¹ Chi̧tti̧, yorö'iso cu̧ni̧chi̧'ä Ttö̧ chi̧huȩnȩ hueähuä̧ huȩnȩmä̧ ja̧'hua̧ta̧'a̧nö̧ hua'adö ku̧ni̧ chu̧huo̧juo̧tä̧ji̧mä̧ cua̧mi̧ i̧so̧'qui̧nä̧, ² Ja̧'hua̧nö̧ ja̧'a̧ juä̧töttä yabocu ppättädäcuotömä cu̧jö̧ mo̧ro̧ otoa pä'ömä ja'huata'anö adiu cu̧ja̧ pä'ö huȩnȩ juiyönä. ³ Jaro'cui'o rekä̧nö̧ utodecuinö̧mä̧ ja̧'hua̧ta̧'a̧nö̧ tta̧'cua̧ huȩnä̧rä̧cu̧huä̧mä̧ yorö'iso jaro'cui'ä cu̧ru̧pä̧'quȩnä̧ kärocuächönä rö̧nä̧hui̧, huȩyu̧tö̧ ku̧nä̧hui̧ cua̧mi̧ i̧so̧'qui̧nä̧. ⁴ Ja̧'hua̧nö̧ jo̧mȩnä̧ ucumä ppädacuähuä cu̧'o̧cui̧'ä̧cua̧jä̧ ja̧'hua̧ta̧'a̧nö̧ adiutä cu̧ju̧nä̧rä̧cu̧a̧jä̧ Dios ä'ca jo̧mȩttö̧'i̧nä̧ ja̧'hua̧ta̧'a̧nö̧ ttö̧ja̧ttö̧'i̧nä̧. ⁵ TÖ̧Ä̧NÄ̧HUA̧RÖ̧ cuamiso'qui o'cajuiyönä cua̧'cua̧ huȩnä̧ri̧, cua̧mö̧nä̧ pa̧ja̧tö̧ cu̧huo̧jui̧pa̧'a̧cu̧tä̧mä̧ jȩ'cuä̧; ⁶ o'cajuiyönä jȩ'cuä̧ji̧mä̧ a̧ jȩpä̧ji̧sä̧ pä'i ja̧'hua̧nö̧ päcuomenä Ja̧u̧mä̧ cu̧mä̧nä̧ juȩpä̧cua̧jä̧. ⁷ Cua̧mö̧cuädönä̧tä̧mä̧ huo̧jua̧sä̧ päcuä; TÖ̧Ä̧NÄ̧HUA̧RÖ̧ ucuoti ja̧'hua̧nö̧ ucuotö surojöttömä 'cä̧'i̧pä̧chi̧. ⁸ Pi̧yȩ jȩ'cu̧ttö̧mä̧ jä̧ttä̧ä̧ya̧ aditö i̧cuä̧cua̧jä̧ ja̧'hua̧ta̧'a̧nö̧ Jä̧ttä̧pä̧ya̧ cujuruhuächä̧cua̧jä̧. ⁹ Cuiäre rö̧ä̧nä̧ cu̧ju̧nä̧rö̧nä̧mä̧ TÖ̧Ä̧NÄ̧HUA̧RÖ̧TÄ̧ ucuo te'ähui ja̧'hua̧ta̧'a̧nö̧ cu̧ju̧nä̧huä̧ttö̧ ä̧cuo̧mȩnä̧ u̧huä̧ju̧ huȩjö̧ttö̧'i̧nä̧, ¹⁰ cuojusodettö cu̧cuä̧ rutähuomemä suhuädi'äcua'a juhua'acu cuiäre 'cä̧nä̧ri̧ o̧yu̧'i̧nä̧ vino isoya jareoyattö su'ädi'ö totoäcuähuäcua'a. ¹¹ Chi̧tti̧, TÖ̧Ä̧NÄ̧HUA̧ u̧huo̧juȩtö̧mä̧ yacuocuä ja̧'hua̧ta̧'a̧nö̧ Ja̧u̧ ro̧ȩpö̧mä̧ cuju'cö juiyönämä to'cuä, ¹² isopäi'önä̧tä̧ TÖ̧Ä̧NÄ̧HUA̧MÄ̧ tä̧bo̧tä̧rö̧ jitö chutä repeä̧u̧rö̧mä̧, ya̧tȩ ttä'o i̧tti̧ repeäcuru tä̧bo̧tä̧rö̧ ji̧ä̧huä̧ra̧'a̧ jä̧'i̧nö̧'a̧nö̧. ¹³ Chu huo̧jä̧cuä̧ po̧cui̧pö̧mä̧ ppädäcuähuä ȩmä̧cua̧; ja̧'hua̧ta̧nö̧ ja̧u̧mä̧ huo̧jä̧chi̧ä̧cuä̧'inä u̧ju̧nä̧rä̧cua̧. ¹⁴ Ucu huo̧jä̧cuä̧ cuȩmä̧ji̧mä̧ juiyo adicua'a parätättö'inä abonänö ja̧'hu̧a̧ta̧nö̧ rö̧chi̧pö̧nä̧ cuȩmu̧mä̧ orottö'inä abonänö adihua'a. ¹⁵ Ttu̧huo̧ju̧mä̧ rö̧ä̧nä̧ micuäu orottö tta̧'cua̧tö̧ 'cua̧rö̧nä̧ ja̧'hua̧ta̧'a̧nö̧ ja̧'a̧nä̧ ucutä cu̧ju̧nä̧römä̧ ja̧u̧cu̧mä̧ pätetö tocu'a pä'ömä juiya'a. ¹⁶ Ja̧u̧mä̧ recuo kö̧ ja̧'a̧ cu̧mö̧ cu̧huo̧jua̧'a̧nä̧ i̧sä̧mu̧nä̧mä̧; cuieruhua'anä i̧sa̧mu̧mä̧ ko̧cua̧'a̧ järe rö̧ä̧nä̧ ku̧nä̧rä̧cuä̧hua̧ ja̧'hua̧ta̧'a̧nö̧ ucuo jö̧nä̧ kö̧cuä̧huä̧'i̧nä̧. ¹⁷ U̧mä̧nä̧mä̧ adiunä esecuä mänä ja̧'a̧ ja̧'hua̧ta̧'a̧nö̧ o'cajuiyönä ppo̧ö̧ mä̧ni̧yä̧mä̧ esecu kä̧cuä̧huä̧ ja̧'a̧. ¹⁸ Jäi daumä tta'cuarö̧ köi ja'huäittö cuätörömä, ja'huäittö chu̧'ä̧rö̧ ko̧cuä̧tö̧mä̧ eseunutä kä̧tö̧. ¹⁹ Huo̧juä̧huä̧nä̧tä̧ TÖ̧Ä̧NÄ̧HUA̧MÄ̧ pi̧jä̧'i̧nä̧ aditinö, chutä a̧'cua̧nä̧ u̧huo̧ju̧nä̧tä̧ mo̧ro̧jä̧'i̧nä̧ aditinö. ²⁰ Rö̧ä̧nä̧ täcunä u̧huo̧juo̧mȩtä̧ ja̧'a̧ttö̧ bachächina'a ja̧'hua̧ta̧'a̧nö̧ ajiya isoppa'inä ka̧ppȩppȩnö̧ ma̧i̧na̧'a̧. ²¹ Chitti̧, cunichi̧ä̧ ucú to'cömä; ttö̧ȩpä̧rä̧chi̧i̧ jidäumä huo̧juä̧huä̧'i̧nä̧; ²² ucunätä̧ tta̧'cua̧rä̧cuo̧ttö̧ juätömä ja̧'hua̧nö̧ ja̧'a̧ttö̧ i̧jȩcuä̧ pä'iönä cu̧ru̧pä̧'quȩnä̧ rä'u tta̧'cua̧ta̧'a̧ jä̧i̧nö̧'a̧nö̧ jä̧cua̧'a̧ ²³ Ja̧'hua̧nö̧ ja̧'a̧ttö̧ cui̧jä̧cua̧jä̧ huené jui̧yö̧nä̧, surojömä jȩ'cui̧yä̧cua̧jä̧ ucumä. ²⁴ Cuä'apeö cui̧ä̧mä̧do̧mȩnä̧mä̧ yecuhue cui̧yä̧cua̧jä̧, huȩnȩ́ juiyönätä̧ cuä̧'a̧cua̧jä̧. ²⁵ Yecuecuä̧ ju̧rö̧nä̧ ra̧huä̧pi̧jö̧nä̧mä̧ ja̧hua̧ta̧'a̧nö̧ suronä jȩpä̧tö̧rö̧ surojuo'epö ichomenämä, ²⁶ Ja̧'hua̧nö̧ ja̧'a̧ TTU̧RU̧HUA̧MÄ̧ cuippeyänä kä̧nö̧ cu̧jä̧pi̧yä̧'i̧nä̧ cuabo jähuä ȩmi̧pö̧ juiyönä tta̧huä̧rä̧cua̧jä̧. ²⁷ Adiunä jö̧ ppäcuäda'anö jö̧ttö̧mä̧ jȩchö̧ juiyö'anö ja̧'a̧ päcuätucuä, ji̧yȩtȩ jȩ'cu̧'a̧nö̧ cujurunä kö̧ttö̧mä̧. ²⁸ Cuippeyänä kö̧rö̧mä̧ päcuä: ichihuä ppa̧'ä̧chi̧ yo̧'ä̧i̧ mo̧ro̧tä̧ chi̧ya̧cu̧jä" cu̧mö̧nä̧ pä̧rä̧tä̧bi̧ cu̧ju̧nä̧rö̧ttö̧mä̧. ²⁹ Cuippeänä kö̧rö̧ suronä jȩ'cua̧ pä'ömä cuamöcuädä, chu tö'cönänö kö̧ ucuru a̧'cua̧ huȩnä̧rö̧rö̧mä̧. ³⁰ Huȩnȩ'i̧nä̧ jo̧ca̧'a̧ra̧'a̧nä̧mä̧ päcuä'chä, suronä ja̧rö̧jä̧ pä'ö suronä jȩo̧ca̧'a̧nä̧mä̧. ³¹ Cuju'cö juiyönä̧mä̧ to'cuä ujurucu suronä jȩpö̧rö̧mä̧ ja̧'hua̧nö̧ chujua jȩö̧'a̧nö̧ jȩcha̧ja̧ pä'ömä cuamöcuädä. ³² Ja̧'hua̧nö̧ ja̧'a̧ TÖ̧Ä̧NÖÄ̧HUA̧MÄ̧ yaparetö jȩpä̧'chö̧rö̧mä̧ su̧ro̧tö̧ ja̧'hua̧nö̧ ja̧'a̧nä̧ Ja̧u̧mä̧ jueö huȩnȩnä̧ kö̧rö̧mä̧ Chutä a̧'cua̧ u̧huȩnä̧rö̧ jacuä ku̧nö̧. ³³ TÖ̧Ä̧NÄ̧HUA̧ surojuottächönä pä'ö huȩnȩmä̧ suronä jȩpä̧tö̧ ttojusodenä̧ kä̧cua̧'a̧, ja̧'hua̧nö̧ ja̧'a̧nä̧ Ja̧u̧mä adiunä ji̧ya̧rö̧tä̧ pä'ö adiunä jȩpö̧ ojusodenä̧mä̧. ³⁴ Ja̧u̧mä̧ ya̧'a̧huȩ'ä̧tö̧rö̧mä̧ ya̧'a̧huȩ'ö̧ ja̧'hua̧nö̧ ja̧'a̧nä̧ ttihueyenä̧ kä̧tö̧rö̧mä̧ Ja̧u̧mä̧ ppä'ädö. ³⁵ Huo̧juä̧huä̧ huȩnȩ ku̧nä̧rä̧tö̧mä̧ ucuo jähuätä ttȩmä̧cuo̧tö̧, ja̧'hua̧nö̧ ja̧'a̧ huo̧juä̧huä̧ jui'ätömä dä'ä ttuhuepäcuotö.