¹ TÖ̧Ä̧NÄHUA̧ ucuocuinö Moisesrö ja̧'hua̧ta̧'a̧nö̧ Aarónrö̧'i̧nä̧ pä̧i̧nä̧u̧. ² Ucuocu'i chahuaruhuä Israelrö ji'ähuitö. Pitö ja̧'a̧ pi̧jä̧nä̧ o'cato'inä a̧'cua̧rä̧tö̧ttö̧ ucutu cucuä tucua pä'ö kä̧tö̧mä̧. ³ Ucutu cucuätucua pä'ö ka̧tö̧mä̧ isotö ttö̧jä̧pu̧ o̧tta̧ ä̧cä̧́ huotutä ja̧'hua̧ta̧'a̧nö̧ ttö̧cu̧'ȩ tti'cäbiyuttö rä'epu cuätöttö. ⁴ Ja̧'hua̧nö̧ ja̧'a̧nä̧ yä̧cu̧nä̧ isotö ja̧'hua̧ta̧'a̧nö̧ tti'cäbiyuttö rä'epu ttöcua'anä tti̧jä̧pu̧ o̧tta̧ ä̧cä̧́ huocotö, jahuätörömä cucuätucuä, jähuätömä camello ja̧'a̧, ttöcuäji rä'epu yä'cöpö ttöcua'anä, ja̧'hua̧nö̧ ja̧'a̧ttö̧ jähuätömä ucuturumä suropätö ja̧'a̧. ⁵ Ja̧'hua̧ta̧'a̧nö̧ tejón pä'ö micua̧mä̧, u̧cuȩmä̧ ppa̧'ä̧dö̧rö̧ ya'cupu cu ja̧'a̧nä̧, u̧no̧jä̧'inä 'cä̧rä̧cä̧ huocö ja̧'a̧nä̧, ucutumä su̧ro̧pa̧ jö̧nä̧ to'cuätucuaröjä̧. ⁶ Conejomä u̧cuȩmä̧ ppa̧'ä̧dä̧rö̧ yä'cupu cu ja̧'a̧nä̧, u̧no̧jä̧'inä 'cä̧rä̧cä̧ huocö ja̧'a̧nä̧ ucutumä̧ su̧ro̧pa̧ jö̧nä̧tä̧ to'cuätucuaröjä̧. ⁷ Cuchimä u̧no̧jä̧mä̧ 'cä̧rä̧cä̧ hua̧ ja̧'a̧nä̧, u̧cuȩmä̧ ppa̧'ä̧dä̧rö̧ yä'cupumä cuocö ja̧'a̧nä̧ ucutumä su̧ro̧pa̧ jö̧nä̧tä̧ to'cuätucuaröjä̧. ⁸ Ucutumä ja̧u̧ idepämä cucuätucuó, 'corujuo'ächäjirö'inä mecuä̧tu̧cuä̧, jahuätömä suropätö jo̧mȩttö̧ ucututtömä. ⁹ Isotö ajenä kä̧tö̧ ucutu cucuätucua'anö huotömä o'catoi'önä ttihuiribu'inä ttijesa'inä ku̧nä̧rä̧tu̧ru̧tä̧, aje dä'ähuotonä kä̧tö̧rö̧'i̧nä̧. ¹⁰ ja̧'hua̧nö̧ ja̧'a̧nä̧ o'catoi'önä isotö a̧dȩcuä̧tö̧ ttihuiböhuiyä'inä tti̧jȩsa'i̧nä̧ jui'ätörömä dä'ähuotonä kä̧tö̧rö̧ ja̧'a̧nä, ajenä'i̧nä̧ ka̧cuä̧tö̧rö̧ ja̧'a̧nä̧ cuo̧'ä̧rä̧tö̧rö̧'i̧nä̧ ja̧'hua̧ta̧'a̧nö̧ o'catoi'önä a̧'cua̧rä̧tö̧ ajenä ka̧cuä̧tö̧rö̧mä̧ suropä jö̧nä̧tä̧ to'cuätucuatöjä. ¹¹ Suropätö jö̧nä̧tä̧ topäcuähuotörömä, ucutumä jahuätö ttidepämä cucuätucuó; ja̧'hua̧ta̧'a̧nö̧ 'corujuo'ächäjätörö'inä mecuä̧tu̧cuä̧. ¹² O'catoi'önä ttihuiriböyä'inäcö̧ tti̧jȩsacö̧ jui'ätö ajenä cuo̧'ä̧rä̧tö̧mä̧ suropätö jö̧nä̧tä̧ to'cuätucuäcuotö. ¹³ Ju'tojunä co̧'ä̧rä̧tö̧ suropätö jö̧nä̧ topäcuähuotömä ja̧'hua̧ta̧'a̧nö̧ cuäcuähuocotö ttäcuotömä pitö ja̧'a̧; pare'inä, möca'inä, ¹⁴ aje pare'inä, pa̧rȩtö̧ jö̧nä̧ huotörömä, ¹⁵ o'catoi'önärötä, 'chajahuä jä̧'i̧nö̧'a̧nö̧ huotörö'inä, ¹⁶ pepepeyurö'inä ja̧'hua̧ta̧'a̧nö̧ pepepeyu jö̧ta'anö hua̧rö̧'i̧nä̧, cä̧cu̧huä̧rö̧'i̧nä̧ ja̧'hua̧ta̧'a̧nö̧ korotö pä̧rȩtö̧ pä'ähuotörö'inä. ¹⁷ Ja̧'hua̧ta̧'a̧nö̧ ucutu suropätö jö̧nä̧tä̧ to'cuätucuäcuäu̧mä̧ a̧'u̧cua̧ pepepeyurö'inä, ja̧'hua̧ta̧'a̧nö̧ buo pepepeyurö'inä, berurirö'inä, ¹⁸ tȩ'a̧ pepepeyurö'inä, pepepeyu ju̧ta'anö hua̧rö̧'i̧nä̧, ttihue'quiyu 'co'u curu'inä, ¹⁹ tȩ'a̧ rasarö'inä, korotö ra̧sa̧tö̧rö̧'inä, abubilla pättäcurö'inä, ja̧'hua̧ta̧'a̧nö̧ cuojuhuärö'inä. ²⁰ O'catoi'önä isotö ppö̧'ä̧tö̧ co'ätö ttu̧jä̧pi̧yä̧ pa̧ja̧cuä̧nö̧ ku̧nä̧rä̧tö̧rö̧'i̧nä̧ ucutumä suropätö jö̧nä̧tä̧ to'cuätucuajá, ²¹ ja̧'hua̧nö̧ ja̧'a̧nä̧'i̧nä̧, isotö ppo̧'ä̧tö̧ co̧'ä̧rä̧tö̧ ttö̧jä̧pi̧yä̧ pa̧ja̧cuä̧nö̧ ku̧nä̧rä̧tö̧ ucutu cucuätucua pä'ö huotömä, töttomenä ttö̧jä̧pi̧yä̧ ti̧'ca̧cuä̧chä̧u̧rö̧tö̧ jä̧cua̧'a̧. ²² ja̧'hua̧ta̧'a̧nö̧ cucuätucuatö päi'önä huotömä korotö o'catoi'önä ji̧ri̧chu̧tu̧rö̧'inä, ä̧yu̧rö̧'inä juhua'atäcu mä̧rä̧cä̧yu̧rö̧'inä. ²³ Ja̧'hua̧nö̧ ja̧'a̧nä̧ o'catoi'önä isotö ppo̧'ä̧tö̧ co'ätö ttö̧jä̧pi̧yä̧ pa̧ja̧cuä̧nö̧ ku̧nä̧rä̧tö̧rö̧mä̧ suropätö jö̧nä̧tä̧ to'cuätucuatöjä̧. ²⁴ Ucutumä surojö ku̧nä̧rä̧tö̧ta̧ cuäcuotöjä ni̧pä̧rö̧mȩ juoächomȩ jöbu pitö de'a isotö 'corujuo'ächäjätöttö ya̧tȩrö̧ mȩcuä̧tu̧cu̧ttu̧mä̧. ²⁵ Ya̧tȩttö̧ 'corujuo'ächäjirö ȩmä̧ji̧ttö̧mä̧ ö̧'ca̧ta̧hua̧ta̧mä̧ ötöcö'anö ja̧'a̧ ja̧'hua̧ta̧'a̧nö̧ ni̧pä̧ro̧mȩ juoächomejobu surojö ku̧nä̧rö̧ hua̧tä̧ ö̧jä̧cua̧. ²⁶ Isotöttö ya̧cu̧nä̧ ttö̧na̧ji̧yä̧ ta'are ku̧nä̧rä̧tö̧ i̧mi̧cu̧nä̧ ko̧ca̧'a̧nä̧ ja̧'hua̧ta̧'a̧nö̧ u̧cuä̧ yä'cupö ra'adiö pa̧'a̧dö̧ yä'cupömä, ja̧u̧mä̧ ucuturu surojötä hua̧. O'catoi'önä ja̧u̧ru̧ mȩ'ä̧tö̧mä̧ surojötä huottö. ²⁷ O'catoi'önä isotöttö 'chä̧tö̧ttö̧ ttö̧na̧ji̧yä̧ o̧ttä̧ ku̧nä̧rä̧tö̧ pa̧ja̧cuä̧nö̧ ttö̧jä̧pi̧yä̧nä̧ 'chä̧tö̧mä̧. Jahuätömä ucuturumä suropätö ja̧'a̧. Yä̧tȩ ja'huätöttö 'corujuo'ächäjirö mȩ'ö̧ttö̧mä̧ surojö hua̧tä̧ jä̧cua̧ ni̧pä̧ro̧mȩ päi'ome jubu. ²⁸ Ya̧tȩ ja'huätöttö korujuo'ächäjirö ȩmä̧ji̧mä̧ ö̧,ca̧tä̧huä̧ta̧'i̧nä̧ ötöcö'anö ja̧'a̧, ja̧'hua̧ta̧'nö̧ ja̧u̧mä̧ surojö hua̧tä̧ jä̧cua̧ ni̧pä̧ro̧mȩ päi'ome jubu. Pitö isotömä surojötä huotö ttäcuotö ucuturumä. ²⁹ Isotö rȩjȩnä̧ do'ähuätöttömä, jahuätö isotömä ucuturumä suropätö ja̧'a̧: mutua'inä si̧ri̧'cu̧'i̧nä̧ o'catoi'önä ttȩppa̧tö̧ ppo̧'ä̧tö̧ tä̧mö̧'i̧nä̧, ³⁰ je'quebe'inä, tteppä ju'tojunä bo'ipö'inä rȩjȩnä̧ do'äu'inä, ä̧ca̧tö̧'i̧nä̧ ja̧'hua̧ta̧'a̧nö̧ camaleon'inä. ³¹ O'catoi'önä isotö rȩjȩnä̧ do'ähuätöttömä, jahuätö ja̧'a̧ isotöttö surojönä huotömä ucuturu. Ya̧tȩttö̧ 'corujuo'ächäji pu̧rö̧ mȩ'ö̧ttö̧mä̧ ja̧u̧mä̧ surojötä hua̧ ni̧pä̧rö̧mȩ päi'ome jubu päi'önä. ³² Jahuätöttö ya̧tȩ 'corupä'i'ö korojueinä maö̧ttö̧mä̧, ja̧u̧ ma̧ä̧ji̧mä̧ surojötä ja̧'a̧, dau isodättö adicuä jö̧ttö̧'i̧nä̧, pa̧yu̧'cuanö jö̧ttö̧'i̧nä̧ i̧jȩta̧nä̧ ja̧'hua̧ta̧'a̧nö̧ sacuyunä jö̧ttö̧'i̧nä̧. Koro jö̧ttö̧'i̧nä̧ ja̧'hua̧ta̧'a̧nö̧ koro jui adicuä jö̧ttö̧'i̧nä̧, ajiyanä ȩnö̧ ttu̧ju̧na̧ pä'ö ja̧'a̧; Ja̧u̧mä̧ surojötä jä̧cuä̧ ni̧pä̧ro̧mȩ juo'ächome jubu päi'önä. Ja̧'hua̧nö̧ jo̧mȩnä̧tä̧ surojö'inä jui̧yä̧cuä̧. ³³ O'cajuiyönä 'cä̧nä̧ri̧o̧yu̧ jacuä ja̧'hua̧ta̧'a̧nä̧ u̧mi̧nä̧ ja̧u̧ i̧sa̧ surojö ku̧nä̧rö̧ ma̧'ö̧ttö̧mä̧, korojuei 'cä̧nä̧ri̧o̧yu̧nä̧ ko̧cu̧mä̧ surojötä ja̧'a̧, Ja̧'hua̧nö̧ ja̧'a̧ttö̧ ucutumä si'epö cuicuätucua pä'ötä ja̧'a̧. ³⁴ O'ca juiyönä adiutä ttöcua pä'ö hue'inömä ja̧u̧tä̧ ji̧na̧'a̧ ttöcua pä'ö ji̧nu̧mä̧, ja̧'hua̧nö̧ ja̧'a̧nä̧ 'cänäri̧yu̧ surä̧ja̧yu̧nä̧ acuya ma'u̧ttö̧mä ja̧'hua̧ja̧'a̧ttö̧ surojötä jö̧. O'ca juiyönä ttahua'anö jo̧mä̧ ja̧'hua̧nö̧ ja̧'a̧nä̧ 'ca̧nä̧ri̧yu̧ suräjä̧yu̧nä̧ acu'oyamä surojoya. ³⁵ Ya̧tȩ i̧sá̧ hua'ö icuäji idepä yo̧mȩtȩ ma'u̧ttö̧mä̧, ja̧'hua̧nö̧ ja̧'a̧ttö̧ ja̧u̧mä̧ surojö, ȩttä̧huo̧mȩ ju̧ttö̧'i̧nä̧ ja̧'hua̧ta̧'a̧nö̧ da̧hua̧hua̧bä̧ ju̧ttö̧'i̧nä̧. Ja̧u̧mä̧ dö'ö icuätucui. Surojö ja̧'a̧ttö̧ ja̧'hua̧ta̧'a̧nö̧ surojö ja̧u̧mä̧ ucuturumä̧. ³⁶ Ajiya huerächome ja̧'hua̧ta̧'a̧nö̧ ajiya huättömä te'önä ttö̧ju̧nä̧ra̧'a̧nö̧ ja̧'a̧, ja̧'hua̧nö̧ ja̧'a̧nä̧ i̧sä̧ ma̧'ä̧chö̧ttö̧mä̧. Ya̧tȩ i̧sä̧́ hua'icuäjirö me'ö̧ttö̧mä̧ ajiyamä̧ surojoya, jo̧'u̧mä̧ su̧ro̧pä̧ ja̧'a̧ttö̧. ³⁷ Ttö̧ju̧na pä'ö u̧huä̧ju̧ba jacuä i̧sä̧bi̧ ji̧bi̧tȩ maö̧ttö̧mä̧ hua'icuäjirö, ji̧nä̧ adihuä cuä̧bi̧. ³⁸ Ja̧'hua̧nö̧ ja̧'a̧nä̧ ajiyanä 'cuättädöttömä i̧sä̧ hua'ö icuäjirö ma'ö̧ttö̧mä̧ ja̧u̧ o̧bi̧mä̧ suräjötä jä̧cuä̧ ucuturumä. ³⁹ Ya̧tȩ i̧sa̧ cuö̧cuä̧hua̧ ja̧'a̧nä̧ 'corujuoächäjittömä, ja̧u̧ 'corujuo'ächäjirö me'ö̧mä̧ ni̧pä̧cho̧mȩ jubö su̧ro̧pa̧ jö̧nä̧tä̧ to̧ttä̧cua̧. ⁴⁰ Ya̧tȩ ja̧u̧ 'corujuo'ächäjirö cuäjimä ö̧'ca̧tä̧huä̧ti̧yu̧mä̧ ötöca pä'ötä jä̧cua̧'a̧ ja̧'hua̧nö̧ ötöca'anä ni̧pä̧cho̧mȩ jubö päi'önä su̧ro̧pa̧ jö̧nä̧tä̧ to̧ttä̧cua̧. Ya̧tȩ i̧sa̧ 'corujuo'ächäjirö äräbe'ömä ö̧'ca̧tä̧huä̧ti̧yu̧mä̧ ötöca pä'ötä jä̧cua̧'a̧ ja̧'hua̧nö̧ ötöca'anä ni̧pä̧cho̧mȩ jubö päi'önä su̧ro̧pa̧ jö̧nä̧tä̧ ⁴¹ Isotö rȩjȩnä̧ do'ähuotörömä cucuätucuó jahuätömä su̧ro̧tä̧cuä̧huotö̧ jö̧nä̧tä̧ huotö. ⁴² Ttö̧cuä̧ba̧nä̧ dä'ohuätörö'inä ja̧'hua̧ta̧'a̧nö̧ ttö̧jä̧pö̧ pa̧ja̧cuä̧nö̧ o̧'ö̧nä̧ cue'ächätörö'inä, oöcatoi'önä ttö̧jä̧pi̧yä̧ rö̧ä̧nä̧ ku̧nä̧rä̧tö̧ rȩjȩnä̧ do'ähuätörö'inä pitörömä cucuätucua pä'ömä jo̧ca̧'a̧, jahuätömä su̧ro̧tä̧cuä̧huotö jo̧mȩttö̧. ⁴³ Ucututä cuamönä pa̧ja̧tö̧mä̧ surojuocuecuätucuä isotö a̧'cua̧rä̧tö̧ rȩjȩnä̧ do'ähuätucumä; ucutu cuamönä pa̧ja̧tö̧mä̧ jahuätucumä surojuocuecuätucuä, jahuätö surojuottepa'anä'inä cuiyähuätucuä. ⁴⁴ Isopäi'önä Ttötä ja̧'a̧ CU̧Ä̧NÄ̧HUA̧TU̧CU̧ Diosmä. Ucutumä cuamönä pa̧ja̧tö̧ surojö jui'ätö jö̧nä̧tä̧ 'chä̧'ä̧rä̧cuä̧u̧ cu̧jä̧tu̧cua̧jä̧, ja̧'hua̧nö̧ jo̧mȩnä̧ surojömä jui'ätötä jö̧nä̧ cuäcuotöjä̧, isopäi'önä surojömä jui̧'a̧ chomȩttö̧. Ucutumä cua̧mö̧nä̧ pa̧ja̧tö̧ korojuo'otö isotö rȩjȩnä̧ cue'ächätucumä surojuocuecuätucuä. ⁴⁵ Isopäi'önä Ttö ja̧'a̧ TTÖ̧Ä̧NÄ̧HUA̧MÄ̧, Egipto rȩjȩttö̧ u̧mi̧cu̧ rä'epö icu i'cächinömä cu̧ru̧hua̧tu̧cu̧ Dios jö̧nä̧. Ja̧'hua̧nö̧ ja̧'a̧ttö̧ ucutumä surojö jui'ättö jö̧nä̧tä̧ ka̧cuä̧tu̧cui̧, Ttö'inä surojö juiyönä kö̧ cha'attö. ⁴⁶ Pi̧yȩ ja̧'a̧ hueähuä huȩnȩ de'a isotö'inä, ppi̧yu̧'inä, o'catoi'önä yo'ähuätö aje cuo̧'ä̧rä̧tö̧'inä ja̧'hua̧ta̧'a̧nö̧ o'catoi'önä yo'ähuätö rȩjȩnä̧ do'ätö'inä ttötö'cö hueähuächinö̧mä̧, ⁴⁷ pitömä suropätö ja̧'hua̧ta̧'a̧nö̧ pitötä ja̧'a̧ adihuätömä pä'ö cu̧huo̧juä̧tu̧cuä̧cua̧'a̧ juhua'atäcu tta̧'cua̧rö̧ ku̧nä̧rä̧tö̧ cucuätucua pä'ö huotörö'inä, ja̧'hua̧ta̧'a̧nö̧ tta̧'cua̧rö̧ ku̧nä̧rä̧tö̧ cucuätucua pä'ö huocotörö'inä cu̧huo̧juä̧ru̧cuä̧cua̧'a̧nö̧."