¹ TÖÄ̧NÄ̧HUÄ̧MÄ̧ Moisésrö ucuocu pä'inö: " ² Israel ttö̧jä̧rö̧ olivosttö ta'ö adicuoja a̧dȩja päcuäyatä lamäari̧yu̧ rȩdȩcuoya ti'cächa hue'i, juoyamä̧ 'cuäopönä̧tä̧ tȩa̧u̧nä̧ kä̧dȩpö̧nä̧ cuoäcua'a̧nö̧. ³ Ä'ca jome ttoecua'a rä̧ta̧nä̧ umicu esecu jȩtta̧ pä'ö hueina'a̧ ca̧ca̧cu ttö̧'ȩjo̧mettö̧, Aarón ja̧'a̧ lámpara cuoönä̧ nipä̧rö̧mȩttö̧ kä̧mä̧dö̧ koro mo̧ro̧ mo̧ro̧ juhuome jubö cuounä̧ irȩdȩrȩtä̧rä̧cua̧mä̧ TÖ̧Ä̧NÄ̧HUA̧ ä'ca jomettö̧mä̧. Pi̧yȩ hueähuämä cui̧tti̧mö̧tu̧cu̧ juhua'a yabo tti̧timö'i̧nä̧ cuäopönä̧tä̧ jȩpö̧ ttö̧ja̧ pä'ö hueähui'ina'a ja̧'a̧. ⁴ Sacerdotemä̧ juȩ'i̧pa̧mä̧ lámpara o̧yu̧mä̧ 'cuäopönä̧tö̧ cuoönä̧tä̧ i̧rȩdȩtä̧rä̧cua̧ TÖ̧Ä̧NÄ̧HUA̧ ä'ca jo̧mȩttö̧mä̧, lámpara o̧yu̧ ka̧cuäcämä päcuäji orotä ji̧na̧'a̧. ⁵ Trigo i̧sa̧ppȩ adihuappȩttö̧ cacuopi'ö'ca̧mä̧ panttö̧mä̧ 12nö o̧si̧ cuȩtta̧jä̧. Ji̧yȩtȩ o̧si̧ pö̧nä̧mä̧ cuatro-nö̧ quilos jo̧mȩttö̧mä̧ yabonä̧nö̧ ä̧mä̧cö̧ jä̧cua̧'a̧, ⁶ ja̧u̧nu̧ o'ca'amä, mesa isodä oro päcuäittö adicuodä TÖ̧Ä̧NÄ̧HUA̧ ä'cajo̧mȩ ko̧dänä̧ to̧mä̧rȩ jo̧mȩnä̧ ku̧ni̧, ja̧u̧ o̧mä̧ ji̧mä̧cu̧nä̧mä̧ seisnö o̧si̧ pönä̧tä̧ kä̧cua̧'a̧. ⁷ Ja̧u̧ o̧mä̧nä̧mä̧ incienso pättö päcuäi ku̧nä̧'chi̧, ja̧u̧ panmä̧ ku icu iyähuä huȩnȩcuä̧chö̧tä̧ jä̧cua̧'a̧. Ja̧u̧ inciensomä ku icu TÖ̧Ä̧NÄ̧HUA̧RÖ̧ iyähuä jä̧cua̧'a̧. ⁸ Pi̧yȩ panmä̧ 'cuä'ächi'ö pä̧mä̧dä̧cuä̧huä̧ mo̧ro̧ jö̧ta'anö sacerdotetö̧ttö̧ juȩ'i̧pa̧mä̧ TÖ̧Ä̧NÄ̧HUA̧ ä'ca jo̧mȩmä̧ 'cuäopönätä i̧yä̧cua̧, Israel ttö̧ja̧rö̧ ppä'ädömä esecuinö̧ beipocö ji̧nö̧ i̧jȩcuä̧ jö̧nä̧tä̧. ⁹ Ja̧u̧ i̧yä̧huä̧mä̧ Aarón'i̧nä̧, i̧tti̧mö̧rö̧'i̧nä̧ i̧yä̧huä̧cuȩ, ja̧u̧mä̧ a̧tȩcuä̧nä̧ ttucua pähui'ino̧mȩttö̧tä̧ ttucuäcuotö, juhua'amä̧ ocuränä ku icuähuä cu̧ä̧nä̧hua̧rö̧ eseu cuiyö jo̧mȩttö̧." ¹⁰ Jitämä 'cuäopina'a̧ ya̧tȩ Israél ttö̧ja̧saju ki̧tti̧, ja̧u̧ jä'omä Egipto ttö̧ja̧sa̧ ji̧na̧'a̧, Israél ttö̧ja̧cu̧ rä'opinö, ja̧u̧ Israél ttö̧ja̧saju ki̧tti̧mä̧ ttä'ähuarättö rohuähuinö Israél ttö̧ja̧sa̧cu̧. ¹¹ Israél ttö̧ja̧saju ki̧tti̧mä̧ TÖ̧Ä̧NÄ̧HUA̧ i̧mi̧ suronä huopinö ja̧'hua̧ta̧'a̧nö̧ Diosrömä suronätä̧ pä'inö, Ja̧'hua̧nö̧ jȩa̧'a̧ttö̧, ttö̧ja̧ tti'chächinäcu̧ Moisés ä'cajo̧mȩ. Ja̧ju̧ ki̧mi̧mä̧ Selomit pä'ö mi̧cuinä̧ju̧, Dibri kittiju ji̧na̧'a̧, Dan ahuaruhuä o'cotö isaju. ¹² Cärenä rötö tta̧ttö̧ri̧nä̧cu̧ TTÖ̧Ä̧NÄ̧HUA̧ päomenätä̧ jȩttä̧rö̧ pä'ö. ¹³ Ja̧'hua̧nö̧ ja̧'a̧ttö̧ TTÖ̧Ä̧NÄ̧HUA̧ ucuocuinö Moisérö, pa̧'a̧nö̧ pä'ö: ¹⁴ Diorö surojönä pä'äjirö 'chu'ädö ȩpä̧tu̧cui̧ ä'ähuarättö'inä jäyäcu. O'catoi'önä ä̧ju̧cuä̧jä̧tö̧mä̧ cu̧mu̧tu̧cu̧ unä mecuä̧cuo̧tö̧jä̧, ja̧'hua̧nö̧ jȩpö̧ o'catoi'änä i̧nä̧ o'quinä icuäu cuä'ö cuicuäcuotöjä. ¹⁵ Ucutu ji'ä huätucu'i Israel ttö̧ja̧rö̧ pa̧'a̧nö̧: Ya̧tȩ DIORÖ suronä pä'öttömä usurä ȩmä̧huä̧cu'a̧ suronä pä'inätä̧. ¹⁶ Ya̧tȩ TÖ̧Ä̧NÄHUA̧ i̧mi ucu'otocömä je'ö̧nätä̧ hua'ö i̧cu'ä̧cu'a̧. O'ca to'inä ucu'otönö ka̧cu'ä̧tö̧mä̧ i̧nä̧ o'quinä tti̧cu'ä̧cu'a̧, ko̧ro̧ jä̧ttö̧ ichinö'inä ja̧'hua̧ta̧'a̧nö̧ Israelitattö huäpächinö jö̧ttö̧'i̧nä̧. Ya̧tȩ ucu'otoca'a jȩ'ö̧ttö̧mä̧ TÖ̧Ä̧NÄHUA̧ i̧mí̧, jo̧'u̧mä̧ hua'ö icu'a pe'otä ö̧jä̧cu'a̧. ¹⁷ Ya̧tȩ cu'ä'icuttömä ka̧rá̧ ttö̧ja̧sä̧rö̧, jo̧'u̧mä̧ jue'inätä̧ hua'ö icu'a pe'ötä kö̧. ¹⁸ Ya̧tȩ i̧sä̧ ttäjirö cu'ä'icuttömä, jo̧'u̧mä̧ imita pe'ötä kö̧, a̧'cu'a̧rö̧ kö̧nä̧rö̧ cu̧tä̧. ¹⁹ Ya̧tȩ ippeyänä kö̧rö̧ barahuächi'önä jȩ'ö̧ttö̧mä̧, jȩttö̧'a̧nö̧ hua̧ chutä ippeyänä kö̧rö̧ jȩä̧ji̧ta̧'a̧nö̧: ²⁰ Jȩttö̧mä̧ jȩttö̧cu̧, tti'äre'inä tti'ärecu, ttäcu'inä ttäcucu. Ja̧u̧ ka̧ra̧rö̧ barahuächi'önä jȩö̧ta̧'a̧nä̧, ja̧'hua̧ta̧'nä̧ jȩtta̧ pä'ö hua̧. ²¹ Ya̧tȩ de'a i̧sa̧rö̧ cuä'ö icumä i̧mi̧tä̧huä̧cua̧, ja̧'hua̧ta̧'a̧nö̧ ya̧tȩ ttö̧ja̧sä̧tö̧ cuä'ö icumä cuä'ö tticua pä'ötä hua̧. ²² Ja̧u̧ hueähuä huȩnȩmä̧ micuähuäcua'a o'catoi'önä̧rö̧ ko̧ro̧jä̧ ttö̧ja̧rö̧'inä, pi̧jä̧ttö̧tä̧ uhuäpächinä̧tö̧ Israel ttö̧ja̧rö̧'i̧nä̧, isopäi'önä Ttömä ucu CU̧Ä̧NÄ̧HUA̧ Diosä". ²³ Ja̧'hua̧nö̧ ja̧'a̧ttö̧ Moisésmä Israel ttö̧ja̧rö̧ ucuocuinö, ja̧'hua̧nö̧ ja̧'a̧ ttö̧ja̧mä̧ ja̧u̧ ttö̧ja̧sa̧ TÖ̧Ä̧NÄ̧HUA̧RÖ̧ suronä pä'äjipäjirömä ä'ö kä̧cuä̧huo̧mȩttö̧mä̧ jäyäcu ȩpi̧nä̧tö̧. Inädönä icuäu tticuinä̧cu̧. Israel ttö̧ja̧mä̧ TÖ̧Ä̧NÄ̧HUA̧ Moisésrö hueinöta'anötä̧ jȩpi̧nä̧tö̧.