¹ Chi̧tti̧, chi̧huȩnȩ ä̧ju̧cui̧ttö̧ ja̧'hua̧nö̧ ä̧ju̧cu̧ ucuru huedö huȩnȩ'i̧nä̧ rö̧ä̧nä̧ micuäu jö̧nä̧ adiu jȩpö̧ ku̧ni̧, ² huo̧juä̧huä̧ huȩnȩ adiu cuä̧ju̧cu̧ttö̧mä̧ juhua'atäcu huo̧jui̧'ä̧cuä̧huä̧ camiso'qui ucuo u̧huo̧hui̧pö̧nä̧ jȩpi̧. ³ Ucu huopönö huo̧jui̧'ä̧cuä̧huä̧ ja̧'hua̧ta̧'a̧nö̧ ja̧u̧rö̧ huo'cuttömä, ⁴ plata ttusa'a jä̧'i̧nö̧'a̧nö̧ cusuttömä ja̧'hua̧ta̧'a̧nö̧ huo̧jui̧'ä̧cuä̧huä̧ huȩnȩ rö̧ä̧nä̧ micuäu rȩjȩ daju icuähuä cusuttumä, ⁵ ja̧'hua̧nö̧ cusomenä TÖ̧Ä̧NÄ̧HUA̧RÖ̧ ucuotäcuähuämä cu̧huo̧jui̧pä̧cua̧jä̧ juhua'atäcu Dios u̧huo̧juö̧'i̧nä̧ cu̧'o̧cui̧'ä̧cua̧jä̧. ⁶ Ja̧'hua̧nö̧ ja̧'a̧ TÖ̧Ä̧NÄ̧HUA̧ ja̧'a̧ huo̧juä̧huä̧ huȩnȩ iyömä, Ja̧u̧ Ättötä räopa'a huo̧jui̧pö̧ tu̧huo̧jui̧pö̧'i̧nä̧. ⁷ Ja̧u̧mä̧ jitö chutä eseunä huotörötä iyö ja̧'a̧ huo̧juä̧huä̧ huȩnȩmä̧, Ja̧u̧mä̧ ttabo jähuä ttoecuäbi jä̧'i̧nö̧'a̧nö̧ hua̧ jitö päinö̧'a̧cuä̧tö̧ jȩpö̧ ka̧cuä̧tö̧rö̧mä̧, ⁸ Diosmä adihuomenä jȩpö̧ ttö̧ja̧cu̧nä̧ jȩpö̧ ja̧'hua̧ta̧'a̧nö̧ adiu tta̧huä̧rä̧cua̧ jitö chutä päinö̧'a̧cuä̧tä̧ ka̧cuä̧tö̧rö̧mä̧. ⁹ Ja̧'hua̧nö̧ jo̧mȩnä̧ ucumä cu̧huo̧jui̧pä̧cua̧jä̧, jueö huȩnȩmä̧, adiu jȩä̧cuä̧huä̧mä̧, yoräteunä kä̧cuä̧huä̧mä̧ ja̧'hua̧ta̧'a̧nö̧ Dios öjö'ca'acu adiu kä̧cuä̧huä̧mä̧. ¹⁰ Huo̧juä̧huä̧ huȩnȩ cuamiso'quira̧'a̧cu̧ rȩbȩhuä̧cua̧'a̧ ja̧'hua̧ta̧'a̧nö̧ cu̧huo̧juä̧chö̧mä̧ cua̧'cua̧rö̧ eseunä jä̧cua̧'a̧. ¹¹ Ttu̧ȩpä̧rö̧nö̧ cucuocu tta̧cua̧rä̧cua̧jä̧, cu̧huo̧juä̧chi̧ö̧tä̧ hua'adö ku̧nu̧. ¹² Ja̧u̧ ttu̧ȩpä̧rö̧ cu̧huo̧jö̧nä̧tä̧ ppä̧dä̧cua̧jä̧ mä̧nä̧ su̧rä̧jä̧mä̧ttö̧ cu̧ji̧pö̧nä̧ ja̧'hua̧ta̧nö̧ suronä ucuohuätöttö'inä, ¹³ adiu mänättö jaropiätömä 'chä̧tö̧ mä̧nä̧ yo̧'ö̧ mä̧nä̧nä̧tä̧. ¹⁴ Jahuätömä esehuätö suronä jȩtto̧mȩnä̧tä̧ ja̧'hua̧nö̧ suronö jȩpö̧tä̧ pä'cäri 'cua̧rö̧nä̧ esehuätö. ¹⁵ Ja'huätömä mänä suräjämänätä̧ 'chä̧tö̧ ja̧'hua̧nö̧ jȩpö̧ jȩttö̧ da̧jä̧rö̧ yaparetä jiähuätö ¹⁶ Huo̧juȩcu̧nä̧ ja̧'hua̧ta̧'a̧nä̧ adiunä cucuocuätucuttumä kirecuo po'cöcu jȩpä̧ju̧ttu̧ cua̧mo̧nä̧tä̧ cu̧ji̧pä̧cuo̧tö̧jä̧, isaju ucuotocujuttu'inä ja'hua̧ta̧'a̧nö̧ amo̧nä̧ esecu ucuocuäjuttu'inä. ¹⁷ Ja'huäjumä muäyaju kä̧nö̧ kirecuo pinörö̧'i̧nä̧ jaropi'äju ja̧'hua̧nö̧ jȩpö̧ Dioscu esecu chö̧jä̧cua̧ju̧sä̧ päjinö'inä unichi'äju. ¹⁸ Jahuäju kojusodecumä hua'arera̧'a̧tä̧ oipa'a ja̧'hua̧ta̧'a̧nö̧ ja'huäju kö̧jö̧nä̧ cui̧'chä̧tu̧cu̧ttö̧mä̧ hua'arebara̧'a̧tä̧ ȩpä̧u̧jä̧. ¹⁹ O'catoi'önä ja'huäjucu 'chätömä, pä'äjita'anömä ppa̧'a̧cho̧co̧tö̧jä̧ ja̧'hua̧ta̧'a̧nö̧ po̧cui̧po̧co̧tö̧cuäcuotöjä eseunu kä̧cuä̧huä̧mä̧. ²⁰ Ucumä cui̧chä̧cua̧jä̧ adihuä ttö̧ja̧ ttö̧ma̧nä̧nä̧ ja̧'hua̧ta̧'a̧nö̧ cui̧chä̧cua̧jä̧ ttö̧ja̧ surojö juiätö ttö̧mä̧nä̧nä̧tä̧. ²¹ Jitö jueönä jȩpä̧tö̧tä̧ tti̧jä̧cuo̧tö̧ pi̧jä̧ rȩjȩnä̧ ja̧'hua̧nö̧ ja̧'a̧ttö̧ o'cajuiyönä tti̧jä̧cuo̧tö̧ juä̧jä̧nä̧. ²² Jarodätömä juä̧jä̧ttö̧ räepu icuähuotötä tti̧jä̧cuo̧tö̧ ja̧'hua̧nö̧ ja̧'a̧ttö̧ jarodätömä ro̧ȩcuo̧tö̧tä̧ tti̧jä̧cuo̧tö̧ juä̧jä̧ttö̧mä.