¹ TÖ̧Ä̧NÄHUA̧ ucuocuinö Moisesrö pä'inö: ² ucuocu'i Aarón ja̧'hua̧ta̧'a̧nö̧ i̧tti̧mu̧rö̧'i̧nä̧, jiähui jähuätörö Israel ttö̧ja̧tö̧ surojuttö 'qu̧ȩ'ȩpu̧ kö̧nä̧huo̧mȩ otonänö tö̧já̧ pe'ö, jähuätö 'quȩ'ȩpu̧ tö̧jö̧ninome ttörö. Ttö surojö jui̧'a̧ chi̧mimä ttöcuotoca'a jȩttä̧ pe'ömä jo̧ca̧'a̧. Ttötäsä CU̧Ä̧NÄHUA̧TU̧CU̧. ³ Jiähui jähuätörö: ucutö isotöttö ya̧tȩ cuahuaröhuä'cotöttö ti̧chi̧'ö̧ttö̧mä̧ surojö juiyome 'quȩȩpu̧ ttö̧ju̧ni̧no̧mȩ TÖ̧Ä̧NÄHUA̧RÖ̧ Israel ttö̧ja̧, ja̧'hua̧nö̧ ja̧'a̧ttö̧ jo̧ú̧mä̧ surojö cö̧närö̧ ja̧'a̧ttö̧, joú̧ sacerdotemä ttö chö̧jo̧memä iya pe'ömä jo̧ca̧'a̧: Ttötä ja̧'a̧ CUÄ̧NÄ̧HUA̧TU̧CU̧MÄ̧. ⁴ Aarón ahuaruhuättö i̧jȩta̧nä̧ umäriche'i boipu nahua̧chu̧ttö̧mä̧, ja̧'hua̧ta̧'a̧nö̧ u̧ju̧nä̧rö̧ttö̧ idepä jacua u̧mä̧richei, u̧märichei ö̧i̧po̧mebu ucua pe'ömä jo̧ca̧a̧ TÖ̧Ä̧NÄHUA̧RÖ̧ kö icu iyähua. Ya̧tȩ su̧ro̧pa̧rö̧ huaicuä'irö meö̧ttö̧mä̧ ja̧'hua̧ta̧'a̧nö̧ ttö̧ja̧sä̧ idepättö tȩa̧'tä̧nö̧ ma'ö̧nä̧ na'a̧chö̧rö̧'i̧nä̧, ⁵ ja̧'hua̧ta̧'a̧nö̧ suroja'a mȩttö̧ttö̧mä̧ de'a isotö doähuätörö ja'hua̧ta̧'a̧nö̧ ttö̧ja̧sä̧ su̧ro̧pä̧rö̧'i̧nä̧, ja̧'hua̧ta̧'a̧nö̧ korottö'inä surojoepa pe'ö kö̧ttö̧'i̧nä̧. ⁶ Ja̧'hua̧nö̧ ja̧'a̧ttö̧ sacerdote surojö meö̧ttö̧mä̧ , jo̧u̧mä̧ su̧ro̧pä̧ ni̧pä̧ro̧mȩ joächomebu, jo̧u̧mä̧ ucuiyä̧cua̧ surojö juiyömä, ucua'anö ja̧'a̧ ajiyanä ajeö icuäjöttötä. ⁷ Ja̧umä kä̧hua̧ ma̧'ä̧cho̧mȩ jubutä, surojö jui̧'a̧ jä̧cua̧. Ja̧u̧nu̧ o'ca'a mo̧ro̧ juomenä ja̧u̧mä̧ ucu'anö ja̧'a̧ surojö juiyötä, jua'amä ja̧u̧ ja̧'a̧ttö̧ u̧cuä̧mä̧. ⁸ Ja̧u̧mä̧ ucu juiyö'anö ja̧'a̧ de'a i̧sa̧ 'corujuo'ächäji pö̧rö̧mä̧ ja̧'hua̧ta̧'a̧nö̧ de'a i̧sa̧ cuä'ö ötäjäcurumä, ja̧'jua̧nö̧ jȩpö̧ ö̧ä̧nä̧hua̧ttö̧ surojuächö'anö ja̧'a̧ttö̧. Ttö ja̧'a̧ TTÖ̧Ä̧NÄ̧HUA̧MÄ̧. ⁹ Sacerdote huotö'inä ttö pädötä jȩttö̧'a̧nö̧ ja̧'a̧, ja̧'hua̧nö̧ jö̧ juiyöttömä ja'huätö'inä huȩnȩ huotö ttäcuotö suronä jȩttö̧mä̧ ja̧'hua̧nö̧ ja̧'a̧ttö̧ jahuätö'inä 'corujuotächäcuotö TTÖ chi̧mi̧ surojuottepa'attö. Ttötä ja̧'a̧ TTÖ̧Ä̧NÄ̧HUA̧MÄ̧ surojö juiyönä'inä jȩpö̧mä̧. ¹⁰ Ya̧tȩ'i̧nä̧ toa'a sacerdote huotö ttahuaruhuä'inä, sacerdote huotö tä̧tȩpä̧u̧'i̧nä̧ ja̧'hua̧ta̧'a̧nö̧ ttiäre ttaditönä huȩttä̧rö̧'i̧nä̧, ttucu'anö ja̧'a̧ surojö juiyötä. ¹¹ Ja̧'hua̧nö̧ ja̧'a̧nä̧ ya̧tȩ sacerdote hua̧ chutä iäre pärätänä mitö ttaditönä huȩttä̧rä̧u̧ru̧ ȩmö̧ttö̧mä̧, ja'huätö ttaditönä huȩttä̧rä̧u̧mä ttucuäcuotö TTÖ̧Ä̧NÄ̧HUA̧RÖ̧ ttiya pä'ö 'quȩ'ȩpö̧ ku̧nä̧huo̧mȩttö̧. Sacerdote huotöttö ttahuaruhuä ja̧'hua̧ta̧'a̧nö̧ ttaditönä huȩttä̧rä̧u̧ jahuätö 'tojusodettö uhuäpächättömä, ja'huätö'inä ja̧u̧cu̧ ttucuäcuotö chutä ucujueimä. ¹² Sacerdote ittiju kirecu'o kȩmu̧ttö̧mä̧ ya̧tȩ sacerdote huocörö, jähuäjumä kucu'i ya'anö ja̧'a̧ surojö ju'iyönä ttiyöttömä. ¹³ Ja̧'hua̧nö̧ ja̧'a̧nä̧ sacerdote ittiju recu'ajojöttö'inä jaroji'öttö'inä, jähuäju ki̧tti̧mu tojöttömä pä'äjita'anö kä'o ojusodenä kö̧ja̧ pe'ö ka̧'a̧ mu̧'ä̧yaju ki̧jä̧ji̧ta̧'a̧nö̧, ja̧'hua̧nö̧ ja̧'a̧ttö̧ jähuäjumä kucua pe'ömä ka̧'a̧ kä'ocumä. Sacerdote i̧tti̧mu̧ huocotömä sacerdote u̧cu'ȩmä̧ ttöcu'a pe'ömä jo̧ca̧'a̧. ¹⁴ Ya̧tȩ ttö̧ja̧sä̧ jerupu ucuttömä sacerdote ö̧cu'ȩ, ja̧'hua̧nö̧ ja̧'a̧ttö̧ jo̧'ú̧mä̧ imita pe'ö ka̧'a̧ sacerdoterö ja̧'hua̧ta̧'a̧nö̧ ppa̧huä̧da̧ pe'ö ka̧'a̧ ji̧mu̧tȩ jähuä 'torähuä yoräte'unä sacerdoterö. ¹⁵ Israel ttö̧ja̧ ucu'otönö jȩttä̧ pe'ö ka̧'a̧ surojö juiyönä TÖ̧Ä̧NÄHUA̧RÖ̧ ttiyä'ita'anö, ¹⁶ Jähuätö jäyä jȩttö̧tä̧ ku̧nä̧ra̧tö̧ surojömä ja̧'hua̧nö̧ ja̧'a̧ttö̧ kuhuicu iyähuämä ttöcu'iya'anö huotö, Ttötäsä TÖ̧Ä̧NÄHUA jähuätörö surojö ju'i'ätö pätti'önä jȩpu̧mä̧. ¹⁷ TÖ̧Ä̧NÄ̧HUA̧MÄ̧ Moiséscu ucuocumä pä'inö̧: ¹⁸ "Aarón-rö̧'i̧nä̧, ja̧u̧tä̧ i̧tti̧mö̧rö̧'i̧nä̧ ja̧'hua̧ta̧nö̧ Israel ttö̧ja̧rö̧mä̧ o'catoi'önä̧rö̧tä̧ pi̧yȩ jȩttä̧cua̧'a̧nö̧ ji'ähuitö: Israel ttö̧ja̧sa̧'i̧nä̧, ko̧ro̧jä̧ttö̧ i̧chä̧cuä̧hua̧ ucututäcu kö̧'i̧nä̧, i̧sa̧rö̧ cuä'ö icu pä̧huä̧rö̧jo̧mȩnä̧ i̧yähuä chi̧yä̧cua̧sä̧ pä'ino'cotö ku icu iyähuä'inä TTÖ̧Ä̧NÄ̧HUA̧RÖ̧ ttiyöttömä̧, ¹⁹ Ttömä chȩmi̧ya̧tö̧ pä'ömä̧, jahuätömä i̧sa̧ uborömä̧ päcäyäcö̧, ovejacö̧, cabracö̧ öttahuiyä'i̧nä̧ jui̧'a̧rö̧tä̧ ttiya pä'ö jä̧cua̧'a̧. ²⁰ Ja̧'hua̧nö̧ ja̧'a̧nä̧ i̧sa̧ öttahuiyä rö̧tä̧rö̧rö̧ cuiyuttömä̧. Ttömä ucu cuiyömä ȩmo̧cö̧ chä̧cua̧sä̧. ²¹ Ya̧tȩ ä̧ji̧mö̧ ji̧nä̧ yo̧mȩtȩ kä̧tö̧ttö̧ esecu kö̧cuä̧huä̧ Ö̧Ä̧NÄ̧HUA̧RÖ̧ chi̧yä̧cua̧sä̧ päinö jȩpö̧, jitörötä pä̧huä̧rö̧jo̧mȩnä̧ iyähuä jö̧ttö̧'i̧nä̧, surojömä juiyötä cuiyätucuaja, chȩmi̧yä̧tu̧cua̧cu̧ pä'ömä. I̧sa̧ öttahuiyä hua̧rö̧mä̧ iyähyoca'a jä̧cua̧'a̧. ²² Ucutumä isotö tti'äriyä ä̧to̧cä̧tö̧rö'inä, ppi̧sä̧ppi̧sä̧ 'chä̧tö̧rö̧'i̧nä̧, 'te'chächinä̧tö̧rö̧'inä, tti̧jȩta̧nä̧ mä̧richei ku̧nä̧rä̧tö̧rö̧'inä, ttöttahuiyä huotörö'inä, tu̧huä̧'quȩ huotörö'inä cuiyätucua pä'ömä jo̧ca̧'a̧. Ucutumä ja̧'hua̧nö̧ huotörömä ku icu iyähuome huä̧mȩ huȩnö̧ ocuränä ku icumä cuiyätucuä TÖ̧Ä̧NÄ̧HUA̧RÖ̧MÄ̧. ²³ Ucutu pähuärö̧jo̧mȩnä̧ iyämä päcäyärötä, oveja ö̧jä̧pö̧ yorätehuocörötä, a̧'u̧cua̧rö̧tä̧, cuiyätucua pä'ö jä̧cua̧'a̧, ja̧'hua̧nö̧ ja̧'a̧nä̧ chi̧yä̧cua̧sä̧ päcuinö jinö jȩpö̧ cuiyätucuttömä ȩmä̧huo̧ca̧'a̧ jä̧cua̧'a̧. ²⁴ I̧sa̧ örä'cäyä cuäcuäpä̧cua̧hua̧rö̧'i̧nä̧, 'cä'ö i̧cuä̧hua̧rö̧'inä, barachi'inä̧cu̧rö̧'inä, 'cui'opö i̧cuä̧hua̧rö̧'i̧nä̧ TÖ̧Ä̧NÄ̧HUA̧RÖ̧MÄ̧ cuiyätucuä. Pi̧yȩmä̧ jȩ'cuä̧tu̧cuó cui̧rȩjä̧tu̧cu̧ jäcuättömä. ²⁵ Ucutumä TÖ̧Ä̧NÄ̧HUA̧ u̧cuä̧ jö̧nä̧mä̧ cuiyätucuó ko̧ro̧jä̧ra̧'a̧ttö̧ i̧chä̧cuä̧hua̧ttö̧ ȩmö̧mä̧, jahuätö isotömä jättäpäyotöttö ji̧yȩtȩ jui'ätö ja̧'a̧ ja̧'hua̧ta̧'a̧nö̧ ttöttahuiyä huotö jo̧mȩttö̧ ȩmä̧huo̧co̧tö̧ ttäcuotö." ²⁶ TÖ̧Ä̧NÄ̧HUA̧MÄ̧ Moiséscu ucuocumä pä'inö: ²⁷ Päcäyä isaju ki̧tti̧cö̧, oveja isaju ki̧tti̧cö̧, cabra isaju ki̧tti̧cö̧ uhuächömä ja̧ju̧cu̧mä̧ sietenö mo̧ro̧ jo̧mȩnö̧ ö̧jä̧cua̧. Ja̧'hua̧nö̧ ja̧'a̧ ochonö mo̧ro̧ yabocumä, ja̧u̧ i̧sa̧mä̧ cuä'ö icu ocuränä ku icu TÖ̧Ä̧NÄ̧HUA̧RÖ̧ ttiyomenämä ȩmä̧cua̧. ²⁸ Päcäyä isajurucö̧, oveja isajuröcö̧ ki̧tti̧cu̧mä̧ cuä'ö cuicuä, ji̧yȩtä̧ mo̧ro̧mä̧. ²⁹ Ucutu i̧sa̧rö̧ cuä'ö icu TÖ̧Ä̧NÄ̧HUA̧RÖ̧ eseu cuiyätucuomenämä, ȩma̧'a̧nö̧ jo̧mȩnä̧ cuä'ö icu cuiyätucua pä'ö ja̧'a̧. Pi̧yȩmä̧ cuä'ö cuijätucu mo̧ro̧tä̧ cucuätucua pä'ö jä̧cuȩ. ³⁰ Ucutumä ku̧ju̧ni̧'ä̧tu̧cua̧ pä'ömä jo̧ca̧'a̧ koro mo̧ro̧ cucuätucua pä'ömä. Ttöttäsä TTÖ̧Ä̧NÄ̧HUA̧MÄ̧. ³¹ Ja̧'hua̧nö̧ ja̧'a̧ttö̧, ucutumä ttö huedömä jȩpu̧ kä̧tu̧cui̧. TTÖTÄ ja'a CUÄ̧NÄ̧HUA̧TU̧CU̧MÄ̧. ³² Ucutumä TTÖ chimimä ucuo juiyönämä jȩ'cuä̧tu̧cuä̧. Israel ttö̧ja̧ttö̧mä̧ TTÖRÖMÄ ttu̧huo̧jua̧ päö hua̧sä̧ surojö'inä jui̧'a̧ päö. TTÖTÄ ja̧'a̧ TTÖ̧Ä̧NÄ̧HUA̧MÄ̧, surojö jui'ätö cuätucunä jȩpu̧mä̧, ³³ Egipto rȩjȩttö̧'i̧nä̧ ucuturu räepu ihuinömä ttötä ji̧nä̧'a̧ cuä̧nä̧hua̧tu̧cu̧ Dios chö̧ja̧ päö: TTÖTÄ ja̧'a̧ CUÄ̧NÄ̧HUA̧TU̧CU̧MÄ̧."