¹ Aora, abebá un fariseo ke a se ñama Nicodemo, kabimbante judío. ² E ombé a miní a Jesús endí okurana i chitiá:"Rabí, suto a sabé ke bo a sendá un piacha ke Rioso a mandá, pokke ningun jendé poleba asé ma señal ke bó asé ñama ke Rioso te ku éle." ³ Jesús a kontestá: "Rí belá belá, na ma ke polebá nasé uta bé, éle nu polé guatiá reino rí Rioso." ⁴ Nicodemo chitiá: "¿Kumo un ombé polé gobbé a nasé sí éle sendá biejo? ¿Akaso polé un ombé lendrá uta bé endí bariga rí mae sí í nasé? ¿Nasé?" ⁵ Jesús a kontesta: "Rí belá belá, na ma ke polebá nasé rí apú i rí Epiritu, nu polé lendrá endí reino rí Rioso. ⁶ Pokke lo ke nasé rí kanne, sendá kanne, i lo ke nasé rí Epiritu, sendá epiritu. ⁷ Nu asomblá rí ke I chitiá bo: "Bo ten ke nasé rí nuebo." ⁸ Biento asé soplá pa andí e kelebá, bo a kuchá soniro rí sí, poro bo nu sabé rí andí miní o pa andí bae. Asina tambie sendá to aké ke a nasé rí Epiritu." ⁹ Nicodemo kontestá i chitiá a Éle: "Kumo polé sendá e ma kusa?" ¹⁰ Jesús a kontestá i chitiá a éle: "¿Bo sendá piacha rí Israel i asina nu polé entendé e kusa? ¹¹ Rí belá belá, i ta chitiá ku bo, ke konbetsamo kusa rí lo ke sabé, i suto testika rí lo ke a guatiá. Poro, enú nu resibí testimonio rí suto. ¹² Sí I tén konbetsao rí kusas rí akí tiela i enú a kreé nú, ¿kumo enú kreé sí I konbetsa ma kusa selestiales rí nsulú? ¹³ Ningún abé subio a nsulú na ma Akel ke a bajá rí nsulú: e Mona rí ombé. ¹⁴ Asina memo kumo Moises lebandá kulebra endí resietto, asina memo sendá nesesario ke e Mona rí ombé sendá lebandao ¹⁵ Pa ke to ma jende ke a kreé endí Éle, ten mbila po chocha etenna. ¹⁶ Pokke Rioso a gongorokia un chochá a ma mundo, ke ndá a uniko Mona lo ke Éle tén, pa ke to ma jende ke kreé endí Éle, lunga nú, si nú ke tené mbila po chochá etenna. ¹⁷ Pokke Rioso nu mandá Mona sí a mundo ku fín rí kondena mundo, si nú pa salbá a mundo po kuenda rí Éle. ¹⁸ To akel ke kreé endí Éle nú sendá kondenao, poro to a kele ke nú kreé a sendá kondenao, pokke nu a kreé endí e nombe rí uniko Mona rí Rioso. ¹⁹ E sendá kausa pa a juísio miní: ke Lú a miní a mundo i ma ombé a kelé nchochá okurana ke Lú, pokke to ma kusa lo ke ma jende asé sendá kaika nú. ²⁰ Pokke to ma jendé ke asé kusa mala, e pokke nguta nu rí Lú. i miní nú andí Lú pa ke to kusa mala lo ke sabeba asé sendá enpenaka nú. ²¹ Poro, to ma jendé ke a pratlika (asé) belá belá miní a Lú pa ke tu kusa lo ke sabeba asé endí Rioso, sendá rebelao." ²² Repué rí a akusa, Jesús i ma rissipulo sí a bae pa tiela rí Judea, Aí a kelé po aggún tiembo ku ané í bautisaba. ²³ Juan, tambie tabá bautisá endí Enón, sekka rí Salim, pokke abebá nchochá rí apú aí: jendé a miní a éle i sendá bautiso. ²⁴ Pokke Juan aun nu a tabá andí tramakua. ²⁵ Antonse a komensá ma rissipulo rí Juan i un judío a epepita, po kuenda rí labarsé pa sendá asettao po Rioso. ²⁶ Ané a bae pa andí Juan i chitiá: "Rabí, kiene taba u bo endí uto lao rí Rioso Jordán, rí kiene bo ndá testimonio, a ta bautisa i to ma jendé a ta kuje pa andí Éle. ²⁷ Juan a respondé: "Un ombé nú polé resibí ningun kusa na ma ke sendádaó renje nsulú. ²⁸ Enú memo poleba testifika ke I chitiá: "I sendá Kristo nú ", sí nú ke I chitiá: "I sendá enbiao rí landa rí éle." ²⁹ Esposa sendá rí esposo. Mas kombilesa rí esposo, ke a ta andí lao sí í a kuchalo, sendí gongoroko ngandisimo po nbó rí esposo. Asina antonse, chuchumeko mí sendá konpleto. ³⁰ Sendá nesesario ke Éle kresé, poro ke I reja rí kresé. ³¹ Éle ke kiene a miní rí aríba, a tá po ensima rí to: i kiene ta andí tiela, rí tiela a sendá i rí kusa rí tiela chitiá. Akel ke miní renje nsulú, a ta po ensima rí to jende. ³² Éle testifika rí to lo je guatiá i kuchá, poro ninguno asetta testimonio sí. ³³ Akel ke a resibí testimonio rí éle, a konfiao ke Rioso sendá rí belá belá. ³⁴ Pokke akel ke Rioso a mandá chitiá ma palabra rí Rioso. Pokke Éle nú ndá Epiritu po medida. ³⁵ Tatá a gongorokia a Moná sí i ndá to ma kusa andí mao. ³⁶ To akel ke a kreé andí Moná tené mbila ettera, poro akel ke nu kelé obedesé a Moná nu guatiá mbila, sí nú ke ira rí Rioso kelá po chocha ri tiembo sobre éle.