¹ Pakujinae Efrain kuikuijai, bajarapakujinae ira natjünüta. Bajaraponü Israeltalia pijakuata na ayainü ejjana, itsiata bajaraponü nanekonita Baal pematabakabüta peto nawajükabiabijjae neejjata bajaraponü tüpa. ² Juya, bajarapamonae nanekonita bitso. Bajarapamonae kopai javaanüta pejumapiianü ejjana pija palataanüta, jjaniavaetsia nakuneba, artesano penakuenebijavaanü. Jivi baraakuikuijaitsi ma jumaitsije: "Ma papebijivi baka bevije baka nakuetonü upi tsustuba. ³ Bajarapamonae be bajayakunua pija itarürübo tsane, be dono aajena matakabijitsia ba nayoba, be poona jovibo pekaputsi javatsi tajü pekakiatsijavatsi, pakuenia ütsüjjü ba kaeka. ⁴ Itsiata jjanü Petuujjanenünü pija Diosonü Egipto iratalia.Akuenebi itsa dioso panejume kowünütsijava jjanü sayabaja; pajjamü kaajena jjanü vekua, ajibi itsanü papekapanepaenü. ⁵ Jjanü tajeta wayapjota paka tanetsi, ayaikuene petsevi irata. ⁶ Pakujinae poona pajjainame, neejjanata pajjamü papeniame, pajamatabü ütjü natsipaebame. Bajarajjuijitsia panenakopjünütame. ⁷ JJanü be leon kuenia bajarapamonae tsita naitotjianaenajû; be newütjü penayakibinü, Jjanü namutua naitajjutokaevetsianajû. ⁸ Jjanü tsiyajematabianajû pakuenia Oso pekojji pitsinütsi. jjanü müpaabi saranaenajû neejata bajarajota be leon kuenia jjaenajû, be pe aitotjianü unupijinü kuenia tupa titikaenajû. ⁹ Jjanü paka verebabenatsi, Israel;¿Jipatsa paka kapanepaena? ¹⁰ ¿Itsajota nuka papekayaa iraa evetsinü, bajaraponü tsaja kapanepa papekapanepaeja dajjita tomaraanüjava? ¿De jota jane papekamata kanubenaevi nubena, pamonae yaabara jjanü panejumaitsimü: pataneyaa iraa nakua evetsinü panerajure petujjanenü? ¹¹ Jjanü paka rajutatsi taka anaya papekaya ira evetsinü neejja ikatsia jutajû. ¹² Pebisiakuene Efrain pe ejjanaejava to ayaijavatsi; pija neekoni to ayaijavatsi. ¹³ be pe ejjanae tane to patsianatsi, itsiata bajaraponü apo pe natsiwajünae livaisi yapütaenü, penaejjanae matakabi tsane, bajaraponü pekototovereka apo pitsapaetsane. ¹⁴ ¿Kapanepaenajû bajarapamonae seol pekobe velia?¿Kapanepaenajû tsaja bajarapamonae petüpae javavelia?¿Itsajota nukame, netüpaenü, nija peyatüpae Domae?¿Itsajota, seol, nuka neverebabe kuene? Peyapütae livaisi jjanü vekua namatayaba. ¹⁵ Abajjü pematapijivi tuatuajuta Efrain kobekovü navitsi ata, jovibo este veerena najetarukaena; Petuujjanenü pejovibo najetarukaena tajeta tusatoveerena pija meramütjüaanü mera apo jjainae tsane. Pekueyavi yaküjüribianatsi kae penamatamotsi ibotoonü. ¹⁶ Samaria raja nanekonitsiana, bajarapowa pija Dioso baraa anaeta. Bajarapamonae otjopaena espada barüta; tsikirinakuetojji to verebabenatsi tupa titikaenatsi pe to nakojjitsivaanatsi to tupa titibabenatsi.