¹ ¿O numano enu sabe nu, (i ta cómbesa ku gende lo ke kunose ri lei), ke lei asé kontro la ma gende miendla ta mbiba? ² Pue mujé lo ke ta kasao atá ligao ku mailo miendla éle ta ku mbila, poro si mailo lungá, mujé kelá suetto ri lei ri matrimonio. ³ Asina ke miendl mailo ta mbibo, si mujé kuje uto mailo sendá ñamao adultera. Poro si mailo lungá, mujé kelá suetto pa kasá ku uto ombe. ⁴ Po tanto, numano mi, enú jueba muetto pa lei po merio ri kuepo ri krito, pa suto polé nda frutto pa Rioso. ⁵ Pue kuandi suto endi kanne ri pekaro ku ma pasíó pekaminosa impulsao po lei asíendo ku miemblo ri suto to lo ke ase prorusi frutto pa muette. ⁶ Poro aoro suto ta suetto ri lei, suto a lunga ri ma kusa lo ke teneba suto preso. E kusa sendá pa suto polé siribi po Epiritu i nu po merio ri letra. ⁷ ¿Ke jue lo ke suto tan kombesa?¿Lei sendá memo pekaro? Nunka sendá. Poro i poleba kunosé pekaro si nú jueba po merio ri lei. I poleba kunosé kodi sia si nu jueba pokke lei a chitia:"NU KORISIA." ⁸ Poro pekaro a kuje okasio po merio ri mandamiendo lo ke se treé lujuria pa mi, pue sin lei pejara ta muetto. ⁹ Po un tiembo i taba ku mbila sin lei, poro kuandi mandamiendo mini, pekaro a recobra mbila i ta lungá. ¹⁰ Mandamiendo lo ke e pa treé mbila a resultá muette pa mi. ¹¹ Pue pekaro a kuje okasió po merio mandamiendo i a engaña mi. Po merio ri mandamiendo i a lungá. ¹² Asina ke lei e sando, i mandamiendo e sando, jutto i gueno. ¹³ Asina ke, ¿ Lo ke e gueno a mini pa muette? ¡Ri niggú foomo! Poro pekaro pa móstrá kumo pekaro, po merio ri aggú kusa gueno, a treé muette pa mi. Asina gue ke, po merio ri mandamiendo, pekaro a mini ase pekaminoso ma aya ri lo ke pole merí. ¹⁴ Pue suto a sabe ke lei e epiritual, poro i asé kaanal. Ia se bendio kumo moso pa pekaro. ¹⁵ Pue lo ke i ta asé, i pole entendelo nu, pue lo ke i kelé asé, i pole aselo nu, i lo ke nu kelé asé jué lo i ta asé. ¹⁶ Poro si i ta asé lo ke nu kelle asé, i ta ri akuedo ku Lei, ke Lei e guena. ¹⁷ Poro aora nu senda yo memo lo ke ta aselo si nu pekaro lo ke ta bibi endi mí. ¹⁸ Pue i sabé ke, naturalesa pekaminosa mi, nuten na gueno. Pue i kele ase makusa guena, poro i polé aselo nú. ¹⁹ Pue lo gueno ke i kelé,, i polé aselo nú, poro lo malo ke i kelé nu, i ta aselo. ²⁰ Aora si i ta ase lo ke nu kelé asé, antonse nu sendá yo memo lo ke tá ase to e kusa si nu pekaro lo ta bibi endi mi. ²¹ I ta topeta ku un plinsipo endi mi ke i kelé asé lo ke agueno, poro maddá ta lendro ri mi. ²² Pue i ta ku jorocheria po lendro ri mi endi Lei ri Rioso. ²³ Po i tá guatia un plinsipio diferente endi kuepo mi, kke tá trompia ku plimé plinsipio endi mende. E kusa asé kuje mi eklabo ri plinsipio ri pekaro ke ta endi ma patte ri kuepo mi. ²⁴ ¡I senda un ombe miserable! ¿ Kien jue lo ke tan libr´´a mi ri e kuepo ri muette? ²⁵ Poro i ta nda nglasia a Rioso po merio ri Jesukrito ñño suto. Antonse yo memo ta siribi a Lei ri Rioso ku mende, poro po merio ri kanne i ta siribi al plinsipio ri pekaro.