¹ No kasta ngarud adda pannakapabileg kenni Kristo. No kasta ngarud adda liwliwa manipud iti ayatna. No kasta ngarud adda pannakikadua iti Espiritu. No kasta ngarud adda kaasi ken pannakipagrikna. ² An-anayenyo ti rag-ok babaen iti panangipadayo iti panunotyo, nga addaan iti isu met laeng nga ayat, nga agkaykaysa iti espiritu, ken addaan iti isu met laeng a panggep. ³ Awan koma ti banag nga aramidenyo a maigapu iti kinaagum wenno awan serserbina a kapanunotan. Ngem ketdi, sipapakumbabakayo a mangibilang a nasaysayaat dagiti dadduma ngem kadakayo. ⁴ Saan koma a dagiti bukodyo a pakasapulan ti ipangpangrunayo, ngem kitaenyo met ti pakasapulan dagiti dadduma. ⁵ Agpanunotkayo iti wagas a kas kenni Kristo Jesus. ⁶ Isuna ket Dios, ngem saanna nga imbilang a masapul a mabigbig ti kina-Diosna. ⁷ Ngem ketdi, awan imbatina iti bagina. Nagbalin a kasla adipen, naiyanak isuna a kas tao. Nagparang isuna a kalanglanga ti tao. ⁸ Impakumbabana ti bagina ken nagbalin a natulnog inggana iti patay, ti ipapatay iti krus. ⁹ Ngarud, intan-ok met laeng isuna ti Dios. Intedna kenkuana ti nagan a kangatoan iti amin a nagan. ¹⁰ Inaramidna daytoy tapno babaen iti nagan ni Jesus, tunggal tumeng ket rumbeng nga agparintumeng, dagiti adda idiay langit ken ditoy rabaw ti daga ken iti uneg iti daga. ¹¹ Ken amin a dila ket ipudnoda a ni Jesu-Kristo ket Apo, para iti pakaidayawan ti Dios Ama. ¹² Ngarud, kadakayo nga ay-ayatek, kas iti kanayon a panagtulnogyo, saan laeng nga iti kaaddak ngem ad-adda pay ita iti kaawanko, itultuloyyo nga itrabaho iti bukodyo a pannakaisalakan nga adaan iti panagbuteng ken panagpigerger. ¹³ Ta ti Dios ti agtigtignay kadakayo iti tarigagay ken aramidyo para iti pakaragsakanna. ¹⁴ Aramidenyo amin a banbanag nga awan iti panagreklamo wenno panagriri. ¹⁵ Agtignaykayo iti daytoy a wagas tapno agbalinkayo nga awan ti pakababalawanna ken napudno nga annak ti Dios nga awan pakapilawanna. Agtignaykayo iti kastoy a wagas tapno agraniagkayo a kas silsilaw iti lubong, iti tengnga ti nakillo ken dakes unay a henerasion. ¹⁶ Kumpetkayo a naimbag iti sao ti biag tapno maaddaanak iti rason nga agragsak iti aldaw ni Kristo. Ta no kasta ti mapasamak, ammokto a saanak a nagtaray nga awan mamaayna wenno nagtrabaho nga awan serserbina. ¹⁷ Ngem uray no maiparukpokak a kas sagut iti daton ken panagserbi iti pammatiyo, agragsakak, ken makipagragsakak kadakayo amin. ¹⁸ Iti kasta met laeng a wagas, agrag-okayo met, ken makipagrag-okayo met kaniak. ¹⁹ Ngem mangnamnamaak kenni Apo Jesus nga ibaonna ni Timoteo kadakayo iti mabiit, tapno mapabilegak met inton maammoak dagiti banbanag a maipapan kadakayo. ²⁰ Ta awanen ti sabali pay nga adda kaniak a kas kenkuana iti kababalin, a pudno a madanagan para kadakayo. ²¹ Ta sapulenda amin dagiti bukodda a pagragsakan, saan a dagiti banbanag ni Jesu-Kristo. ²² Ngem ammoyo iti pategna, gapu ta kas iti panagserbi ti maysa nga anak iti amana, nagserbi met isuna a kaduak iti ebanghelio. ²³ Isu a namnamaek a maibaon isuna iti mabiit apaman a makitak no ania ti mapasamak iti masakbayan. ²⁴ Ngem natalgedak iti Apo a siak a mismo ket makaumay met iti mabiit. ²⁵ Ngem panpanunotek a masapul a maibaon manen ni Epafrodito kadakayo. Isuna ket kabsatko ken padak nga agserserbi ken padak a soldado, ken mensaheroyo ken agserbi para kadagiti kasapulak. ²⁶ Ta narigatan unay isuna, ken il-iliwenna ti makikaadda koma kadakayo amin, gapu ta nangngeganyo a nagsakit isuna. ²⁷ Ta pudno unay a nakaro ti panagsakitna ket dandani isuna a natay. Ngem naasi ti Dios kenkuana, ken saan laeng nga isuna, ngem uray met kaniak, tapno saanak koma nga agladingit iti kasta unay. ²⁸ Isu nga ad-adda a magagaranak a mangibaon kenkuana, tapno inton makitayo manen isuna ket agragsakkayo ken mawayawayaanakto iti panagdanagko. ²⁹ Pasangbayenyo ni Epafrodito nga addaan iti panagrag-o iti Apo. Padayawanyo dagiti tattao a kas kenkuana. ³⁰ Ta gapu iti trabaho para kenni Kristo a dandani isuna a natay. Intulokna nga agpeggad ti biagna gapu iti panagserbina kaniak ken pinunnoanna dagiti saanyo a maaraamid iti panagserbiyo kaniak.