¹ A pasá ke kuandi Jesús a kabá ri chitiá e ma palbra, a bae ri Galilea, i Éle a yegá endi frontera ri Judea, má ayá ri Río Jordán. ² Un chochá ri gende tan siguí a Éle, i Éle a ta saná a ané. ³ Ma fariseo a bae pa andi Éle pa probá Éle i ané a chitiá: "¿Sendá permitío ke ombe tan rejá a birikueta si po kuakié kusa?" ⁴ Jesús a kontestá chitiando: "¿Enú a ta leé nú ke endi komienso RIOSO A KREA OMBE I CHANGAINA? ⁵ ¿'I Éle memo a chitiá: PO E KUSA OMBE TAN REJÁ A TATÁ SI KÚ MAE SÍ PA BAE A JUNDÁ KÚ BIRIKUETA SI, I BILINGÓ TAN SENDÁ LINGÓ KANNE'? ⁶ Antonse sendá bilingó má nú, aora sendá lingó kanne nú má. Asina ke, lo ke Rioso a tá jundá, narie ta separá nú". ⁷ Ané a chitiá: "pue, ¿Pokke Moisés a mandá pa asé sertifikado ri diborsio pa repué kelé e kusa nú?" ⁸ Éle a chitiá: "Po ané ten nduló kolasó si, Moisés tan rejá pa ané diborsiá ri ma birikueta si, poro endi komienso sendá asina nú. ⁹ I ta chitiá ke kuakié ke ta diborsiá ri birikueta si, i sendá po inmoralidá sesual nú, ta kasá uto be, a tá asé adulterio; asina memo, ombe ke tan jundá endi matrimonio kú changaina diborsiá, a tá asé adulterio". ¹⁰ Má disipulo a chitiá a Jesús: "Si e sendá kusa lo ke ta pasá ku un ombe kú birikueta si, sendá kaiko kasarse nú". ¹¹ Poro Jesús a chitiá a enú: "To polé aseptar e insiñansa nú, nú má ané ke ta rejá resibí e insiñansa". ¹² Pokke abeba eunukos ke a nasé asina renje barika ri mae si, abeba eunuko ke a asé eunuko po merio ri ma ombe, i abeba uto eunuko ke ta asé ané memo eunuko po kausa ri reino ri má Nsulú. kiene ta polé resibí e insiñansa, ngalalo. ¹³ Antonse ma gende ta tré má moná pa Éle poné mano si endi ané i orá po ané; poro má disipulo a tá reprendé a ané. ¹⁴ Poro Jesús a chitiá: "Rejá má moná miní pa andi mi, impidí nú, pokke reino ri má nsulú a sendá ri kiene sendá kumo ané". ¹⁵ I Éle a poné mano si endi ané, i repué Éle a bae ri aí. ¹⁶ Antonse, un ombe a miní pa andi Jesús i éle a chitiá: "Piacha, ¿ke kusa kaiko i ten ke asé pa i polé ten mbila etenna?" ¹⁷ Jesús a chitiá a éle: "¿Pokke bo ta prundá mi lo ke sendá kaiko? So un sendá kaiko, poro si bo keleba lendrá endi mbila, bo ten ke gualá má rekao". ¹⁸ E ombe a chitiá: "¿kuá rekao?" Jesús a chitiá: "NÚ KITÁ MBILA; ASÉ ADULTERIO NÚ; NÚ JUTÁ; TAN CHITIÁ TETTIMONIO KE NÚ SENDÁ NÚ; ¹⁹ ONRA A TATÁ SI ASINA MENO A MAE SI; I NDÁ NGONGOROKO A UTO GENDE KUMO A BO MEMO". ²⁰ E ombe a chitiá: "To e má kusa i a aselo; ¿Ke uto kusa i ten ke asé?" ²¹ Jesús a chitiá éle: "Si bo keleba sendá peffetto, bae, bendé lo ke bo ten i ndalo a mña kusubé i bo a ten tesoro endi nsulú. repué miní i siguí mi". ²² Poro kuandi majanasito a kuchá lo ke Jesús a chitiá, éle bae triste, pokke éle teneba un chochá ri kusa. ²³ Jesús a chitiá a má disipulo: "Ri belá i ta chitiá, sendá difisi ke un ombe lendrá endi reino ri má nsulú. ²⁴ Uto be i ta chitiá: "Sendá má fasi ke un kamello lendrá po ojo ri una aguja, ke un galipotano endi reino ri Rioso". ²⁵ Kuandi ma disipulo a kuchá e kusa, ané a kelá sorprendío i ané a chitiá: "¿Kiene tan polé sendá sabbo?" ²⁶ Jesús a guatiá ané i a chitiá: " Pa ma gende e kusa sendá imposible, poro pa Rioso to sendá posible". ²⁷ Antonse Pedro a kontestá i a chitiá: "Guatiá, suto a ta rejá to po siguí a bo; antonse, ¿ke suto tan ten? ²⁸ Jesús a chitiá: "Ri belá i ta chitiá, a enú ke a siguí mí, endi ma regenerasió ri má kusa, kuandi moná ri ombe tan sendá endi trono ri ngloria si, enú tan sendá endi dolingó tronos tambié, jusgando ma dolingó tribu ri Israel. ²⁹ To ané ke a rejá má posá si, má numano si, má numana si, tatá si, mae si, moná si o tiela si po kausa ri nombe mi, tan resibí lingó na na má i ané tan eredá ma mbila etenna. ³⁰ Poro un chochá ke sendá primo aora tan sendá uttimos, i un chochá ke sendá uttimo aora tan sendá primó.