¹ Kamaudiananna, kakabsatko, agrag-okayo iti Apo. Para kaniak, saanko a pakadanagan ti panangisuratko manen kadagitoy isu met laeng a banbanag kadakayo. Salaknibannakayo dagitoy a banbanag. ² Agannadkayo kadagiti kasla aso. Agannadkayo kadagiti dakes nga agtrabtrabaho. Agannadkayo kadagiti mangputputed iti tulang. ³ Ta datayo ti pannakakugit. Datayo nga agdaydayaw babaen iti Espiritu ti Dios. Datayo a mangipanpannakkel kenni Kristo Jesus, ken saan nga agtaltalek iti lasag. ⁴ Nupay kasta, mabalin nga agtalekak iti lasag. No adda man ti mangpanpanunot a mabalinna ti agtalek iti lasag, ad-adda pay kaniak. ⁵ Nakugitak iti maikawalo nga aldaw, kamengak ti tattao ti Israel, iti tribu ni Benjamin, maysaak a Hebreo kadagiti Hebreo; ket no maipanggep iti linteg, maysaak a Fariseo. ⁶ Napasnekak a nangidadanes iti Iglesia. No maipanggep iti kinalinteg ti linteg, awan pakapilawak. ⁷ Ngem aniaman a banbanag a makaited iti gunggona kaniak, imbilangko dagidiay a pukaw gapu kenni Kristo. ⁸ Kinapudnona, imbilangko itan amin a banbanag a pukaw gapu iti kinangato ti pannakaammo kenni Kristo Jesus nga Apok. Para kenkuana inikkatko amin a banbanag. Imbilangko dagidiay a rugit tapno magun-odko ni Kristo. ⁹ ken makipagkaykaysaak kenkuana. Awanen ti bukodko a kinalinteg a magun-od babaen iti panangtungpal iti linteg. Ngem ketdi, addaanak iti kinalinteg babaen iti pammati kenni Kristo, ti kinalinteg a nagtaud iti Dios a naibasar iti pammati. ¹⁰ Isu nga ita kayatko a maam-ammo isuna ken ti pannakabalin iti panagungarna ken ti pannakikaddua kadagiti panagsagabana. Kayatko a mabalbaliwan iti wagas a kapada ti pannakatayna, ¹¹ tapno uray kaskasano, mapadasak ti panagungar manipud iti patay. ¹² Saan a pudno a naawatkon dagitoy a banbanag, wenno nagbalinakon a naan-anay. Ngem ar-aramidek amin a kabaelak tapno magun-odko ti makagapu a pinagbalinnak ni Kristo Jesus a kukuana. ¹³ Kakabsat, saanko a panpanunoten a nagun-odkon daytoy. Ngem maysa a banag ti aramidek: lipatek no ania ti napalabas ken agsalukagak para iti masangoanan. ¹⁴ Ituloyko ti agturong iti pagpatinggaan tapno magun-odko ti gunggona iti nainlangitan nga ayab ti Dios babaen kenni Kristo Jesus. ¹⁵ Datayo amin a nataengan, agpanunottayo iti kastoy a wagas. Ket no sabali ti adda iti panunotyo maipanggep iti aniaman a banag, ipakaammonto met laeng ti Dios dayta kadakayo. ¹⁶ Nupay kasta, aniaman a nadanontayo, saantayo nga umibbat iti daytoy. ¹⁷ Tuladendak kakabsatko. Kitaenyo a naimbag dagiti magmagna babaen kadagiti pagwadan a nakitayo kadakami. ¹⁸ Adu dagiti magmagna-- isuda dagiti masansanko nga ibagbaga kadakayo, ket ita, aglulua-ak a mangibagbaga kadakakayo—nga isuda dagiti kabusor ti krus ni Kristo. ¹⁹ Ti pagbanaganda ket pannakadadael. Ta ti diosda ket ti tianda, ken ipanpannakkelda dagiti nakababain nga aramidda. Dagiti nainlubongan a banbanag ti panpanunotenda. ²⁰ Ngem umilitayo iti langit, a paggapuan ti ur-urayentayo a mangisalakan kadatayo, a ni Apo Jesu-Kristo. ²¹ Baliwannanto dagiti nanumo a bagitayo iti bagi a kalanglanga ti nadayag a bagina, a naaramid babaen iti bileg ti pannakabalinna tapno iturayanna amin a banbanag.