¹ Antonse, ¿Ke suto pole chitia ri lo ke Abraam ante pasao suto a jaya ku reposto ri kanne? ² Pué si Abraam sendá juttifikao po kusa lo ke éle asé, e teneba rasón pa elogiáse, poro nu ri lande ri Rioso. ³ Pué ¿Ke jué lo ke ta krito? "ABRAAM A KREE ENDI RIOSO I JUÉ KONSIRERAA KUMO JUTTO" ⁴ Aora palo ké sé makania, salario ri éle nu sendá kon sirerao kumo regalo, si nu kumo pago. ⁵ Poro a ké lo ke sé asé na nie, akree endi aké ke sé juttikiká impió, fe ri éle senda konsirerao kumo juttisia. ⁶ Dabid tanbié asé pronunsiá, bendisió endi aké ombe lo ke Rioso asé kondá kumo jutto sin asé niggú kusa guena nú, ⁷ ele chitia:"BENDECIO SENDA AKÉ LO KÉ RIOSO ASÉ PEEDONÁ INIKIDARE, I NLA PEKARO SENDÁ TAPAO. ⁸ BENDESIÓ SENDA OMBE A KIENE ÑO NU SE KONDÁ MA PEKARO." ⁹ Antonse, ¿ E bendisió senda numá pa lo ri ma sikusisio, o tanbié pa lo ri insikusisio? Pue suto asé chitia:"FE JUE KONSIRERAO A ABRAAM KUMO JUTTISIA." ¹⁰ Asina ke, ¿Kumo jué konsirerao?¿Kuandi Abraam taba endi sikusisio o insikusió? ¹¹ Abraam a resibí seña ri sikusisió. Kumo seyo ri juttisia ri fe ke ya éle teneba kuandi taba endi insikusisió. Kumo resultao ri e seña jue ke Abraam a kombeti endi tatá ri to a ke lo ke a kree, aun kuandi ané taba endi insikusisio, pa ane tanbie senda kontao po merio ri fe kumo jutto sia. ¹² Antonse sinnifika ke tanbié Abraam a kombeti endi tatá ri sikusisio pa ke lo ke nu a mini ri sikusisio, si nu tanbié ake kíen tá sigui ma paso ri fe ri taýa suto Abraam, ante ri ke éle jueba sikusirao. ¹³ Pue plomesa lo ke jue ndao pa Abraam ku resendiente ri ele, jué pa éle sendá ererero ri mundo ke a mini nu po Lei, si nu, po merio ri fe. ¹⁴ Pue si a ke, ke tá bibi po merio ri Lei sendá ererero, antonse fe siribi nu i ma plomesa a kela kumo na. ¹⁵ Pue lei asé mini ku ira, poro aonde nu tan lei tanpoko ten resoberiesio. ¹⁶ Pue rasó e kusa asé pasá po fe, pa polé sendá po nglasia, i kumo resultao, plomesa tá aseguráo pá to ma resendiente, i nu sendá numá pa ma resendiente ke kunose lei si nu tanbié pa ake lo ke kompati fe ri Abraam. Éle senda tata ri to suto, ¹⁷ kumo ta krito:"BO SENDA CHO TATÁ RI UN CHOCÁ RI NASÍO." Abraam taba endi ple sensia ri ake endi ele ta konfiá endí Rioso lo ke ndá bila a ma muétto i sé ñamá ma kusa ke nu sendá kumo si jueba. ¹⁸ A pesá ri to ma sikutansio Abraam a konfiá endi Rioso ri futuro, asina ké, éle amini a sé tata ri chochá ri nasío, ri akueddo ka lo ke jué chitiao:"ASINA SENDÁ MA RESENDIENTE." ¹⁹ Éle nu jué endeble endi fe, Abraam a entendé ke kuepo ri ele senda incapá ri tené mona(pokke ele teneba kumo lingonaná jaño). Ele tanbié a rekonose ke matri ri Sara ase incapa ri ten moná. ^{20 21 22} Poro po kausa ri plomesa ri Rioso, Abraam nu dudá endi ikrerurirá, si nú, ke éle a fottalese endi fe, i a ndá alabansa a Rioso. Éle taba konbensio ri lo ke Rioso á plometé. Po tanto, e kusa jue kontao kumo juttisio pa éle. ²³ Aora, e kusa ke jué kontao, kumo juttisia, nu sendá krito numa pa benefisio ri ele. ²⁴ Pa benefisio ri suto, tanbié suto lo ke a kree endi ake lo ke a lebandlai ri muetto a Jesukrito ño suto. ²⁵ Éle jué entregao po ma tragresione ri suto i jue labandao pa juttifikasió ri suto.