¹ TÖ̧Ä̧NÄHUA̧ pä'inö Moisesrö: ucu'ocu'i sacerdote huotörö, Aarón i̧tti̧mu̧rö̧ jiähuitö jähuätörö: ucututtömä ya̧tȩ'i̧nä̧ jȩ'a̧ pä'ömä̧ ju'iya'a tta̧mu̧nä ttädihuächa pe'ömä cu'ahuaröhuä 'corö jottächomettö̧, ² tö'cö ahuaruchärö ppä'ädömä a̧ju̧rö̧, jä̧'orö, i̧tti̧rö̧, ittijurö, i̧jä̧hua̧rö̧, ³ ja̧'hua̧ta̧'a̧nö̧ ijähuaju mu̧'ä̧yäju chutä ppädä̧rä̧cua̧, ji̧nä kirecu'o to'aju ja̧'a̧ttö̧ jo̧'ú̧mä̧ jähuäjunä adihuo'cö a̧mu̧nä̧mä̧. ⁴ Ja̧'hua̧nö̧ ja̧'a̧ttö̧ jo̧'ú̧mä̧ adihuocö korotö ttä'cattömä ja̧'hua̧ta̧'a̧nö̧ ucu'o ju'iyönä jȩ'a̧ttö̧. ⁵ Sacerdote huotömä ttöhuo'che'i̧nä̧ ttäcähuiyä'che jäyänä'i̧nä̧ 'cu'ittähuiya'anö ja̧'a̧, ja̧'hua̧ta̧'a̧nö̧ ttidepä koro tti̧jȩpi̧ya̧'a̧nö̧ ja̧'a̧. ⁶ Jähuätömä DIOS cutä surojö ju'i'ätö ttö̧ja̧ pe'ö ja̧'a̧ TÖ̧Ä̧NÄHUA̧ DIOS i̧mi̧nä̧ jȩpu̧, sacerdote huotömä TÖ̧Ä̧NÄHUA̧RÖ̧ iyätö ja̧'a̧ttö̧ ucu'otönö cu'äcu'ähuä, ja̧'hua̧nö̧ ja̧'a̧ttö̧ sacerdote huotömä surojö ju'i'ä̧tö ttö̧jö̧'a̧nö̧ ja̧'a̧. ⁷ Jahuätömä ttirecua päi'önä̧ ttȩma̧ pä'ömä̧ huocotö kidepä iyä'chäcuähuäjucurö'i̧nä̧, isaju suronä̧ jȩtti̧nä̧cua̧cu̧rö̧'i̧nä̧, kirecuorö jaropi'inä̧ju̧cu̧rö̧'i̧nä̧,, juhua'amä̧ Dios aditähuä ttadita pä'ötä pojopö ku̧nä̧huo̧tö̧ jo̧mȩttö̧. ⁸ Ucutä surojöttömä̧ 'cä̧'ȩpö̧ ku̧ni̧tö̧, isopäi'önä̧ ja̧u̧mä̧ Diosrö pan iyö jo̧mȩttö̧. Ja̧u̧mä̧ surojö juiyönä̧ ö̧jä̧cua̧ ucunämä, juhua'amä̧ Ttö TTÖ̧Ä̧NÄ̧HUA̧ ja̧'a̧ surojö jui̧'a̧ jö̧nä̧ jȩpö̧mä̧, Ttö'inä surojä jui̧'a̧ cha'attö̧. ⁹ "Sacerdote päi'önä̧ hua̧ ittiju ttidepä iyä'chäcuähuänä̧ juojuächöttömä̧, kä'omä̧ esehuocötä jȩjä̧cua̧ju̧. Jahuäjumä kutä icuähuäcuaju. ¹⁰ Chu sacerdotestö̧ ttu̧ru̧hua̧ ahuaruhuä ttö̧'cä̧tȩttö̧ unä̧ a̧dȩja da'epö pojopö ku̧nä̧hua̧mä̧, ja̧'hua̧ta̧'a̧nö̧ ö̧'ca̧tä̧huä̧ta̧'i̧nä̧ ucuo i̧sä̧ta̧ sacerdotetö̧ ttö̧'ca̧tä̧huä̧ta̧ 'ca̧tä̧huö̧mä̧, uhuo'chemä̧ ti̧ä̧dä̧cuä̧huo̧ca̧'a̧mä̧ cueächa pä'ömä̧ jo̧ca̧'a̧, i̧ä̧rȩta̧'inä i̧sȩrä̧hua̧ pä'ömä̧ jo̧ca̧'a̧; ¹¹ Jahuätömä yoriso 'corujuo'ächäji ö̧'o̧mȩ'i̧nä̧ do'ächocötö ttäcuotö ja̧'hua̧ta̧'a̧nö̧ chutä'inä jä'o jö̧ttö̧'i̧nä̧, ja̧ju̧ jö̧ttö̧'i̧nä̧ jahuätö jähuä surojuoecua pä'ömä̧ jo̧ca̧'a̧ jä̧cua̧'a̧. ¹² Sacerdotemä̧ Dios ö̧jodettömä̧ räopächa pä'ömä̧ jo̧ca̧'a̧, Dios ö̧jo̧de surojuoächa'anä̧'i̧nä̧ ja̧'a̧tä̧ toa pä'ömä̧ jo̧ca̧'a̧ jä̧cua̧'a̧, juhua'amä̧ unä̧ a̧dȩja da'epö Dios u̧mö̧huä̧ya̧ päi'önä̧ pojopö ku̧nä̧hua̧ jo̧mȩttö̧. Ttötäsä TTÖ̧Ä̧NÄ̧HUA̧ Diosmä̧. ¹³ Sacerdotettö juȩ'i̧pa̧mä̧ irecua päi'önämä uborö jerupajuttö ȩma̧ pä'ö ja̧'a̧. ¹⁴ Ja̧u̧mä̧ irecua päi'önä̧ ȩmä̧cua̧mä̧ recuamäcö̧, kirecuo jaroi'inä̧cua̧mä̧cö̧, isaju kidepä iyä'chäcuähuäjumäcö̧. Ja̧u̧mä̧ pa̧'a̧nö̧ huotöttömä irecua päi'önämä ȩmo̧cö̧ jä̧cua̧. Ja̧u̧mä̧ ȩmä̧cua̧ chuta ahuaruhuättö isaju uborö jerupajuttö, ¹⁵ ja̧'hua̧nö̧ ja̧'a̧ttö̧ ja̧u̧mä̧ i̧tti̧mö̧rö̧mä̧ surojuo'epocö jȩcua̧ ahuaruhuättömä, isopäi'önä Ttötäsä TTÖ̧Ä̧NÄ̧HUA̧, surojö jui'ätö jö̧nä̧ jȩpö̧mä̧. ¹⁶ TÖ̧Ä̧NÄ̧HUA̧MÄ̧ Moiséscu ucuocumä pä'inö: ¹⁷ Aaróncu̧ ucuocumä pa̧'a̧nö̧ ji'ähuirö: Ucu cui̧tti̧mä̧ yo'ähui'ätöttö ji̧yȩtȩ jä̧ttä̧pä̧ya̧ttö̧ su̧ro̧pa̧mä̧, Ö̧ä̧nä̧hua̧ Diosrö cuäcuähuä iya pä'ö ötö'cöhuächi'a pä'ömä juiyäcua'a. ¹⁸ Ya̧tȩ jä̧ttä̧pä̧ya̧ttö̧ ji̧yȩtȩ su̧ro̧pa̧mä̧ TÖ̧Ä̧NÄ̧HUA̧ ö̧jo̧mȩcu̧mä̧ ötö'cöhuächi'ö juiyö'anö ja̧'a̧, ä̧to̧ca̧mä̧, adiunä 'cho̧cö̧mä̧, i̧ji̧yu̧ su̧ro̧pa̧'inä, ä̧ja̧ jui̧'a̧'inä, ¹⁹ ya̧tȩ u̧mö̧cö̧ ö̧jä̧pö̧cö̧ huisobö hua̧'inä, ²⁰ abo ja̧rȩyu̧ hua̧'inä, ä̧tȩcuä̧nä̧ si̧'ä̧hua̧'inä, äcä́ bȩ'a̧'inä, iäre su̧ro̧pa̧'inä, ji̧yȩtȩ märichei ku̧nä̧rö̧'inä, barau ku̧nä̧rö̧'inä, cä̧pä̧chä̧rö̧'inä, örä'cäyä 'cä'ö i̧cuä̧hua̧'i̧nä̧. ²¹ Ya̧tȩ'inä sacerdote Aarón i̧tti̧mö̧ttö̧mä̧ ji̧yȩtȩ jä̧ttä̧pä̧ya̧ttö̧ su̧ro̧pa̧mä̧; ku icu iyähuä Diosrö iya pä'ömä ötö'cöhuächi'ö juiyö'anö ja̧'a̧. ²² TÖ̧Ä̧NÄ̧HUA̧RÖ̧ u̧cuȩmä̧ chutä'inä u̧cuä̧cua̧ rö̧ä̧nä̧ ro̧ö̧ jö̧ttö̧'i̧nä̧, ro̧ö̧tä̧ jö̧ttö̧'inä. ²³ Ja̧'hua̧nö̧ ja̧'a̧nä̧ ja̧u̧mä tto̧ȩcuä̧tä̧ jacuämä̧ doächa pä'ömä̧ huocö jä̧cua̧, ja̧'hua̧ta̧nö̧ ku̧ icu iyähuome tö'cunä̧nö̧'inä̧, Juhua'amä̧ huä̧mȩnä̧ öttahuiyä hua̧ jo̧mȩttö̧, ja̧u̧mä̧ ju̧huȩnȩ ro̧o̧mȩ surojuoepö juiyäcua'anö. Ttötäsä TTÖ̧Ä̧NÄ̧HUA̧MÄ̧, jahuätörö surojö jui'ätö ttönä jȩpö̧mä̧." ²⁴ Ja̧'hua̧nö̧tä̧ Moisésmä̧ ji'ähuinö̧ Aarónrö̧'i̧nä̧ ja̧'hua̧ta̧'a̧nö̧ i̧tti̧mö̧'inä̧ juhua'atäcu Israel ttö̧ja̧rö̧mä̧ o'catoi'önä̧rö̧tä̧.