¹ Jainxon Dios rabiti xobonkoniax pikotax Jesus kaitian, westiora jaomea onanaitonin yoiya iki: "¡ Axeamis, oinwe nato jakoinra makanbo itan jakon-ira ani xobobo!" ² Jan yoiya iki, "¿Min oina nato ani xobobo?" jainoara baneyamai westiora makanbi, jatibira ras iki kai". ³ Jainoax Olivos manaman yakata iki, Dios rabiti xobo bekeiba, Pedro, Santiago, Juan itan Andres, jainxon jatonbicho yokakana iki. ⁴ "Noa yoiwe, ¿Jawetianki jaskarabo winoti iki?, ¿Jawe keska jawekibo ikai oinxonki non onanti iki? ⁵ Jatian Jesussen peokin jato yoiya, mato tsonbi paranyamano koiramekanwe. ⁶ Nokon janenkora icha benonxikanai, "eariki ja iki, jaskaaxon icha parannoxikanai. ⁷ Reteanankanaibo ninkatax itan reteanantiresbo ninkatax tsokasyamanoxikanwe; jaskarabora iti jake, ikaxbira nete senenamapari iti iki. ⁸ Jainoaxibira nato maimeabetan wetsa maimeabo reteananoxikanai, jainoax apobo wetsa apobobetan reteananoxikanai. Wetsankobora niwannoxiki itan pitin inonxikanai. Natabora inonxiki chexakati netebo peokatai. ⁹ Koiramekanwe, matora joni koshiboiba bononxikanai, itan jain Diosen joi ninkati xobonkoxonra mato rishkinonxikanai. Ea kopira mato joni koshiboiba itan apoboiba bononxikanai nokon joi yoino ixon. ¹⁰ Ikaxbi Diosen joira yoikana iti jake jatibi mainkobo. ¹¹ Jaskakin mato yatanxon bokona, tsokasyamanoxikanwe, jawerakimein en jato yoiti iki ikax. Jainoara mato Diosen ochaoma shinanman meniti iki jaskati yoyo iti, matora, yoyo itima iki. ¹² Jainxon jawen wetsanbi yatamaxon jaton wetsabi retemanonxiki, itan papan jawen bakebi. Bakebaonribi yoitimaxon jaton papabi jato retemanonxiki. ¹³ Nokon jane kopira mato omis-nonxikanai. Ikaxbi jawerato joniki ekikoshii jeneyamai, jara kishpinnoxiki. ¹⁴ Jawetianki maton oinai onis jawekiomisi wetsankobires tantikanai (yoyo axon onankawen). Judeain ikabo manaman jabamakanwen. ¹⁵ Jaoratoki xobo bochiri ika, naman pakeyamawe, jawebi xobomea tsekayamawe. ¹⁶ Jaoratoki wainko iki, jawen rakoti bii baneyamawe. ¹⁷ ¡Ja netebaon kikin noibatishoko! inonxiki ja bakeyabo itan ja xoma amaibo. ¹⁸ Jaskara iketian orankanwen jenetian jaskara winotima kopi. ¹⁹ Jatianra inonxiki masa tenetibires, Diosen nete jonianotianbi jaskara iosma, jaskara masa tenetibora ja pekao yamanoxiki. ²⁰ Ja netebo Diosen xateyamabira, tsoabi kishpintima iki, ikaxbi jan katotabo kopi nato netebo chitia iki. ²¹ Jaskara iketian, mato yoikanti iki, joinkawen nenoriki Cristo! ¡Iamax onoriki Cristo!, ja ikon ayamanoxikanwe. ²² Pikoranoxikanai ikonma cristobo itan ikonma Diosen janenko yoyo ikaibo, jabaonra anonxiki rateti jawekibo, jaskaxon paranoxikanai, ja Diosen katotabobi. ²³ Koiramekanwe, "enra mato yoike moamabi" ²⁴ Ja masa teneti netebo pekao, BARIRA YAMENOXIKI, OXENRA TENAYAMANOXIKI, ²⁵ WISHTINBORA NAIKAMEAX PAKENOXIKI, itan jatibi nai koshiabora shakonoxiki. ²⁶ Jaskaxon jabaon ionoxikanai JONIN BAKE JOAI NAI KOIMA, JAWEN KOSHI SHINANYA ITAN JAWE JATI NETEYA. ²⁷ Jainxon jan ranoxiki jawen Anjiribo, jawen katota bakebo tsinkiti, mai senenainoa itan nai senenainoa. ²⁸ Higuera oinxon onanoxikanwe; ja higo peibo manax pechokotaitian oinxon maton onanai moara baritia ochomai ixon. ²⁹ Jaskaribiakin, ja yoiya jawekibo ikai oinxon onanoxikanwe, ja joti ochoma. ³⁰ Ikonshamanra en mato yoiyai, ja jonibo jaresparikebira neskarabo iti jake. ³¹ Naibetan maira winokanai, ikaxbi nokon joira winoyamai. ³² Ikaxbi ja joti nete itan ja hora, tsonbi onanyamake; Angel baon itan, ja Bakenbira onanyamake, nokon Papanbicho. ³³ ¡Jaskara iketia koiramekanwe! oxayamakanwe, matonra ja hora onanyamake. ³⁴ Natoriki westiora jonin ochoo kakin, jawen xobo jenebainkin, jawen yonotibo teebo menibainai keska, jaskaxon yoiyai ja koiranai oxatima. ³⁵ ¡Jaskara iketian oxayamakanwe!, jawetianra ja xobo ibo jobirai, yametaitian, yame pochinikon, atapa bene keotaitian, iamax yamekiri. ³⁶ Moa jotoshixon, mato nokonake oxaabo. ³⁷ Mato en yoiyaibora en jatibi jonibo yoiyai: ¡Oxayamakanwe!