¹ TTÖ̧Ä̧NÄ̧HUA̧ ucuocuinö Moisésrö: ² Israél ttö̧ja̧rö̧mä̧ ucuocu, ji'ähui jahuätörö: Pi̧yȩ ja̧'a̧ TTÖ̧Ä̧NÄ̧HUA̧ hue'nömä pä'cäri jö̧nä̧ tesehuarö pä'ö, ji̧nä̧ yo̧mȩtȩ ca̧ca̧cu̧ cui̧jȩpä̧tu̧cua̧ ppi̧yȩ ja̧'a̧ surojö juiyönä ca̧ca̧cuä̧cuä̧huä̧ pä'ö; ja̧u̧ ja̧'a̧ ttö huedö pä'cäri adiunä jö̧mä̧. ³ Ucutumä cuaditätucu'anö ja̧'a̧ ji̧mu̧tȩ ta'arenö mo̧ro̧, ja̧'hua̧nö̧ ja̧'a̧nä̧ ji̧mu̧tȩ huäba'acuä mo̧ro̧mä̧ TÖ̧Ä̧NÄ̧HUA̧RÖ̧ ucuotö 'cuä'ächö pä̧cuä̧huä̧ mo̧ro̧ ja̧'a̧, o'catoi'önä tteseu mo̧ro̧. Ucutu'inä aditömä cuäditätucuä, ja̧u̧nu̧ mo̧ro̧mä̧ TÖ̧Ä̧NÄ̧HUA̧RÖ̧ ucuotö 'cuä'ächö pä̧cuä̧huä̧ mo̧ro̧ ja̧'a̧ ya̧cu̧pö̧nä̧ cu̧jo̧mȩtu̧cu̧ttu̧'i̧nä̧. ⁴ Pi̧yȩtó̧ pä'cäri TÖ̧Ä̧NÄHUA̧ ji'ähuö ö̧jö̧ni̧nö̧, ucutu surojö ju'iyomettö̧ ji̧nä̧ yo̧mȩtȩ pä'i'ö cucu'o cu'ätu cu'ä pä'ömä recu'ä'inä jicu'ä huätucu'a pe'ö ka̧'a̧: ⁵ Ä̧cu'o̧mȩnä̧ kä̧hua̧, catorce moró̧ pä'i'omenä nipä̧ro̧mȩ, TÖ̧Ä̧NÄHUA̧ i'ä'cäri ja̧'a̧. ⁶ Ja̧'hua̧ta̧'a̧nö̧ quince moró̧ pä'i'omenä jo̧'ú̧tä̧ kä̧hua̧nä̧, TÖ̧Ä̧NÄHUA̧RÖ̧ tti̧ya'a pä̧ ppu̧'ä̧mo̧cö̧ ju'e'ittö̧ adicuä. Ja̧'hua̧ta̧'a̧nö̧ ko̧ro̧mu̧ttö̧nö̧ ta'are moró̧ pä'i'omenä ucutumä cucuätu'a pe'ö ka̧'a̧ pä̧ ppu̧'ä̧mo̧cu̧ ju'e'ittö̧ adicuä. ⁷ Ucutu ji̧nä yo̧metȩ pä'i'ö cucocu'ätucu'a pe'ömä ya'ute moró̧ 'quȩ'ȩpu̧ cu̧ju̧nä̧tu̧'cu'a̧nö̧ ja̧'a̧; ucutu cu'adi tä'itucunä cu'aditätucu'ä. ⁸ TÖ̧Ä̧NÄHUA̧RÖ̧ cu'iyä cu'otöjä Ucutu ku'icu iyähuä ko̧ro̧muttö̧ ta'are moró̧ pä'i'omenä. Koromuttö̧ ta'are morómä TÖ̧Ä̧NÄHUA̧CU̧ ucu'ocu 'cuä'ächö ttö̧'ö̧ moró̧, jo̧'u̧ moró̧mä̧ ucutu cu'aditätucumä cu'aditätucu'ä. ⁹ TÖ̧Ä̧NÄ̧HUA̧ ucuocuinö Moisésrö, pä'inö: ¹⁰ Israél ttö̧ja̧rö̧ ucuocui ja̧'hua̧ta̧'a̧nö̧ ji'ähuitö jahuätörö: Ja̧u̧nu̧ cu̧rä̧bȩhuo̧mȩnä̧ rȩjȩ ttö ucuturu chi̧yi̧nä̧jä̧nä̧, ja̧'hua̧ta̧'a̧nö̧ trigo cu̧ca̧ca̧tä̧tu̧cuo̧mȩnä̧. ¹¹ Ȩpä̧tu̧cui̧ cuähuä ä̧cuo̧mȩnä̧ jähuä kä'co päte'ö adicuä i̧sa̧ i̧jȩpa̧ pä'ö TTÖ̧Ä̧NÄ̧HUA̧RÖ̧ tiäre iyähuä ja̧'hua̧nö̧ ttiyäcu esehua pä'ö ucutu cui̧mi̧tu̧cunä. Ja̧u̧nu̧ 'chä̧ȩpöä̧cua̧ ttö chä'ca jo̧mȩ. ¹² Ji̧yȩnö̧ mo̧ro̧ ucutu cuiyätucu mo̧ro̧mä̧ ä̧cuo̧mȩnä̧ cuaditähuätucu ttö chö'ca jo̧mȩ ucutumä cuiyätucua pä'ö ja̧'a̧ ya̧tȩ oveja i̧tti̧ yaute duhuo hua̧ttö̧ ja̧'hua̧nö̧ ja̧'a̧nä̧ usurä'inä jui̧'a̧rö̧ ttiäre iyähuä ku icu TTÖ̧Ä̧NÄ̧HUA̧RÖ̧. ¹³ Ttiäre iyähuä otemä jö̧'a̧nö̧ ja̧'a̧ huäbodäcuä jo̧mȩnä̧ harinä i̧sa̧ppȩ a̧dȩjacu huihuäcua'a, ji̧yȩtȩ ttiäre iyähuä ocuränä ku icu TTÖ̧Ä̧NÄ̧HUA̧RÖ̧, adiu a̧mȩu̧nä̧ 'chopönä, ja̧'hua̧ta̧'a̧nö̧ jua'atäcu yoräteunä ya'ate litro jo̧mȩ yabonänö vino isoya'inä, ¹⁴ Ucutumä cucujuiyätucu'anö ja̧'a̧ pa̧'i̧nä̧, sa̧ri̧dä̧cuä̧hua̧'a̧'i̧nä̧ u̧huä̧ju̧ jareö'inä Diosrö ttiäre iyähuä ttichächo mo̧ro̧ päi'ome jubu. Pi̧yȩ huedömä 'chä̧cua̧'a̧ cuahuaruhuä o'cotörö'inä, cuidepiyu jö̧nä̧ cu̧jä̧tu̧cuo̧mȩ'i̧nä̧. ¹⁵ Siete semana jo̧mȩnä̧ pa̧ja̧tä̧tu̧cui̧ mo̧ro̧ 'cuä'ächi'ö pä̧mä̧dä̧cuä̧huä̧ mo̧ro̧ttö̧ kä̧mä̧dö̧ ja̧u̧ mo̧ro̧ ji̧na̧'a̧ ucutu cu̧cuȩ cuähuätucuttö ö̧cuo̧mȩnä̧ jähuä hui'cu iyähuä cui'cächinä̧tu̧cua'amä. ¹⁶ Ucutumä cincuentanö mo̧ro̧ jo̧mȩnä̧ cu̧'a̧tä̧tu̧cua̧ pä'ö ja̧'a̧, 'cuä'ächi' pä̧cuä̧huä̧ mo̧ro̧ siete mo̧ro̧ttö̧ kä̧mä̧dö̧. Ja̧'hua̧nö̧ jo̧mȩnä̧ ucutumä u̧huä̧ju̧ otettö iyähuä pä'äjita'anö TÖ̧Ä̧NÄ̧HUA̧RÖ̧ cuiyätucua pä'ö ja̧'a̧. ¹⁷ Ucutumä cuojusodetucuttö to̧ppä̧rȩ panppä trigo i̧sa̧ppȩttö̧ 4,5 kg jo̧mȩnä̧ ȩmö̧ adicua'a cui'cächätucuaja. Ja̧u̧ panmä trigo i̧sa̧ppȩ adihuäjueitä aditi'ipö ppö̧ä̧mö̧ jähuäcu huihuatö cuȩttä̧tu̧cua̧ja̧; ja̧u̧mä̧ ä̧cuo̧mȩnä̧ jähuättö hui'cu iyähuä jä̧cua̧'a̧ TÖ̧Ä̧NÄ̧HUA̧RÖ̧. ¹⁸ Ucutumä Pancu̧ i'cöchö kä̧nö̧mä̧ oveja i̧tti̧mö̧ ya'ute a̧'ȩtä̧ ku̧nä̧rä̧tö̧rö̧mä̧ sietenö huotörö, ttöttahuiyä'i̧nä̧ jui'ätörö, päcäyä i̧tti̧rö̧mä̧ ya̧tȩrö̧tä̧ ja̧'hua̧ta̧nö̧ ovejattö umä̧tö̧rö̧mä̧ ta̧ju̧ru̧tä̧ cuȩpä̧tu̧cua̧jä̧, jahuätömä ku icu TÖ̧Ä̧NÄ̧HUA̧RÖ̧ iyähuotö jä̧cua̧'a̧, u̧huä̧ju̧ otecu ja̧'hua̧ta̧'a̧nö̧ ahuähuäcu juhua'atäcu ku icu iyähuäcu, TÖ̧Ä̧NÄ̧HUA̧RÖ̧ adiu ameu 'chopönä. ¹⁹ Ucutumä cabrattö uborö, suronä jȩcuä̧tu̧cu̧ jȩä̧chö̧ jö̧nä̧ cuiyätucuaja ja̧'hua̧ta̧'a̧nö̧ ovejas i̧tti̧mö̧ ta̧ju̧rö̧ ya'ute a̧'ȩtä̧ ku̧nä̧rä̧tö̧rö̧ cuä'ö icu huȩnȩ juiyönä kä̧cuä̧huä̧ jähuä jö̧nä̧ cuiyätucuaja. ²⁰ Sacerdotemä pan ä̧cuo̧mȩnä̧ jähuättö iyähuäcu TÖ̧Ä̧NÄ̧HUA̧ ä'ca jo̧mȩnttö̧ i̧hui̧'cuä̧cua̧, ja̧'hua̧ta̧'a̧nö̧ ja̧u̧rö̧ iyähuä jö̧nä̧ ovejas i̧tti̧mö̧ ta̧ju̧cu̧. Ja̧u̧ iyähuämä ro̧ö̧ jähuä jö̧mä̧ TÖ̧Ä̧NÄ̧HUA̧RÖ̧ iyö kä̧nö̧ sacerdoterö'inä i̧yä̧huä̧cuȩ. ²¹ Ucutumä ja̧u̧nu̧ mo̧ro̧mä̧ pä̧i̧cu̧nä̧ huopö jicuähuätucuaja. Ä̧tȩcuä̧nä̧ 'cä̧'ȩpö̧ ku̧nä̧huo̧tö̧ jö̧nä̧ ttäcuotö, ja̧'hua̧nö̧ jo̧mȩttö̧ ucutumä cuaditähuätucumä cuaditätucuä. Pi̧yȩ hueähuä huȩnȩmä̧ cui̧tti̧mö̧tu̧cu̧ juhua'a yabo tti̧tti̧mö̧'i̧nä̧ o'cajuiyönä ttö̧ja̧cuo̧mȩ pönämä toepächocö jä̧cuȩ. ²² Ku̧cuȩ cuähuätucu rȩjȩttö̧ cu̧ca̧ca̧tä̧tu̧cuo̧mȩnä̧mä̧, cu'ättatucu jäyänä̧ bahuinö̧nä̧ huȩju̧ttö̧ o'cajuiyönämä̧ 'cuicuätucuä, ja̧'hua̧ta̧nö̧ cuäipächinö̧nä̧ huȩju̧ rȩjȩ pȩjö̧'i̧nä̧ cu̧ca̧ca̧tä̧tu̧cuä̧. Usurä isotötä ja̧'hua̧ta̧nö̧ ko̧ro̧jä̧ra̧'a̧ttö̧ ichäcuähuotötä ttö̧ca̧ca̧ta̧ cuti'ätucuajä̧, Ttötäsä TTÖ̧Ä̧NÄ̧HUA̧ Dios-mä̧." ²³ TTÖ̧Ä̧NÄ̧HUA̧ ucuocuinö Moisésrö, pa̧'a̧nö̧: ²⁴ Israél ttö̧ja̧rö̧ ucuocui pa̧'a̧nö̧ pä'ö: "Ji̧mu̧tȩ ta'are kä̧hua̧ päi'omenä, ja̧u̧ kä̧hua̧ttö̧ ä̧cuo̧mȩnä̧ mo̧ro̧, yorö'isotä 'cuäcuächätucu mo̧ro̧ jä̧cua̧'a̧ ucuturu, dedecä rä̧mi̧pa̧'a̧nä̧ cuamucuädätucua pä'ö, ja̧'hua̧ta̧'a̧nö̧ surojö'inä juiyönä ca̧ca̧cuä̧tu̧cui̧. ²⁵ Ji̧'qui̧cha̧nö̧'i̧nä̧ chadita pä'ö'inä jȩcu̧'ä̧tu̧cuä̧, ja̧'hua̧ta̧'a̧nö̧ u̧cu̧tu̧mä̧ cuiyätucu'anä ja'a cuiäre ku icu iyähuä CU̧Ä̧NÄ̧HUÄ̧TU̧CU̧RU̧." ²⁶ Ja̧'hua̧nö̧ ja̧'a̧ TTÖ̧Ä̧NÄ̧HUA̧ ucuocuinö Moisésrö, pa̧'a̧nö̧ pä'ö: ²⁷ "Jitämä, Ji̧mu̧tȩ ta'are kä̧hua̧ päi'omenä, ja̧u̧ kä̧hua̧ttö̧ to̧mu̧rȩ mo̧ro̧, suronä jȩttö̧ micuä iyähuä mo̧ro̧ päi'omenä. Surojö'inä juiyönä ca̧ca̧cuä̧cuähuä mo̧ro̧ jä̧cua̧'a̧ juorö ucututä cua̧mo̧nä̧tu̧cu̧ ucuo tecuähuätucuä iyätucui TÖ̧Ä̧NÄ̧HUA̧RÖ̧TÄ̧ cuiäre iyähuä ku iyö. ²⁸ Ja̧u̧nu̧ mo̧ro̧ ucutumä cuäditätucuä jua'amä suronä jȩtti̧nö̧ micuä iyähuä mo̧ro̧ ja̧'a̧, ucutunä̧'i̧nä̧ suronä jȩcu̧'ä̧tu̧cu̧ TÖ̧Ä̧NÄ̧HUA̧ Diosrö iyähuä ja̧'a̧ttö̧. ²⁹ Ya̧tȩ ja̧u̧nu̧ mo̧ro̧ suronä jȩpi̧nö̧sä̧ pä'ö iya pa'o'cömä, ahuaruhuättö i̧mi̧cu̧nä̧ pportädö ku̧nä̧hua̧ jä̧cua̧. ³⁰ Ucututtu ya̧tȩ ja̧u̧nu̧ mo̧ro̧ aditömä, TTÖ, CU̧Ä̧NÄ̧HUA̧TU̧CU̧, ttö̧ja̧ ttö̧'cä̧tȩttö̧ si'epö chi̧cuä̧cua̧. ³¹ Ucutu ja̧u̧nu̧ mo̧ro̧mä̧ ji̧yȩtȩ adicuä'inä cuaditätucuä. Pi̧yȩ hueähua ja̧'a̧ ucutu cuahuaruhuä o'cotö'inä cu̧jä̧tu̧cuo̧mȩ pö̧nä̧ttö̧ hue'äu cu̧jä̧tu̧cua̧ pä'ö jö̧mä̧. ³² Pi̧yȩ mo̧ro̧ u̧cu̧tu̧ru̧mä̧ ucuotönö 'cuä'ächö pä̧cuä̧huä̧ mo̧ro̧ ja̧'a̧, ja̧'hua̧nö̧ ja̧'a̧ttö̧ cua̧mo̧nä̧tu̧cu̧tä̧ ucuotönö jȩpä̧tu̧cui̧ ya'ate kä̧hua̧ttö̧mä̧ ji̧mu̧tȩ pa̧ja̧cuä̧nö̧ mo̧ro̧ päi'ome ni̧pä̧ro̧mȩ jubu. Ni̧pä̧ro̧mä̧ koro mo̧ro̧ttö̧'i̧nä̧ ni̧pä̧ro̧mȩ jubu, ucutu'inä ku̧nä̧rä̧tö̧jä̧ eseu 'cuä'ächö cu̧'ä̧tu̧cu̧ mo̧ro̧. ³³ TÖ̧Ä̧NÄHUA̧ ucuocuinö Moisesrö pä'inö: ³⁴ Ucuocui Israel ttö̧ja̧rö̧ , ji'ähuitö: Koromuttönö ta'are kä̧hua̧ pä'i'omenä to̧mu̧re jähuä ja̧'hua̧ta̧'a̧nö̧ ji̧mu̧tȩ jähuä pä'i'omenä hueähuä huȩnȩ ȩco̧ca̧ pä'cäri jȩttäjá TÖ̧Ä̧NÄHUA̧RÖ̧. Ji̧mu̧tȩ ta'are moró̧ jo̧mȩnä̧. ³⁵ Ä̧cuo̧menäji̧ mo̧ro̧mä̧ TÖ̧Ä̧NÄHUA̧RÖ̧ ucuotönö ttöcuocuaja. Cuaditätucuä ucutumä cuaditä'ijätucumä. ³⁶ ji̧mu̧tȩ ta'aenö moró̧ pä'i'omenä ucutu cuiyätucuajá cuä'ö'icu ocuränä ku icu iyähuä TÖ̧Ä̧NÄHUA̧RÖ̧. Ucuotönö ttöcuocuaja ji̧mu̧tȩ huäba'acuä mo̧ro̧ päi'omenä ja̧'hua̧ta̧'a̧nö̧ ucutu cuiyätucuaja cuä'ö icu ku icu iyähuä TÖ̧Ä̧NÄHUA̧RÖ̧ . Pi̧yȩtó ucuotönö jȩcu'ä̧tu̧ cuä̧cuä̧mä̧ ja̧'hua̧nö̧ ja̧'a̧nä̧ ucutu cuaditä'ijä̧tucumä cuaditätucuä. ³⁷ Pi̧yȩtó TÖ̧Ä̧NÄ̧HUA̧RÖ̧ eseäcuähuä mo̧ro̧mä̧ ja̧u̧rö̧ tesehua pä'ö jȩpö̧ ku̧nä̧hjua̧'a̧ mo̧ro̧mä̧ isopäi'önä ucutu jȩ'cuä̧tu̧cua̧ pä'ö ja̧'a̧ ca̧ca̧cu̧ ucuotäcuähuä mo̧ro̧ jönä, ja̧'hua̧ta̧'a̧nö̧ ucutumä jȩ'cuä̧tu̧cua̧já̧ i̧sa̧rö̧ cuä'ö icu ocuränä ku icu iyähuä TÖ̧Ä̧NÄ̧HUA̧RÖ̧. Ocuränä ku icu iyähuä'inä ja̧'hua̧ta̧'a̧nö̧ u̧huä̧ju̧ ote iyähuä'inä, i̧sa̧rö̧ cuä'ö icu ihuä'inä ja̧'hua̧ta̧'a̧nö̧ ahuähuä iyähuä'inä ji̧yȩtȩpö̧nä̧mä̧ u̧mo̧ro̧ jö̧ta'anö. ³⁸ Pi̧yȩ pä'cärimä TÖ̧Ä̧NÄ̧HUA̧RÖ̧ ucuo te'äu 'cuä'ächi'ö pä̧mä̧dä̧cuä̧huä̧ mo̧ro̧ ppädäcuähuäcua'a rö̧ä̧chi̧pö̧nä̧ ja̧'hua̧ta̧'a̧nö̧ mippoönä iyähuä'inä, ttiya pättinömä o'cajuiyötä juhua'atäcu ucuturutä pä̧huä̧rö̧jo̧mȩ TÖ̧Ä̧MÄ̧HUA̧RÖ̧ cuiyätucu'inä o'cajuiyötä. ³⁹ Dios ö̧jo̧dettö a̧mö̧cuädö ttu̧ju̧ni̧na̧'a̧cu̧, mo̧ro̧mä̧ 15nö̧ mo̧ro̧nä̧ kä̧hua̧tö̧tä̧ sietenö pätti'omenä, ucutu rȩjȩ cuähuä u̧huä̧ju̧ cu̧ca̧ca̧tä̧tu̧cuo̧mȩnä̧mä̧, ucutumä pi̧yȩ pä'cärimä sieten1ö mo̧ro̧ jo̧mȩnä̧ jȩ'cuä̧tu̧cua̧ pä'ö ja̧'a̧, ä̧cuo̧mȩnä̧ mo̧ro̧mä̧ 'cuä'ächi'ö pä'cäri jȩ'cuä̧tu̧cu̧ mo̧ro̧ jä̧cua̧'a̧ ja̧'hua̧ta̧'a̧nö̧ 8nö̧ mo̧ro̧ päi'omenä'inä 'cuä'ächi'ö pä'cäri jȩ'cuä̧tu̧cu̧ mo̧ro̧ jä̧cua̧'a̧. ⁴⁰ Ä̧cuo̧mȩnä̧ mo̧ro̧mä̧, dauhuiyä adihuäjuei oi u̧huä̧ju̧ttö̧'inä, o̧i̧ ojiyättö'inä, dauhuiyä a̧'cua̧cu̧ oicuttö'inä, ojiyä otoö bäreö aje jäyoto ka̧cu̧ttö̧'i̧nä̧ ca̧ca̧ti̧'i̧pö̧, cu̧ru̧hua̧tu̧cu̧ Dios ä'cajo̧mȩttö̧ sietenö mo̧ro̧ jo̧mȩnä̧ cuesehuätucuajá. ⁴¹ A̧'ȩ jö̧'a̧cuä̧mä sietenö mo̧ro̧ päi'omȩnä̧mä̧, ucutumä CU̧Ä̧NÄ̧HUA̧TÖ̧CU̧RÖ̧ eseu pä'cärimä̧ jȩ'cuä̧tu̧cua̧jä̧, pi̧yȩ huedömä̧ ucutu'i̧nä̧ jȩ'cuä̧tu̧cua̧'a̧nä̧, juhua'a yabo cui̧tti̧mö̧tu̧cu̧'i̧nä̧ jȩttä̧cuȩ ja̧'a̧ ucutu cu̧ja̧cuä̧tu̧cuo̧mȩttö̧mä̧. Ucutumä pi̧yȩ pä'cärimä jȩ'cuä̧tu̧cua̧jä̧ kä̧hua̧tö̧ttö̧mä̧ sietenö kä̧hua̧tö̧ päi'omenä. ⁴² Ucutumä sietenö mo̧ro̧ jo̧mȩnä̧ cu̧ja̧cuä̧tu̧cua̧ja̧ odehuiyä ppo̧ö̧nä̧, o'catoi'önä̧, Israel ttö̧ja̧ttö̧ uhuäpächinä̧tö̧mä̧, odehuiyä ppo̧ö̧nä̧ sietenö mo̧ro̧ jo̧mȩnä̧ ttö̧ja̧cua̧ pä'ö ja̧'a̧, ⁴³ Cui̧tti̧mä̧tu̧cu̧ juhua'a yabo tti̧tti̧mö̧'i̧nä Israel ttö̧ja̧mä Egipto rȩjȩttö̧ rä'epö chicuäji o'ca'amä odehuiyä ppo̧ö̧nä̧ ka̧cui̧nä̧tö̧ pä'ö ttu̧huo̧juä̧cua̧'a̧nö̧. Ttötäsä TTÖ̧Ä̧NÄ̧HUA̧ Dios-mä̧." ⁴⁴ Pa̧'a̧nö̧tä̧ Moisésmä̧ Israel ttö̧ja̧ TTÖ̧Ä̧NÄ̧HUA̧RÖ̧ eseu pä'cäri jȩttä̧cuȩ mo̧ro̧mä̧ pi̧yȩ mo̧ro̧ pönä̧tä̧ jȩ'cuä̧tu̧cua̧jä̧ pä'ö ji'ähuinö̧.