^{1 2} Nadab'inä Abiú'inämä Aarón i̧tti̧mö̧ ji̧na̧'a̧, yotucunä ttiäre incienso ȩnä̧huä̧ o̧ba̧ ȩmo̧po̧'ö̧ ja̧u̧nä̧ incienso ȩnö̧ rȩdȩti̧nä̧tö̧. Ja̧u̧nu̧ o'ca'a jahuätömä cuoö jähuä TÖ̧Ä̧NÄ̧HUA̧RÖ̧ ttiyäjimä, chutä pa̧'a̧nö̧ cuiyätucuattöjä päoca'a ji̧na̧'a̧cu̧ jȩpö̧ iyinä̧tö̧. ² Ja̧'hua̧nö̧ jo̧mȩttö̧ ocurämä TÖ̧Ä̧NÄ̧HUA̧ to̧ä̧ro̧mȩttö̧ räo'ina'a ja̧'hua̧nö̧ päi'omenä̧ jahuätömä ocurä ku icuinä̧u̧, ja̧'hua̧nö̧tä̧ jahuätömä TÖ̧Ä̧NÄ̧HUA̧ ä'ca jo̧mȩttö̧ 'coru pä'i'inä̧tö̧. ³ Ja̧'hua̧nö̧ jä̧ji̧yä̧cu̧ Moisésmä Aarónrö pä'inö: Pi̧yȩ ji̧na̧'a̧ TÖ̧Ä̧NÄ̧HUA̧ ucuocu päinömä: Ttömä jitö chu̧jo̧mȩ tö'cöcu ichi'ätörömä Ttö surojö juidö jähuä chi̧jȩpä̧cuo̧tö̧. Ttö̧ja̧mä̧ o'catoi'önä ttä'ca jo̧mȩttö̧ ttȩsȩhuä̧cua̧sä̧." pä'inö päcu Aarónmä yorö'iso ädätocö pinö. ⁴ Moisésmä Misaelrö'inä ja̧'hua̧ta̧'a̧nö̧ Elzafánrö'i̧nä̧ huopinö, Aarón imiya̧ Usiel i̧tti̧mö̧rö̧, ja̧'hua̧nö̧ ja̧'a̧ jahuätörö pä'inö: Pocu ichi'ö cuahuaruhuärö TÖ̧Ä̧NÄ̧HUA̧ ö̧jo̧detö rä'epö icu ä'ö ttö̧ja̧cuo̧mȩttö̧mä̧ u̧mi̧cu̧ ȩpä̧tu̧cui̧tö̧." ⁵ Ja̧'hua̧nö̧ pä̧ö̧, jahuätö ju̧huȩnȩcu̧ 'chä̧hui̧'ö̧ ji̧nä̧ sacerdote ttö̧'ca̧tä̧huä̧ta̧ ttö̧'ca̧tä̧huä̧ji̧mä̧ ttö̧'ca̧huä̧hua̧'a̧nä̧ ä'ö ttö̧jo̧mȩttö̧mä̧ u̧mi̧cu̧ ttȩpi̧nä̧u̧, Moisés hueäjita'anö̧tä̧. ⁶ Ja̧u̧ 'cuäopäji o'ca'a Moisésmä, Aarón'inä ja̧'hua̧ta̧'a̧nö̧ i̧tti̧ Eleazarö'inä juhuatäcu Itamarö'inä pä'inö: "Cuhuo'chetucumä ejächi'ö ra̧'a̧nä̧mä̧ ja̧'a̧tä̧mä̧ to'cuäcuähuätucuä ja̧'hua̧ta̧'a̧nö̧ cu̧'ca̧tä̧huä̧ti̧yu̧mä̧ cui̧sȩrä̧huä̧tu̧cuä̧, 'coru juocuächätucu juiyäcua'anö̧ ja̧'hua̧ta̧'a̧nö̧ TÖ̧Ä̧NÄ̧HUA̧ ttö̧ja̧ o'catoi'önä̧rö̧ ö̧ra̧huä̧ri̧'ö̧ jiuyäcua'anö. Ja̧'hua̧nö̧ ja̧'a̧nä̧ ttahuaruhuä, Israel ttö̧ja̧mä̧ o'catoi'önärö ja̧'a̧tä̧ topätucui, TÖ̧Ä̧NÄ̧HUA̧ ocurättö ku icuomenä cuo'ö icuäjätörö ttajahua'anä. ⁷ Ucutumä ca̧ca̧cu̧ pä̧cuä̧huo̧mȩttö̧mä̧ räcuopätucuä, 'coru juocuächätucu juiyäcua'anö, TÖ̧Ä̧NÄ̧HUA̧RÖ̧ pätetö 'cä̧'ȩpö̧ ku̧nu̧ dahuecuoya a̧dȩja̧mä̧ ucutucu ka̧'a̧ttö̧," Ja̧'hua̧nö̧ pä̧ö̧ Moisés päjita'anö̧tö̧ jȩpi̧nä̧tö̧. ⁸ TÖ̧Ä̧NÄ̧HUA̧MÄ̧ Aaróncu ucuocumä pä'inö̧: ⁹ Vino isoyamä cuahuätucuó, ahuähuättö juruhuömä, ucutä'i̧nä̧ cui̧tti̧mö̧'i̧nä̧, ucutäcu ka̧cuä̧tö̧'i̧nä̧, ca̧ca̧cu̧ pä̧cuä̧huo̧mȩra̧'a̧cu̧ docuächi'ätucuomenä 'coru juocuächätucu juiyäcua'anö. Pi̧yȩ hueähuä huȩnȩmä̧ cuahuaruhuä tti̧tti̧mö̧'i̧nä̧ 'cuäopönätä̧ jȩttä̧cuȩ ja̧'a̧, ¹⁰ surojö juiyö'inä, juiyocö'inä ttu̧huo̧jua̧ pä'ö ja̧'hua̧ta̧'a̧nö̧ surojucu huihuacuä'inä, huihuacuocö'inä, ¹¹ Israel ttö̧ja̧ o'catoi'önärö hueähuä huȩnȩ TÖ̧Ä̧NÄ̧HUA̧, Moisésnä hueinö jinö cu̧huo̧juȩtä̧cua̧'a̧nö̧. ¹² Moisés Aarónrö ucuocuinö ja̧'hua̧ta̧'a̧nö̧ Eleazarö'inä, Itamarö'inä röjicu i̧tti̧mu̧rö̧: Ȩmi̧ u̧huä̧ju̧ ote TÖ̧Ä̧NÄ̧HUA̧RÖ̧ ku'icu iyähuomettö̧ ko̧cui̧pä̧ji̧, ja̧'hua̧ta̧'a̧nö̧ ja̧u̧ cuití ppu̧ä̧mu̧ juäi huihuacu juiyönä ku'icu iyähuä'ca ko̧mȩttö̧, pi̧yȩmä̧ surojö'inä juiyö ja̧'a̧. ¹³ Pi̧yȩ cucuä pä'ötä ja̧'a̧ surojö'i̧nä̧ juiyomȩttö̧, ucutä'inä jäcuä ja̧'a̧ttö̧ ja̧'hua̧ta̧'a̧nö̧ cui̧tti̧mu̧'i̧nä̧ jähuä ja̧'a̧ cuiäre ku'icu iyähuämä CU̧'Ä̧NÄ̧HUA̧RÖ̧, pi̧yȩtä̧ ja̧'a̧ jidähuä pä'ö hueipinömä. ¹⁴ Amucattö'inä ja̧'hua̧ta̧'a̧nö̧ öjattö'inämä TÖ̧Ä̧NÄ̧HUÄ̧RÖ̧ Pätetö iyähuä jä̧cua̧'a̧, ja̧u̧mä̧ cucuätucua päö jä̧hua̧'a̧ surojö'inä juiyomȩttö̧tä̧ Dios esehuätucuacu päömä. Ucu cui̧tti̧mu̧ u̧mä̧ttö̧ nä̧ttö̧'i̧nä̧mä̧ ucucutä tucua päö jä̧cua̧'a̧ ja̧u̧mä̧, tä'cö ucurutärö'inä cui̧tti̧mu̧rö̧'inä iiyähua'attö cuäö'icu iyähuättö'inä i̧mi̧cu̧nä̧ Israel ttö̧ja̧ eseu ttiyö ja̧'a̧. ¹⁵ Öja'inä ja̧'huta̧'a̧nö̧ amuca isäbämä tti'cächa' päö ja̧'a̧ ö̧a̧dȩ ku'icu iyähuomȩcu̧, TÖ̧Ä̧NÄ̧HUÄ̧ ä'ca jo̧mȩcu̧. Ja̧u̧mä̧ 'cuä̧opunä ucuru'inä cui̧tti̧mu̧rö̧'inä ko̧cui̧pä̧cuä̧ TÖ̧Ä̧NÄ̧HUA̧ hueinö̧ta'anö̧tä̧. ¹⁶ Ja̧'hua̧nö̧ ja̧'a̧, Moisémä jä'epö ä̧ju̧cui̧nö̧ suronä jȩttö̧ micuä päi'önä tti̧yä̧cua̧ chivorö. Ja̧u̧nu̧tä̧ juo̧juä̧chi̧'i̧nö̧ ku tticuäja'amä. Ja̧hua̧nö̧ jo̧mȩnä̧ ja̧u̧mä̧ amisurunä topinö Eliazarö ja̧'hua̧ta̧'a̧nö̧ Itamar'rö'inä, Aarón röjicu i̧tti̧mu̧rö̧'i̧nä̧; ja̧u̧ pä'inö: ¹⁷ "¿Dä̧bö̧ ttiäre suronä jȩttö̧ micuä päi'önä ku'icu iyähuämä cucui'ätucuoca'a jä̧ttö̧ ttö̧ä̧nä̧hua̧ ö̧jodettömä, juȩnȩ ja̧'a̧ rö̧ä̧nä̧ ro̧mȩmä̧, jua'amä TÖ̧Ä̧NÄ̧HUA̧TÄ̧ iyinö ucuturu ji̧nä̧ jo̧mȩtȩ cu̧jä̧tu̧cuo̧mȩttö̧ suronä jö̧ jȩpö̧'icua pä'ö, hua'amä chutä ä'cattö surunä jȩcu̧'i̧nä̧tu̧cua̧'a̧ttö̧? ¹⁸ Topätucui, ucuojamä ji̧nä̧ yo̧mȩtȩ pä'i'ö u̧cuo̧cuä̧cuä̧huo̧ca̧ttö̧mä̧ i'chächäcuähuoca'a jä̧ja̧'a̧, ja̧'hua̧nö̧ ja̧'a̧ttö̧ ucutumä cucuätucua pä'ö jä̧'a̧ ji̧nä̧ yo̧mȩtȩ pä'i'ö u̧cuo̧cuä̧cuä̧huo̧ca̧ttö̧tä̧, tto huedäjita'anö," ¹⁹ Ja̧'hu̧nö̧ päcu Aarón ädätinö Moisérö: "Topí, jitä mo̧ro̧mä̧ jahuätömä ttiäre iyähuä suronä jȩttö̧ micuä päi'önä iyätö ja̧'hua̧ta̧'a̧nö̧ ku'icu'inä TÖ̧Ä̧NÄ̧HUA̧ ä'cajo̧mȩ, ja̧'hua̧ta̧'a̧nö̧ 'cuäopäcusä jitä mo̧ro̧mä̧. Ttö'inä suronä jȩttö̧ micuä päi'önä ttiäre iyähuä jitä mo̧ro̧tä̧ chucuttumä, ¿TTÖ̧Ä̧NÄ̧HUA̧MÄ̧ eseunu toö'anö ja̧'a̧?" ²⁰ Ja̧'hua̧nö̧ päa'a ä̧ju̧cu̧ Moisesmä, esehuipinö.