¹ TÖ̧Ä̧NÄ̧HUA̧ Moiaerö ucuocu pä'inö: ² "Israél ttä̧ja̧rö̧ ji'ähui: Ya̧tȩ Israél ttö̧ja̧ttö̧ jö̧ttö̧'i̧nä̧, ko̧ro̧nö̧mä̧ i̧chä̧cuä̧hua̧ Israélnä kö̧ i̧tti̧mu̧rö̧ Moloc'rö iyöttömä, ja̧u̧mä̧, isopäi'önätä̧, cu'ö i̧cuä̧hua̧tä̧ jä̧cua̧. Pi̧jä̧nä̧ ko̧cuä̧tö̧mä̧ i̧nä̧du tti̧cuä̧huä̧cua̧ 'corupäi'ome jubu. ³ Tto'inä kö'cocö chä̧cua̧sä̧ ja̧u̧ ttö̧ja̧sa̧rö̧mä̧, 'cä̧'ȩpö̧ chi̧cuä̧cua̧ ahueruhuä ttö'inä i̧tti̧rö̧ Moloc'rö iyöta'anö, TTÖ chö̧jo̧mȩ surojö juiyome surojuoepa'attö ja̧'hua̧ta̧'a̧nö̧ TTÖ chi̧mi̧nä̧ suronä jȩa̧'a̧ttö̧. ⁴ Pi̧jä̧nä̧ ko̧cuä̧tö̧ ja̧u̧ ttä̧ja̧sa̧ i̧tti̧mu̧rö̧ Moloc'rö iya'a totta'anä, cuä'ö tticuoca'a jö̧ttö̧mä̧, ⁵ ja̧u̧nu̧mä̧ TTÖTÄ chö̧'ä̧i̧nä̧ ro̧dȩpä̧cua̧sä̧ ja̧u̧ru̧mä̧ ja̧'hua̧ta̧'a̧nö̧ jua'a yabo ahueruhuä o'cotörö'inä, ja̧hua̧nö̧ TTÖTÄ kä̧'ȩpö̧ chi̧cuä̧cua̧ ja̧u̧mä̧ ja̧'hua̧nö̧tä̧ jȩchä̧cua̧sä̧ o'catoi'önärö̧ ja̧hua̧nö̧ suronä jȩpä̧tö̧rö̧mä̧, Moloc'rö ttidepä ttiyähuä'cha̧'a̧ttö̧. ⁶ Pä'äji ta'anö ttö̧ja̧ hua'inätö̧cu̧ ucu'ocuttömä ja̧'hua̧ta̧'a̧nö̧ hua'inätö̧ ttä̧'cua̧rö̧hua̧cu̧ ucu'ocumä jähuätörö ucu'otunö jȩpä̧'chä̧tö̧mä̧, ttö tochäcu'otö to'icutä jähuätörömä; ttötä pporädö chicu'ä̧cu'a̧ chahuaruchä tti̧'cä̧tȩttö̧. ⁷ Ja̧'hua̧nö̧ ja̧'a̧ttö̧, ucu'otönö jȩpä̧tu̧cu'i̧ ucututä surojö ju'iyönä, dä̧ pe'ö ttötäsä̧ ucutu cu'ä̧huä̧na̧tu̧cu̧ DIOMÄ. ⁸ Ucutumä huedinö ucuotönö jȩpä̧tu̧cui̧. Ttötäsä TÖ̧Ä̧NÄHUA̧, surojö juiyönä kö̧mä. ⁹ Ö'cato'inä suronä pä'ömä jä'orö'inä a̧ju̧rö̧'i̧nä̧ ja̧'u̧mä̧ kȩ'ȩpu̧ i̧cua̧hua̧ hua'ö icua pä'ö. Jä'orö'inä ja̧'hua̧ta̧'a̧nö̧ a̧ju̧rö̧'i̧nä̧ suronä pä'attö ja̧u̧mä̧ hua'ö icua pä'ötä kö̧. ¹⁰ Ya̧tȩ ka̧ra̧ irecuacu ä'ä'chörömä, ja̧u̧mä̧ ttö̧jo̧mȩ ppeyänä kä̧ irecuacu jö̧ta'anö jö̧-- ä'äjirö'inä ja̧'hua̧ta̧'a̧nö̧ ä'äjuru'inä ta̧ju̧cuäyotörö cuä'ö tticuatö pä'ötä ttäcuotö. ¹¹ Ya̧tȩ jä'o irecuacu rö̧mä̧ jahuäjucu ä'a pä'ö, ja̧u̧mä̧ chutä amönä jä'orö ucuotocö ja̧'a̧. Ja̧'hua̧nö̧ ja̧'a̧ttö̧ ta̧ju̧cuäyotö i̧tti̧'inä juhua'atäcu irecua'inä cuä'ö tticuatö pä'ötä ttäcuotö. ¹² Ya̧tȩ ö̧jo̧ri̧ju̧cu̧ ä'öttömä jahuätö ta̧ju̧mä̧ cuä'ö tticuatö pä'ötä ttäcuotö. Jahuätömä surojö jȩttä̧ja̧'a̧ttö̧. Jahuätömä jȩttä̧ji̧tä̧ huȩnȩcuä̧cuo̧tö̧ ja̧'hua̧nö̧ jo̧mȩttö̧ cuä'ö tticuatö pä'ötä ttäcuotö. ¹³ Ya̧tȩ ubo ka̧ra̧ ubocu ä'ä'chumä, isajucu ttä'a'a 'cua̧rö̧nä̧, jahuätö ta̧ju̧mä̧ su̧ro̧tä̧cuä̧tä̧ jȩpä̧jä̧tö̧. Jahuätömä cuä'ö tticuatö pä'ötä ttäcuotö. cuä'ö tticuatö pä'ötä ttäcuotö. ¹⁴ Ya̧tȩ kittijuru'i̧nä̧ ȩmö̧ kä̧nö̧ ka̧ju̧ru̧'i̧nä̧ irecua päi'önä̧ ȩmö̧mä̧, rö̧ȩnä̧ surojötä jȩpö̧, churutä'i̧nä̧ ja̧'hua̧ta̧nö̧ nä̧tö̧rö̧'i̧nä̧ ku tticuatö pä'ötä huotö ja̧u̧ surojö jȩä̧cuä̧huä̧ juhua'a yabonö ucutu cu̧'cä̧tȩtu̧cu̧ttö̧ rö̧ä̧chö̧ juiyäcua'anö̧. ¹⁵ Ya̧tȩ de'a i̧sa̧cu̧ ä'ömä̧, isopäi'önä̧tä̧ cuä'ö tticuarö pä'ötä bua̧, ja̧'hua̧ta̧'a̧nö̧ de'a i̧sa̧'inä ucutumä̧ cuä'ö cuicuätucua pä'ötä ja̧'a̧. ¹⁶ Yajute issaju de'a i̧sa̧cu̧ kä'a pä'ö kötö'cöhuächi'öttömä ucutumä̧ isajuru'inä cuä'ö icu kä̧nö̧ de'a i̧sa̧rö̧'inä cuä'ö cuicuätucua pä'ötä ja̧'a̧. Jahuätö isopäi'önä̧tä̧ cuä'ö tti cuatö pä'ötä huotö. Jabuätömä̧ isopäi'önä̧ jȩpä̧jä̧tö̧ ja̧'hua̧nö̧ ja̧'a̧ttö̧ 'coru juottächa pä'ötä huotö. ¹⁷ Ya̧tȩ öjähuacu ä'öttömä, jä'otä ittijurö ja̧'hua̧nö̧ jo̧ca̧'a̧ jö̧ttö̧'inä ja̧ju̧tä̧ kittijurö, ja̧u̧mä̧ jähuäjucu ä'öttömä, jähuäju'inä ja̧u̧cu̧ kä'öttömä, ja̧u̧mä̧ dä'ä ttuhuähuä ja̧'a̧. Jahuätömä ttahuaruhuä ttä'ca jo̧mȩttö̧ rä'epötä icuähuäcuotö. ¹⁸ Ya̧tȩ isaju kihuarö rä̧ju̧cu̧ ä'öttömä̧, ja̧'hua̧ta̧'a̧nö̧ jahuäjucu ä'i'äjittömä ja̧u̧mä̧ ta̧ju̧cuäyotö juä̧jä̧ rȩjȩttö̧mä̧ rä'epötä icuähuäcuotö. kucuoja räopome topäji ja̧'a̧. Ta̧ju̧cuäyotö, ubo'inä, isaju'inä, ttahuaruhuä ttä'ca jo̧mȩttö̧ rä'epötä icuähuäcuotö. ¹⁹ Ucutumä̧ cua̧ju̧ kijähuajucumä̧ cua'ätöcua pä'ömä jo̧ca̧'a̧ ja̧'hua̧nö̧ jo̧ca̧'a̧ jö̧ttö̧'inä cuö'o ijähuajucumä, ja̧u̧ jȩ'cuä̧tu̧cu̧ttö̧mä̧ tö'cö cuahuaruhuärö dä'ä ttucuepätucua pä'ötä ja̧'a̧. Ucututä cuamo̧nä̧ jähuänätä usurä cuȩmä̧huä̧cuo̧tö̧jä̧. ²⁰ Ya̧tȩ ubo imiyajucu ä'öttömä̧, ja̧u̧mä̧ imiya̧rö̧ ucuotoca'atä jä̧cua̧'a̧. Jahuätö 'coru juottächomenä̧mä̧ ta̧ju̧cuäyotörö rö̧dȩpäcua̧sää̧ ja̧'hua̧ta̧'a̧nö̧ jahuätö 'corujuottächomenämä, ttiäre o'co tti̧ti̧mö̧ tȩmajueimä̧ ttötä chȩmä̧cua̧sä̧. ²¹ Ya̧tȩ a̧hua̧ru̧hua̧ ireccuärö, ji̧nä̧ pi̧jä̧nä̧ ö̧ja̧'a̧nä̧ 'ca̧ȩpö̧tö̧mä̧. ja̧u̧mä̧ dä'ä ttuhuähuätä ja̧'a̧. ja̧u̧mä̧ ö̧jä̧hua̧rö̧ ucuotoca'atä ja'a, ja̧'hua̧nö̧ jo̧mȩnä̧, tti̧tti̧mö̧rö̧mä̧ Ttötä chȩmi̧yä̧cuo̧tö̧ ttä'o tti̧rȩjä̧ päi'önä iya päinä̧jä̧'i̧nä̧. ²² Ja̧'hua̧nö̧ ja̧'a̧ttö̧ o'cajuiyönä̧ Ttö jȩ'cuä̧tu̧cua̧ pä'ö huedinömä cäcuädi'ätucuä ucutumä̧; Ucutumä cucuotätucua pä'ötä ja̧'a̧ cu̧jä̧tu̧cua̧ pä'ö chi'cächä̧jä̧ rä'epö icuätucua'acu pä'ömä. ²³ Ucutumä cuä'catucuttö rä'epö chi̧cuä̧cuä̧u̧ jȩpö̧ ttö̧jä̧'i̧jö̧mä̧ jȩpö̧ cu̧jä̧tu̧cuä̧, ja̧'hua̧nö̧ ja̧'a̧ o'cajuiyönä jȩttä̧'i̧jö̧mä̧, Ttömä chu̧so̧ro̧tö̧ ja̧'a̧. ²⁴ Ttö päinösä̧ ucuturu: Rȩjȩmä ucuturutä ki̧'i̧pä̧cua̧'a̧; Ja̧huä̧jä̧ rȩjȩ cuähuä adiunä i̧ya̧jä̧mä ttötä chi̧yä̧cua̧sä̧ ucuturu cuȩmätu̧cua̧ päö. Ttötä ja̧'a̧ ucutu CUÄ̧NÄ̧HUA̧TU̧CU̧ Diosmä, korotucu ku̧jä̧tu̧cuo̧mȩttö̧ 'cȩ'ȩpu̧ ku̧ni̧nö̧mä̧. ²⁵ Ja̧'hua̧nö̧'a̧nö̧ ja̧'a̧ttö̧ ucutumä cu̧huo̧juä̧tu̧cu̧'a̧nö̧ ja̧'a̧ dea isotöttö surojö juiätörömä ja̧'hua̧ta̧'a̧nö̧ surojö ku̧nä̧rä̧ttö̧rö̧'i̧nä̧, ja̧'hua̧nö̧ jö̧ ta̧'a̧nö̧tä̧ coätöttö'inä. Ucutumä jahuätöttömä suropätö juocuächätucuó rȩjȩnä̧ doähuätöttö 'inä, ttötä ucuturumä pitömä surojö juotö päö 'cȩ'ȩpu̧ chu̧ju̧ni̧nä̧u̧." ²⁶ Ucutumä surojöttö 'cä̧ȩpu̧ ku̧nä̧huo̧ttö̧jä̧, TTÖMÄ, CUÄ̧NÄ̧HUÄ̧TU̧CU̧MÄ̧ surojömä jui̧'a̧sä̧, ja̧'hua̧'a̧nö̧ ja̧'a̧ttö̧ korottötömä ttötä 'cȩdȩpi̧nä̧u̧jä̧, ja̧'hua̧'a̧nö̧ ja̧'a̧ttö̧ ucutu cu̧ru̧hua̧tu̧cu̧mä̧ ttötä ja̧'a̧. ²⁷ Ubo jö̧ttö̧'i̧nä̧ isaju jö̧ttö̧'i̧nä̧ 'corujuo'ächinätu̧cu̧ ko̧ro̧nö̧mä̧ isoppa huotucu ucuocuätömä, iso päi'önä ja'huätömä cuä'ötä icuähuotö. Ttö̧ja̧mä̧ inädu icuäutä. Ja'huätö ja̧'a̧ huȩnȩ jö̧nä̧ jȩpä̧tö̧mä̧ ja̧'hua̧nö̧ ja̧'a̧ttö̧ 'corujuotächapä'ötä huotö."