¹ Jesuso tambié a chitiá a ma risipolo: "Un kompaombre galipotano lo ke teneba un amminitruró, i ele a interá ke e ma amminitraró taba fifarriando ma biene sí. ² Asina ke ma galipotano a ñamalo i a chitia: "¿Ké sendá ri to kusa mí ke no tené, pokke bo polé sendá amminitraró nú. ³ Ma amminitraró a prundá a ele memo: "¿Ke kusa I ten ke asé, ya ke suamo mí tá kitá mí makaneo ri amminitraró? I ten kañaña pa kobá nú, i I ta sindi pena pa sendá pirikaya. ⁴ I sabé lo ke I tan asé, pa kuandi tan kitá mi ri makaneo ri amminitraró, ma gende resibí mi endi posá sí." ⁵ Antonse ma amminitraró a ñamá a to ma gende ke a rebé a suamo sí, i a prundá a ma primó: "¿Kuanto bo rebé a suamo mí?" ⁶ Ele a chitiá: "Lingonaná meria ri manteka ri olibo". i ele a chitiale:"Tomá kueda ri bo, sendá rapiro, i kribí kinalingó". ⁷ Antonse ma amminitraró a chitiá a uto: "¿Kuanto bo rebé?" Ele a chitiale: "Lingona ná meria ri anina". Ele a chitiale: "Tomá kuenda ri bo, i kiribí olinalingó". ⁸ Ma suamo a elogia a ma amminitraró pokke ele a attua ku rapiré. Ya ke ma moná ri bolita mundo sendá ma rapiro ku propia gende sí ke ma moná ri ma lú. ⁹ I risí a enú, asé kumbilesa po merio ri burú injuto, pa ke kuandi e tan kabá, enú polé sendá mienminio endi má posá etenna. ¹⁰ E kiene sendá fié ku pokito, tambié sendá fié endi chochá, i e kiene sendá injuto endi pokito, tambié sendá injuto endi chochá. ¹¹ Si enú a sendá fié nú ku burú injuto, ¿Kiene tan konfiá ma gualipotanía ri belá a enú? ¹² i si enú a sendá fiele nú ku ma bupú ri uto gende, ¿Kiene tan ndá propio burú si? ¹³ Niggún siebbo polé sibbí a ndo suamo endi memo tiembo, pue ele tan sindi guapía po uno i ngongorokó po uto, i asina meme ele tan kelá ku uno pa ichá a uto. Enú polé sibbí a Rioso i a ma galipotanía". ¹⁴ Aora ma fariseo, kiene a sindí ngongorokó po burú, a kucha to e ma kusa, i ané a rejá a ele mal. ¹⁵ i Ele a chitiá a ané: "Enú sé juttifixá endi go ri ma gende, poro Rioso konosé kolasó ri to enú. E kusa ke sendá ngandao endi ma gende sendá kaiku nú endi ojo ri rioso. ¹⁶ Ma lei ri ma profeta taban endi efetto ata ke a yegá Juan, ri e tiembo pa lande, ma abungelio ri reino ri rioso sendá prerikao, i to ma gende tratá akokoná kuddame sí endi ele. ¹⁷ poro sendá ma anchoba ke ma nsulú i ma tiela pasá, ke un tidde ri un letra ri ma lei bobbe balira nú. ¹⁸ To aké asé rejá kunkola sí i sé enkonkolá ku uto, asé arutterio, i to aké ke sé enkonkolá ku una rejá ku milo sí, asé aturrerio. ¹⁹ Aora a abé un kumpaombre galipotano ke taba bitilo ri puppura i line fino i ele a jurochiá ri galipotanía si ká ría ²⁰ Un pirikaya ñamao lasaro taba tirao aí endi puetta sí, ku un chochá ri ñoña, ²¹ i ele a resia komé ku to kusa ke a kaí ri ma mesa ri e galipotano, i aremá ri e kusa, ma pelo sabeba lambé ñoña sí. ²² Apasá ke e prikiya a lungá i jueba kaggao po ma angele ata lao ri Abraam. Ma galipotano tambié a lungá i jueba eterrao, ²³ i endi ma ades, tando endi sofoko, ele a ichá ojo si pa riba i a miná a Abraam kirilembo i a lasaro endi pecho sí. ²⁴ Asina ke ele a jaraniá i achitiá: "Tatá Abraam, tené miserikoddia ri mí i mandá a Lasaro, pa ele mojá reo sí endi apú i refreká lengua mí, pokke i tá en akongojo endi e kandelá". ²⁵ poro Abraam a chitia le: "Moná, kolá ke endi mbila bo a resibí kusa kaiko, lasaro lo memo, a resibí kusa mala. poro aora ele tá akí i bo ta endi agonía. ²⁶ Arema ri to eto, un jueko ngande jueba pueto, pa ke to aké ke kelé pasá ri akí pandi bo polé aselo nú, i narie tan sendá kapá ri pasá ri aí pandi suto." ²⁷ Ma galipotano a chitiá: "I tá pirí a bo, tatá Abram, pa bo mandalo pa posá ri tatá mí, ²⁸ pokke i ten kilingó numano, pa ele polé abbeti a ané, po miero a ke ané tambié miní pa ete paraje ri sofoko." ²⁹ Poro Abraan a chitiale: "Ané tené a Moisés i ma profeta; rejá a ané pa kuchá a ané." ³⁰ Ma galipotano a kuntetá: " Nú, tatá Abraham, poro si agguie fuera pandi ané renje ma langao, ané tan arrepentí." ³¹ Poro Abraam a chitiale: "Si ané kuachá nú a Moisés i a ma profeta, ane tan sendá pesuario nú si agguje palá ri lungao".