¹ Tätähuä o'ca'i̧nä̧, tta̧'cua̧juä̧'i̧nä̧ aditömä̧ cu̧ju̧nä̧tu̧cuä̧; inä̧ o'qui ro̧ö̧'i̧nä̧, ja̧'hua̧ta̧nö̧ inä̧ o'qui huȩyu̧cuä̧ o'qui'i̧nä̧ äräbe'ö ku̧nö̧mä̧; ucuotömä̧ cuesehuätucuä, Ttötä ja̧'a̧ttö̧ TTÖ̧Ä̧NÄ̧HUA̧ Diosmä̧ ² Chu̧mo̧ro̧ adicuocö mo̧ro̧mä̧ ucuotätucui, ja̧'hua̧ta̧'a̧nö̧ chu̧jo̧de'inä ucuotätucui, Ttötäsä TTÖ̧Ä̧NÄ̧HUA̧ Diosmä̧. ³ Ttö huedinö̧'inä ja̧'hua̧ta̧'a̧nö̧ hueähuä huȩnȩ'inä ucuotö jȩ'cuä̧tu̧cu̧ttö̧mä̧, ⁴ ajiya i̧chä̧cuȩ mo̧ro̧mä̧, ajiyamä̧ ichönä̧tä̧ huȩdä̧cua̧sä̧; rȩjȩmä̧ cuähuä u̧huä̧ju̧ iyäcua'a ja̧'hua̧ta̧'a̧nö̧ dauhuiyä'i̧nä̧ u̧huä̧ju̧mä̧ huȩjä̧cua̧'a̧; ⁵ trigo'i̧nä̧ huȩjä̧cua̧'a̧, uvas ocha jo̧mȩnö̧ jö̧ ttottomȩ jubö päi'önä̧, ja̧'hua̧ta̧nö̧ uvas ttu̧ju̧nu̧ mo̧ro̧ jubö päi'önä̧. pan'i̧nä sucuädi'ätucuomȩ jubö päi'önä̧ cuä̧nö̧ kä̧nö̧ juä̧jä̧nä̧mä̧ u̧ni̧chä̧rö̧ eseutä cu̧jä̧cuo̧tö̧jä̧. ⁶ Ja̧huä̧jä̧ rȩjȩnä̧mä̧ u̧ni̧chä̧rö̧ kä̧cuä̧huä̧ kö̧nä̧ jȩchä̧cua̧sä̧; ucutumä ya̧tȩ'i̧nä̧ yepe'oca'a u̧ni̧chä̧rö̧tä̧ cuä'äcuotöjä̧. Ttömä de'iyu isotö rä̧huä̧pi̧ huotörö'i̧nä̧ rä'epö icu kä̧nö̧, curä rohuähuätörö'i̧nä̧ juä̧jä̧nä̧mä̧ dottächö juiyönä̧tä̧ jȩchä̧cua̧sä̧. ⁷ Ucutumä̧ cuaboiyotö döttecuächönä̧ jȩ'cuä̧cuo̧tö̧jä̧, ja̧'hua̧ta̧nö̧ jahuätörömä̧ curodänä̧ cuä'äutä cuicuäcuotöjä̧. ⁸ Ucututtö cinconö jo̧mȩnä̧ huotömä̧, ciennö̧ huotörö ya'opö tticuäcuotö, ja̧'hua̧ta̧nö̧ ucututtö ciennö̧ huotömä̧, diez milnö̧ huotörö ya'opö tticuäcuotö; cuaboiyotörömä̧ rohuäu icu curodänä̧ cuä'äu cuicuäcuotöjä̧. ⁹ Ttötä topö ppä̧dä̧dä̧cua̧sä̧ ucuturu, ja̧'hua̧ta̧'a̧nö̧ yodepäcuotöjä yabocutä cuirecuächätucunä; Ttötä chersecu chi̧jȩpä̧cua̧sä̧ ucuturu. ¹⁰ Ucutumä cucuäcuotöjä recuo hua'adö ku̧nä̧huö̧ttö̧tä̧. Ucutumä rä'epö cuicuätucuajá cu̧cuä̧tu̧cu̧ hua'adö cu̧ju̧nä̧'i̧jä̧tu̧cu̧mä̧ ucuturu recuä rö̧jä̧cua̧'a̧ cu̧cuä̧tu̧cu̧ jareö hua'adö cu̧ju̧nä̧tu̧cua̧ pä̧'ö̧. ¹¹ TTÖ chu̧ju̧nä̧cua̧sä̧ chö̧jo̧ca̧ ucutu cu̧'cä̧tȩtu̧cu̧nä̧, suronämä topocö chä̧cua̧sä̧. ¹² Ucututäcu chä̧jä̧cua̧sä̧ CU̧Ä̧NÄ̧HUA̧TU̧CU̧ jö̧nä̧tä̧ ja̧'hua̧nö̧ ja̧'a̧ttö̧ ucutu jä̧cua̧'a̧ jitucu chö̧jä̧u̧mä̧. ¹³ Ttotäsä CU̧Ä̧NÄ̧HUA̧TU̧CU̧ Diosmä, Egipto rȩjȩttö̧ rä'epö icuinömä, ucuturu jahuätö huȩttö̧ra̧'a̧nä cu̧jätucua'acu pä'ö. Ttötä rä'epö icuinösä̧ rö̧'ä̧nä̧ huȩttö̧ro̧mȩttö̧ ucuturu ja̧'hua̧nö̧ jȩpö̧, adiu jueönätä cui̧'chä̧tu̧cu̧nä̧ jȩpi̧nö̧sä̧. ¹⁴ Ja̧'hua̧nö̧ ja̧'a̧nä̧ ucutu ttörö cuä̧ju̧cu̧ juiyöttömä, ¹⁵ pi̧yȩ hueähuä huȩnȩ o'cajuiyönä jȩcu̧'ä̧tu̧cu̧ juiyöttömä, ja̧'hua̧ta̧'a̧nö̧ ttö pädinö cuju'cätucuoca'a jö̧ttö̧ ja̧'hua̧ta̧'a̧nö̧ ttö huedinö jarocu'ätucuttu'inä, jȩcu̧'u̧ juiyätucua pä'ö ttö huedinö ji̧nö̧, ja̧hua̧nö̧ jȩpö̧tä̧ ttö esecu chu̧ju̧ni̧nö̧'i̧nä̧ jȩpo̧co̧tö̧jä̧. ¹⁶ Pi̧yȩ jȩcu̧'ä̧tu̧cu̧ttö̧mä̧, ja̧u̧nu̧mä̧ pa̧'a̧nö̧ jȩchä̧cua̧sä̧: TTÖTÄ ro̧dȩpä̧cua̧sä̧ ucutu, maricheinä ja̧'hua̧ta̧'a̧nä̧ du'unä näcuä̧chä̧tu̧cuo̧mȩnä̧ cui'äriyä'inä tocu'u juiyätucunä ja̧'hua̧nö̧tä̧ cua̧'cua̧rö̧ jiyupöchö ja̧'cuo̧ppö̧nä̧ 'corujuocuächäcuotöjä. U̧huä̧ju̧ isade cu̧ju̧nä̧tu̧cu̧ttu̧'i̧nä̧ huȩjo̧ca̧'a̧ jä̧cua̧'a̧. ¹⁷ TTÖ chö̧'ä̧i̧ chi̧jȩpä̧cua̧sä̧ ucuturu, ja̧'hua̧nö̧ jo̧mȩnä̧ cuabo'iyotötä huettäcuotöjä. Ru̧hua̧'i̧nä̧ ucuturu kö'cocötä hueäcuotöjä, ja̧'hua̧nö̧ jo̧mȩnä̧ tö'ipötä cu̧jä̧cuo̧tö̧jä̧, ko̧ro̧nö̧mä̧ korotö'inä ru̧ttä̧ro̧ca̧'a̧nä̧. ¹⁸ Ucutu ttö huedö jȩ'cu'ä̧ tu̧cuo̧ca̧'a̧ju̧ttö̧mä̧, ja̧'hua̧nö̧ ja̧'a̧ttö̧ ttötä ro̧dȩpä̧cu'a̧sä̧ ji̧mu̧tȩ ta'arenö jo̧menä̧, suronä jȩ'cu'ä̧tu̧cu̧nä̧tä̧ . ¹⁹ Ttötä ro̧dȩpä̧cu'a̧sä̧ ucu'o tecu'ähuömä. Ttötä huedi yä̧cua̧sä̧ ajiya mo̧ro̧ jä̧ttö̧mä̧ ja̧'hua̧ta̧'a̧nö̧ ucutu cö̧jä̧tu̧cu'ä̧jä̧ 'quiyäcu'a. ²⁰ Juruhuächi'ö cuadita'anä ja̧'hua̧nö̧ cuaditömä cu'i̧rȩjä̧ttö̧ cu̧cu'ȩ cu'ähuämä u̧huä̧ju̧ obamä huȩji̧yä̧cua̧'a̧. ²¹ Ucutu ttörö cu'arodätucútömä ja̧'hua̧ta̧'a̧nö̧ cuä̧ju̧cu'ä̧tu̧co̧ca̧'a̧ jö̧ttö̧mä̧, ttötä ro̧dȩpä̧cu'a̧sä̧, ji̧mu̧tȩ ta'are abonänö ucuturömä, suronä jȩ'cu'ä̧jä̧tu̧cu̧tä̧. ²² Ttötä de'á isotö pä̧'i̧cu'ä̧tö̧rö̧ huȩdä̧cua̧'sä̧ ucutu cuaboyotörö, cu'i̧tti̧murö̧ tti̧nä̧ cuä̧cu'o̧ttö̧, si'epu tticuäcu'ottö cu'ä̧ji̧mu̧ pä̧cä̧yö̧rö̧, hui̧ttä̧chi̧'ä̧cu'o̧tö̧. cu̧jä̧tu̧cu'o̧mȩmä̧ ya̧tȩ'i̧nä̧ to'äcua'a. ²³ ja̧'hua̧nö̧ jö̧ 'cuäopa'anä, ucutumä jidäjuomenä̧'inä juo̧juä̧chi̧'o̧co̧tö̧jä̧ TTÖ pädoca'acutä 'chä̧nö̧ icuätöjä, ja̧'hua̧nö̧ ja̧'a̧ttö̧ ttö'inä to'ija̧'a̧cu̧ jȩchä̧cua̧sä̧ ucuturu, ²⁴ Ja̧'hua̧nö̧ ja̧'a̧ttö̧ TTÖTÄ ro̧dȩpä̧cua̧sä̧ ji̧mu̧tȩ ta'arenö jo̧mȩ suronä jȩtti̧nö̧mä̧ micuämä. ²⁵ Curä'chu chi̧'chä̧chä̧cua̧sä̧ ucuturu ro̧'ȩpä̧cuä'chu chesecuinö jȩcu̧'ä̧tu̧cuo̧ca̧'a̧ttö̧. Ucutu ji̧nä̧ yo̧mȩtȩ päcui'äcuotöjä cutähuiyätucu jacuättötä ja̧'hua̧nö̧ ja̧'a̧nä̧ TTÖTÄ märichi huȩdä̧cua̧sä̧ jua'atä ucuturu, ja̧'hua̧nö̧ jo̧mȩnä̧ cuabo'iyotö ttu̧mu̧nä̧tä̧ päcui'äcuotöjä. ²⁶ Cu̧cuä̧ cuȩmä̧tu̧cuo̧mȩ TTÖ 'to'opö chicuomenämä, to̧mu̧rȩnö̧ jo̧mȩ nä̧tö̧mä̧ ji̧nä̧ ttȩttä̧pcuo̧tö̧ pa̧'o̧ppä̧ ȩttä̧huo̧mȩ, ja'huätö nätö̧mä̧ ttiyä'chäcuotö ttö̧ja̧ ttö̧'a̧cuä̧cho̧mȩtä̧ pa̧ja̧tö̧. Ucutumä cucuätucua'anä su'ädi'ocotö cuäcuotöjä. ²⁷ Ucutu Ttö pädö cuä̧ju̧cuä̧tu̧cuo̧ca̧'a̧ jö̧ttö̧mä̧, Ja̧u̧mä̧ 'cuäopa'anä̧ jarodö yabonö̧tä̧ to'ija̧'a̧cu̧ jȩ'cuä̧tu̧cu̧ttö̧mä̧, ²⁸ Ttö'i̧nä̧ ucuturu to'ija̧'a̧cu̧ jȩpö̧, ra̧huä̧ri̧pö̧nö̧ surojö jȩchä̧cua̧sä̧, ja̧'hua̧nö̧ jȩpö̧mä̧ sietenö jo̧mȩnä̧ ro̧dȩpä̧cuä̧u̧jä̧, surojö rö̧ä̧nä̧ jȩ'cuä̧tu̧cu̧nä̧mä̧. ²⁹ Ucutumä cua̧mö̧nä̧ cui̧mö̧tu̧cu̧ u̧mä̧tö̧'i̧nä̧, nä̧tö̧'i̧nä̧ ttidepä cucuäcuotöjä̧. ³⁰ Ju'to jo̧mȩ'inä si'epö chi̧cuä̧cua̧sä̧, incienso ku icu iyähuome'inä o'ca'inä si'epö chi̧cuä̧cua̧sä̧, ja̧'hua̧nö̧ jȩpö̧ cuo'co jähuätucumä tätähuä o'ca huä̧mȩ cä'epä'chö chu̧huȩnä̧cua̧sä̧, ja̧'hua̧nö̧ jȩpö̧tä̧ ttö chöjö'cocömä̧ chi̧jȩpä̧cua̧sä̧. ³¹ Kuidepiyutucumä̧ juiyomȩtä̧ päi'önä̧ chu̧nä̧hui̧'ä̧cua̧sä̧, ja̧'hua̧ta̧nö̧ cu̧ä̧huo̧tö̧rö̧'inä si'epö chicuä̧cua̧sä̧. Ttömä ku icu cuiyätucu ö̧a̧mȩmä̧ ku'cocö chä̧cua̧sä̧. ³² Ja̧hu̧ä̧jä̧ rȩjȩmä̧ si'epö chicuäcuäjä̧. Cuaboiyotucu ju̧huȩnȩ ka̧cuä̧tö̧mä̧, si'epö chicuäjittö ye'ecuä'chötä ttö̧ja̧cuä̧cuo̧tö̧. ³³ Ucuturumä̧ tti̧rȩjä̧pö̧nä̧ ka̧cuä̧tö̧ ttö̧'cä̧tȩ jo̧mȩ pö̧nä̧ cu̧ja̧cuä̧tu̧cu̧nä̧ pperetö chicuäcuotöjä̧, chucurodä chu̧mö̧nä̧ 'chu̧ä̧rä̧nö̧ cuo'ca'atucunä̧ ru̧dä̧rä̧cuä̧u̧jä̧. Cui̧rȩjä̧tu̧cu̧mä̧ to̧ä̧jä̧tä̧ ki̧'ä̧cua̧'a̧ ja̧'hua̧ta̧'a̧nö̧ cuidepiyutucumä̧ juiyomȩtä̧ päi'önä̧ si'epö icuähuäcua'a. ³⁴ Ja̧u̧nu̧ o'ca'amä, juä̧jä̧ rȩjȩmä̧ o'cajuiyönä̧ adicuocö mo̧ro̧mä̧ surojuoächinä̧jä̧ ja̧'a̧nä̧ esehuä̧cuä̧jä̧, ja̧'hua̧ta̧'a̧nö̧ ucutumä̧ cuaboiyotö tti̧rȩjä̧nä̧ cu̧jä̧tu̧cua̧'a̧nä̧. Ja̧u̧nu̧ pä̧nä̧mä̧, ja̧huä̧jä̧ rȩjȩmä̧ adicuoco̧jä̧ jä̧cuä̧jä̧ ja̧'hua̧nö̧ jo̧mȩnä̧ adicuocö mo̧ro̧mä̧ ȩsȩhuä̧cuä̧jä̧. ³⁵ Icuicäjä̧tä̧ ja̧'a̧nä̧ ku̧nä̧huo̧co̧jä̧ jä̧cuä̧jä̧, ucutu ja̧huä̧jä̧nä̧ cu̧jä̧tu̧cuo̧mȩnä̧ adicuocö mo̧ro̧ esehuocomȩ ji̧no̧mȩnä̧. ³⁶ Ucutu cuaboiyotö tti̧rȩjä̧nä̧ ka̧cui̧pä̧tö̧rö̧mä̧, cuamiso'quitucunä rö̧ȩnä̧ yecuecuätucunä, isojä ma̧a̧'a̧ rä̧mi̧pa̧'a̧ ä̧ju̧cu̧tä̧'i̧nä̧ yecuecuä'chätucunä, ja̧'hua̧nö̧ jo̧mȩnä̧ ucutumä ducuecuächäcuotöjä̧ cuä'äu tticuatö pä'ö curodäcu rö̧ttä̧u̧ döttecuächa'a jä̧'i̧nö̧'a̧nö̧. Ucutu ma̧cuä̧cuo̧tö̧jä̧ ya̧tȩ'i̧nä̧ cuo'ca'atucunämä ruhuoca'anä̧. ³⁷ Ucutu cua̧mo̧nä̧tu̧cu̧tä̧ curohuähuäcuotöjä, ucutumä curächu ye'ecu jottea'a cua̧ro̧nä̧, ya̧tȩ cua̧bo̧cha̧tu̧cu̧'i̧nä̧ ru̧huä̧ro̧ca̧'a̧nä̧. Ucutu cuä̧rä̧bi̧ä̧tu̧cua̧ pä'öinä cujurutumä juihuäcuottöjä cuabo'iyotö ttä'cattömä. ³⁸ Ucutumä 'coru juocuächäcuotöjä korotö tti̧rȩjä̧ttö̧tä̧ ja̧'hua̧nö̧ ja̧'a̧ttö̧ cuabo iyotö tti̧rȩjä̧ttö̧tä̧ ttuhui'äcuotöjä ucutumä. ³⁹ Ucututu ka̧hui̧pä̧tö̧mä̧, ttämonä suronä jȩttö̧ micuätä totteäcuotö, jahuätämä ttäbo'iyotö tti̧rȩjä̧nä̧ ka̧cuä̧tö̧, ja̧'hua̧ta̧nö̧ ttä̧do̧tö̧ mi̧nä̧ suronä jȩpu̧ totte'inöta'anö̧tä̧ totteäcuotö. ⁴⁰ Iso pä'önä suronä jȩttö̧ jiäu tticuttumä ja̧'hua̧ta̧nö̧ ttä̧do̧tö̧ minä jȩtti̧nö̧'i̧nä̧, ja̧'hua̧ta̧nö̧ TTÖRÖ ucuo juiyönä jȩtti̧nö̧'i̧nä̧ ja̧'a̧nä̧ ttö chabo iyotö 'cua̧ro̧nä̧ tti̧'chi̧nö̧'i̧nä̧ ja̧'a̧ttö̧. ⁴¹ Jahuätö ttäbo i̧ya̧ 'cua̧ro̧nä̧ 'chänö jȩchä̧cua̧sä̧ ja̧'hua̧nö̧ jȩpu̧ ttäbo iyotö tti̧rȩjä̧ra̧'a̧ chi'cächäcuotö, ttämiso'qui jahuätö jarodäcuäcuä juiyönä jahuätö a̧'a̧ pä'ö suronä jȩttäji ttimitähuä pä'ö, ⁴² Ja̧'hua̧nö̧ jö̧ttö̧mä̧ TTÖTÄ chamucuädäcua̧sä̧ Jacobcu'inä Isaac'cu'inä ja̧'hua̧ta̧'a̧nö̧ Abrahamcu̧'i̧nä̧ esecu jȩchä̧cua̧sä̧ pädinö jinö, TTÖ rȩjȩ chi̧yä̧cua̧sä̧ pädinö jinömä chi̧yä̧cua̧sä̧. ⁴³ Ja'huätömä tti̧rȩjä̧'i̧nä̧ jarotti'äcuotö, ja̧'hua̧nö̧ jȩpö̧ cuesehuäcuotöjä 'cuättächö̧ mo̧ro̧ jä̧u̧ cui̧rȩjä̧tu̧cu̧ jaropi'ö cuecuächätucua'anä'inä. Ja̧'hua̧nö̧ ja̧'a̧nä̧ ucutumä ro̧ȩcuä̧ cuȩmä̧cuo̧tö̧jä̧ suronä jȩcu̧'ä̧tu̧cu̧mä̧ jua'amä jitötä ttöaroda'attö ttö huedinö ja̧'hua̧ta̧'a̧nö̧ ttötö hueähua huȩnȩ cuju'cätucuoca'attö. ⁴⁴ Ji̧nä̧, ja̧'hua̧nö̧ 'cuäopa'anä'inä, ja'huätö ttabo iyotä ti̧rȩjä̧nä̧ ttö̧jo̧cua̧'a̧nä̧'i̧nä̧, ttömä jaropocö chä̧cua̧sä̧, ja̧'hua̧ta̧'a̧nö̧ TTÖTÄ 'cä̧'ȩpö̧ chu̧ju̧nä̧cuo̧tö̧ o'catoi'önärö̧ si'epö chicuomettö'inä, ja'huätörö chesecuinö'inä juȩnȩbutä jä̧cua̧'a̧, ttötäsä TTÖ̧Ä̧NÄ̧HUA̧ Diosmä. ⁴⁵ Ja̧'hua̧nö̧ ja̧'a̧nä̧ ja'huätörö adinä ja̧ pä'ö, TTÖ cha̧mucuä̧dä̧cua̧sä̧ chesecuyinö ji̧nö̧ ttä̧do̧tö̧mi̧nä̧tö̧ pi̧nä̧tu̧cu̧, pi̧jä̧ o'cajuiyönä ttu̧huo̧ju̧nä̧ ttötä chi̧'chä̧chi̧nä̧u̧ru̧ Egipto rȩjȩra̧'a̧ttö̧, ttu̧ru̧hua̧ Dios chä pä'ö. TTÖ̧Ä̧NÄ̧HUA̧MÄ̧ ttötäsä. ⁴⁶ Ja̧'hua̧nö̧ ja̧'a̧ttö̧ pi̧yȩ ja̧'a̧tó hue'ähuä huȩnȩmä, jȩtta̧ pä'ö, ja̧'hua̧ta̧'a̧nö̧ TÖ̧Ä̧NÄHUA̧ hue'inömä Moisesrö Israel ttö̧ja̧rö̧ Sinaí mö'ä̧'cattö.