¹ Chi̧tti̧, chi̧hu̧ȩnȩ hua̧'a̧dö ku̧ni̧ ja̧'hua̧ta̧'a̧nö̧ hua̧'a̧dö ku̧ni̧ Ttö huȩdö̧ ucutä jacuänä. ² Ttö huedötä hua'adö ku̧nö̧mä̧ ja̧u̧nä̧tä̧ kä̧hui̧ ja̧'hua̧nö̧ ja̧'a̧nä̧ jȩ'cua̧ pä'ö huedömä̧ hua̧a'adö ku̧ni̧ cui'äre huä̧mȩnä̧ i̧sa̧ta̧ jä̧'i̧nö̧'a̧nö̧. ³ Ti̧ä̧dä̧cuä̧hui̧ cudo'chiyänä̧, huȩyöu̧tä̧cuä̧hui̧ cuamiso'quinä̧. ⁴ Huo̧juä̧huä̧ huȩnȩrö̧ pä'ö: "Ucumä chöjähuajujä," ja̧'hua̧ta̧'a̧nö̧ huo̧jui̧'ä̧cuä̧huä̧mä̧ cha̧hua̧ru̧hua̧ pä'ötä o'i. ⁵ Röjinä̧mä̧ isaju kidepä iyä'chäcuähuäjuttö cu̧ji̧pö̧nä̧ jȩpä̧cuä̧huä̧ji̧jä̧, juaju ki̧huȩnȩmä̧ adiutä ucuocuäju. ⁶ Chojusodettö ventana isäcä 'cä̧tȩnä̧ to̧pä̧rö̧ ki̧nö̧sä̧. ⁷ Ttömä̧ jo̧mȩ juo'ocotörö topinö̧sä̧ ja̧'hua̧ta̧'a̧nö̧ topinö̧sä̧ mö̧ä̧yotö ttö̧'cä̧tȩ jo̧mȩ, ya̧tȩ mö̧ä̧ya̧ huo̧jui̧'ä̧cuä̧huä̧ jui̧'a̧rö̧'i̧nä̧ topinö̧sä̧. ⁸ Ja̧u̧ mö̧ä̧ya̧mä̧ mänä kähuächö u̧yu̧'ca̧ri̧ tö'cönä 'cuäopinö, ja̧'hua̧nö̧ 'cuä'opömä juaju kojusodecu 'chi̧nö̧. ⁹ Kä̧hua̧ ma̧ä̧cho̧mȩnä̧ ni̧pä̧ro̧mȩ juoächa'a, yodo juoächina'a ja̧'hua̧ta̧'a̧nö̧ yodo jö̧nä̧tä̧. ¹⁰ Juorötä ttö̧'o̧cui̧'i̧nä̧cua̧, kidepä iyä'chäcuähuäju ku̧'ca̧tä̧cuä̧'pi 'ca̧tä̧huä̧ju̧tä̧, ka̧miso'quinä̧mä̧ yapareutä. ¹¹ Juajumä̧ borädäcuähuä isaju pinä̧ju̧ ja̧'hua̧ta̧nö̧ pä̧i̧cui̧nä̧ju̧; ku̧jä̧pi̧yä̧mä̧ kojusodenä̧ kö̧ja̧ pä'ömä̧ huocoju pinä̧ju̧. ¹² Ja̧'hua̧nö̧ ja̧'a̧ttö̧ jitämä̧, mä̧niyä̧nä̧'i̧nä̧ ttö̧cuȩ iyähuome'inä̧ u̧yu̧'cä̧ri̧ jo̧mȩpu̧nä̧ tta̧'ä̧rä̧'chu̧ ki̧'ä̧nä̧ju̧ ku'ecuächa pä'ö. ¹³ Ja̧'hua̧nö̧ ja̧'a̧ juajumä̧ ja̧u̧rö̧ päi̧cu̧nä̧ 'chu'ädö 'chu'o̧pi̧nä̧ju̧, jäpäyajutä rö̧ä̧nä̧ kujurucu pä'inä̧ju̧: ¹⁴ "Jitä mo̧ro̧mä̧ u̧nö̧chä̧rö̧ ka̧cuä̧huä̧nä̧ chiäre mippounä iyähuä jȩpä̧jisä̧, ji̧yȩtȩ chi̧yä̧cuȩmä̧ mitö ku̧ni̧nö̧sä̧. ¹⁵ ja̧'hua̧nö̧ ja̧'a̧ttö̧ ichäjusä ucuru chu̧'o̧cui̧'a̧ pä'ö, ö̧sä̧rä̧ju̧sä̧ u̧curu chu'öcui'a̧ pä'ö ja̧'hua̧nö̧ ja̧'a̧ttö̧ chu̧'o̧cui̧'ä̧cu̧jä̧. ¹⁶ Ttö chä̧'ä̧ppä̧mä̧ ucurumä adiu a̧'cua̧cu̧nä̧ ppäepö iyösä Egiptottö linö a̧'cua̧cu̧nä̧ tu̧ȩcuä̧ta̧ttö̧. ¹⁷ Ttömä riähuinösä̧ chä̧'ä̧ppä̧mä̧ mirrattö'inä, áloesttö'inä ja̧'hua̧ta̧nö̧ canela'inä. ¹⁸ Ichí, ti̧'cha̧ esecuähuonö tacua yo̧ä̧i̧ mo̧ro̧ jubu; ti̧chä̧ tidepänä rö̧ä̧nä̧ iyäu teseähuäcua. ¹⁹ Jitä toa'a ttö chirecuo isodenämä̧; ja̧u̧mä̧ recuonä 'chä̧ji̧ kara'a ra'opö. ²⁰ Ja̧'hua̧ta̧nö̧ ja̧u̧mä̧ öäre pärätä ȩco̧jä'inä ȩmi̧pö̧ chä̧ji̧; ppa̧cuä̧chä̧cuä̧ mo̧ro̧mä̧ ka̧cua̧ beipomecu̧. ²¹ ''Jahuäju rö̧ä̧nä̧ ucuocu iso juojepinäcu̧; adiu säyu'unä ucuocu yapare 'cucuocuinäcu̧. ²² Päcayärö cuättomecu̧ i̧'cha̧'a̧ 'cua̧rö̧nä̧ o'capäi'önä jahuäju 'co'ca'anätä 'chö̧ ja̧u̧mä̧, tȩ'u̧rä̧ ä̧tȩcuä̧ ko̧mȩ ö̧ri̧pa̧'a̧ 'cua̧rö̧nä̧, ²³ atiyanä ppo̧'a̧ri̧ doächi'ome jubu. Ja̧u̧mä̧ ppiyuä chutä ä̧tȩcuä̧ ko̧mȩcu̧ joa'a jä̧'i̧nö̧'a̧nö̧ jopö. Ja̧u̧mä̧ jerupinö cha̧'cua̧rö̧mä̧ juȩnȩ jubutä beipö'anö ja̧'a̧ pä'ömä. ²⁴ Ja̧'hua̧nö̧ ja̧'a̧ttö̧ jitämä, chi̧tti̧mö̧, ä̧ju̧cuä̧tu̧cui̧ttö̧; adiunä ä̧ju̧cuä̧tu̧cui̧ chucuocumä. ²⁵ Cuamiso'quittömä ja'huäju isau ku̧mä̧nä̧ra̧'a̧cu̧mä̧ kä̧cui̧pä̧chä̧; cuirettehuächä juä̧mä̧nä̧mä̧. ²⁶ Ucú jähuänä recuätö hua'ö icu'ätö; cuä'ö cuicuähuö̧'i̧nä̧ juiyo recuätö. ²⁷ Huä'ä rejura̧'a̧tä̧ 'chä̧tö̧ ttojusode päi'önä; ju'huätömä yo̧'cö̧ jo̧ca̧nä̧tä̧ rȩbȩhuä̧tö̧ hua'ö icu'cotömä.