¹ A pasá un sankoló, kuadi ele a bae pa un posá ri uno ri ma fariseo pa ele kumé pan, ané a miná a ele ri sekkita. ² Asina ke, flende a ele taba un kompaombre ke a sufrí ri edema. ³ Jesuso a prundá a ma saberore ri mando judio i a ma Fariseo: "¿Sendá kuará endi sankoló, o nú? ⁴ Poro ané a jablá nú. Asina ke Jesuso a nagalato, a dando i a ichalo. ⁵ Ele a chitiá a ané: "¿ kiene ri enú tené un moná o guey ke tá kaí endi posa endi ria ri oreo, i ri una bé enú sakalo nú?" ⁶ Ané a tene bilanté pa kontetá e kusa nú. ⁷ Kuandi Jesuso a ndá kuenda ke kiene jueba imbitao a kujé ma taburete ri anor, ele a kondá un parábola, chitiando; ⁸ "Kuandi enú jueba imbitao po agguie pa un kumina ri konkolao, nú sendá ndi taburete ri anor, pokke agguie ke sendá ri ma anor ke enú, poleba sendá inbitao. ⁹ Kuandi ma ke a imbitá a ané tá yegá, ele tan chitiá a enú: "Ndá a e uto gende ma taburete" i antonse ku begguensa enú tan kujé ma taburete ma bajo. ¹⁰ Poro kuandi enú jueba mbitao, pa ke kuandi suamo ri oriki mini, ele poleba chitía: "Kombilisa, bae taburete atto." Antonse enú tan sendá endi mesa ku enú. ¹¹ pokke to ake ke ta kreé ke ele sendá ma ke uto tan sendá umiyao, i e aké ke sabé umiyá ele memo, tan sendá ngande. ¹² Jesuso tambié a chitiá a ma kompraombre ke imbitálo: "Kuandi bo ndá un kumina o un sena, bo pole imbitá nú ni kombilesa o mumano o famía o laoposá galipontano, pokke ané polé ichá pa trá ma imbitasió, i bo tan resibí ma pago ri buetta. ¹³ Poro kuandi bo ndá un kumina, imbitá a ma kusubé, ma kojo, ma lisiado, i ma gende ke sabe miná nú, ¹⁴ I bo tan sendá bendisio, pokke ané polé pagá nú a bo ri buetta. Pue bo tan sendá minao endi resimbila ri ma juto. ¹⁵ Kuandi un kumpaombre ke a sendá endi mesa ku Jesuso a kuchá e kusa, ele a chitiá: ¡Bendito sendá aké ke kumé pan endi Reino ri Rioso!" ¹⁶ Poro Jesuso a chitiá: "un kompaombre a prepará un sena i a imbitá un chochá. ¹⁷ Kuandi ma sena taba prepar+a, ele a mandá a moso, pokke tá ta perparao aora" ¹⁸ To ané a komensá a ndá ekusa endi memo tiembo. Ma primó a chitiá a ele: Ia komblá un kulao, I tundo pa juera a minalo ¹⁹ i uto a chitiá: "I a kompá silingó pá ri gueye, i I tando a probalo. ²⁰ I uto kompaombre a chitiá: "I a enkonkolá i po e kusa I polé bae nú." ²¹ Ma moso a mini i a chitiá e kusa a suamo ri ele. Antonse ma suamo ri posá a kujé rabia i a chitiá a ma muso: "soclino rapido po ma kuya i kaddume ri ma lisiados, ma gende ke miná ní i ma kojó." ²² Ma moso a chitiá: "Suamo, lo ke bo a mandá a papá kumo bo keleba, i toabía kelá páraje pa gende miní." ²³ Ma suamo a chitiá a ma moso: " Salino po karretera i por ma sekka i obligá a to ané pa miní ke posá mí polé kelá apiñoñá. ²⁴ pué I tá chitiá a bo, ningún ri aké kompaombre kiene jueba imbitao tan probá kimina mí." ²⁵ Aora chochá ri gende bae ku Ele, i Ele a rebbobé i a chitiá a ané: ²⁶ "Si kuakié ke ta miní pandí mí i tá aborresé nú a tatá sí, mae, mujé, monasito, numano i numana sí, i ata memo mbila sí tambié, ele polé sendá risipulo mí nú. ²⁷ Kiene kaggá nú propia krú rí ele i siguí mí, polé sendá nú risipulo mí. ²⁸ pue ¿Kiene ri enú, ke resiá asé un torre, tan sendá primo nú i kondá ma kosto i soká kuenda ri lo ke tené i nesesitá pa kompletalo? ²⁹ Ri uto manera, kuandi ele aya pueto un fundamento i sendá kapá nú ri temminá, to ake ta minalo tan guachafiá ri ele, ³⁰ chitiando, " Ete kompaombre a kumensá a palá un posá i a sendá kapá ri temminá nú." ³¹ O, ¿Ke takumbo kuandi tando a topetá ku uto takurimbo endi chamukina, ta sendá primó nú i tomá konsejo pa sabé si sendá kapá ri trompiá ku dilingo nananá kompaoombre ku ma uto takurimbo ke tá miní kontrá ele ku bidilingonananá kompaombre? ³² I si nú, kuandi ma uto kuangro tá kurilembo toabía, mandá un embajaró pa prundá po kondisió ri pá. ³³ Asina antonse, kuakié ri enú ke rejá nu to lo ke tené polé sendá nú risipulo mi. ³⁴ Ma sá sendá kaiko, poro si ma sá a pelé sabó sí, ¿Kumo polé sendá salá uto begá? ³⁵ Sendá ri ningún uso pa ma terreno o pa ma pila ri moñinga. Se bota, kucherno kiene ten kucharó pa kuchá.