lakea e Isu i taki maea ia,"Muholi hateka iau a taki ioe,bakovi kama ge bele karaba na naru na spirit,ia kama ge dili na harikianga ne Deo. ⁶ Ara maki i vakabele a kakaine teu,ia a kakaina,ara maki i vakabele a Spirit ia ne vona Spirit. ⁷ Nahani turutu hale vona ngava iau a taki maea ioe vona,'Mu bele karaba tabu.' ⁸ Vilu ia i lohoka vona hini bari ngaru ni lakea vona;ioe o longoa nanina,pali ioe kama o lohoka vona ia i valai maea vai ia i ngaru ni lokovai.Ia i manga kunana a bakovi erei bari bele karaba pololilo na Spirit." ⁹ Lakea e Nikodimas i koli i taki maea,"Ra maki iea ge bele muholi navai?" ¹⁰ Lakea e Isu i kolia ngavana,"Ioe tara vinara na maka tara iea o Israel,pali navai kama o lohoka vona ra maki iau a tata vona." ¹¹ Muholi hateka iau a taki ioe,mia mi tata na maki mi lohoka kamumu vona,mia mi tata na maki mi matai.Pali mua kama mu luhoitora vona ara maki mi taki mua vona. ¹² Pali re mua kama mu luhoitora, vona maka maki na malala iau a taki mua mugu luhoitora navai vona maka maki na hunu,iau a taki ioe vona? ¹³ I uka tara bakovi ge sike na hunu pali bakovi erei i puru valai na hunu ia a tuna bakovi. ¹⁴ Pali hosi e Moses i bole rikea mata na tanga tavula i kere,na naro i palupu kunana bara ri kavurikea Tuna Bakovi, ¹⁵ Mavonga maka bakovi a ngatavine erei ri luhoitora ria bara ri bolea ni made mahuri vakaroro vakaroro. ¹⁶ Deo i ngaru hateka maka bakovi a ngatavine vona malala iea,lakea i habia e tuna i taku kunana,pali erei a bakovi i luhoitora vona kama ge velu uka ia bari bole a ni mahuri vakaroro vakaroro. ¹⁷ Deo kama i rudu vilia na malala e Tuna ge luhoikado e hurika bakovi a ngatavine,uka ia i valai ni bole mule ria. ¹⁸ Bakovi i luhoitora ne Tune Deo kama ge kara ni velu,pali a bakovi kama i luhoitora vona ia i velu pali,na rana kama i luhoitora vona rana ra koma i taku e Tune Deo. ¹⁹ Lakea a vuhuna na ni luhoikado i maea:Ni para i puru valai vona malala iea pali maka bakovi ri ngaru hatekea a uvo kama ri ngarua ni para na rana narone ria i hale. ²⁰ Maka bakovi ri kara ni rata naro hale ri koi na ni para kama ri ngaru ni valai na ni para,na rana ri marikoi vona naro hale ne ria ge bele kavakava. ²¹ Pali,maka bakovi ri rata naro i muholi ria ri kara ni valai na ni para pali e huriki ranga bari matai bara ri lohoka maea ria ri ramai a ni ngaru ne Deo." ²² Muri na maka maki nga i bele,Isu turana maka murimuri vona ri lakea na tabekene Judia.Ia i made turane ria i baptaisim maka bakovi a ngatavine. ²³ Lakea e Jon tara i leho ni baptaisim maka bakovi na tanga iea o Ainon tabukoi iea o Salim a vuhuna i tahoka naru i kupo vona hini nga.Maka bakovi a ngatavine ri valai vona ri bole a baptais, ²⁴ Na tahuna iea e Jon kama i lakea ma na bavi. ²⁵ Ngane i tahoka ni ta vagege i bele na palana maka murimuri e Jon tara bakovi iea o Juda na naro ni hilolo ni matapado. ²⁶ Ri pesirike ri lakea ne Jon ri takia,"Vinara,bakovi erei i made turamu na tabekena naru e Jodan,lakea ioe o takia ne mia,ia i leho ni baptaisim hurika bakovi a ngatavine lakea maka bakovi a ngatavine ri lakea vona." ²⁷ Jon i koli mule maea ngava,"Bakovi kama i kara ni bolena tara maki pali re Deo na hunu kama ge habia vona. ²⁸ Mua kunana mu lohoka vona ara ngava iau a taki mua,"Iau a taki maea mua,' kama Iau e Kristo,'pali iau a taki maea mua,'iau a valai muga vona." ²⁹ Bakovi erei i parani.Ia kunana a girihina ngatavine,pali a turana bakovi iea i parani i pesi i vonu turana ni vivi ni longona ngava na bakovi i ngaru parani.Ra hini nga i ratea tamudigu iau a vonu turana ni vivi. ³⁰ A rana ge bele dagi hateka,a ragu ge makali puru. ³¹ Bakovi erei i valai na hunu.Ia i rede maka bakovi lobo,lakea erei a bakovi na malala,ia na malala,pali ia i kara ni ta kunana na maki na malala.Bakovi erei i valai na hunu ia i made polomeli na maka bakovi lobo. ³² Ia i kara ni takitala maka maki ia i longo i matai,pali i uka bakovi ge luhoitora na maka ngava i rata. ³³ Pali a bakovi erei i luhoitora na ngava ia i takitala maea Deo i muholi hateka. ³⁴ Mavonga ra bakovi i rudu vilia e Deo ia i takitala ngavane Deo.Na rana e Deo i habia vona Spirit i vonu hateka vona. ³⁵ Tamana i ngaru hatekea Koma i habi lobo na limana maka maki. ³⁶ Bakovi i luhoitora ne Tune Deo,ia bari bolea ni mahuri i tabuli vakaroro vakaroro,pali a bakovi i longotaro e Tuna,ia kama ge bole a ni mahuri.Uka,ni hate kapupu ne Deo bari tabuli vona."