¹ ¿Huo̧juä̧huä̧ huȩnȩmä̧ huoca'a? ttu̧huȩpä̧ri̧'ä̧cuä̧huä̧mä̧ ¿Pä̧i̧cu̧nä̧mä̧ huoca'a? ² Muä'ca huämȩttö̧ mä̧nä̧ jä̧yä̧, kähuächäcuähuomettö̧, jȩttä̧cuȩmä̧ huo̧juä̧huä̧ huȩnȩtä̧ 'chuhuädi'ina̧'a̧. ³ Äpate ötahuiyära̧'a̧cu̧ doächäcuähuomȩ ä'cattö, juorötä pä̧i̧cu̧nä̧ huojäcuaju. ⁴ "Ucuturu ja̧'a̧, Ttö huo̧chä̧'ö̧mä̧, chi̧huȩnȩmä̧ pi̧jä̧ ttö̧ja̧ tti̧tti̧mö̧ ja̧'a̧. ⁵ Ucutu huo̧jui̧'o̧co̧tö̧mä̧, huo̧juä̧huä̧ huo̧jui̧pä̧tu̧cui̧, ja̧'hua̧ta̧'a̧nö̧ ucutu huo̧juȩcu̧nä̧ huocotömä̧, cu̧huo̧jui̧pä̧tu̧cua̧ pä'ö ja̧'a̧. ⁶ Ä̧ju̧cui̧ttö̧, isopäi'önä̧ adihuäjueitä chu̧cuo̧cuä̧cua̧sä̧ ja̧'hua̧ta̧'a̧nö̧ chä bahuecuächomenä̧mä̧ jueö huȩnȩtä̧ chu̧cuo̧cuä̧cua̧sä̧. ⁷ Ja̧'hua̧nö̧ ja̧'a̧ chämä tta̧'cua̧ huȩnä̧rä̧cuä̧huä̧tä̧ ucuocua'a ja̧'hua̧nö̧ ucuocuomenä chämä surojömä kö'coca'a jä̧cua̧'a̧. ⁸ Ttö chänä chucuocumä adiutä ja̧'a̧; ja̧u̧nä̧mä̧ juiya'a hui̧so̧tö̧ ucuocuähuä'i̧nä̧, yapareäcuähuä'i̧nä̧. ⁹ Ja̧u̧mä̧ o'cajuiyötä jueö huȩnȩtä̧ ja̧'a̧ huo̧jui̧'ä̧tö̧rö̧mä̧; chi̧huȩnȩmä̧ jueö huȩnȩtä̧ jä̧cua̧'a̧ jitö huo̧juä̧chä̧cuä̧huä̧ po̧cui̧pä̧tö̧rö̧mä̧. ¹⁰ Pärätättö ä'canä̧mä̧ ttö jȩ'cua̧ pä'ö huedötä usi; Päcuäi orottö ä'canä̧mä̧ huo̧juä̧chä̧cuä̧huä̧tä̧ usi. ¹¹ Isopäi'önä huo̧juä̧huä̧ huȩnȩmä̧ rö̧ä̧nä̧ micuäuttö'inä yabonä̧nö̧ adihuäjuei ja̧'a̧, koro rö̧ä̧nä̧ micuäumä juiya'a ja̧u̧'a̧nö̧ yoräteumä. ¹² Ttömä huo̧juä̧huä̧ huȩnȩsä̧ ja̧'hua̧nö̧ ja̧'ttö̧ ja̧u̧ huo̧juä̧huä̧ huȩnȩnä̧tä̧ kö̧sä̧, ja̧'hua̧ta̧'a̧nö̧ huo̧juä̧chä̧cuä̧huä̧nä̧tä̧ cue'ächösä juhua'atäcu ttu̧'ȩpä̧rö̧nö̧tä̧. ¹³ TÖ̧Ä̧NÄ̧HUA̧RÖ̧ ucuotäcuähuämä, surojömä yahuocu. Ttömä ttucuo teäcuähuämä ku'cocösä, ucuotäcuähuocömä, surojönä̧tä̧ 'chö̧rö̧mä̧ ja̧'hua̧ta̧'a̧nö̧ surojötä ucuocurumä. Chu̧ju̧'co̧co̧u̧. ¹⁴ Ttömä täbocuä adiu ku̧nä̧rö̧sä̧ ja̧'hua̧ta̧nö̧ huo̧jö̧nä̧ kä̧cuä̧huä̧'i̧nä̧; ttujurunä kä̧cuä̧huä̧'i̧nä̧ ttötä chiäre ja̧'a̧. ¹⁵ Ttönä̧tä̧ hueö ko̧cuä̧to̧ ruhuo hueätö'inä, ja̧'hua̧ta̧nö̧ o'cato'inä adiu hueätömä. ¹⁶ Ruhuotö tti̧tti̧mu̧'inä ötahuiyättö ttu̧huo̧tä̧u̧'i̧nä̧ ja̧'hua̧ta̧nö̧ o'cato'inä adiu hueätö'inä ttönätä̧ huȩä̧tö̧,. ¹⁷ Ttömä repeösä jitö repeätörömä, ja̧'hua̧nö̧ ja̧'a̧nä̧ jitö tu̧ȩcuä̧nä̧ usätömä ttö̧o̧cui̧ä̧cu̧sä̧. ¹⁸ Ttöcutä ka̧'a̧ rö̧ä̧ö̧nä̧ micuäu juäi ku̧nä̧rä̧cuä̧'inä, ja̧'hua̧ta̧nö̧ ucuotönö jȩpö̧ kä̧cuä̧'inä, adiunä kä̧tö̧rö̧mä̧ chi̧yä̧cua̧sä̧ rö̧ä̧nä̧ micuäu juäi recuó ttu̧ju̧nä̧rö̧nä̧. ¹⁹ Ttö chiya pädömä juiyö adiu orottö'inä abonänö, oro adihuäjueittö'inä amonänö; ²⁰ Ttö chiyömä juiyo adiu päcuäi pärätättö'inä abonänö. Ttöma jueö mänänätä 'chö̧sä̧, adihuomenä jȩpa̧tö̧ ttu̧mä̧ni̧yä̧nä̧tä̧. ²¹ Ja̧'hua̧nö̧ jo̧mȩnä̧tä̧, Ttörö repe'ätörömä iyösä ttöäre juiyöjuiyönä rö̧'ä̧chö̧ ttö̧jö̧nä̧; Ttötä sudepä̧u̧ micuäu juäittötä. ²² Ttö ji̧na̧'a̧ ä̧cuo̧mȩnä̧ aditinäcu̧mä̧ CHÖ̧Ä̧NÄ̧HUA̧, ji̧yȩnö̧ pä̧nä̧ aditomenä ä̧cuo̧mȩnä̧ aditinäcumä. ²³ Mo̧ täbocutä aditinäcusä̧, ä̧cuo̧mȩnö̧ ö̧jä̧mä̧di̧nö̧tä̧, pi̧jä̧ aditäcua'a ä'canätä̧. ²⁴ Ä'que'itä ajé deähuoto'inä ajehuiyä'inä juiyä'itä ki̧nö̧nö̧sä̧. ²⁵ Ä'que'itä dea'inä inähuiyä'inä juiyä'itä ki̧nö̧sä̧. ²⁶ TI̧Ä̧NÄ̧HUA̧ aditíyä'itä pi̧jä̧'i̧nä̧ dea'inä, ji̧nä̧́ rȩbá̧ i̧sa̧ppȩ'i̧nä̧ jo̧mȩ́ ji̧yä̧'i̧tä̧ pi̧jä̧nä̧ ttömä̧ ki̧nö̧sä̧. ²⁷ Juo̧'u̧ moro̧jä̧ aditomenämä deähuoto ttö̧'i̧nä̧ 'quȩ'ȩpu̧ u̧ju̧na'i̧nä̧ juȩnȩtä̧ ki̧nö̧sä̧. ²⁸ Ttömä̧ ju̧huȩnȩtä̧ ki̧nö̧sä̧ kä̧rö̧'coppa ju̧'to̧ju̧ ropa u̧ni̧nö̧mä̧ isoppa ja̧'hua̧ta̧'a̧nö̧ ajehuiyä rȩjȩttö̧ räopö jo̧mȩnö̧ jȩpö̧ u̧ju̧ni̧nö̧'inä. ²⁹ Ttö̧mä̧ juȩnȩtä̧ ki̧nö̧sä̧ aje rö̧o̧to beipomä 'cä̧'ȩpö̧ u̧ju̧ni̧nö̧mä̧, ajiya ra̧ pä'ö hueinome yabonö̧ pperecuächö juiyäcua'anö̧ ja̧'hua̧ta̧'a̧nö̧ rȩjȩ juo̧ä̧jä̧ beipomȩ 'chu̧huä̧ro̧mȩ'i̧nä̧ jȩpö̧ u̧ju̧ni̧nö̧mä̧. ³⁰ Ttö̧mä̧ ja̧u̧tä̧cu̧ ki̧nö̧sä̧, huo̧juȩcu̧nä̧ adicuä i̧sa̧cu̧; ttötä ji̧na̧'a̧ 'cuäopönä mo̧ro̧ eseunä ki̧nö̧mä̧, 'cuäopönätä̧ eseu ki̧nö̧sä̧ chutä ä'ca jo̧mȩttö̧mä̧. ³¹ Ttömä̧ esehuinösä aditähuämä̧ o'cajuiyönätä̧, ja̧'hua̧ta̧'a̧nö̧ ttö cheseumä pi̧jä̧ ttö̧ja̧ tti̧tti̧mö̧nä̧tä̧ ki̧na̧'a̧. ³² Ja̧'hua̧nö̧ ja̧'a̧, chi̧tti̧, ä̧ju̧cui̧ttö̧, isopäi'önä jitö ttö huedö jȩpä̧tö̧mä̧ adiunä̧tä̧ jä̧cuo̧tö̧. ³³ Ttö jidäu ä̧ju̧cuä̧tu̧cui̧ ja̧'hua̧nö̧ ä̧ju̧cu̧ huo̧juä̧huä̧ ku̧nä̧rä̧tu̧cui̧; ja̧u̧mä̧ 'quiyönä̧ 'chu̧'ä̧rä̧cuä̧huä̧tu̧cui̧. ³⁴ Ya̧tȩ ja̧u̧ ä̧ju̧cu̧mä̧ adiunätä̧ jö̧nä̧ ppä̧dä̧cuä̧huä̧cua̧. Ja̧u̧mä̧ 'cuäopönä mo̧ro̧tä̧ chäpatenä to̧pä̧rö̧ ö̧jä̧cua̧. ³⁵ Ja̧'hua̧nö̧ ja̧'a̧ ya̧tȩ ttörö topäcuäumä, kä̧cuä̧huä̧ po̧cui̧pö̧, ja̧'hua̧ta̧'a̧nö̧ TÖ̧Ä̧NÄ̧HUA̧TTÖ̧ pädäcuähuätä ö̧'o̧cui̧'ä̧cua̧. ³⁶ Ja̧'hua̧nö̧ ja̧'a̧nä̧ ya̧tȩ ja̧u̧ jäyä jȩpö̧mä̧ chutä a̧mö̧nä̧ pa̧ja̧tö̧tä̧ cuä'äcuäu i̧cuä̧cua̧; o'catoi'önä ttörö kö'cocotömä hua'aretä kö'cätö."