¹ Da Pablo ken Timoteo, nga adipen ni Kristo Jesus, kadagiti amin a nasantoan a tattao ti Dios nga adda ken ni Kristo Jesus nga adda dita Filipos, agraman dagiti manangaywan ken dagiti diakono. ² Parabur ken kappia manipud iti Dios nga Amatayo ken manipud kenni Apo Jesu-Kristo ti adda koma kadakayo. ³ Agyamyamanak iti Diosko tunggal malaglagipkayo. ⁴ Kanayon a para kadakayo amin ti tunggal kararagko, nga addaan rag-o iti panagkararagko. ⁵ Gapu iti pannakikaduayo iti ebanghelio manipud idi immuna nga aldaw agingga ita. ⁶ Masiguradok iti daytoy a banag, nga isuna a nangirugi iti naimbag nga aramid kadakayo ket itultuloyna a leppasen daytoy agingga iti aldaw ni Jesu-Kristo. ⁷ Rumbeng a makariknaak iti kastoy maipanggep kadakayo amin gapu ta addakayo ditoy pusok. Nagbalinkayo amin a kaduak iti parabur iti pannakaibaludko ken iti panangikalintegak ken panangpatpatalged iti ebanghelio. ⁸ Ta saksik ti Dios, no kasano ti iliwko kadakayo amin iti kinauneg ti ayat ni Jesu-Kristo. ⁹ Ket kastoy ti ikarkararagko: a ti ayatyo ket manayonan pay koma babaen iti pannakaammo ken amin a pannakaawat ¹⁰ tapno mabalinyo nga anamongan ti naimbag, ket iti kasta agbalinkayo a napasnek ken awan pakababalawanna agingga iti aldaw ni Kristo , ¹¹ a napnoan iti bunga ti kinalinteg nga umay babaen kenni Jesu-Kristo a napno iti dayag ken pannakaidaydayaw ti Dios. ¹² Ita kakabsat, kayatko a maammoanyo, a napasamak kaniak ket talaga a nagserbi a nagparang-ay iti ebanghelio. ¹³ Kas resultana, nagbalin a silaw dagiti kawarko ken Kristo iti intero a sibubukel a guardia ti palasio ken iti tumunggal maysa. ¹⁴ Ket ad-adda ti panagtalek ti kaaduan kadagiti kakabsat iti Apo gapu kadagiti kawarko, ken addaanda iti tured a mangikasaba iti sao nga awan butengda. ¹⁵ Pudno nga iwarwaragawag dagiti dadduma ti maipanggep kenni Kristo gapu iti apal ken tapno maartapanda dagiti dadduma, ken dagiti met dadduma ket gapu iti naimbag a nakem. ¹⁶ Dagiti tattao a nangiwaragawag kenni Kristo gapu iti ayat ket ammoda a naiyapanak ditoy gapu iti panangisakitko iti ebanghelio. ¹⁷ Ngem iwaragawag dagiti dadduma ni Kristo gapu iti kinamanagimbubukod ken saan a napudno a panggep. Pagarupenda nga agar-aramidda iti pakariribukak bayat iti pannakaikawarko. ¹⁸ Ania koma ita? Aniaman a wagas, uray no iti panaginkukuna wenno kinapudno, ni Kristo ket naiwaragawag ket maragsakanak iti daytoy! Wen, maragsakanak. ¹⁹ Ta ammok nga agbanagto daytoy iti pannakawayawayak. Mapasamakto daytoy gapu kadagiti kararagyo ken iti tulong ti Espiritu ni Jesu-Kristo. ²⁰ Daytoy ket segun iti natalged a panangnamnamak ken kinapudno a saanakto a mabainan. Ngem ketdi, iti amin a kinatured, a kas iti napalpalabas ken uray ita. Namnamaek a maitan-ok ni Kristo babaen iti bagik, uray no babaen iti biag wenno ipapatay. ²¹ Ta para kaniak, ti panagbiag ket agpaay kenni Kristo ken ti pannakatay ket gungona. ²² Ngem no kayatko ti agbiag iti lasag, kaipapanan dayta ti nabunga a panagtrabaho para kaniak. Ania ngarud ti pilien? Saan ko nga ammo. ²³ Ta marigatanak kadagitoy a dua a pagpilian. Addaanak iti tarigagay a sumina ken makikadwa kenni Kristo, nga adayo a nasaysayaat! ²⁴ Ngem ti agtalinaed iti lasag ket ad-adda a kasapulan para iti pagimbaganyo. ²⁵ Agsipud ta natalgedak maipapan iti daytoy, ammok nga agtalinaedak ken agtultuloyak a kaduayo amin, tapno rumang-ay ken agrag-okayo iti pammati. ²⁶ Ket ti pagbanaganna, gapu iti kaaddak kadakayo ad-adda nga idaydayawyo ni Kristo Jesus gapu kaniak. ²⁷ Agbiagkayo laeng iti wagas a maikari iti ebanghelio ni Kristo. Aramidenyo dayta tapno iti kasta, umayak man a mangkita kadakayo wenno awanak, mabalin a mangngegak no kasano nga agtaktakderkayo a sititibker nga addaan iti maymaysa nga espiritu, nga addaan iti sangsangkamaysa a panunot nga mangikagumaan para iti pammati ti ebanghelio. ²⁸ Ken saanyo a pagbutngan ti aniaman a banag nga inaramid dagiti kabusoryo. Daytoy ket agbalin a pagilasinan kadakuada iti pannakadadaelda. Ngem para kadakayo, pagilasinan daytoy iti pannakaisalakanyo ken daytoy ket agtaud iti Dios. ²⁹ Ta daytoy ket naited kadakayo, maigapu kenni Kristo, saan laeng a tapno mamatikayo kenkuana, ngem tapno agsagabakayo pay para kenkuana. ³⁰ Ta addaankayo iti isu met laeng a panagiinnapa a kas iti nakitayo kaniak, ken ita ket mangngeganyo kaniak.