¹ TÖ̧Ä̧NÄ̧HUA̧MÄ̧ Moiséscu ucuocumä pä'inö: ² Aarónrö̧'inä i̧tti̧mö̧rö̧'inä ttu̧ca̧ca̧ca̧cui̧'ö̧nä̧ jȩpö̧ ttö̧'ca̧tä̧huä̧ti̧yu̧'i̧nä̧ ja̧'hua̧ta̧'a̧nö̧ pojopö ku̧nö̧ dahuecuoya a̧dȩja'inä, päcayä suronä jȩttö̧ micuä jö̧nä̧ i̧yä̧hua̧rö̧'inä, ta̧ju̧ ovejastö̧rö̧'inä ja̧'hua̧ta̧'a̧nö̧ dejäcänä ȩcö̧ pan ppö̧ä̧mö̧ juiyönä ȩttä̧huä̧'inä. ³ Dios ö̧jo̧decu doächäcuähuome ä'ca ttö̧ja̧mä̧ o'catoi'önärö̧ ca̧ca̧ti̧pi̧. ⁴ Ja̧'hua̧nö̧ ja̧'a̧ Moisésmä TÖ̧Ä̧NÄ̧HUA̧ hueäjita'anötä̧ jȩpi̧nö̧, ja̧'hua̧nö̧ jȩo̧mȩnä̧ ttö̧ja̧ yo̧mȩtȩnä̧ Dios ö̧jo̧decu doächäcuähuome ä'cacu ichinä̧tö̧. ⁵ Ja̧'hua̧nö̧ ja̧'a̧ Moisésmä ttö̧ja̧rö̧ pä'inö: Pi̧yȩ ja̧'a̧ CU̧Ä̧NÄ̧HUA̧TU̧CU̧ jȩ'cuä̧tu̧cua̧ pä'ö hueäjimä." ⁶ Moisésmä̧ i'cächinö̧ Aarónrö̧'i̧nä̧ ja̧'hua̧ta̧'a̧nö̧ i̧tti̧rö̧'i̧nä̧ ja̧'hua̧nö̧ i'cächö jahuätörömä̧ ajiyanä̧ töquinö̧. ⁷ Aarónrö̧mä̧ ö̧'catä̧huäta̧ 'ca̧tö̧ äcä kärocuächönä i̧sata̧nä̧ ti̧ä̧di̧ä̧cu̧, pu̧jä̧ta̧ o̧to̧ä̧ta 'ca̧tö̧ kä̧nö̧mä̧, huä̧mȩnä̧ ö̧'cata̧huä̧ta̧mä̧ i̧sä̧ta̧nä̧ kärocuächönä ti̧ädinä̧cu̧ röjínä̧mä̧ pö̧ttä̧huä̧ta̧ttö̧ ja̧'hua̧nö̧ jȩpö̧ chunä̧tä̧ ti̧ä̧di̧nä̧cu̧. ⁸ Ja̧u̧mä̧ a̧mö̧canä isäbi (pectoral) pättö u̧ni̧nä̧cu̧ ja̧'hua̧ta̧'a̧nö̧ ja̧u̧ isäbinä̧mä̧ ru̧ni̧nö̧ Urim'inä ja̧'hua̧ta̧'a̧nö̧ Tumim pättö'inä. ⁹ Unämä cäyuhuä'ca i̧sä̧ppä̧ jö̧nä̧ adicua'a u̧huȩni̧nä̧cu̧ ja̧'hua̧ta̧'a̧nö̧ Unä i̧huȩnä̧ji̧ ä'cacumä sä̧rä̧bä̧ sä̧ru̧huä̧bä̧ ro̧ö̧ pöttähuä jö̧nä̧ adicua u̧huȩni̧nä̧cu̧, TÖ̧Ä̧NÄ̧HUA̧ hueinöta'anö̧tä̧. ¹⁰ Moisésmä 'cä̧'ȩpo̧ ku̧nö̧ dahuehuoya a̧dȩja ȩmö̧ Dios u̧jo̧de'inä̧ juodenä̧ ka̧cu̧nä̧'inä̧ ja̧'hua̧nö̧tä̧ ja̧u̧mä̧ TÖ̧Ä̧NÄ̧HUA̧ i'äre päi'önä̧. ¹¹ Ja̧u̧mä̧ ku icu iyähuome a̧dȩjattö riripinö̧ sietenö̧ jö̧menä̧ Ja̧'hua̧nö̧ ja̧'a̧ttö̧ juȩnȩtä̧ ku icu iyähuome'inä̧ O'cäjuiyunä̧tä̧ ju̧huȩnȩtä̧ ka̧cu̧ uribiyunä'inä̧, huȩ'chä̧qui̧yä̧nä'i̧nä̧, pärähuä ä̧bä̧nä'i̧nä̧ ja̧'hua̧ta̧'a̧nö̧ juahuocuä ocänä'inä riripinö juhua'atäcu ttumö tu'cäcuähuä̧bä̧nä̧'i̧nä̧, ja̧u̧tä̧ kada'ca 'chu̧huä̧ro̧mȩ'i̧nä̧ TÖ̧Ä̧NÄ̧HUA̧RÖ̧ jähuätä päi'önä 'cä̧'ȩpö̧ ku̧ni̧nö̧. ¹² Ja̧u̧mä̧ 'cä̧'ȩpö̧ dahuocuoya a̧dȩja Aarón Unä da'epinö ja̧'hua̧nö̧ da'epö ro̧'a̧ jö̧nä̧ 'cä̧'ȩpö̧ u̧ju̧ni̧nä̧cu̧. ¹³ Moisésmä Aarón i̧tti̧mö̧rö̧ i'cächipö ttö̧'ca̧tä̧huä̧ti̧yö̧ ö̧'ca̧ti̧nä̧u̧. Ja̧u̧mä̧ ttäcänä i̧sä̧ta̧nä̧ juä'opö ti̧ä̧di̧nä̧u̧ ja̧'hua̧ta̧'a̧nö̧ lino pö̧jä̧ta̧ttö̧ ttunä kärocuächönä juäopinä̧u̧ TÖ̧Ä̧NÄ̧HUA̧ hueinöta'anötä̧. ¹⁴ Moisés tororö 'cächinö öäre iyäcuä jȩ'a̧ päö

surojö micuä päiönä, ja̧'hua̧'ja̧ttö̧ Aarón i̧tti̧mu̧cu̧mä̧ toro u cuä̧mȩ mȩi̧nä̧ttö̧ ku'icu i̧ya̧hua̧ päinä i'cächäjäcuru surojö micuä päinä.

¹⁵ Ja̧u̧tä̧ cuäinä̧cu̧, ucuoja ema'päö ja̧'hua̧'a̧nö̧ jȩpu̧ päcäyä u'onanä jo̧mȩ ödochenä 'cucuetinö, surojö juiya päö ku'icu iyähuome, ju̧huä̧nȩ kada'ca 'chuä̧rö̧mȩ'i̧nä̧ ucuoja riripinö ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ DIOS ö̧jo̧mȩtä̧ päiönä jahuätö surojö jȩttö̧ micuähuächönä̧ iya päömä. ¹⁶ Ja̧u̧mä̧ öacuä ja̧cuä̧nä̧ ö̧a̧dȩ ko̧cu̧ o'cajuiyönä ȩmi̧nö̧, atiya a̧ttö̧pä̧rö̧mȩ'i̧nä̧, ja̧'hua̧ta̧nö̧ totere öjäcuorä ote ö̧a̧dȩ'i̧nä̧, ja̧hua̧ ja̧'a̧ttö̧ Moisésmä o'cajuiyönä ku'icuinö ku'icu iyähuomettö. ¹⁷ Ja̧'hua̧'a̧nö̧ ja̧'a̧nä̧ toromä, i̧jȩta̧'i̧nä̧, idepä'inä ja̧'hua̧ta̧'a̧nö̧ ite'inämä ku'icuinö a'acuarä u̧mi̧ttö̧, TÖ̧Ä̧NÄ̧HUA̧ hueäjita'anötä jȩpi̧nö̧. ¹⁸ Moisémä i'chächinö oveja i̧tti̧rö̧ ku'icu iyapä'ö, ja̧'hua̧nö̧ ja̧'a̧ttö̧ Aarón i̧tti̧mu̧cu̧ oveja i̧tti̧ unä mȩ'i̧nä̧tö̧. ¹⁹ Ja̧u̧ cuä'ö icuinö ja̧'hua̧nö̧ cu'ö'icu ku iyähuä'ca jäyä ucuojä riripinö. ²⁰ Ja̧u̧ma̧ ppo̧u̧cu̧nä̧ 'cui'ö icuinö oveja i̧tti̧rö̧ ja̧'huia̧nö̧ jȩpö̧ uyu'inä ö̧a̧dȩ'i̧nä̧ ppö̧u̧cu̧nä̧ 'cui'ö ku'icuinö. ²¹ Jacuänä jähuä'inä ja̧'hua̧ta̧'a̧nö̧ ö'ajue'inä ajiyanä töcö icuinö, ja̧'hua̧nö̧ jȩpö̧ oveja i̧tti̧ jä̧ttä̧pä̧ya̧rö̧ ku'icuinö ku iyähuä'canä. Pi̧yȩ ji̧na̧'a̧ ttiäre ku'icu ttiyomenä adiu a̧dö̧nä̧ 'chopönä a̧mȩhui̧nö̧, ku'icu ttiäre iyähuä TTÖ̧Ä̧NÄ̧HUA̧RÖ̧ chutä TÖÄNÄHUA Moisérö hueinö ji̧nö̧ta'anö. ²² Ja̧'hua̧nö̧ ja̧'a̧ttö̧ Moisés oveja kararö̧ iyinö, ucuotönö ttiya pä'ö ovejarö Aarón ja̧'hua̧ta̧'a̧nö̧ i̧tti̧mu̧'i̧nä̧ oveja unä ttö̧mu̧ mȩ'i̧nä̧tö̧. ²³ Aarón cuä'ínö ja̧'hua̧ta̧'a̧nö̧ Moisés ji̧'qui̧cha̧nö̧ ȩmopo̧'ö̧ Aarón u̧huo̧jua̧'a̧nä̧ a̧já̧ hua̧mȩ́ tuepinö ja̧'hua̧ta̧'a̧nö̧ u̧mú̧ u̧huo̧jua̧'a̧nä̧ ido'che ö'caja'chenä tu'epinö ja̧'hua̧ta̧'a̧nö̧ i̧jä̧pu̧ u̧huo̧jua̧nä̧ ido'che ö'caja'chenä tuepinö. ²⁴ Tuepinö ja̧'hua̧ta̧'a̧nö̧ Aarón i̧tti̧mu̧ tu̧huo̧jua̧'a̧nä tta̧já̧ hua̧mȩnä̧ tuepinö ja̧'hua̧ta̧'a̧nö̧ ttu̧mu̧ ttu̧huo̧ja̧'a̧nä̧ ttödo'che ö'caja'chenä tu̧huȩpi̧nä̧'u̧ ja̧'hua̧ta̧'a̧nö̧ tti̧jä̧pu̧ ttu̧huo̧jua̧'a̧nä̧ ttödo'che ö'caja'cjenä tu̧huȩpi̧nä̧'u̧ yä̧cu̧nä jähuätörö ja̧'hua̧nö̧ Moisés tu̧ȩpä̧ji̧'ca̧ kuhuicu iyähuome ppeyänä riripinö oveja ucuoja. ²⁵ Moisés ö'ade ȩmi̧cu'inö ka̧cu̧mä̧ i̧hui̧ri̧pa̧nä ja̧'hua̧ta̧'a̧nö̧ u̧cuä̧ba̧ jacuä ka̧cu̧'i̧nä̧ atiyanä, ta'are öjacu'orätenä ka̧cu̧'i̧nä̧ ja̧'hua̧ta̧'a̧nö̧ öjá u̧huo̧ju'a̧nä̧ ka̧cu̧'i̧nä̧. ²⁶ TÖ̧Ä̧NÄHUA̧ ö̧jö̧mȩ ki̧na̧'a̧ dejä̧cä̧ pa̧ ppu̧'ä̧mu̧ juiyönä adicuä, jo̧'ú̧mä̧ iyinö 'cui'opu pa̧ ppu̧'ä̧mo̧cö̧ttö̧ adicuä ja̧'hua̧ta̧'a̧nö̧ a̧dȩjacu huihuatö pä̧ adicu'inä ya'ute trigottö adicuä o̧bí̧'inä ja̧'hua̧ta̧'a̧nö̧ öjá u̧huo̧jua̧'a̧nä̧ tu'epinö ö̧'a̧dȩ. ²⁷ Ja̧u̧ o'ca juiyönä iyinö Aarón u̧mu̧nä̧ ja̧'hua̧ta̧'a̧nö̧ i̧tti̧mu̧ ttö̧mu̧nä̧'i̧nä̧ TÖ̧Ä̧NÄHUA̧ ö̧jo̧mȩ ttiya pä'ö. ²⁸ Ja̧'hua̧nö̧ ja̧'a̧ Moisésmä jahuätö 'chuttärö̧ ȩmo̧po̧'ö̧ ttiäre iyähuä ku icu iyähuome iyö ku icuinö. Pi̧yȩ iyähuämä ro̧ö̧ ji̧na̧'a̧ ja̧'hua̧ta̧'a̧nö̧ nu̧nä̧ eseunä 'chopina̧'a̧. Ja̧u̧mä̧ ocurä ku icu iyähuä ji̧na̧'a̧ TÖ̧Ä̧NÄ̧HUA̧RÖ̧. ²⁹ Moisésmä i̧sa̧ amö'ca ȩmo̧po̧'ö̧ yȩ'ä̧ji̧'ca̧ TÖ̧Ä̧NÄ̧HUA̧RÖ̧ iyinö. Pi̧yȩmä̧ Moisés ovejas idepä pätecuächinö ji̧na̧'a̧ iya pä'ö sacerdotetö̧ pätti'önä u̧ju̧nä̧u̧rö̧, TÖ̧Ä̧NÄ̧HUA̧ hueinöta'anötä̧. ³⁰ Moisésmä pojopö ku̧nö̧ dahuecuoya a̧dȩjattö a̧'u̧cu̧nä̧ ȩmo̧po̧'i̧nö̧ ja̧'hua̧ta̧'a̧nö̧ ku icu iyähuome ka̧cu̧ i̧sa̧ ucuoja'inä, Aarónrö'inä ö̧'ca̧tä̧huä̧ta̧nä̧'inä juhuatäcu i̧tti̧mö̧rö̧'inä ttö̧'ca̧tphuä̧ti̧yu̧nä̧'inä riripinö. Pa̧'a̧nö̧ jȩpö̧tä̧ Aarónrö'inä ö̧'ca̧tä̧huä̧ta̧'inä ja̧hua̧ta̧'a̧nö̧ ja̧u̧tä̧ i̧tti̧mö̧rö̧'inä ttö̧'ca̧tä̧huä̧ti̧yu̧'inä TÖ̧Ä̧NÄ̧HUA̧ öäre päi'önä̧tä̧ pojopö ku̧ni̧nö̧. ³¹ Ja̧'hua̧nö̧ ja̧'a̧ttö̧ Moisésmä Aarón'i̧nä̧ ja̧'hua̧ta̧'a̧nö̧ i̧tti̧mö̧rö̧'i̧nä̧ pä'inö: ca̧ca̧cu̧ pä̧cuä̧huodera̧'a̧ doächi'äcuähuomettö̧ idepämä da'atucui ja̧'hua̧ta̧'a̧nö̧ juhuorötä cuätucui juhua'atäcu pan pojopö ku̧nä̧huä̧ dejäcänä ȩcö̧ttö̧'i̧nä̧, Ttö Aarónrö'inä ja̧'hua̧ta̧'a̧nö̧ i̧tti̧mö̧rö̧'i̧nä̧ ttucua pä'ö hue'ö pädinöta'anö̧. ³² Idepättö ka̧cui̧pö̧mä̧ ja̧'hua̧ta̧'a̧nö̧ pan obimä ku cuicuätucua pä'ötä ja̧'a̧. ³³ Ja̧'hua̧ta̧'a̧nö̧ ucutumä ca̧ca̧cu̧ pä̧cuä̧huo̧mȩra̧'a̧cu̧ doächäcuähuomettö̧mä̧ sietenö mo̧ro̧ jo̧mȩnä̧ räcuopätucuoca'a ku̧jä̧tu̧cua̧jä̧, hueähui'inö mo̧ro̧ jo̧mȩ päi'ime jubö. Isopäi'önä TÖ̧Ä̧NÄ̧HUA̧MÄ̧ ucuturu ucuotäcuähuotö cuätucunä jȩä̧cuä̧u̧jä̧ sietenö mo̧ro̧ jo̧mȩnä̧. ³⁴ Jitä mo̧ro̧ jȩtä̧ji̧mä̧, TÖ̧Ä̧NÄ̧HUA̧ ucuturu suronä jȩ'cuä̧'i̧jä̧tu̧cu̧ jȩä̧cha̧ pä'ö jȩpä̧jä̧tö̧jä̧. ³⁵ Sietenö mo̧ro̧ jo̧mȩnä̧ ja̧'hua̧ta̧'a̧nö̧ sietenö yodo jo̧mȩnä̧ ca̧ca̧cu̧ pä̧cuä̧huo̧mȩra̧'a̧cu̧ doächäcuähuometä̧ cu̧jä̧cuo̧tö̧jä̧, ja̧'hua̧ta̧'a̧nö̧ TÖ̧Ä̧NÄ̧HUA̧TTÖ̧ hueähuä huȩnȩ päö'anö jȩ'cuä̧tu̧cua̧ja̧ 'coru juocuächätucu juiyäcua'anö̧, pi̧yȩ ja̧'a̧ TÖ̧Ä̧NÄ̧HUA̧ ttörö hueäjimä." ³⁶ Ja̧'hua̧nö̧tä̧ jȩpi̧nä̧tö̧ Aarón'inä ja̧'hua̧ta̧'a̧nö̧ i̧tti̧mö̧'i̧nä̧ o'cajuiyönä jahuätö jȩtta̧ pä'ö TÖ̧Ä̧NÄ̧HUA̧ hueäjita'anö Moisésnä.