¹ Antonse reino ri má nsulú sendá kumo dilingó birgenes ke a ngalá lampara si, i ané a bae a topetá kú ma birikueta. ² Kilingó ri ané a sendá nesia i kilingó ri ané a sendá sabijonda. ³ Poro kuandi má birgenes nesia a tá ngalá lampara si, ané a tá ngalá a aseite nú. ⁴ Poro má birgenes sabijonda, a tá ngalá kalanbuko ri aseite jundo kú lampara si. ⁵ Miendla birikueta ri ané taba retrasao, a to ané a ndá sueño i ané a ndrumí. ⁶ Poro endi merianoche a abeba un klamor: '¡Guatiá, ma birikueta! Salí a topetá kú éle'. ⁷ Antonse to ma birgenes a ta palá i arreglá lampara si. ⁸ Ma birgene nesia a chitiá a má birgene sabijonda: "Ndá a suto un chito ri aseite pokke a ma lampara ri suto tan kabá". ⁹ Poro má sabijonda a kontestá chitiando: "Nú, abeba pa enú i pa suto akí nú, enú ten ke bae pa andi se bendé e kusa i komblá pa enú mema. ¹⁰ Miendla ané a bae a komblá, birikueta a miní, i ané kiene taba prepará a bae kú éle pa oriki ri matrimonio, i puetta a selá. ¹¹ Repué, má uto birgenes a miní tambié i ané a chitiá: "Piacha, piacha, abrí". ¹² Poro Éle a kontestá: Ri belá belá i a ta chitiá, i a kunosé a enú nú. ¹³ Belá pue, pokke enú ta sabé ma ría ni má ora nú. ¹⁴ Sendá kumo un ombe ke a tan bae pa uto pais. Éle a ñamá a ma moso si i ndalo ané to kusa galipotana ke éle teneba. ¹⁵ A lingó ri ané éle a ndalo kilingó talentos, o uto éle a ndalo bilingó talentos, i a uto éle a ndalo lingó talento, Ka lingo a resibí un kantirá ri akueddo a kapasidad si, i ombe a bae. ¹⁶ Ri un bé, kiene ta resibí kilingó talentos a bae i a inbertí i a produsí uto kilingó talentos. ¹⁷ Ri e memo fomma éle kiene ta resibí bilingó talentos ta asé uto bilingó. ¹⁸ Poro moso kiene ta resibí lingó talento a bae a kabá un oyo endi tiela, i éle a kundilo aí. ¹⁹ Aora repué ri un chochá ri tiembo ma kamajan ri ané má moso a miní i a ajuttá kuenda kú ané. ²⁰ Má moso ke a resibí kilingó talentos a miní i a tré uto kilingó talento m'a, éle a chitiá: "Ño, bo a ndá mi kilingó talentos, guatiá, i ta asé kilingó talento má". ²¹ Ma kamajan a chitiá éle: "¡Kaiko moso, bo a aselo kaiko, moso fiel! Bo a sendá fie endi chito ri kusa, i tan poné a bo ribá ri un chochá ri kusa. lendrá endi chuchumeko ri kamajan si". ²² Má moso lo ke a resibí bilingó talentos a miní i éle a chitiá: "Ño, bo a ndá mi bilingó talentos, guatiá, i a asé bilingó talentos má". ²³ Ño si a kontestá: "¡Kaiko moso, bo a aselo kaiko, moso fiel! Bo a sendá fie endi chito ri kusa, i tan poné a bo ribá ri un chochá ri kusa. lendrá endi chuchumeko ri ño si". ²⁴ Antonse ma moso lo ke a resibí lingó talento a miní i éle a chitiá: "Ño, i a sabé ke bo sendá un ombe ndulo, bo kelé kujé andi bo ta sembrá nú". ²⁵ I teneba miero, asina ke i a bae i a kundilo endi tiela. Guatiá, ten lo ke sendá ri bo". ²⁶ Poro ño si a kontesta chitiando: "Bo malo i mabbao moso, bo a sabé ke i kelé kujé andi i ta sembrá nú. ²⁷ Antonse bo teneba ke ndá burú a má bankero, pa kuandi i a ta bobbé i ta resibí burú mi kú intereses. ²⁸ Asina ke kitá lingó talento i ndalo a miso ke teneba dilingó talentos. ²⁹ Pokke aké ke teneba, a éle ta ndalo má i éle tan ten má. Poro kiene nú teneba, aun lo ke teneba tan sendá kitao. ³⁰ A moso ke siribí nú ichalo endi okurana andi andi so abeba leko i akongojamiendo". ³¹ Kuandi má moná ri ombe tan miní endi ngloria si i to má angeles kú Éle, Antonse Éle tan sendá endi trono nglorioso. ³² Lande ri Éle tan jundá to má nasiones, i Éle tan separá má gende uno ri uto, asina kumo ma pastor tan separá obejas ri má chibo. ³³ Éle tan poné má obejas endi mano derecha si, poro ma chibo endi mano iskiedda si. ³⁴ Antonse má Takurimbo tan chitiá a kiene tan endi mano derecha si: "Miní, enú kiene ta endi lilenga ri Tatá Mi, ereden ma reino ke ta preparao pa enú renje má kreasión ri má mundo. ³⁵ Pokke i a teneba kanatulé i enú a ndá mi kumina; pokke i a teneba sed i enú a ndá mi apú; i a sendá kapuchichimanga i enú a resibí mi. ³⁶ I taba enkuero i enú a bití mi; i taba chakoso i enú a kuirá mi; i taba endi tramukua i enú a bae pa andi mi. ³⁷ Antonse ma jutto tan kontestá chitiando: "Ño, ¿Kuandi suto ta guatiá bo kú kanatulé i kuandi suto ta ndá kumina a bo? ¿Kuandi suto ta guatiá bo kú sed i suta ta ndá apú? ³⁸ I ¿Kuandi suto ta guatiá bo kumo kapuchichimanga, i suto ta resibí bo? ¿Kuandi suto ta guatiá bo enkuero i suto ta bití bo? ³⁹ ¿Kuandi suto ta guatiá bo chakoso, o endi tramukua, i suto ta bae a miná bo?" ⁴⁰ I má Takurimbo tan kontestá chitiando: "Ri belá belá i ta chitiá, lo ke ané ase po numano mi chinindingo, a ta aselo a mi". ⁴¹ Antonse Éle tan chitiá a kiene ta endi mano iskierda si: "Bae ri jundo ri mi, maddito to enú, pa andi kandela ke a sendá pa dianche kú angele si, ⁴² pokke i a teneba kanatulé i enú ta ndá kumina pa mi nú; i a teneba sed poro enú ta ndá apú a mi nú, ⁴³ i a sendá kapuchichimanga poro enú ta resibí mi nú; i taba enkuero poro enú ta bití mi nú; chakoso i endi tramukua i enú ta kuirá ri mi nú. ⁴⁴ Antonse ané tambié tan respondé chitiando: "Ño, ¿Kuandi suto ta guatiá bo kú kanatulé, kú sed, kumo kapuchichimanga, enkuero, chakoso o endi tramukua i suto ta siribí a bo nú?" ⁴⁵ Antonse Éle tan kontestá chitiando: "Ri belá belá i ta chitiá, kusa ke enú ta asé po ma chinindingo nú, ta aselo po mi nú". ⁴⁶ "Asina ke ané a bae pa kastigo po to tiembo, poro ma jutto pa mbila po to tiembo".