¹ TÖ̧Ä̧NÄ̧HUA̧ Moiséscu ucuocumä pa̧'a̧nö̧ pä'inö: ² Israel ttö̧ja̧rö̧ ji'ähui ja̧'hua̧ta̧'a̧nö̧ jahuätörö ji'ähui: Ya̧tȩ TÖ̧Ä̧NÄ̧HUA̧RÖ̧ ji̧yȩtȩ chiya pä'ö amöcuädömä pi̧yȩ mi̧cuä̧u̧ jä̧huä̧ jȩa̧ pä'ö ja̧'a̧. ³ Ubo veintenö a̧'ȩ jo̧mȩnä̧ ku̧nä̧rö̧ttö̧ kä̧mä̧dö̧ sesentanö̧ a̧'ȩ jo̧mȩnä̧ ku̧nä̧rö̧ jubö ku̧nä̧rö̧ i̧micuomemä̧ cincuentanä plata o̧bi̧ jo̧mȩnä̧ jä̧cua̧'a̧ Dios ö̧jo̧dettö plata o̧bi̧nä̧ tti̧mi̧tä̧cuȩ pä'ö ttu̧ju̧ni̧nö̧'a̧cu̧ä̧tä̧. ⁴ Isaju'i̧nä̧ ja̧u̧ a̧'ȩ jo̧mȩtä̧ ku̧nä̧rä̧ju̧ kimicuämä platamä treintanö o̧bi̧ jo̧mȩtä̧ jä̧cua̧'a̧. ⁵ U̧mä̧tö̧ cinconö̧ a̧'ȩ ku̧nä̧rä̧tö̧ttö̧ kä̧mä̧dö̧ veintenö̧ a̧'ȩ jo̧mȩnä̧ ku̧nä̧rö̧ jubömä̧ ttimicuämä veintenö̧ o̧bi̧nä̧tä̧ mitö ȩmä̧huä̧cuo̧tö̧, ja̧'hua̧ta̧'a̧nö̧ nä̧tö̧rö̧mö̧ dieznö̧ o̧bi̧nä̧tä̧ mitö ttȩmä̧cuä̧u̧. ⁶ Ppo̧'ä̧tö̧ ya'ute kä̧hua̧tä̧ ku̧nä̧rä̧tö̧ttö̧ kä̧mä̧dö̧ cinconö̧ a̧'ȩ jo̧mȩnä̧ ku̧nä̧rä̧tö̧ jubö, cinconö o̧bi̧nä̧tä̧ mitö ȩmä̧huä̧cuo̧tö̧, ja̧'hua̧ta̧'a̧nö̧ nä̧tö̧ ppo̧'ä̧tö̧mä̧ ja̧u̧tä̧ a̧'ȩ jo̧mȩtä̧ ku̧nä̧rä̧tö̧mä̧ huä̧bo̧bi̧cuä̧nä̧tä̧ mitö ȩmä̧huä̧cuo̧tö̧. ⁷ U̧mä̧tö̧ sesentanö̧ a̧'ȩ yabonä̧nö̧ ku̧nä̧rä̧tö̧mä̧, quincenö̧ o̧bi̧nä̧tä̧ mitö ȩmä̧huä̧cuo̧tö̧, ja̧u̧tä̧ a̧'ȩ ku̧nä̧rä̧tö̧ nä̧tö̧mä̧ dieznö o̧bi̧nä̧tä̧ mitö ȩmä̧huä̧cuo̧tö̧. ⁸ Ja̧'hua̧nö̧ ja̧'a̧nä̧ mi̧cuä̧huä̧cuȩ jȩpö̧ ttu̧ju̧ni̧no̧mȩ jo̧mȩ i̧mi̧ta päö juiyönä jö̧ttö̧mä̧, i̧yä̧hua̧ päjimä sacerdote ö̧ja̧'a̧cu̧ i̧'chä̧ pä'ö jä̧cua̧'a̧, ja̧'hua̧nö̧ jo̧mȩnä̧ sacerdotemä micuähuomȩttömä̧ pabonä̧tä̧ jui'ädö icua'atä ȩmä̧huä̧cua̧. ⁹ Ya̧tȩ i̧sa̧rö̧ cuä'ö icu Ö̧Ä̧NÄ̧HUA̧RÖ̧ iya pä'öttömä, ja̧'hua̧nö̧ iyomenä Ja̧u̧ ȩmö̧ttö̧mä̧, ja̧u̧ i̧sa̧mä̧ Ja̧u̧rö̧ i̧yähua jönätä 'cä̧'ȩpö̧ ku̧nä̧huäcua, ¹⁰ ttö̧ja̧sa̧mä̧ päroumä icuo, ka̧rä̧ i̧sa̧ adihua̧cu̧'i̧nä̧, su̧ro̧pa̧cu̧'i̧nä̧mä̧. Ja̧u̧mä̧ i̧sa̧ ka̧ra̧ i̧sa̧cu̧ pärou icuttumä̧ ta̧ju̧cuäyotö pojopö ku̧nä̧huo̧tö̧ jö̧nä̧tä̧ ttö̧ja̧cuä̧cuo̧tö̧. ¹¹ Ja̧'hua̧nö̧ ja̧'a̧nä̧ ya̧tȩ ji̧yȩtȩ i̧mi̧nä̧ huȩnȩtö̧ I̧sa̧ su̧ro̧pa̧rö̧ Ö̧Ä̧NÄ̧HUA̧RÖ̧ iyöttömä TÖ̧Ä̧NÄ̧HUA̧MÄ̧ ȩmo̧cö̧ jä̧cua̧, ja̧'hua̧nö̧ jo̧mȩnä̧ ttö̧ja̧sa̧mä̧ ja̧u̧ i̧sa̧rö̧mä̧ sacerdote ö̧ja̧'a̧cu̧tä̧ i'cächa pä'ötä jä̧cua̧'a̧. ¹² Sacerdotemä u̧sä̧huä̧cua̧ i̧sa̧ i̧mi̧cuä ju̧huȩnȩnä̧ ttiya pä'ö ttu̧ju̧ni̧no̧mȩnä̧ ttiya pä'ötä. Sacerdote ju̧huȩnȩmä̧ mi̧cuä̧hua̧ päjittömä̧, ja̧u̧ jä̧cua̧'a̧ i̧sa̧ imicuämä. ¹³ Sacerdote iyö icuähua̧rö̧ ppa̧huä̧da̧ päöttömä̧, i̧sa̧ i̧mi̧cuähuomȩttö̧mä̧ yabonä̧nö̧ cinconö jähuä jo̧mȩnä̧ i̧mi̧ta pä'ötä jä̧cua̧'a̧. ¹⁴ Ya̧tȩ ojusede 'quȩ'ȩpö̧ u̧ju̧nu̧ttö̧ Ö̧Ä̧NÄ̧HUA̧RÖ̧ iya pä'ö, ja̧'hua̧nö̧ jo̧mȩnä̧mä̧ sacerdote hua̧ ö̧tä̧cua̧ ja̧u̧ mi̧cuämä adiunä'inä surojöna'inä. Sacerdote hua̧ micuähuome päomenämä, ja̧'hua̧nö̧tä̧ jä̧cua̧'a̧. ¹⁵ ja̧'hua̧nö̧ ja̧'a̧nä̧ isode u̧ru̧hua̧ 'quȩ'ȩpö̧ ppa̧huä̧dö̧ttö̧mä̧, ja̧u̧mä̧ micuähuomettö̧'i̧nä̧ yabonänö i̧mi̧tä̧cua̧ ppä̧huä̧dä̧ pä'ömä, ja̧'hua̧nö̧ jȩö̧ttö̧tä̧ iäre pä̧i̧'ä̧cua̧. ¹⁶ Ya̧tȩ chutä i̧rȩjä̧ttö̧ ji̧'qui̧cha̧nö̧ 'cä̧'ȩpö̧ttö̧mä̧, ja̧'hua̧nö̧ jo̧mȩnä̧mä̧ micuähuäcua'a cuähuä u̧huä̧ju̧ u̧ju̧nä̧cuo̧mȩttö̧ topö, 370 lts. jo̧mȩ cebadamä micuähuome ja̧'a̧ 50nö̧ pärätä o̧bi̧ jo̧mȩ. ¹⁷ TTesecu a̧'ȩ pätecuächomenä cuähuä u̧ju̧no̧mȩ 'cä̧ȩpö̧ttö̧mä̧, micuähumemä yorätehuäcua'a. ¹⁸ Ja̧'hua̧nö̧ ja̧'a̧nä̧ cuähuä u̧ju̧no̧mȩ ttesecu a̧'ȩ o'ca'a 'cä̧ȩpö̧ttö̧mä̧, ja̧'hua̧nö̧ jo̧mȩnä̧mä̧ sacerdote hua̧tä̧ pa̧ja̧tö̧ to̧ä̧cua̧ cuähuä chu̧nä̧huo̧mȩ micuämä a̧'ȩttö̧ pä'äjita'anö ttesecu pä̧nä jo̧mȩ jubu, ja̧'hua̧nö̧ jo̧mȩnä̧mä̧ micuähuomettö'inä pabotä jui'ädö i̧cuä̧hui̧yä̧cua̧. ¹⁹ Ya̧tȩ cuähuä u̧ju̧no̧mȩ i̧yi̧nö̧'ca̧ pä'äjita'anö ppa̧huä̧da̧ pä'öttömä, ja̧'hua̧nö̧ jö̧ttö̧mä̧ ja̧u̧mä̧ micuähuomettö̧'i̧nä̧ yabonänö i̧mi̧tä̧huä̧cua̧, ja̧'hua̧nö̧ jö̧ttö̧tä̧ cuähuä u̧ju̧no̧mȩ pä̧i̧'ä̧cua̧. ²⁰ Cuähuä ku̧nä̧huo̧mȩ ȩmu̧ juiyöttömä, ja̧'hua̧nö̧ jo̧ca̧'a̧ ka̧ra̧rö̧ micuänä iyäjittömä, pä'äjita'anö ȩmä̧ pä'ömä juiyäcua'a. ²¹ Ja̧'hua̧nö̧ jä̧'ji̧ o'ca'a, cuähuä ku̧nä̧huo̧mȩ jä̧jo̧mȩmö̧ ttiya pätttöttömä ttesecu a̧'ȩ pä̧tȩcuä̧cho̧mȩnä̧, juȩnȩmä̧ TÖ̧Ä̧NÄ̧HUA̧RÖ̧ adihuomenä iyähuä jä̧cua̧'a̧, juȩnȩ rȩjȩmä̧ o'cajuiyönä TÖ̧Ä̧NÄ̧HUA̧RÖ̧TÄ̧ iyähuome. Sacerdote huotörötä iyähuäcuome. ²² Ya̧tȩ ttö̧ja̧'i̧sa̧ mitö ȩmäme 'quȩ'ȩpu̧ icuttömä, 'quȩpä̧jä̧mä̧ ahuaruhuä tti̧rȩjä̧mäcö̧, ²³ ja̧'hua̧nö̧ ja̧'a̧ttö̧ sacerdote pa̧ja̧tö̧ to̧'ä̧cua̧ i̧micuä rä'opächö a̧'ȩ́, ja̧'hua̧ta̧'a̧nö̧ ttö̧ja̧'i̧sä̧ i̧mi̧tä̧cua̧ i̧mi̧cuä ja̧u̧nu̧ moró̧ iya pä'ö surojö juiyönä TÖ̧Ä̧NÄHUA̧RÖ̧. ²⁴ Räopächö a̧'ȩ́mä̧, cuähuä ttu̧ju̧ni̧no̧mȩ mitö ȩmi̧nomemä̧ mitö ȩminäcu̧ru̧tä̧ ki̧'i̧na̧'a̧. ²⁵ O'ca juiyönä micuäumä surojöttö 'quȩ'ȩpu̧ kö̧nä̧huo̧me ttötinöta̧'a̧nö̧ pärätä o̧bi̧. 20nö jo̧menä micuäö 57gms. Rö̧nä̧huo̧mȩ jo̧menä. ²⁶ Ajicuäcuähuotö ä̧cuo̧mȩnä̧ tti̧tti̧rö̧mä̧ ya̧tȩ'inä pporädö icua pä'ömä jo̧ca̧'a̧ jä̧cua̧'a̧, ja̧u̧ ä̧cuo̧mȩnä̧ tti̧tti̧mä̧ TÖ̧Ä̧NÄ̧HUA̧RÖ̧ i̧yä̧hua̧ jo̧mȩttö̧, päcäyä jö̧ttö̧'inä, oveja jö̧ttö̧'inä TÖ̧Ä̧NÄ̧HUA̧RÖ̧TÄ̧ i̧yä̧hua̧ jä̧cua̧. ²⁷ I̧sa̧ su̧ro̧pa̧ i̧tti̧ jö̧ttö̧mä̧ u̧ru̧hua̧mä̧ ppa̧'a̧dö̧ imitäjhua pä'ötä jä̧cua̧'a̧ ja̧u̧ i̧mi̧cuomemä̧, yabonänö jimätejähuä jo̧mȩ jo̧mȩnä̧ mi̧cuähuomettö̧mä̧. Ja̧u̧ i̧sa̧rö̧ ppa̧'a̧di̧pö̧ ȩmä̧huo̧cö̧ jö̧ttö̧mä̧, ä̧tȩcuä̧nä̧ imicuome jo̧mȩtä̧ iyö i̧cuä̧huä̧cua̧. ²⁸ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧RÖ̧ iya pä'ö pojopö u̧ju̧no̧co̧cu̧ jö̧ttö̧mä̧, u̧ju̧nä̧rö̧mä̧ o'cajuiyötä ttö̧ja̧ jö̧ttö̧'inä, ajicuäcuähuotö jö̧ttö̧'inä ahuaruhuä tti̧rȩjä̧ jö̧ttö̧'inä iyötä icuähuäcua'a ja̧'hua̧nö̧ jo̧ca̧'a̧ttö̧mä̧ ppa̧'a̧dö̧ mitö ȩmä̧huä̧cua'a. ²⁹ Si'epö tticua pä'ötä pätetö ku̧nä̧hua̧rö̧mä̧ ppa̧'a̧dö̧mä̧ mitömä ȩmä̧huo̧ca̧'a̧ jä̧cua̧'a̧. Ja̧u̧rö̧mä̧ cuä'ö tticua pä'ötä jä̧cua̧'a̧. ³⁰ Cu̧cuȩ cuähuä rȩjȩttö̧ bahuö to̧mö̧rȩ jähuättömä̧ ji̧yȩtȩ, rȩjȩttö̧ bahuinö u̧huä̧ju̧ ote jö̧ttö̧'inä, dauhuiyä u̧huä̧ju̧ jacuä jähuämä̧ jö̧ttö̧'i̧nä̧, TÖ̧Ä̧NÄ̧HUA̧ jähuätä jä̧cua̧'a̧. TÖ̧Ä̧NÄ̧HUA̧ jähuä päi'önä̧tä̧ 'cä̧'ȩpö̧ ku̧nä̧huä̧cuȩ. ³¹ Ya̧tȩ to̧mö̧rȩ jähuättö ji̧yȩtȩ ȩma̧ päöttömä̧, ȩmö̧ ttimita pä'ö pähui'ino̧mȩttö̧mä̧ ji̧mö̧te jähuä jo̧mȩ yabonä̧nö̧ jo̧mȩnä̧ i̧mi̧ta pä'ö jä̧cua̧'a̧. ³² Pä̧cä̧yu̧ jö̧ttö̧'i̧nä̧, ovejatö̧ttö̧ jö̧ttö̧'i̧nä̧ ttu̧ru̧hua̧ pa̧ja̧tä̧rö̧ tta̧huä̧rä̧u̧ to̧mö̧renö̧ jo̧mȩnä̧ huotöttömä̧ ya̧tȩrö̧tä̧ TÖ̧Ä̧NÄ̧HUA̧RÖ̧ i̧yä̧hua̧ jö̧nä̧ 'cä̧'ȩpö̧ ku̧nä̧huä̧cua̧'a̧. ³³ Isotö ttu̧ru̧hua̧mä̧ usa pä'ömä jo̧ca̧'a̧ jä̧cua̧'a̧ adihuätörö jö̧ttö̧'i̧nä̧, suropätörö jö̧ttö̧'i̧nä̧, ja̧'hua̧ta̧'a̧nö̧ ja̧u̧mä̧ ka̧ra̧ i̧sa̧cu̧mä̧ pärotö'i̧nä̧ icua pä'ömä jo̧ca̧'a̧ jä̧cua̧'a̧. Ja̧u̧ o'catoi'önä̧rö̧ pärotö icuttumä̧, pärotö icuähuotö ta̧ju̧cuäyotö 'cä̧'ȩpö̧ ku̧nä̧huo̧tö̧ jö̧nä̧tä̧ ttö̧ja̧cui̧'ä̧cuo̧tö̧. Pä'äjita'anö̧ ppa̧'ä̧dö̧mä̧ ȩmä̧huo̧co̧tö̧ ttäcuotö." ³⁴ Pi̧yȩ hueähuä huȩnȩmä̧ Sinaí mö̧ä̧'cattö TÖ̧Ä̧NÄ̧HUA̧ Moisésrö iyinö̧ ja̧'a̧ Israel ttö̧ja̧rö̧ u̧huo̧juȩti̧ya̧rö̧ pä'ö.