¹ TÖ̧Ä̧NÄ̧HUA̧MÄ̧ Sinaí möä'cattö Moiséscu ucuocumä pä'inö: ² Israel ttö̧ja̧cu̧ ucuocu, jahuätörömä pa̧'a̧nö̧ ji'ähuitö: Rȩjȩ ucuturu chi̧yä̧jä̧ra̧'a̧ docuächi'ätucuomenämä, ja̧'hua̧nö̧ ja̧'a̧ TÖ̧Ä̧NÄ̧HUA̧ u̧mo̧ro̧ 'cuä'ächi'ö pä̧mä̧dä̧cuä̧huä̧ mo̧ro̧mä̧ rȩjȩmä̧ ucuota pä'ö jä̧cua̧'a̧. ³ Cu̧cuä̧ cuähuätucumä seisnö a̧'ȩ jo̧mȩnä̧ ku̧ju̧nä̧tu̧cua̧ja̧, ja̧'hua̧ta̧'a̧nö̧ seisnö a̧'ȩ jo̧mȩnä̧ uva isäi ä̧nä̧jui̧yä̧mä̧ 'cui̧cuo̧pä̧ra̧jä̧ juhua'atäcu u̧huä̧ju̧'inä cu̧ca̧ca̧tä̧jä̧. ⁴ Ja̧'hua̧nö̧ ja̧'a̧nä̧ sietenö a̧'ȩ päi'omenä 'cuä'ächi'ö pä̧mȩdä̧cuä̧huä̧ mo̧ro̧mä̧ ja̧huä̧jä̧ rȩjȩmä̧ hueähuä huȩnȩ pähuächinö'cuä̧ ku̧nä̧huo̧co̧jä̧ jä̧cuä̧jä̧, TÖ̧Ä̧NÄ̧HUA̧TTÖ̧ 'cuä'ächi'ö pä̧mä̧dä̧cuä̧huä̧ mo̧ro̧ jö̧nä̧. Cu̧cuä̧ cuhuämä cu̧ju̧nó̧, ä̧na̧jui̧yä̧'i̧nä̧ 'cuicuä. ⁵ Ucumä amönä pa̧ja̧tö̧ ba'ipö u̧huä̧ju̧ huȩjö̧mä̧ ttö̧ca̧ca̧ta̧ pä'ömä huecuó, ja̧'hua̧ta̧'a̧nö̧ uva änajui̧yä̧ 'cuiähuocönä u̧huä̧ju̧ huȩjö̧'inä ttö̧ca̧ca̧ta̧ pä'ömä huecuó, Ja̧u̧ a̧'ȩnä̧mä̧ ja̧'huä̧jä̧ rȩjȩmä̧ yabonömä adicuocojä jä̧cuä̧jä̧. ⁶ Ja̧huä̧jä̧ rȩjȩnä̧ adicuocö mo̧ro̧ a̧mö̧nä̧ pa̧ja̧tö̧ ba'ipö huȩju̧tä̧ cu̧cuä̧cua̧jä̧ ucumä. Ucutä'inä, cumöhuäyotö u̧mä̧tö̧'inä, nätö̧'inä, cumöhuäyotö micuänä aditätö'inä juhua'atäcu ko̧ro̧jä̧ttö̧ ichäcuähuotö ucucu ka̧cuä̧tö̧'inä ttucua pä'ö ttö̧ca̧ca̧tä̧cuȩ. ⁷ Ja̧'hua̧ta̧'a̧nö̧ cuä̧ji̧mö̧ pä̧cä̧yu̧'inä juhua'atäcu de'a isotö'inä amönä pa̧ja̧tö̧ ba'ipö huȩju̧tä̧ ttucuäcuotö. ⁸ Ucumä sietenö a̧'ȩ päi'omenä adicuocö jo̧mȩttö̧ kä̧mä̧dö̧ cu̧'a̧ta̧jä̧, sietenö a̧'ȩmä̧ sietenö jo̧mȩnä̧, ja̧'hua̧nö̧ ja̧'a̧ttö̧ sietenö a̧'ȩ jo̧mȩnä̧ cuähuämä i̧u̧nä̧huo̧co̧jä̧ jä̧cuä̧jä̧, o'cajuiyönämä cuarentinueve a̧'ȩ jo̧mȩnä̧ jä̧cua̧'a̧. ⁹ Ja̧'hua̧nö̧ ja̧'a̧ trompeta pä̧i̧cu̧nä̧ ppöcuaja mo̧ro̧mä̧ to̧mö̧rȩ mo̧ro̧ päi'omenä kä̧hua̧tö̧tä̧ sietenö huotö jo̧mȩ päi'omenä. Surojö jȩttö̧ jȩä̧chö̧ mo̧ro̧mä̧ cui̧rȩjä̧ jä̧ttä̧jä̧tä̧ trompeta rä̧mi̧pö̧nä̧ ppöcua pä'ö jä̧cua̧'a̧. ¹⁰ Ucú 'quȩȩpu̧ kö̧ní̧ 50 a̧'ȩ́ päi'omenä amucuädi TÖ̧Ä̧NÄHUA̧ jua̧jä̧ttö̧ räepu i̧cui̧nä̧u̧jä̧ o'cato'inä cu̧jä̧u̧cu̧. Ja̧'hua̧nö̧ ja̧'a̧ttö̧ cuesehua'anö ja̧'a̧ ucumä, juorö cuadita pe'ö huettömetö̧ cuahuaruhuä ttö̧ ja̧'a̧ ppa̧cuä̧chi̧na̧'a̧ttö̧. ¹¹ 50 a̧'ȩ́ päi'omenä ucú cueseu a'ȩ́ ja̧cua̧'a̧. Ucú cu̧ju̧na pe'ömä jo̧ca̧a̧ ja̧'hua̧ta̧'a̧nö̧ u̧huä̧ju̧ oba'inä cu̧ca̧tä̧tä̧. Cuití a̧mu̧nä pä̧ja̧tu̧tä̧ bautä ja̧'hua̧ta̧'nö̧ uva ttu̧ju̧noca̧'a̧nä bauttötä u̧huä̧ju̧ o̧cha̧ ca̧ca̧ti̧. ¹² Cueseumä, surojö juiyö ja̧cua̧'a̧ ucurömä. Ucú cucua pe'ö ja̧'a̧ cu̧cu̧'ȩ kö̧ nähuo̧me jäyä́ bauttötä. ¹³ Pi̧yȩ a̧'ȩ adihuomenä jȩä̧cuä̧huä̧ mo̧ro̧ päi'omenämä̧ ucumä cuiyä'chajá o'catoi'önärö̧ tti̧rȩji̧yä̧ pö̧nä̧. ¹⁴ Cuippeyänä kö̧rö̧ ucu cui̧rȩjä̧ mitö cuiyöttömä ja̧'hu̧ya̧nö̧ jo̧ca̧'a̧ cuipeyänä kö̧ttö̧ mitö cuȩmö̧ttö̧mä̧, jäyä jȩpä̧ 'chodiparö pä'o'inä cuamucuädä ko̧ro̧nö̧mä̧ korotöcu esecu'inä yapare jiccuähuä. ¹⁵ Cuippeyänä kö̧ i̧rȩjä̧ cuȩmö̧ttö̧mä̧, amucuädi tta̧'a̧nö̧ rö̧'ä̧nä̧ a̧'ȩ ka̧ pä'ö ja̧'hua̧ta̧'a̧nö̧ cuähuä jo̧mȩnö̧ 'chiyächome a̧'ȩ adihuomenä jȩä̧cuä̧huä̧ mo̧ro̧ pätecuächome jubu. Cuippeyänä kö̧'i̧nä̧ rȩjȩ iyökä̧nö̧mä̧ ja̧u̧ o'cajuiyönä u̧huo̧jua̧ pä'ö ja'a. ¹⁶ Adihuomenä jȩä̧cuä̧huä̧ mo̧ro̧ a̧'ȩ yabonänö jöttömä micuä'inä yäbonänö micuähuäcua'a, ja̧'hua̧ta̧'a̧nö̧ a̧'ȩ adihuomenä jȩä̧cuä̧huä̧ mo̧ro̧ pabotä jö̧ttö̧mä̧ micuä'inä pabotä jä̧cua̧'a̧, jua'amä rȩjȩ cuähuä 'chiyächomettö topö jä̧cua̧'a̧ tta̧'a̧nö̧ rö̧'ä̧nä̧ ȩmä̧cua̧ pä'ö a̧'ȩ adihuomenä jȩä̧cuä̧huä̧ mo̧ro̧ päi'omenä. ¹⁷ Ucumä suronä ö̧ji̧pä̧ pä'ö'inä jȩcu̧'ä̧ yapare'inä jicuähuä'chä korotö korotucumä, ja̧'hua̧nö̧ jo̧ca̧'a̧, ucumä Diosrötä ucuotö kä̧hui̧ ttö̧tä̧sä̧ CU̧Ä̧NÄ̧HUA̧TU̧CU̧ Diosmä. ¹⁸ Ja̧'hua̧nö̧ ja̧'a̧ttö̧ ucumä ttö huedö́ jȩpi̧, ttöttö hue'ähuä huȩnemä 'chu̧'ä̧ri̧ ja̧'hua̧ta̧'a̧nö̧ jȩpä̧tu̧cu'i̧. Ja̧'hua̧nö̧ ja̧'a̧ttö̧ ju̧'ä̧jä̧ rȩjȩnä̧ ucumä adiunä cu'i̧jä̧cu'a̧jä̧. ¹⁹ Ju̧'ä̧jä̧ rȩjȩnä̧ cu̧cu'ȩ cu'ähuämä rȩji̧yä̧cu'a̧jä̧, ja̧'hua̧nö̧ ja̧'a̧ttö̧ ucú cu cu'ä̧cu̧'a̧jä̧ sucu'ä di'önä ju'ȩnȩtä̧ cu̧jä̧ cu̧'a̧jä̧ jȩnȩ́ ju'iyönätä̧. ²⁰ Ucútu päcu̧'ä cu'ottöjä. ¿Ji̧mutȩ ta'arenö a̧'ȩ́ jo̧mȩnä̧ däjé tucu'ä cua'attö̧? ä̧ju̧cu'ä̧ tu̧cu'i̧. cu̧ju̧ni̧yä̧tu̧cu̧nä̧ ja̧'a̧tȩji̧ cu̧ju̧nä̧huä̧tu̧cu̧mä̧ cö̧ca̧tä̧ti̧yö̧nä̧ huotöjä̧tä̧ji̧. ²¹ Ttötä huȩdä̧cu'otöjä adiunä ucu'ocu ucuturö koromuttö̧nö̧ ya'ute a̧'ȩ́ pä'i'omenä ja̧'hua̧nö̧ ja̧'a̧ttö̧ u̧huä̧ju̧ cu̧ca̧tä̧tä̧ cu'o̧ttö̧jä̧ ri̧'ȩnä̧ huabodäcu'ä a̧'ȩ́ jo̧mȩnä̧. ²² Ucutu cu̧ju̧nä̧cu'o̧tö̧jä̧ koromuttö̧ huäbodäcu'ä a̧'ȩ́ pä'i'omenä ja̧'hua̧nö̧ ja̧'a̧ttö̧ cu'esetäcu'otöjä jo̧'u̧ a̧'ȩ́ topu ö̧huä̧ju̧ iyö cu'ä̧nö̧tä̧ ja̧'hua̧ta̧'a̧nö̧ ö̧huä̧ju̧ iyömä ca̧ca̧tö̧ cö̧jö̧nä̧cu'o̧ttö̧jä̧. ji̧mu̧tȩ pa̧ja̧cu'a̧nö̧ a̧'ȩ́ pä̧'i̧'o̧mȩbu̧ pärocu'ä ö̧huä̧ju̧ iyomebu, ucutu cucu'ä cu'ottöjä hua'adö rutähuomettö̧. ²³ Rȩjȩmä̧ 'cuäopunä micuänä ttiya pä'ömä jo̧ca̧'a̧ ka̧ra̧rö̧, rȩjȩmä̧ ttö chi̧rȩjä̧ ja̧'a̧. O'catoi'önä ucutumä ichäcuähuotöjä ja̧'hua̧nö̧ ja̧'a̧ttö̧ pi̧jä̧nä̧mä̧ cu̧jo̧mebutä kä̧tö̧jä̧. ²⁴ Ucumä topi huä̧inätä̧ o'cajuiyönä rȩjȩmä̧ ucu̧tä̧ cuȩmi̧nö̧ ja̧'a̧ttö̧; ucú rȩjȩ́ mitö cuȩminiyä̧u̧tä̧ mitö ttȩma iyí rȩjȩmä̧. ²⁵ Ucú cuahua̧ru̧hua̧ israel ttö̧ja̧sä̧ u̧su̧rä̧i̧sä̧ ö̧jö̧nä̧ jä̧cu̧ u̧ju̧nä̧rä̧ji̧ mi̧cuä̧nä̧ iyö icuttumä, ja̧'hua̧nö̧ ja̧'a̧ttö̧ tö'cö ahuaruhuättötä pä'äji ta'anö mitö ttȩmä̧cuo̧tö̧ ja̧u̧ iyö icuäjimä. ²⁶ Ya̧tȩ ttö̧ja̧sä̧ u̧ju̧närö̧ ahuaruhuä mitö ttȩmä̧ pä'ö juittöttömä, ja̧'hua̧nö̧ ja̧'a̧nä̧ mitö ȩma̧ pä'ö u̧ju̧nä̧rö̧ttö̧mä̧ mitö ȩma pe'ö ka̧'a̧, ²⁷ ja̧'hua̧nö̧ ja̧'a̧ttö̧ ja̧u̧mä̧ pojopu toa pä'ö ja̧'a̧ rȩjȩ́ mitö iyötticuinö a̧'ȩ́ ja̧'hua̧nö̧ ja̧'a̧ttö̧ pa̧ja̧tö̧ tottäjo̧metä̧ i̧mita pä'ö ja̧'a̧ mitö ȩmi̧nö̧rö̧mä̧. Ja̧'hua̧nö̧ ja̧'a̧ttö̧ ja̧u̧mä̧ i̧rȩjä̧ ppa̧huä̧dä̧cua̧. ²⁸ Ja̧'hua̧nö̧ ja̧'a̧nä̧ chutä i̧rȩjä̧ ppa̧huä̧di̧yö̧nä̧ jö̧ttö̧mä̧, ja̧'hua̧nö̧ ja̧'a̧ttö̧ rȩjȩ́ mitö ȩmä̧ji̧tä̧ ö̧jä̧cua̧ juȩnȩ rȩjȩmä̧ jubileo a̧'ȩ jubu. Jubileo a̧'ȩ́nä, ppa̧huä̧dä̧cuä̧huä̧cua̧ rȩjȩmä̧ ttö̧ja̧sä̧ iyö icuinörö̧mä̧, ja̧'hua̧nö̧ ja̧'a̧ttö̧ ppa̧huä̧chä̧cua̧ i̧rȩjä̧ pä'ötä. ²⁹ Ya̧tȩ ojusode ötahuiyä ttoecuäbä jacuä huode micuänä iyöttömä, iyö icu'ca̧mä̧ ya'ute a̧'ȩ o'ca'a pä'äjita'anö micuä ema'anö ja̧'a̧. Ya'ute a̧'ȩ päi'ö o'ca'amä o'cajuiyönä ppa̧'a̧di̧pö̧ ȩma̧ pä'ömä̧ kä̧cua̧'a̧. ³⁰ Juhuode isode ya'ute a̧'ȩ päia'anä isode u̧ru̧hua̧ pinö ppa̧'a̧di̧pö̧ ȩmo̧ca̧'a̧ jö̧ttö̧mä̧, ötahuiyä ttoecuäbi jacuä huode eminömä ojusode päi'önä̧tä̧ jäcuode, i̧tti̧mö̧ juhua'a yabo tti̧tti̧mö̧'i̧nä̧. Juhuode isodemä rö̧ä̧nä̧ eseu ttö̧jö̧ a̧'ȩnä̧'inä ppa̧ttä̧docode jäcuode. ³¹ 31 Ja̧'hua̧nö̧ ja̧'a̧nä̧ ötahuiyä ttoecuäbä ttoecuocomȩ jäyänä huȩjö̧ odehuiyämä̧, mȩjȩ'quiyönä̧ huȩjö̧ odehuiyä jȩttö̧ta̧'a̧nö̧tä̧ jȩä̧cuä̧huä̧cua̧'a̧. Rö̧ä̧nä̧ eseu ttö̧ja̧cu̧ a̧'ȩnä̧ isode pä'äjita'anö̧ ttojusode päi'önä̧ ttȩma̧ pä'ö jä̧cua̧'a̧. ³² Ja̧'hua̧nö̧ ja̧'a̧nä̧ Jitötä tta̧mö̧nä̧ ttidepiyu jacuä huȩjö̧ odehuiyämä̧, Levíttö yo'ähui'inä̧tö̧mä̧ ja̧'a̧tä̧ mo̧ro̧'i̧nä̧ mitömä̧ ttȩmä̧cuo̧tö̧. ³³ Ya̧tȩ Leví isotö i̧sa̧ttö̧ isode micuänä iyö icuinode ppa̧'a̧di̧pö̧ ȩmo̧ca̧'a̧ jö̧ttö̧mä̧, rö̧ä̧nä̧ eseu ttö̧jö̧ a̧'ȩnä̧ juode isodemä̧ ä'coji u̧ru̧hua̧ pinö̧rö̧tä̧ iyähuäcuode, Israel ttö̧ja̧cu̧ ka̧cuä̧tö̧, Levíttö yo'ähui'inä̧tö̧ ttidepiyönä̧ huȩjö̧ odehuiyämä̧ jahuätötä ttoju odehuiyä jo̧mȩttö̧. ³⁴ Ja̧'hua̧nö̧ ja̧'a̧nä̧ ötahuiyä jäyänä huȩjö̧ odehuiyämä micuänämä iyömä icuähuocö jä̧cuȩ, Levíttö yo'ähui'inä̧tö̧ ttidepiyunä̧ huȩjö̧ jo̧mȩttö̧. ³⁵ 35 Kuahuaruhuättö ya̧tȩ recuä rö̧jä̧chi̧'ä̧cu̧ a̧mö̧nä̧ pa̧ja̧tö̧ ppädäcuähua pä'ö'inä juiöttömä, ko̧ro̧jä̧ra̧'a̧ttö̧ i̧chä̧cuä̧hua̧ 'cuä'opöröcö̧ ucutucu ku̧rö̧cö̧ ppäcuädä'ija'anö̧tä̧ ppäcua pä'ö jä̧cua̧'a̧. ³⁶ Ja̧'hua̧nö̧ ja̧'a̧nä̧ cu'ärohuäjomȩ yabonä̧nö̧ ppa̧huä̧da̧cu̧ pä'ömä̧ jäcuepärö; yabonänö cu̧mu̧nä̧ra̧ pä'ö'inä korojueinä huȩnȩtö̧mä̧ jäcuepärö, ja̧'hua̧nö̧ jättepajueimä̧ Diosrötä ucuoti, ja̧u̧ cua̧hua̧ru̧hua̧mä̧ yabonö ucutäcu ö̧jä̧cua̧'a̧nö̧. ³⁷ Pärätä cu'ärouttömä̧, cu'ärohuäjomȩ yabonä̧nö̧ ppa̧huä̧da̧cu̧ pä'ömä̧ jäcuepärö, ja̧'hua̧ta̧'a̧nö̧ yabonänö cu̧ju̧nä̧ra̧ pä'ömä cucuȩmä̧ micuänämä cuiyärö. ³⁸ Ttötäsä TTÖ̧Ä̧NÄ̧HUA̧ Diosmä̧, Egipto rȩjȩttö̧ rä'epö icuinö̧mä̧ pi̧jä̧ Canaám rȩjȩ cui̧rȩjä̧tu̧cu̧ päi'önä̧ chiya pä'ö, ja̧'hua̧ta̧'a̧nö̧ Ttö ja̧'a̧ cu̧ru̧hua̧tu̧cu̧ Dios jö̧nä̧ kö̧mä̧. ³⁹ Cu̧jä̧hua̧ Israel ttö̧jä̧sa̧ usurä i̧sa̧ juo'ö ucurutä iyähuöttömä, juiyo pä̧i̧cu̧nä̧ aditönämä huecuärö. Huiäre adihuä i̧sa̧ 'cua̧rö̧nä̧tä̧ jȩpi̧rö̧. ⁴⁰ Ucutäcutä beome kö̧ 'cua̧rö̧nä̧. Ja̧u̧mä̧ a̧di̧ta̧hua̧ ucumä tteseu a̧'ȩ mo̧ro̧ jubutä. ⁴¹ Ja̧'hua̧nö̧ ja̧'a̧ttö̧ otó i̧cuä̧'cua̧ ucuttumä, chutä'inä ja̧'hua̧ta̧'a̧nö̧ i̧tti̧mu̧'i̧nä̧, ja̧'u̧mä̧ ppä̧huä̧chä̧cua̧ chutä jäottö ahuäruhuä ttidepiyura'acu. ⁴² Jahuätömä TTÖTÄ chumuhuäyotö Egipto rȩjȩttö̧ räepu chi̧jui̧nä̧u̧. ⁴³ Jahuätömä pä̧i̧cu̧nä̧ ttädita pö'ömä iyähuocotö ttähuotö. Cu̧ru̧hua̧ Diosrö ucuotö pä̧i̧cu̧nä̧mä̧ huecuätö pitömä . ⁴⁴ Ja̧'hua̧nö̧ ja̧'a̧nä̧ ucu huȩhuä̧u̧ päi'inämä cuȩmu̧'a̧nö̧ ja̧'a̧ u̧mä̧ttö̧ nä̧tö̧rö̧'i̧nä̧mä̧ huippeyenä ka̧cuä̧ttö̧tö̧. ⁴⁵ Ucutu'inä cuȩmä̧tu̧cu̧'a̧nö̧ ja̧'a̧ huȩcuä̧rä̧tu̧cuä̧u̧ru̧ ichäcuähuotö ucutucu huihuaunä ko̧cuä̧to̧ttö̧, ja̧'hua̧nö̧tä̧ ja̧'a̧, tta̧hua̧ru̧huä̧ ucutucu ko̧cuä̧tö̧ttö̧, tti̧tti̧mö̧ huä̧jä̧ttö̧ uhuäpächinätö̧rö̧. Ja'huätömä̧ ucutu huȩcua̧u̧ ttäcuotö. ⁴⁶ Ucutu huȩcuä̧rä̧tu̧cuä̧u̧ru̧mä̧ cuiyäcuotöjä jua'a jabo cui̧tti̧mö̧rö̧ ki̧'i̧pö̧ juei 'cua̧rö̧nä̧, ttiäre 'cua̧rö̧nä̧ tta̧tä̧rä̧cua̧'a̧nö̧. Ja'huätöttö 'cuäopönä cuȩmä̧cuo̧tö̧jä̧ huȩcuä̧rä̧tu̧cuä̧u̧ru̧, ja̧'hua̧nö̧ ja̧'a̧nä̧ ucutumä cui̧jä̧hua̧tö̧ huotö Israél ttö̧ja̧cu̧mä̧ pä̧i̧cu̧nä̧ rohuäumä cu̧jä̧tu̧cuä̧. ⁴⁷ Ya̧tȩ i̧chä̧cuä̧hua̧ ja̧'hua̧nö̧ jo̧ca̧'a̧ jö̧ttö̧mä̧ ka̧ra̧'i̧nä̧ ucutucu recu'o ö̧jo̧ca̧'a̧nä̧ järettö ru̧hua̧ juo'öttömä, ja̧'hua̧ta̧'a̧nö̧ ucutä cuahuaruhuä Israél ttö̧ja̧ttö̧ usurä isa̧ juo'öttömä ja̧'hua̧ta̧'a̧nö̧ i̧chä̧cuä̧hua̧cu̧ iyäcuäu icuttumä, ja̧'hua̧nö̧ jo̧ juiyöttö'inä ya̧tȩ ahuaruhuättö iyäuttö'inä, ⁴⁸ ja̧u̧nu̧ o'ca'a ucutu cuahuaruhuä Israél ttö̧ja̧ttö̧ ȩmuä̧huä̧chä̧ji̧ttö̧mä̧, ja̧u̧ma̧ pä'äjita'anä mitö ttȩma̧ pä'ötä hua̧. Ya̧tȩ ahuaruhuä isotöttö pä'äjita'anö ȩmä̧cua̧. ⁴⁹ Ttö̧ja̧sä̧ i̧miya̧ jö̧ttö̧'i̧nä̧, i̧mi̧ya̧ i̧tti̧ jö̧ttö̧'i̧nä̧, ya̧tȩ tö'cö a̧hua̧ru̧hua̧ jo̧'u̧mä̧ ru̧hu̧á̧ jo'ächäjittö̧mä̧ jo̧'u̧dä̧jä̧ ppäcu'ädarö pe'ö kö̧. ⁵⁰ Ya̧tȩ ttö̧jä̧'i̧sä̧ mitö ȩmäji̧ttö̧mä̧ jo̧'ú̧cu̧ ucu'ocuirö; huo̧ju'ä̧tö̧ jähuätö a̧'ȩ́mä̧ ttiyinö a̧'ȩ́mä̧ ja̧'hua̧ta̧'a̧nö̧ mitö ȩmi̧nö̧rö̧'i̧nä̧ ja̧'hua̧nö̧ ja̧'a̧ttö̧ a̧'ȩ́ dottächö ja̧'hua̧ta̧'a̧nö̧ rättöpomebu huo̧ju'ä̧ttö̧. Rättepu micu'ämä ttȩmi̧nö̧mȩttö̧ topu pa̧ja̧ti̧nä̧tö̧ ya̧tȩ huettö adicu'ä i̧sa̧rö̧, ttȩmi̧nö̧ a̧'ȩ jö̧ta̧'a̧nö̧ jo̧'ú̧mä̧ adittö mitähuinö mitö ȩmi̧nö̧rö̧. ⁵¹ Recuó a̧'ȩ ttötinä̧cu̧ juö̧ttö̧mä̧ kä'conä rä'öpomenä, ja̧u̧nu̧mä̧ i̧mi̧tä̧huä̧cua̧ ö̧'i̧nö̧ a̧'ȩtä̧, rättepu micuä pä'i'önä, ö̧'i̧nö̧ a̧'ȩ́ pä̧jä̧cuä̧cho̧mȩtä̧ pärätä. ⁵² Dottädinö a̧'ȩ tö'cönänö jö̧ttö̧mä̧, ja̧u̧mä̧ mitö ȩmu̧cu̧ ucu'ocu'a pe'ö ji̧na̧'a̧ i̧'ö̧ rä'opäcue'i̧ a̧'ȩ́ ki̧'ö̧ totta pe'ö, ja̧'hua̧nö̧ ja̧'a̧ttö̧ jo̧'u̧mä̧ räopächäji̧'ca̧ kä̧nö̧ i̧mi̧ta pe'ö ki̧na'a̧ ra'epu icuäji micu'ämä ö̧'i̧nö̧ a̧'ȩtä̧. ⁵³ Ja̧u̧mä̧ du'o jö̧ta̧'anö adita pä'ö pätetö cu̧nä̧hua̧. Ucumä ja̧u̧ru̧ pä̧i̧cu̧nä̧ huettö juiyönä to'cua pä'ö ja̧'a̧. ⁵⁴ Pi̧yȩ pä̧nä̧ rä'ecuocö ö̧jö̧ttö̧mä̧, Jubileo a̧'ȩ pänä jubo päi'önä a̧di̧tä̧cua̧ ucucumä i̧tti̧mö̧'i̧nä̧. ⁵⁵ Israel ttö̧ja̧mä̧ TTÖ chumuhuäyotö. Jahuätömä ttö huedö jȩpä̧tö̧ TTÖTÄ Egipto rȩjȩttö̧ rä'epö chi̧cui̧nä̧u̧ ja̧'a̧ttö̧. TTÖTÄ ja̧'a̧ CU̧Ä̧NÄ̧HUÄ̧TU̧CU̧ Diosmä.