¹ Pokke reino ri nsulú sendá kumo un suamo ri monde ke salì ri maana po maana pa buká gende makaniá endi biña si. ² Repué ri poné akueddo kú ma jende ke ta makaniá pagá ané lingó denario po ría, a mandá ané pa biña ri éle. ³ Antonse a gobbé bae sekka ri ora tersera i éle a guatiá a má uto gende ke se makaniá ke nú taba asé niggú kusa. ⁴ A ané éle a chitiá: "Bae enú tambié a biña mi i tan pagá lo ke sandá jutto". asina ke ané bae a makaniá. ⁵ Uto be éle a salí sekka ri ora setta, i tambié endi ora nobena e asé lo memo. ⁶ Uto a salí sekka ri ora undesima i éle topetá a uto moso ke tamba asé niggú kusa. Éle a chitiá: "¿Pokke enú ta akí sin asé niggú kusa to ría?" ⁷ Ane a chitiá: "Pokke suto ten makaneo nú". Suamo ri biña a chitiá a ané: "Bae enú tambié a biña mi". ⁸ Kuandi okurana miní, suamo ri biña chitiá a ombe ke ta makania pa éle kumo kambimbante: Ñamá a má moso ke ta makania i ndá ané pago ri ané, kumensando renje uttimo ata ma primó". ⁹ Kuandi miní ma moso ke a sendá kontratao endi ora undesima, ka lingó a resibí lingó denario. ¹⁰ Kuandi a yegá ma primó ombe ke ta makaniá, ané a kreé ke tan kujé má, poro ané tambié kujé lo memo, un denario ka lingó. ¹¹ Kuandi ané resibí má pago, ané a kejá ri suamo. ¹² Ané a chitiá: "Ané ke miní ri uttimo a makaniá lingó ora nú má, poro bo aselo lo memo ke suto, ke pasá to ma ría ku so kaliente ke a kemá suto". ¹³ Poro suamo a kontentá chitiando a lingó ri ané: ¹⁴ "Kombilesa, i ta asé niggú kusa mala kú bo nú ¿Bo kolá nú ke i chitiá ke pago ri bo sendá lingó denario? Kujé lo ke sendá pa bo i ngalá kaddume ri bo; i kelé ndá a má uttimo ombe ke ta makania lo memo ke bo. ¹⁵ ¿A kaso i nú polé asé lo ke i keleba kú lo ke sendá ri mi? ¿O bo a ten enbiria pokke i sendá kaiko? ¹⁶ Asina ke uttimo sendá primó, i má primó sendá uttimo". ¹⁷ Miendla Jesús a bae pa andi Jerusalen, kujé kú éle so a má risipulo si, i endi kaddume Éle a chitiá: ¹⁸ "Guatieno, suto tan subí pa Jerusalén, i Moná ri omnbe sendá entregao a má prinsipá saseddote i a má ekriba. Ané tan kondená a Éle a muette ¹⁹ i ané a ndalo a má gentiles pa aselo pasá pena, pa asotalo i pa krusifiká éle. Poro endi trilingó ría Éle resusitá". ²⁰ Antonse mae ri ma momá ri Sebedeo a miní kú má moná si. Éle a postrá lande ri éle i pirí si polé asé un kusa po éle. ²¹ Jesús chitiá: "¿Ke bo keleba?" Éle a chitiá: "Ndá odde ri ke e bilingó moná mi sendá, lingó a rerechá ri bo i uto a ikiedda ri bo endi reino ri bo". ²² Poro Jesús kontestá chitiandó: "Enú sabeba lo ke tan pirí nú. ¿Enú sendá kapá ri bebé ri kopa amagga?"Ané a chitiá: "Suto Polé". ²³ Éle chitiá: "Asina ke bo tan polé si bo tan bebé ri kopa mi. Poro sendá endi mano rerecha i ma ikiedda sendá kusa ke I polé asé nú, si nú ke sendá pa kiene Tatá mi a prepará". ²⁴ Kuandi ma uto dilingó risipulo kuchá e kusa, a embejuká kú má numano. ²⁵ Poro Jesúa a ñamá a ané pa andi Éle i chitiá éle: "Enú sabe ke má gobbenante ri má gentila someté i má ombe ereriko si tan ta ejersé autorirá endi ané. ²⁶ Poro polé sendá asina nú lendro ri enú. si nú kiene sendá ngande lendro ri enú ten ke sendá moso, ²⁷ i kiene sendá se primó lendro ri enú ten ke sendá moso. ²⁸ Asina kumo Moná ri ombe tan miní a sendá sabio nú a siribí, i ndá mbila pa rekstá ri jende". ²⁹ Miendla salí ri jerikó, un chochá ri jende a siguilo. ³⁰ I ané guatiá ke dolingó ombe ke polé miná nú, tamba senddao endi kaddume. kuandi kuchá ke Jesús pasá po aí, ané a kumensá ku jarana chitiando: "¡Ño, Moná ri David, ten pierá ri suto!" ³¹ Poro ma chochá ri jende a mandá ané chitiando kaeno mboka. Poro ané gritá kú ma kutú chitiando: "¡Ño, Moná ri David, Ten pierá ri suto!" ³² Antonse Jesus a palá i ñamá ané chitiando: "¿Ke enú keleba pa i asé po enú?" ³³ Ané a chitiá: "Ño, ke ojo ri suto polé guatiá". ³⁴ Antonse Jesús, mobío po kompasió, a toká má ojo. ri un bé ané polé guatiá.