¹ Antonse to ma rejojeró ri impueto i uto pekaró tamba miní pandi Jesuso pa kuchado. ² Ane ndó ma Fariseo i ekriba mumulando uno ku uto, chitiando: " Ete kumpaombre tu ndá mienminía a pakarore, i ata kumé ku ané". ³ Jesuso a kondá un parábola a ané, chitiando: ⁴ "¿Kua ri enú, si ten lingunaná obeja i antonse pelé una ri ané, nú reká ma ninnanilingó endi resietto, i bae ri trá ri ma ekanforá ata jayala? ⁵ Kepué ri jayála, ele ponela endi ombro sí i tá poné jarocho. ⁶ Kuandi ele bae pa posa, ele jundá kumbilesa i laoposá sí, ehitiando: "sé jarocho ku I, pué I a jayá obeja mí ekandorá." ⁷ I tá chitiá uto begá, abé jarochoreria endi nsuló kuandi un pekaro sé arrepentí, ma ke ninnanilingó gende junto ke nesesita arrepentí nú. ⁸ O ¿Ke mujé temé dilingó monera ri plata, si ele pelé un monera, nú prensé un mechón, barré ma posá, i kurutiá atta jayala? ⁹ i kuandi ele jayalo, ele ñamá to ma kombilesa i laoposá sí, chitiando: "Sé jarocho ku I, pue I a jayá ma monera ke I a pelé. ¹⁰ Asina I ta chitiá a enú, abé chuchumeko endi presensia ri ma angele ri Rioso po un pekaró ke sé arrepentí". ¹¹ Kepué Jeusso a chitiá: Un kompaombre a tené ndo moná, ¹² i e má chirrindingo a chitiá a tata sí: "Tatá, ndá mí aora to ma patte ri biene ke toká a mí". Asina ke ele a patti ma propierá si pa ndó moná. ¹³ Nú a pasá un chochá ri ría, e má chirriandin yo a empaká to kusa ke a toká a ele i a bae pa un parake kurilembo, i endi e paraje ele fifarriá buró sí, kumplando kusa ke ele a nesesitá nú, i fifarriando burú si endi un mbila serrera. ¹⁴ Antonse kuandi ele a gatá tó un kanatatulé ngande a miní endi e paraje, i ele a komensá a tá endi nesesirá. ¹⁵ Ele a bae i a pirí makaneo a un sirara no ri e paraje, kiene a mandalo pandi mande sí pa ele ndá kumina a ma piangulí. ¹⁶ i ele ku guto poleba kumé ma semía ri ma aggarrobo ke ma pianguli kumé pue narie a ndá a ele kumina. ¹⁷ Poro kuandi e majaná a bobbe en sí, ele a chitiá: " ¡kuanto muso ke tatá mí sabé kontratá tené kumina, i I akí, lungando ri kanatulé! ¹⁸ I tan bae ri akí pandi tatá mí, i I tan chitía a ele: "Tatá, I a peká kontra nsulú, i endi bita ri bo. ¹⁹ I sendá riyno nú ri sendá moná ri bo". ²⁰ Asina ke moná majaná a bae i miní pandi tatá sí. Ele tando kurilembo, tatá si a minalo, i a mobé ku kompasió, i a kulé, i a abrazalo i a besalo. ²¹ Ma moná a chitiá a ele: "Tatá, i a peká kontra nsulú i abita ri bo. I sendá rigno nú ri sé ñamao moná ri bo." ²² Ma taá a chitiá a moso sí: "Traé ma mejó monta, i poné a ele, i poné un aniyo endi mano sí, i chelina endi pié sí. ²³ Repué traé ma tennero ma ngolo i kitambila ¡saranguiemo ku un oriki! ²⁴ Pué moná mí taba lungao, i aora ele ten mbila. Ele taba ekanforao, i aora a sendá joyao". i ané a komensá asarunguiá. ²⁵ Aora moná mayó ri ele taba endi monde. Kuandi ele a miní i asekká a ma posá, ele a kuchá musika i sarangueo. ²⁶ Ele a ñamá a una ri ma moso i aprudá ké poleba e ma kusa. ²⁷ Ma moso a chitiá a ele: "Numano ri bo a miní a posá i tatá ri bo a kitambita a ma kannero ma ngolo, pokke ele a miní kairo" ²⁸ Ma moná mayó taba guapo, i a lendrá nú, tatá sí a salí, i a spulirá a ele. ²⁹ Poro ma moná mayó a kontetá i a chitiá a tatá ele: "Mina, po un chochá rii año I a tá aki kumo eklabo pa tí, i I nunka a patí una ri ma regla ri bo poro bo nunka a ndá mi un kannero majanasito pa I pole saraguiá ku kombilesa mí, ³⁰ Poro kuandi moná si, kiene a gatá ku chibapileta, bo a kitábila pa ele, ma kannero ma ngolo". ³¹ Ma tatá a chitiá: "Moná mí, bo tá ku I endi to tiembo, i to lo ke I tené sendá ri bo. ³² Poro jueba lo propio pa suto saranguiá i tá jarocho, pue numano ri bo taba lungao, i aora ele ten mbila; ele taba ekanforao i aora jueba jayao".