1 Ya po tadde, andi ría ri reposo, kuandi taba amanesé primó ría ri semana, María Magdalena i má uto María a minía guatiá bobera. 2 I a pasá un tropisio ngande, pokke un angel ri Ño a bajá ri nsulú; a miní i a mobé ma piegra i a sendá riba ri e. 3 A pesé kumo un relampago, i ma chepa blanko kumo niebe. 4 Má guaddia a temblá ri miero i a kelá kumo mueeto. 5 Ange a chitiá kú ma changaina: "Nú ten miero, pokke i a sabé ke enú tan buká a Jesús, kien jue krusifakao. 6 Éle ta akí nú, si no ke a rebibí, asina kumo Éle a chitiá, minino a guatiá endi Ño a Taba. 7 Bae kulendo i chitiá kú má risipulo: Éle a rebibí ri andi má muetto, tando ri lande ri enú pa Galilea aí enú tan guatialo. "E akí i chitiá kú enú". 8 Changaina a kolé rejando má bobera kú miero i kú jarochería po chochá, kolendo a ndá fecha a má risipulo. 9 Ri repende Jesús a topetá kú ané i a chitiá: "Saluro". Má changaina a miní i ndá abraso a má ri Jesús i ané a arorá. 10 Antonse Jesús chitiá: "Nú ten miero, bae i ndá fecha a numano ke ané tan bae pa Galilea; aí ané tan guatiá mi". 11 Miendla má changaina a salí pa bae, ma gende a bae pa siurá i chitiaron kú ma kamajan ri saseddote ri to má kusa ke a pasá. 12 Kuandi má saseddote a jundá kú má karrusiano i chitiaron ri lo ke a pasá, ané ndá un chochá ri burú a má chechelo 13 i chitiaron: "Chitieno kú uto ke ma risipulo ri Jesús a miní po oskurana i jutá kuepo miendla suto a ndrumí. 14 Si e kusa yegá endi oiro ri kamajan, suto tan kombeselo i asina enú ten botrokolo". 15 Antonse má chechelo a kujé burú i asé kumo jue chitiao. E kusa a dibulgá po to patte andi to ma judío i asta agué ané ta ku e fecha. 16 Má onlingó risipulo a bae a Galilea, andi monde lo ke Jesús chitiá pa ané bae. 17 Kuandi ané a guatialo, aroraron, poro uto taba kú duda. 18 Jesús miní pa andi ané i Éle a chitiá: "To autorirá jue ndao a mi endi nsulú i endi má tiela. 19 Antonse bae i asé risipulo a to ma nasione, bautisando endi nombe ri Tatá, ri Moná i ri Epiritu sando. 20 Insiñando a oberesé to lo ke I a mandá, I ta ku enú to má ría ata kuandi mundo ta kabá".