¹ Jä̧ju̧cuä̧tu̧cui̧, tti̧tti̧mö̧, jȩcu̧'ä̧tu̧cuä̧cua̧'a̧ ttö'o jiäu, ja̧'hua̧ta̧'a̧nö̧ adiu ttu̧'ȩpä̧rö̧nä̧ ä̧ju̧cuä̧tu̧cui̧ ttu̧cuȩpä̧ri̧'ä̧tu̧cuä̧cua̧'a̧nö̧ tta̧'a̧nö̧ pä'ö ja̧'a̧ttö̧ pä'ö. ² Ttömä adihuäjueitä jȩcu̧'ä̧tu̧cua̧ pä'ö ji'äu iyösä ucuturumä; jarocui'ätucuä ttö jidäumä. ³ Ji̧nä̧ chä'o i̧tti̧ chäimä, cha̧ju̧tä̧ ki̧tti̧ ka̧tȩhua̧ ja'huata'anö chu̧'ä̧cua̧; ⁴ ja̧u̧mä̧ huo̧juȩttö̧ kä̧nö̧ pä̧i̧nä̧cu̧sä̧: "Cuamiso'quinätä amöcuädi ttö padinätä̧; Huedinönätä̧ jȩpö̧ kä̧hui̧. ⁵ Usi huo̧juä̧huä̧ttö̧ ja̧'hua̧ta̧'a̧nö̧ huo̧juä̧chi̧'ö̧nö̧ kä̧cuä̧huä̧ttö̧; Cunichi'ä jaropö'inä jarocu'ä pi̧yȩ ttö chucuocumä; ⁶ Jarocui'ä cu̧huo̧juä̧chi̧nö̧mä̧ ja̧u̧tä̧ ucuru ttahuäräcuämä; Repe'ö tta̧'a̧ri̧ ja̧'hua̧ta̧'a̧nö̧ jahuäjutä ucuru surojuttu cu̧ji̧pö̧nä̧ tta̧'a̧rä̧ju̧mä̧. ⁷ Cu̧huo̧juä̧chi̧nö̧ ja̧'a̧ rö̧ä̧nä̧ micuäumä, ja̧'hua̧nö̧ ja̧'a̧ttö̧, cu̧huo̧juä̧cha̧ usi ja̧'hua̧ta̧'a̧nö̧ o'cajuiyönä cu̧ju̧nä̧rö̧mȩmä̧ cu̧huo̧juä̧cha̧tä̧ usi. ⁸ Cu̧huo̧juä̧chi̧nö̧tä̧ micuäunä topi ja̧'hua̧nö̧ jȩcu̧'o̧mȩnä̧tä̧ ucuru roänä kesehuä̧cua̧jä̧; Ja'huäjumä ucuru kucuotäcuaju hua'adi'äkä̧nö̧. ⁹ Ja'huäjutä ja̧'a̧ ucuru ucuotäcuähuä pö̧ttä̧huo̧bö̧ cunä cä'epö ku̧huä̧nä̧cua̧ju̧mä̧; Ja'huäjutä ja̧'a̧ pö̧ttä̧huo̧bö̧ a̧di̧huo̧bö̧ kiyäcuajumä." ¹⁰ Ä̧ju̧cui̧, chi̧tti̧ chuhuȩjȩtö̧mä̧ ucuotönö ä̧ju̧cui̧ ja̧'hua̧nö̧ jö̧ttö̧mä̧ ucumä recuo duó cui̧jä̧cua̧jä̧. ¹¹ Ttötä chuhuo̧juȩtä̧cu̧jä̧ ucú cui̧ja̧ pe'ö huo̧ju̧'ä̧huä̧nä̧tä̧; ttötä jidähuäcujä ucuotönö cui̧ja̧ pe'ö. ¹² Jȩ'cua̧ pe'ö cuamucuädömä, jȩ'cua̧ cua̧jä̧ a̧di̧u̧nä̧tä̧ ucumä. ¹³ Ucuru jidähuä'itä 'chö̧ä̧rö̧ kä̧huí̧, cunichioca'atä, tta̧'a̧rä̧cuä̧hui̧, juo̧u̧nä̧tä̧ ja̧'a̧ ucú cua̧'cua̧rö̧mä̧. ¹⁴ Suropätucumä cui̧jä̧, juätö suronä jȩttö̧cu̧mä̧ cui̧'chä̧. ¹⁵ Ttö̧ȩpä̧rä̧cuä̧huö̧ kä̧hui̧, juo̧u̧cu̧mä̧ cui̧'chä̧; juo̧u̧ttö̧mä̧ ti'ipächä̧ri̧ ja̧'hua̧nö̧ ja̧'a̧ttö̧ ko̧ro̧mȩnä̧tä̧ tä'í. ¹⁶ Ja̧'hua̧'a̧nö̧ ja̧'a̧ juhuätömä̧ ä'ocotö ttäcuotö suronä jetto̧mȩ jubö ja̧'hua̧ta̧'a̧nö̧ ä'ocotö ya̧tȩrä̧ttö̧'udimä beipächä'u̧ ya̧tȩrö̧ tto'epö kättome jubö. ¹⁷ Ja̧'hua̧'a̧nö̧ ja̧'a̧ juätömä̧ ttö̧cuä̧mä̧ surojö̧nä̧ jȩpä̧tö̧ tö̧cuä̧ttö̧ cuätö̧ ja̧'hua̧ta̧'a̧nö̧ ahuätö vino isoya suropätö tta̧huȩmä̧. ¹⁸ Ja̧'hua̧nö̧ ja̧'a̧nä̧ ttö̧ja̧ adiu jȩpä̧tö̧ ttö̧mä̧nä̧mä̧ pä'ö mo̧ro̧ juoa'a jä̧'i̧nö̧'a̧nö̧ kä̧dȩpä̧tö̧ jo̧mȩ jubö mo̧ro̧ juhuome jubö. ¹⁹ Suröjö̧nä̧ jȩpä̧tö̧mä yo̧u̧ jä̧'i̧nö̧'a̧nö̧ huotö. Jahuätömä tto̧ȩpä̧rö̧ tta̧huä̧rä̧u̧. ²⁰ Chi̧tti̧, chi̧huȩnȩ adiu ä̧ju̧cui̧; pädömä adiu ä̧ju̧cui̧ttö̧. ²¹ Tochö juiyaja pä'ömä päcuä; cuamiso'quinä 'quiyönä 'chu̧'ä̧rä̧cuä̧u̧ kä̧hui̧. ²² Isopäi'önä̧tä̧ chi̧huȩnȩmä̧ kä̧cuä̧huä̧ ja̧'a̧ jitö ja̧u̧ po̧cui̧pä̧tö̧rö̧mä̧ ja̧'hua̧ta̧'a̧nö̧ jättäpäyotörö ja̧u̧ aditö icuäcua'a. ²³ Cuamöcuädömä jäyä päi'öjuiyönä 'chu̧'ä̧rä̧cuä̧hui̧ ja̧'hua̧ta̧'a̧nö̧ cua̧mi̧'qui'ächi'ö cujurucu adiu jȩpö̧ ku̧ni̧, ja̧u̧tä̧ ja̧'a̧ tta̧'cua̧rö̧ kada'cahuomemä. ²⁴ Jueönä̧ jo̧cö̧ ttöcuocuttömä̧ 'cä̧'i̧pä̧chi̧ ucumä̧ ja̧hua̧ta̧nö̧ jueö jähuä ucucu jȩpö̧ ko̧cö̧ttö̧mä̧ 'cä̧'i̧pä̧chi̧. ²⁵ Topi cui̧'cho̧mȩ päte'ö jueönä̧tä̧ cuä'cacutä̧ ja̧'hua̧ta̧nö̧ adiu topi cuä'cacu̧tä̧. ²⁶ Cu̧mä̧nä̧ jueö mä̧nä̧nä̧ täi; ja̧'hua̧nö̧ ja̧'a̧ttö̧ O'cajuiyönä̧ cu̧mä̧nä̧ cui̧'chä̧mä̧mä̧ isopäi'önä̧ jä̧cua̧'a̧. ²⁷ cuieruhua'acu'inä̧ cu̧huo̧jua̧cu'i̧nä̧ kärächu to'cuä; pörächi surojuttömä cui̧jä̧dä̧ surojucumä̧.