¹ Kuandí maana miní, to má kambibante ri má sasedote y má karusiano ri terruño planeá kondla ri Jesús pa kita mbila. ² Ané a kujelo y amalalo, yebá y yebalo pa andi Pilato kamaján. ³ Antonse kuandí Judas, kiene abeba traisionalo, guatiá ke Jesús jueba kondenao, arrepentí ele gobbé má trinalingó chelín ri plata a má kambinbante ri má sasedote y karusiano, ⁴ y chitiá: "¿Ke sendá é kusa pa suto? É kusa sendá asunto ri bo." ⁵ Antonse ele a tirá má chelín ri plata endi masiruma, y a salí juela y ajokká. ⁶ Má kambibante ri má sasedote kujé má chelín ri plata y chitiá:"Sendá kaiko nú poné e kusa endi tesoro, pokke sendá presio ri pola." ⁷ Ané epepitá e kusa jundo y kú burú komplá kampo ri alfarero pa enterrá furastero endi e paraje. ⁸ Po e kusa e kampo e kunosio kumo: "Kampo ri Pola" ata agué. ⁹ Antonse lo ke sendá richo po chakero ri Rioso Jeremías a kumplí, chitiando: "ANÉ KUJÉ MÁ TRANALINGÓ CHELÍN RI PLATA, PRESTO, PO KUATO ISRAELITAS PONÉ PO ELE ¹⁰ Y NDALO PA KOMPLÁ KAMPO RI ALFARERO KUMO ÑO ABEBE NDAO REKAO." ¹¹ Antonse Jesús taba flende ri kamaján y kamaján prundá: "¿Sendá bo Takurimbo ri má Judíos?" Jesús a kontestá: "Bo chitiá." ¹² Poro kuandí ele jueba akusá po má kankamajáan ri má sasedote y má karusiano, a chitiá ná nú. ¹³ Antonse Pilato chitiá: "¿Bo tan kuchá nú to má akusasió ke a tá kondla ri bo?" ¹⁴ Poro ele chitiá niggú kusa nú , asina ke kamaján kelá kú asomblo. ¹⁵ Endi oriki sendá kotumbre ri kamaján sottá a un ombe ke tá endi tramakua ke má jende é kiene chitiá kiene kelé. ¹⁶ Endi é tiembo ané teneba un ombe endi tramakua ke a sé ñamá Barrabás. ¹⁷ Asina ke kuandí ané a jundá, Pilato chitiá: "¿Kiene ri bilingó enú kelé rejá suetto? ¿Barrabás o Jesús, ke asé ñamao Kristo? ¹⁸ Pokke ele sabeba ke ané abeba ndao a Jesús po inbiria. ¹⁹ Miendla ele taba sendao endi tabrete ri juisio, birikueta mandá rekao chitiando: "Tén nú niggú kusa ke guatiá kú é ombe inosente; pokke agué i tén sueño endi i sufrí po kuenda ei Éle." ²⁰ Asina ke má kamaján ri sasedote y má karrusiano motibá a chochá ri jende ke a tá a pirí a Barrabás y ke matá a Jesús. ²¹ Kamaján prundá: "¿Kiene ri bilingó ané kelé ke i rejá suetto?" Ané a chitiá: "A Barrabás." ²² Pilato chitiá: "¿Ke i tén ke asé kú Jesús ke asé ñamá Kristo?" To ané kotestá: "Krusifikalo." ²³ Ele chitiá: "¿Po ke, ke krime Éle tá asé? Poro ané gritá kú kutú: "Krusifikalo". ²⁴ Asina ke kuandí Pilato miná ke poleba asé kusa má nú, si nú ke to taba aborotá má, kujé apú, y labá mano sí flende ri chochá ri jende y chitiá: " I sendá inosente ri pola ri é Ombe; enú berá." ²⁵ To má jende chitiá: "Ke pola ri ele sendá endi suto y moná suto." ²⁶ Antonse ele a sottá a Barrabás, y kujé y mandá asotá a Jesús y ndá ané pa sé krusifikao. ²⁷ Antonse má soddao ri má kamaján nyebá a Jesús pa andi Pretorio y jundá a to má soddao. ²⁸ Ané rejá a ele sin chepa nú y poné manto púrpura endi Éle. ²⁹ Antonse aspe korona ri epina y poné endi kabea ri Éle, y endi mano rerecha un bastón, ané a poné ri ridiya lande ri ele y a sé mofa rindo ri Éle chitiando: "¡Bibí, Takurimbo ri má Judíos!" ³⁰ Ané ekupí, y kujé baston y ndá goppe endi kabea. ³¹ Repué ri abeba assé mofa a ele, ané kitá manto y a poné bitilo ri ele y nyebalo pa krusifiká. ³² Kuandí salino, ané topetá kú ombe Sirene ke asé ñamá Simón, kiene ané obligá a bae kú ané pa nyeba krú. ³³ Ané yebá un paraje ke asé ñamá Gólgota, ke keleba chitiá: "Paraje ri Kalabera." ³⁴ Asina ke ané ndalo a bebé nbino reguetto kú iel. Poro kuandí Éle probá, nú a bebelo. ³⁵ Kuandí a beba krusifikao, bitilo ri Éle sendá repatio y ichao a suette; ³⁶ antonse ané sendá pa bigilalo. ³⁷ Riba ri kabea ri Éle ané poné akusasió kondlaa ei ele ke a chitiá:" E SENDÁ JESÚS, TAKURIMBO RI MÁ JUDÍOS." ³⁸ Bilingó lairon sendá krusifika jundo ri Éle, uno a rerecha ri Éle y uto a ikiedda. ³⁹ Kiene pasá po aí, insuttá meneando kabea ri ele ⁴⁰ y chitiando: "Bo ke chitiá ke a efaratá masiruma y gobbe a sé endi trilingó ría, sabbá a Bo memo. Sí bo sendá Moná ri Rioso, bajá ri é krú." ⁴¹ Ri é memo fomma prinsipal sasedote asé mofa a Éle, jundo kú má ekriba y karrusiano y chitiá: ⁴² "Éle sabbá a uto, poro polé sabbá a é memo nú. Takurimbo ri Israel; bajá ri aí krú y antonse suto kré endi Éle. ⁴³ Éle konfiá endi Rioso. Ke Rioso sabbá Éle si keleba, pokke Éle chitiá: 'I sendá Moná ri Rioso.''' ⁴⁴ Y má lairon ke jueba krusifikao kú Éle, tambié chitiá lo memo y insutta Éle. ⁴⁵ Renje ora sesta miní okurana andi to má tiela a tá ora nobena. ⁴⁶ Sekka ri ora nobena, Jesús lebandá nboso y klamá y chitiá: "ELI, ELI, ¿LAMA SABATANI?" ke a sendá: "RIOSO MÍ, RIOSO MÍ, ¿POKKE BO REJÁ MÍ SOLO?" ⁴⁷ Kuandí aggú ri kiene taba aí ri pie a kuchá, chitiando: "Éle a tán ñamá a Ellías." ⁴⁸ Ri un bé uno ri ané kolé y kujé una eponja empapá kú nbino amaggo y ponelo endi una kaña, ndá a bebé. ⁴⁹ Uto ané chitiá: "Rejé ele solo; guatieno pa bé sí miní a sabbalo." ⁵⁰ Antonse Jesús klamá uto bé ndulo y ndá epiritu sí. ⁵¹ Antonse, kottina ri masiruma pattí endi bilingó renje riba pa abajo. Tiela temblá y má roka pattí. ⁵² Má tumba jueba enpenakao, y má kuepo ri chochá ri sando a resusitá. ⁵³ Ané salí ri má tumba y repué ri resurresió ri Jesús, ané lendrá a siura sanda y aparesé a un chohá. ⁵⁴ Antonse kuandí senturió y kiene a bigilá a Jesús guatiá e terremoto y to kusa ke abeba pasá, ané kujé miero y a chitiá: "Ri belá belá é sendá Moná ri Rioso". ⁵⁵ Chochá ri changaina ke abeba siguí a Jesús renje Galilea pa kuilá ri ele, tanba aí guatiando a lejua. ⁵⁶ Lendro ri ele taba Maria Magdalena, Maria mae ri Jakobo y José, y mae ri má moná ri Sebedeo. ⁵⁷ Kuandí sendá okurana, miní un ombe Galipotano ri Arimatea, ke asé ñamá José, kiene sendá tambié risipulo ri Jesús. ⁵⁸ Ele a bae pa andi Pilato y pirí kuepo ri Jesús. Antonse Pilato a mandá pa ndá kuepo. ⁵⁹ José kujé e kuepo, y a engobé endi tela limpia ri lino. ⁶⁰ y a ponelo endi tumba ri ele ke sendá nueba y ke abeba kortao endi roka. Antonse mobé un peñon ngande endi entrada ri tumba y repué a bae. ⁶¹ Maria Magdalena y uto María tanba aí sendá flende ri tumba. ⁶² Uto ría, ke sendá ría repué ri preparasió, má sasedote y má Fariseos jundá kú Pilato. ⁶³ Ané chitiá: "Ño, suto kolá ke kuandí é enbutero taba kú mbila, chitiá: "Repué ri trilingó ría i tá resusitá.' ⁶⁴ Po é kusa mandá pa bijía tumba a tá trilingó ría ke ele chitiá; ri uto fomma má risipulo polé yegá y jutá y chitiá a má jende: 'Éle a resusitá ri muetto' y uttimo ingaño sendá pio ke primó." ⁶⁵ Pilato chitiá: "Yebá jende pa bijía. Bae y ngual+a to kusa lo ke mejó enú polé". ⁶⁶ Asina ke ané bae y ngualá tumba, amalándo peñon y poné jende pa bijía.