¹ Oro usärömä toepächa'a; ¡Tocu pärohuächa'attö päcuäjitä päia'a pä'ömä! Inä o'qui pojopö ku̧nä̧huä̧mä̧ mä̧ni̧yä̧ u̧yu̧'ca̧ri̧ pö̧nä̧ pperetö icuähua'a. ² Sión i̧tti̧mö̧ rö̧ä̧nä̧ micuähuotömä oro päcuäi öamecä micuähuome jo̧mȩ micuähuinä̧tö̧, ja̧'hua̧nö̧ ja̧'a̧nä̧ jitämä redä'cattö adicuo'ta̧ micuähuomettö̧'i̧nä̧ päbotä micuähuotö, ¡Redä'cattö tätö ku icu aditähuättömä! ³ Tä̧mö̧ a̧hui̧ri̧tö̧'i̧nä̧ tti̧tti̧mö̧rö̧mä̧ ttatste ajät, ja̧'hua̧nö̧ ja̧'a̧nä̧ chahuaruhuä ttittijumä pä̧i̧cua̧ju̧ jö̧nä̧tä̧ juo'ächinä̧ju̧, de'a jui̧yä̧jä̧ttö̧ aveztrustö̧ jä̧'i̧nö̧'a̧nö̧. ⁴ Ji̧'qui̧chä̧cuä̧ atate ajuomä̧ acuä ppä'ittömä̧ ä i̧nȩmä̧ huä̧mȩnä̧ bäehuächäcu; ppo̧'ä̧ttö̧mä̧ ttu̧cuȩ jäepättö, ja̧'hua̧nö̧ ja̧'a̧nä̧ ya̧tȩ'i̧nä̧ to'a'a juättörö ichumä̧. ⁵ jitö adiunä̧ ka̧nö̧ tu̧cuȩ cuä̧'a̧nö̧ ka̧jui̧ȩnä̧tö̧mä̧ jitämä̧ ppä'ittö koru juo'ähuättö mä̧nä̧nä̧; jitö adiunä̧'ä̧ ka̧nö̧ tti̧'ä̧rȩtä̧nä̧'ä̧ adiu 'cä̧tä̧juö̧ ki̧ȩ'nä̧tö̧mä̧, jitä̧mä̧ doihuä̧huä̧'cuä̧nä̧tä̧ cuä̧mȩtä̧ ä'ö kä̧cuä̧tö̧. ⁶ Chacuäröhuä ttittijuru ro̧ȩpä̧huȩmä̧ Sodomatö̧ ro̧ȩpi̧nö̧tö̧'i̧nä̧ abonä̧'ä̧nö̧ jä̧cuä̧'a̧, Ja̧'hua̧ta̧nö̧ ja̧'a̧ttö̧ 'ppo'ächä̧ ji̧mä̧ ya̧tȩ'i̧nä̧ toi'nä̧ ppada'anö̧ jua̧'a̧mä̧. ⁷ Tturuhuotömä nieve i̧sa̧ppȩttö̧i̧nä̧ abonänö teinättö̧, lechettö'inä abonänö; ttidepämä tuinättö coralso'quittö'inä abonänö, ttöadihuämä zafiro so'qui 'cua̧ro̧nä̧ ja̧'tu̧pi̧nä̧ttö̧. ⁸ Jitämä holinttö̧'i̧nä̧ abonä̧nö̧ idicuätö; mä̧nä̧ cueächäcuähuämättö'inä tti̧ä̧ru̧huä̧u̧ jahuätömä. Tti̧jȩta̧mä̧ ttihue'cacutä bäichä̧u̧; juiyo jo'ipächätö dausoda jä̧'i̧nö̧'anö. ⁹ Jitö curä'chunä cuä'äu tti̧cuä̧u̧mä̧ esehuinätö̧ ppäittö 'corujuo'ächätöttö'inä abonänö, korotömä si'ähuächinätö̧, tti'ättanä ttu̧cuä̧ cuähuä'inä juiya'attö̧. ¹⁰ Ta̧ju̧ repe'äju'inä ka̧mo̧nä̧ ku̧mu̧nä̧ 'chu'ädö ki̧tti̧mörö̧ da'äju; ja'huätömä ttu̧cua̧tä̧ juo'epinätö ji̧yȩnö̧ pä̧nä̧mä̧ chötahuiyä kittijuru si'epö tticua'anämä. ¹¹ Ja̧u̧ CHÖ̧Ä̧NÄ̧HUA̧MÄ̧ i̧jȩpi̧nä̧cu̧sä̧ o'cajuiyönä amisurumä; Ja̧u̧mä̧ i̧jȩcuä̧chi̧nä̧cu̧ ö̧'ä̧i̧mä̧. Ja̧'hua̧nö̧ ja̧'a̧ttö̧ Sionä ocurä rä̧dȩtö̧ 'cu icuinö kada'ca su̧ä̧ro̧mȩ'i̧nä̧. ¹² Tti̧rȩjä̧ pu̧nä̧ ruhuo hue'ätö'inä esetocotö pinätö̧, ja̧'hua̧ta̧'a̧nö̧ pi̧jä̧nä̧ ko̧cuä̧tö̧'i̧nä̧, ttabo'iyotö kö'cocotö pä'ijätö'inä dottächa pä'ö ji̧na̧'a̧ Jerusalén apatenä. ¹³ Jua'amä 'cuäopina'a Dios pä'ö ji'ähuätö'inä surojötä jȩtta̧'a̧tö̧ ja̧'hua̧ta̧'nö̧ sacerdote huotö'inä suronä jȩpo̧co̧tö̧rö̧ ttucuojä huerächönä jȩtta̧'a̧ttö̧ jua'a jacuättö. ¹⁴ Jähuätö cueächinätö̧, ä̧tö̧cä̧tö̧ jä̧i̧nö̧a̧nö̧, ötähuiyä mänänä. Ya̧tȩrö̧'i̧nä̧ huettoco̧u̧ pinätö̧ mȩtta̧ peömä tti̧'ca̧tä̧huä̧ta̧nä̧'inä ttöcuoja cuocuaattö. ¹⁵ ötahuiyä ttö̧ja̧ huottinäu̧ ¡tiipächätucui! ¡surojoächinätö̧! ¡tiipächätucui! ¡tiipächätucui! ¡mecuä̧tö̧! Ja̧'hua̧nö̧ ja̧'a̧ttö̧ jähuätö räopächö 'chi̧nä̧tö̧; ttö̧ja̧ pä̧tti̧nä̧u̧ pi̧jä̧́ ttö̧ja̧cuo̧mȩ o̧dö̧nä̧'i̧nä̧: jähuätömä tti̧ji̧ya̧a̧nö̧ ja̧a̧ recuomä. ¹⁶ TÖ̧Ä̧NÄHUA̧ hueö'icuinäu̧; juayabomä pääjitaanömä to'cuiyäcuotö. Jähuätö sacerdotȩtö̧rö̧ ucuotocotö pinätö̧ ja̧'hua̧ta̧'a̧nö̧ DIOS i̧huȩnȩtö̧ huo̧ju̧nä̧ kä̧tö̧rö̧'i̧nä̧ adiunä i̧jȩpo̧co̧tö̧ pinätö̧. ¹⁷ Ti'äriyä'inä 'cuächächa'a, ppättädoca'anä to̧tä̧ro̧mȩnä̧; ju'tojunä to̧tä̧ro̧mȩ kä̧nö̧ totomenä, ujutumä tti̧rȩji̧yä̧ to̧pä̧rö̧ tta̧'a̧rä̧tö̧jä̧ ppä'ädö'inä ppä'ädäcotörö. ¹⁸ Ja'huätömä ujutu ti̧'cho̧mȩtä̧cu̧ to̧pä̧ri̧nä̧tö̧, tämonä tu̧mä̧nä̧nä̧'i̧nä̧ ti̧'cho̧ juiyönätä. Ujutu betipächa pä'ömä tö'cö ji̧na̧'a̧ ja̧'hua̧ta̧'a̧nö̧ ttö̧jä̧cuä̧ mo̧ro̧'i̧nä̧ pa̧ja̧cuo̧mȩtä̧ ji̧na̧'a̧, ujutu betipächomemä ichina'a ji̧na̧'a̧. ¹⁹ Ujuturu ru̧ä̧rä̧tö̧mä̧ juiyo juruhuinätö mo̧ro̧jä̧ mu̧ca̧tö̧ttö̧'i̧nä̧ abonänö. Jahuätö ru̧ttä̧ri̧nä̧u̧jä̧ deanä'inä ja̧'hua̧ta̧nö̧ de'a jui̧yä̧jä̧ttö̧mä̧ 'cärihuä rutä'chö. ²⁰ Ujutu juä̧tä̧rö̧nä̧ ppä̧'ä̧dä̧rä̧'i̧jö̧, TÖ̧Ä̧NÄ̧HUA̧ u'cucuetinäcu̧, ja̧u̧ru̧mä̧ 'chu'ädinätö irejuttu; ppättäjita'anö: "tto̧ȩpä̧ro̧mȩ'i̧nä̧ juiyönätä tö̧jä̧cuo̧tö̧jä̧ tti̧rȩji̧yä̧nä̧mä̧." ²¹ Edom ittiju, rö̧ä̧nä̧ esehuätucui, ucutu Uz rȩjȩnä̧ ka̧cuä̧tö̧mä̧. Ja̧'hua̧nö̧ ja̧'a̧nä̧ usurä ȩmä̧cuä̧huä̧ i̧so̧'ta̧'i̧nä̧ ucuturumä 'cuäopäcua'a, tä̧cuä̧mä̧chä̧cuo̧tö̧jä̧ ja̧'hua̧ta̧'a̧nö̧ cu̧'ca̧tä̧huä̧ti̧yu̧'i̧nä̧ ko̧sä̧chä̧chä̧cuä̧u̧jä̧. ²² Sión ittiju, ucuru ro̧ȩcuä̧mä̧ ju̧huȩnȩ jubötä ja̧'a̧, Ja̧u̧mä̧ ko̧ro̧jä̧ra̧'a̧cu̧mä̧ ȩpo̧co̧cu̧ cuä̧cua̧jä̧. Ja̧'hua̧nö̧ ja̧'a̧nä̧ Edom ttö̧ja̧ ttittijumä ro̧jȩpä̧cua̧jä̧ ja̧'hua̧ta̧'a̧nö̧ suronä jȩ'cuä̧'i̧jö̧mä̧ i̧jȩpö̧ ki̧cuä̧cua̧jä̧.