¹ ¡Galatas sinsiribí! ¿kiene a poné un maldición andi enú? Lande ri ojo ri enú, Jesukristo jue mostrao kumo krusifikado. ² E sendá unika kusa ke i keleba sabé ri enú: "¿Enú a resibí má epiritu sando po pa kusa ri lei o po kree endi kusa ke a ta kuchá? ³ ¿Enú sendá tan sinsiribí? Andi enú a kumensá po ma espiritu, ¿aora bae a kabá andi karne? ⁴ ¿Enú a akongojá po un chochá ri kusa pa na, si sendá pa ná? ⁵ Éle ke a ndá ma espiritu a enú i a asé milagro endi enú, ¿Ta aselo po ma kusa ri lei o po kuchá kú fe? ⁶ Asina kumo Abraam a kreé a Rioso i jue kontado kumo justisia, ⁷ ri e memo fomma, enú ten ke entenguesá, antose, ané ri ma fe, ané sendá moná ri Abraham. ⁸ Ma eskritura, kreiendo ke Rioso tan justifiká a ma gentil po fe, a prediká má ebangelio a Abraam chitiando: "Endi bo to ma terruño tan sendá Bendesío". ⁹ Asina ke, ané ri ma fe sendá bendesido jundo ku Abraam, ombre ri fe. ¹⁰ To ma gende ke ta kreé endi kusa ri ma lei ta maddito; asina ta kribío: "Maddito sendá to ané ke ta kumplí to ma kusá ke tan kribío endi ma lei nú, pa ase e kusa". ¹¹ Aora ta klaro ke niggú gende sendá justifikao lande ri Rioso po ma lei, pokke: "Ma gende justa e ten mbila po ma fe". ¹² Poro ma lei tan miní ri ma fe nú, si no ke: "Ma gende ke ta asé ma kusa ri ma lei, ten ke bibí po e kusa". ¹³ Kristo a liberá suto ri maddisió ri ma lei repué ri asé maddisió po suto pa Éle memo, pokke kribío a tá: "Maddito sendá to aké ke jué koggao endí un palo". ¹⁴ Pa ke má lilenga ri Abraam tan polé miní a má gentil endi Kristo Jesús, pa suto tan polé resibí ma plomesa ri má Espiritu. ¹⁵ Má numano, rejá pa i chitiá ri fomma ke enú polé entendé mi. Un kontrato echo po gende, niggú gende poleba anularlo o añarí aggú kusa repué ri ta firmado. ¹⁶ Aora má promesa jue chitiá a Abraam i ma dessendensia si. No a chitiá: "A dessendiente si", kumo pa un chochá, si nú pa lingó nú má, "i a dessendensia si", kiene sendá Kristo. ¹⁷ Aora lo ke I keleba chitiá sendá sendá e kusa: "Má lei, ke a miní 430 repué, nú ta echá a uto lao nú patto chitiap po Rioso. ¹⁸ Pokke si má erensia ta miní po má lei, antonse ta miní po má promesa nú. Poro Rioso a ndá e kusa a Abraam po merio ri promesa. ¹⁹ ¿Ke a sendá, antonse, ma proposito ri ma lei? E jue puetto po Rioso po kausa ri má pekado, Ata ke ma dessendiente ri Abraam a tan miní a kiene sendá ma promesa, i jue puetta a siribí po má angeles po un meriaro. ²⁰ Aora, kuandi un gende ta chitiá ku uto abeba meriaró nú. i Rioso memo a asé Éle memo promesa kú Abraam. ²¹ Asina ke ¿Sendá lei kontraria a ma promesa ri Rioso? ¡No! Pokke si ma lei tan polé ndá mbila, antonse ma juttisia tan miní po ma lei. ²² Poro má kritua a enselá to kumo pekado. Rioso a asé e kusa pa ke ma promesa ri sabbá a to suto po má fe endi Jesukristo tan polé se ndá a má gende ke kreé. ²³ Aora, ante ke má fe a miní, suto ta kautivo endi má lei, enkarselao ata ke má fe tan sendá rebelá. ²⁴ Asina ke má lei sendá guía ri suto ata kuandi Kristo a miní, pa suto polé sendá justifikao po má fe. ²⁵ Poro aora ke má fe a miní, suta tan gualao endi lei nú. ²⁶ Pokke to enú sendá moná ri Rioso po merio ri Kristo Jesús. ²⁷ Asina ke un chochá ri enú a ta se bautisado endi Kristo, enú a resibí a Kristo. ²⁸ Nú abeba Judío ni Griego, nú abeba esklabo ni suetto, nú abeba ni ombe ni changaina, pokke to enú sendá lingó endi Kristo Jesús. ²⁹ Si enú tan kelá endi Kristo, enú sendá moná ri Abraam, i enú sendá eredero siggú ma promesa.