¹ Mo̧ro̧mä̧ ochonö̧ mo̧ro̧ päi'omenä̧ Moisésmä̧ Aarónrö̧'i̧nä̧ ja̧'hua̧ta̧'a̧nö̧ i̧tti̧murö̧'i̧nä̧ huopinö̧ ja̧'hua̧ta̧nö̧ Israel ttö̧ja̧ tturuhuottörö'inä. ² Ja̧u̧mä̧ pä'inö̧ Aarónrö: "Ji̧nä̧ yo̧mȩtȩ ka̧cuä̧tö̧ttö̧ päcäyä i̧tti̧ ji̧'quicha̧hua̧rö̧ ȩpö̧ mipponä̧ iyähuä suronä̧ jȩttö̧ mihuächunä̧ ttiyäi'ö̧mä̧, Ja̧'hua̧ta̧nö̧ päcäyä suroju jui̧'a̧ttö̧ mipponä̧ ku icu iyäcuämä̧ TÖ̧Ä̧NÄ̧HUA̧ to̧ä̧ro̧mȩttö̧ iyätucui. ³ Ucumä Israel ttö̧ja̧rö̧mä̧ pa̧'a̧nö̧ ucuocuitö: cabra ubo i̧tti̧ttö̧ ȩmö̧ suronä jȩttö̧ jähuänä iyi ja̧'hua̧ta̧'a̧nö̧ pä̧cä̧yä̧ i̧tti̧rö̧'i̧nä̧ juhua'atäcu oveja i̧tti̧ ta̧ju̧cuäyotö ya'ute a̧'ȩtä̧ ku̧nä̧rä̧tö̧rö̧ ja̧'hua̧ta̧'a̧nö̧ suropocotörö ku icu iyähuä jö̧nä̧; ⁴ ja̧'hua̧ta̧'a̧nö̧ päcäyä uborö'inä ja̧'hua̧ta̧'a̧nö̧ oveja uborö'inä huȩnȩ juiyönä kä̧cuä̧huä̧ jö̧nä̧ cuä'ö icu iyähuotö jö̧nä̧ TÖ̧Ä̧NÄ̧HUA̧ ä'ca jo̧mȩttö̧ ja̧'hua̧ta̧'a̧nö̧ u̧huä̧ju̧ otemä a̧dȩjacu huihuatö, isopäi'önä jitä mo̧ro̧mä̧ jä̧cua̧'a̧ TÖ̧Ä̧NÄ̧HUA̧ ucuturu i̧jȩcuä̧cua̧'a̧mä̧." ⁵ Ja̧'hua̧nö̧ ja̧'a̧ttö̧ jahuätömä o'cajuiyönä Moisés hueäjita'anö ca̧ca̧cu̧ pä̧cuähuodecu juhua'atäcu Israel ttö̧ja̧mä̧ o'catoi'önä ichi'ö TÖ̧Ä̧NÄ̧HUA̧ ä'ca jo̧mȩ ka̧cuä̧mi̧nä̧tö̧. ⁶ Ja̧'hua̧ta̧'a̧nö̧ Moisés päinö: Pi̧yȩ ja̧'a̧ TÖ̧Ä̧NÄ̧HUA̧ ucuturu hueömä jȩ'cua̧tu̧cua̧ päö, JA̧U̧ i̧tȩa̧u̧ ö̧jö̧ ucutu cuä'catucu jo̧mȩ jö̧ja̧ päömä. ⁷ Moisés Aarón päinö:"Ichí ku'icu iyähuome tö'cöcu ja̧'hua̧ta̧'a̧nö̧ ucutä surojö cu̧ju̧nä̧rö̧ micuähuächönä ku'icu iyähuä iyi. Ä̧cuo̧mȩnä̧mä̧ ucutätä adihuähuäu i'cuí̧ ja̧u̧nu̧ o'ca'atä ttö̧ja̧ su̧ro̧nä̧ jettö micuähuächönä ku'icu huiya, TÖ̧Ä̧NÄ̧HUA̧ hueäjita'anö̧tä̧. ⁸ Ja̧'hua̧nö̧ ja̧'a̧ttö̧ Aarón ku icu iyähuome tö'cö 'chä̧nö, cuä'ö icuinö päcäyä i̧tti̧rö̧ öäre ku icu iya pä'ö, chutä a̧mo̧nä̧ jähuätä. ⁹ Aarón i̧tti̧mu̧mä̧ ucuojatä ȩpi̧nä̧tö̧ ja̧u̧ru̧mä̧, ja̧hua̧ ja̧'a̧ttö̧ ja̧u̧mä̧ ödo'che 'cucuecu päcäyä ä̧ja̧ o̧na̧ ko̧mȩ ku̧ni̧nö̧ ku icu iyähuomettö̧mä̧, ja̧'hua̧nö̧ ja̧'a̧ttö̧ ucuoja riripinö ku'icu iyähuä'ca kada'ca. ¹⁰ Ja̧'hua̧nö̧ ja̧'a̧nä̧, ja̧u̧mä̧ kuäji ö̧a̧dȩ'i̧nä̧, öjäcuoräte'inä, ja̧'hua̧ta̧'a̧nö̧ atiya'inä ttiare ku iyähuome suronä jȩttä̧ji̧ micuä päi'önä, TÖ̧Ä̧NÄ̧HUA̧ Moisérö hueinö ji̧nö̧ ta'anö. ¹¹ Idepämä ja̧'hua̧ta̧'a̧nö̧ i̧jȩta̧'i̧nä̧, ttä'ähuarättö oto ȩpö̧ ku'icuinö. ¹² Aarónmä cuä'ö icuinö ttiäre iyähuä ttu̧ju̧huä̧cua̧rö̧, ja̧'hua̧ta̧'a̧nö̧ i̧tti̧mu̧'i̧nä̧ ja̧u̧ ucuoja ȩmi̧nä̧tö̧, ja̧'hua̧nö̧ jȩpö̧ ucuojä riripinätö ku iyähuä'ca jäyä. ¹³ Ja̧'hua̧nö̧ ja̧'a̧ttö̧ ja'huätömä ja̧u̧ru̧ iyinätö ttiäre ku'icu iyähuämä, pö̧u̧cu̧ pö̧nä̧ uyucu yoräteunä 'torähua'a̧, ku'ähuä'canä ku'icuinö. ¹⁴ Öacuä jacuänä ko̧cu̧'i̧nä̧ ja̧'hua̧ta̧'a̧nö̧ ö̧'ä̧juȩ'i̧nä̧ ku'icuinö ttiäre iyähuä ku'iyähuome juȩnȩtä̧ huä̧nȩcuä̧chö̧nä̧. ¹⁵ Ttö̧ja̧ ttiyö́ cuäicu iyähuä iyinö Aarón cabrarö, ja̧'hua̧ta̧'a̧nö̧ cuä'ínö suronä jȩttä̧ji̧ cuä'icu iyahuä pä'i'önä, ja̧ú̧ iyinö cuä'icu iyähuä pä'inä suronä jȩtta̧ji̧, ä̧cu̧'o̧mȩnä̧ cabrarö jȩ'ä̧ji̧ta̧'a̧nö̧. ¹⁶ Ja̧u̧mä̧ iyinö kuhuicu iyähuä pä'i'önä TÖ̧Ä̧NÄHUA̧RO̧ ji'ähuinöta̧'a̧nö̧. ¹⁷ Ja̧u̧u̧mä̧ i'cächö iyinö u̧hua̧ju̧ obattö u̧mu̧nä̧ ȩmo̧po̧'ö̧ kuhuicu iyähuome kuhuinö, moró̧ pä'i'ä kuhuicu iyähuäcu. ¹⁸ Ja̧'hua̧nö̧ ja̧'a̧ttö̧ jo̧'ú̧mä̧ päcäyärö ja̧'hua̧ta̧'a̧nö̧ ovejarö cuä'inö ttö̧ja̧ suronä jȩttä̧ji̧ ju'iyächi'önä cuä'icu iyähuä pä'i'önä. jo̧'ú̧rö̧ iyinätö̧ ucu'oja Aarón i̧tti̧mu̧, jo̧u̧tä̧ riripinö kuhuicu iyähuä'ca ippeyänä. ¹⁹ Ja̧'hua̧nö̧ ja̧'a̧ttö̧ jähuätömä ȩmu̧ i̧cu'inätö̧ toro ja̧'hua̧ta̧'a̧nö̧ oveja i̧hui̧ri̧'pa̧ttö̧'i̧nä̧ i̧'ä̧́dȩ, ö'acuä jacu'a ja̧'hua̧ta̧'a̧nö̧ öjacurätenä ja̧'hua̧ta̧'a̧nö̧ atiyanä ka̧cu̧'i̧nä̧ i̧'a̧dȩ ȩmu̧'icuinätö̧. ²⁰ Jahuätömä cui'ö icuähuättö ppächä ȩmo̧po̧'i̧nä̧tö̧ ja̧'hua̧nö̧ ȩmö̧ a̧mö̧'ca jähuäcu rutinä̧tö̧, ja̧'hua̧nö̧ ja̧'a̧ Aarónmä ku icu iyähuome rötö ö̧a̧dehuamä ku icuinö. ²¹ Aarónmä isotö ttamä'ca'inä ja̧'hua̧ta̧'a̧nö̧ ttöjahuiyä ttö̧huo̧jua̧'a̧cu̧nä̧ jähuämä TÖ̧Ä̧NÄ̧HUA̧ ä'ca jo̧mȩttö̧ hui'cuopo'ö ttöäre iyähuä jö̧nä̧ iyinö, Moisés hueinöta'anö̧tä̧. ²² Ja̧'hua̧nö̧ ja̧'a̧ Aarónmä ttö̧ja̧ ttö̧ja̧cua̧'a̧cu̧ u̧mö̧pi̧yä̧ cä'epinö ja̧'hua̧nö̧ cä'epö adiunä̧tä̧ jö̧nä̧ ji̧ya̧rö̧ pä'ö ucuocuinö̧; ja̧'hua̧nö̧ ja̧'a̧ ja̧u̧ juorö mȩyȩhui̧nö̧ suronä jȩttö̧ micuä ku icu iyähuä iya pä'ö juhuatäcu huȩnȩ juiyönä kä̧cuä̧huä̧'inä. ²³ Moisés'inä, Aarón'inä Dios ö̧jo̧denä dodepinätö̧ dodepäjä'cotö pä'äjita'anö rä'o'ömä ttö̧ja̧rö̧ adiunä̧tä̧ jö̧nä̧ ji̧ya̧tö̧ pä'ö ucuocuinä̧tö̧, ja̧'hua̧nö̧ ttucuocuomenä TÖ̧Ä̧NÄ̧HUA̧ usärömä ttö̧ja̧ o'catoi'önä̧rö̧ i̧jȩcuä̧chi̧'i̧na̧'a̧. ²⁴ Ttiäre ku icu iyähuä jä̧ji̧'inä ja̧'hua̧ta̧'a̧nö̧ ku icu iyähuome huȩju̧ i̧sa̧ ö̧a̧dȩhua'inä ocurämä TÖ̧Ä̧NÄ̧HUA̧TTÖ̧ rä'o'ö cuo'ö icuina̧'a̧. Ttö̧ja̧ pi̧yȩ o'cajuiyönä topö, jahuätömä huopinä̧tö̧ ja̧'hua̧nö̧ huopö tti'ämä rȩjȩ mȩä̧huö̧chö̧nä̧ ja̧rȩyu̧ pä'i'inätö̧.