¹ Ttö chi̧tti̧, adiunä ä̧cui̧jó cua̧ja̧ be'ecu ttö chu̧huo̧jö̧; jidäcua'anä, ² pa̧'a̧nö̧tä̧ cu̧huo̧ji̧ä̧cua̧jä̧ ttu̧ȩpä̧rä̧cuä̧'cuä̧mä̧ ja̧'hua̧ta̧nö̧ ja̧'a̧ttö̧ cu̧huo̧ji̧ä̧ji̧tä̧ huo̧jö̧nä̧ cu̧cuo̧huä̧cua̧jä̧. ³ Kidepä iyä'chaju ki̧huȩnȩmä̧ mayá isoya dahuipa'a jä̧i̧nö̧'anö cuaju ja̧'hua̧ta̧nö̧ cämä a̧dȩ isoya säyuhua'a jä̧i̧nö̧'anö cuaju, ⁴ ja̧'hua̧nö̧ ja̧'a̧nä̧ jahuäjumä rijicumä re'aju ni̧yȩcuä̧ 'cua̧rö̧nä̧, curä'chu so̧ä̧'chu 'cua̧rö̧nä̧tä̧ 'cuiäju. ⁵ 'Chä̧nö̧ jȩö̧mä̧ hua'arera̧'a̧tä̧ ȩpä̧cu̧; ö̧jä̧dö̧ta̧'a̧nö̧ ȩpä̧cu̧ hua'are rejucu. ⁶ Kä̧cuä̧huä̧ i'co mänä'inä huo̧juä̧chi̧'o̧cö̧. I̧'cha̧ pä'ömä dödöpötä dödöpö; ja'huäjumä ki̧'cho̧mȩ päteö'ö'i̧nä̧ jerupaju. ⁷ Ja̧'hua̧nö̧ ja̧'a̧ttö̧ jitämä, chi̧tti̧mö̧, ä̧ju̧cuä̧tu̧cui̧ttö̧; chucuocu cuä̧ju̧cuä̧tu̧cuo̧ca̧'a̧ jö̧nä̧mä̧ jȩcu̧'ä̧tu̧cuä̧ttö̧. ⁸ Ja'huäju isau ku̧mä̧nä̧ttö̧mö̧ otonä kä̧tu̧cui̧ ja̧'hua̧ta̧'a̧nö̧ kojusode apate ä'ca'inä tö'cömä päcui'ätucuä. ⁹ Ttö̧ja̧ suronä ra̧hua̧pi̧jö̧nä̧ jȩpu̧ esehuätörö cua̧'cua̧rö̧ iyähuicu beipäjipu cuicua päcua'a ja̧'hua̧ta̧'a̧nö̧ adihuö cui̧jä̧'i̧ji̧ duottömä̧; ¹⁰ O'caju'iyönä aditö cui̧'o̧cui̧nö̧mä̧ pärätä ucuru ttimittinömä, korotö ttö̧mu̧nä̧mä̧ 'chi̧yä̧cua̧'a̧. ¹¹ Cua̧'cua̧rö̧ rijimä, cua̧'cua̧ ttä̧cu'ȩcua̧cua̧jä̧ ju'iö kanö cu̧ju̧nä̧rä̧ji̧ o'cajuiyönä beipächäcu. ¹² Ja̧'hua̧nö̧ ja̧'a̧ päcua̧ cua̧jä̧: ¿Däjé pe'ö chäju̧co̧co̧'a̧jä̧ttö̧ ttö chäorömä? ¿Däjé pe'ö chäju̧co̧co̧'a̧jä̧ttö̧ ttörö huo̧jeu̧tö̧rö̧mä̧? ¹³ Ttömä ä̧ju̧cuo̧cö̧ chä̧cua̧sä̧ ttörö huo̧juȩtä̧tö̧rö̧mä̧ ja̧'hua̧ta̧'a̧nö̧ ja̧rȩyö̧ päi'ocösä chä̧ju̧cua̧ pä'ömä ttörö jiähuätörö. ¹⁴ Ttömä̧ ki̧nö̧sä̧ o'cajuiyönä jui̧'a̧tä̧ ki̧nö̧sä̧ ttö̧ja̧ ttö̧ca̧ca̧cuo̧mȩ jubö päi'önä. ¹⁵ Ajiyamä ahui cuamo̧nä̧ cuahuoyatö ja̧'hua̧ta̧'a̧nö̧ ahui cuamo̧nä̧ cui̧rejuttö räopoyatä. ¹⁶ ¿Ja̧'a̧tä̧ to'cu'anö ja̧'a̧ ajiya cuahuoya huerächö icua'anä ja̧'hua̧ta̧'a̧nö̧ huerä̧cha̧'a̧nä̧ ttu̧cuä̧ ttiyome kä̧tȩttö̧mä̧? ¹⁷ Ja̧'a̧tä̧ topi ucutä cuahuoya ja̧'a̧nä̧ ja̧'hua̧ta̧'a̧nö̧ cuieruhuäcurumä cuiyähuä. ¹⁸ Adiunä jö̧nä̧ ku̧ju̧nä̧ ucuru todeunä jä̧cua̧'a̧ ja̧'hua̧ta̧'a̧nö̧ mö̧ä̧ya̧ ku̧jä̧i̧ cuirecuacumä eseutä kä̧hui̧, ¹⁹ juaju cuirecuamä juiyo adihuaju cierva isaju jä̧'i̧ja̧'a̧nö̧ ja̧'hua̧ta̧'a̧nö̧ a̧'cua̧cua̧ju̧ tȩ'u̧rä̧ 'cua̧rö̧nä̧. 'Cuäopönä mo̧ro̧ ucuru keseu kiya'anä ja̧'a̧tä̧ topiju; ja̧u̧ repeäcuähuämä̧ beipächö juiyönä kä̧cua̧'a̧nö̧. ²⁰ ¿Tta̧'a̧nö̧ pä'ö ja̧hua̧nö̧ jȩ'cua̧'a̧ttö̧, chi̧tti̧, kidepä micuänä iyä'chäcuähuäju 'chu'ädö ku̧ju̧na̧'a̧nä̧mä̧ cuiyähua'attö̧?; ¿Tta̧'a̧nö̧ pä'ö isaju cuieruhuäcua katatenä̧mä̧ huacuädä'cha'attö? ²¹ TÖ̧Ä̧NÄ̧HUA̧MÄ̧ ttö̧ja̧sa̧ jȩö̧mä̧ o'cajuiyötä topö ja̧'hua̧ta̧'a̧nö̧ o'catoi'önä ttö̧ja̧ jȩpö̧ cuettächome'i̧nä̧ to̧pä̧rö̧. ²² Yä̧tȩ suronä̧ jȩpö̧mä̧ ji̧yȩtä̧ suronä jȩä̧ji̧nä̧tä̧ chuhuädäcuä̧huä̧cua̧; suronä̧ jȩä̧ji̧ isappä̧nä̧tä̧ 'quiyönä̧ nö̧cädö ru̧tä̧huä̧cua̧. ²³ Ja̧u̧mä̧ jȩä̧cuȩ ro̧'ȩpö̧ jittähuococutä 'corujuo̧ä̧chä̧cua̧; ja̧u̧mä̧ surojö mä̧nä̧ra̧'a̧tä̧ oipä̧chä̧cua̧ rö̧ä̧nä̧ ja̧'a̧tä̧ra̧'a̧ ucuocunä̧tä̧.