¹ Chi̧tti̧ , cuiäre pärätä 'quȩ'ȩpö̧ ku̧nu̧ cuippeyänä kö̧rö̧ chöärou micuä chi̧yä̧cua̧jä̧ päcuinöttö̧mä̧, päroroutä chi̧yä̧cua̧jä̧ päcuinöttö̧mä̧ cuieruhuäcuru, ² ja̧'hua̧nö̧ jȩcu'i̧nö̧mä̧ cua̧mo̧nä̧tä̧ cuä̧tȩcuä̧tä̧ jȩchä̧cua̧sä̧ pä'inöjä̧ ja̧'hua̧nö̧ ja̧'a̧ttö̧ cua̧mo̧nö̧ cui̧huȩnȩnä̧tä̧ ȩki̧pö̧jä̧. ³ Ucutä cua̧mo̧nä̧ cui̧huȩnȩnä̧ cuȩki̧po̧mȩnä̧mä̧, chi̧tti̧ pa̧'a̧nö̧ jȩpi̧ cuamonä surojöttö cu̧ji̧pa̧ pä'ömä, tä'cö cuippeyänä kö̧ u̧mu̧nä̧ mo̧ä̧ji̧jä̧; tä'i ja̧u̧ ä'ca jometä̧ ja̧'hua̧ta̧nö̧ jȩcha̧ pädoca'anä päi'aja'a pä'ö jäepirö ja̧u̧mä̧. ⁴ Cui'äre 'cuächia'anämä ja̧'a̧tä̧ tocu'ä ja̧'hua̧ta̧'a̧nö̧ cui'äre yȩbi̧ö̧'i̧nä̧ ä'ä'öjuiyönätä̧ kä̧hui̧. ⁵ Cua̧mo̧nä̧tä̧ surujöttö ki̧'i̧pi̧ po̧i̧ ȩmä̧huä̧ i̧sa̧ u̧mö̧ttö̧ tȩ'u̧rä̧ ö̧ji̧pa̧'a̧ jä̧'i̧nö̧'a̧nö̧, ppö'ä po̧i̧ ȩmä̧huä̧ i̧sa̧ u̧mö̧ttö̧ ppiyuhuä ö̧ji̧pa̧'a̧ jä̧'i̧nö̧'a̧nö̧. ⁶ Isotörö topi, ucu, ttö̧ja̧sa̧ ö̧tä̧hua̧, topi ja'huätö isotö jȩtta̧'a̧ ja̧'hua̧nö̧ jȩttö̧ttö topö huo̧juä̧chi̧. ⁷ Ji̧'ä̧huä̧rö̧rö̧'i̧nä̧, ttu̧ru̧hua̧'i̧nä̧ ruhuo hu8e'ö'inä to'ättö, ⁸ ja̧'hua̧nö̧ ja̧'a̧nä̧, duhuonätä jo̧mȩnö̧ aditö ku̧nä̧tö̧ ttu̧cuä̧mä̧ jä'huata'anö ttu̧cuä̧ 'chiyächome hua'adö ku̧nä̧to̧ ttu̧cuä̧cuä̧. ⁹ ¿Tta̧'a̧nö̧ recuó cuä'ä cua'attö̧, ttö̧ja̧'isä i̧tä̧hua̧mä? ¿ti̧yȩnö̧ cuä̧rä̧mi̧'ä̧ cua̧'a̧ttö̧ ucú cuäomettö̧mä̧? ¹⁰ Ji̧nä̧́ cuijó ppä'ecuiö 'cuä'ächiö cuä'a päcua'a ¹¹ ja̧'hua̧nö̧ ja̧'a̧ttö̧ ya̧tȩ näu̧cuä̧rä̧cuä̧huä̧'i̧sä̧ ichaa jä̧i̧nö̧'a̧nö̧ i̧chä̧cua̧jä̧ jui̧'a̧ cui̧jö̧nä̧ ja̧'hua̧ta̧'a̧nä̧ suro̧dä̧'u̧i̧sä̧ curä rohuäcuähuäcu ichö 'cho'i pa'a jä̧i̧nö̧'a̧nö̧ ucuru recuä rȩjö̧́ rȩbȩhuä̧cua̧jä̧. ¹² Ttö̧ja̧'i̧sä̧ suronä úcuo juiyönä jȩpu̧mä̧, ichö yaparetä ucu'ocu, ¹³ Iäre'inä hui̧'ä̧dä̧'chö̧ ye'ädä'chö jȩpu̧, i̧jä̧pu̧nä̧'i̧nä̧ pporädä'chö jiähuö ja̧'hua̧ta̧'a̧nö̧ ido'chiyänä'inä pä̧tȩtä̧rö̧ jiähuö. ¹⁴ Ja̧u̧mä̧ ami iso'quinämä surojö yaparetä amucuädö, ja̧u̧mä̧ cuä̧'o̧pu̧nä̧ tturohuähuönä̧tä̧ jȩpö̧. ¹⁵ Ja̧'hua̧'a̧nö̧ ja̧'a̧nä̧ surojö̧nä̧ jȩä̧ji̧mä̧ yotäcu rȩbȩhui̧pä̧cua̧, ja̧u̧mä̧ ieruhuäcuähua'anätä ö̧'i̧pö̧ juiyönä ju̧iyötä surojuo'epö ichäcua'a. ¹⁶ Ttu̧ru̧hua̧ a̧mi̧suru to'ömä ca̧'a̧ ko̧ro̧mu̧tö̧nö̧ ya'ute jähuä jomenä, ko̧ro̧mötö̧nö̧ todärenä jömä ja̧'u̧mä̧ u̧su̧ro̧tö̧. ¹⁷ Ttucuo te'ähuätö tti'äriyämä, tti̧nȩ ya̧pa̧rȩhuä̧nȩmä̧, ttu̧mö̧pi̧yä̧ suronä jȩpo̧co̧tö̧ cuä'äu tti̧cuä̧mö̧mä̧, ¹⁸ tta̧mi̧so'qui surojutä a̧mö̧cuädo'quimä, ttö̧jä̧pi̧yä̧ surojö jȩtta̧ pä'ö jurunä jo̧ä̧mö̧mä̧, ¹⁹ topäji'ca̧ yapare ji'äumä ja̧'hua̧ta̧'a̧nö̧ ahuaruhuärö to'ija̧'a̧cu̧ ji'ähuä'chumä. ²⁰ Chi̧tti̧, cuä'o hueömä ucuoti ja̧'hua̧ta̧'a̧nö̧ cua̧ju̧ ku̧huo̧juȩtö̧mä̧ jaro'cui'ipä. ²¹ 'Cuäopönä̧tä̧ cuamiso'quinä tö̧'ä̧dä̧cuä̧u̧ ru̧ni̧; ja̧'hua̧ta̧'a̧nö̧ cu̧ru̧pä̧'quȩnä̧ äcuädäcuäu ru̧nä̧hui̧. ²² Cuecuächome punä̧mä̧ jua'atä ottipäcujä̧; cuä'omȩnä̧'i̧nä̧ jua'atä tta̧ttä̧rä̧cua̧jä̧ ucurumä̧; ja̧'hua̧ta̧nö̧ cu'orächomedä̧, jua'attötä ttö̧huo̧juȩtä̧cuä̧jä̧. ²³ Hueähuä huȩnȩmä̧ tejähuore ja̧'a̧, ja̧'hua̧ta̧nö̧ huo̧juȩcuä̧mä̧ tȩa̧u̧ ja̧'a̧; juecuecuächa̧ pä'ömä̧ icha'a cu̧huo̧jui̧'o̧mȩnä̧tä̧ juä̧mä̧nä̧tä̧ ja̧'a̧ cua̧'cua̧rö̧ mä̧nä̧mä̧. ²⁴ Suronä̧ jȩä̧cuä̧huä̧ isajurö'inä̧ tta̧'a̧rö̧, suronä̧ jȩpä̧ju̧mä̧ adiu ucuocuäju kihuȩnȩmä̧. ²⁵ Cuami'isoquinä̧mä̧ 'cö'quecunä̧mä̧ to'cuä juaju kö'adihuämä̧ juaju kȩmi̧pa̧'a̧nä̧mä̧ cuiyähuä kiäre ö'adihuänä̧tä̧. ²⁶ kidepä iyä'chajucu cuäöttömä ji̧'qui̧cha̧nö̧ pa̧ppä̧ micuäcuometä̧ ja̧'a̧, ja̧'hua̧nö̧ ja̧'a̧nä̧ ka̧ra̧ irecuarö jȩ'cu̧tu̧mä̧ cuamonä cua̧'cua̧rö̧tä̧ toepuächöjä. ²⁷ ¿Ya̧tȩ ttö̧ja̧sa̧mä̧ amucanä ocurä cuoa'a jö̧ja̧'anö ö̧'ca̧tä̧cuä̧ta̧mä̧ cuo'ö icu juiyö'anö tä̧ji̧? ²⁸ ¿Ya̧tȩ ttö̧ja̧sa̧mä̧ ä̧ya̧risa duäsanä i̧'chö̧'anä ö̧jä̧pu̧nä̧'inä cuo'ö icuoca'a i̧'chö̧'anö ja̧'a̧ tä̧ji̧? ²⁹ Ja̧'hua̧nö̧tä̧ ja̧'a̧ ippeyänä kö̧ irecuacu ä'omenämä; jahuäjucu ä'äjimä ro̧ȩcuä̧ juiyönämä i̧'chi̧yä̧cua̧. ³⁰ Ttöjamä juo̧juä̧chi̧'o̧co̧tö̧ nä̧u̧cuä̧rö̧rö̧ juiyö rö̧ä̧nä̧ ucua ppä'öjä̧cu̧ ö̧na̧u̧cua̧'a̧ pä'ö'inä. ³¹ Ja̧'hua̧nö̧ ja̧'a̧nä̧'i̧nä̧, ja̧u̧ru̧ 'chuttädöttömä, ji̧mu̧tȩ ta'arenö jo̧mȩnä̧ i̧mi̧tä̧huä̧cua̧ ö̧nä̧u̧cuä̧ji̧ micuämä; ja̧u̧mä̧ iya pä'ö ja̧'a̧ micuäujuäi ojusudenä u̧ju̧nä̧rö̧. ³² Chu irecua pocojucu a'ömä huo̧huä̧chi̧'o̧cö̧tä̧ hua̧; Chu ja̧'hua̧nö̧ jȩpö̧mä̧ a̧mo̧nä̧tä̧ si'epö icuäu. ³³ Cuäcuäpö dä'ä ttuttepö'anätä hua̧ ja̧u̧mä̧ ja̧'hua̧nö̧ ja̧'a̧ttö̧ suronä jȩi̧nö̧mä̧ si'epö'inä icuähuocötä hua̧. ³⁴ Ya̧tȩ ttö̧ja̧'i̧sä̧ a'cuoyäu i̧ra̧huä̧ri̧pu̧mä̧; juo̧u̧mä̧ toäjimä ucuotiya̧cua̧ ro̧ȩpa̧ pä'ömä. ³⁵ Juo̧u̧mä̧ ttimitarö päö'inä kö'cocö mitö ȩmä̧huo̧cö̧ ja̧'a̧ttö̧, ja̧'hua̧ta̧'a̧nö̧ ri̧ȩnä̧ cuiya pe'ö cuesecuttö'inä.