¹ Amucuädi, TTÖ̧Ä̧NÄ̧HUA̧, ujuturu 'cuäopäji, topitö ujutu tusurähua'a. ² Ujutu tötämö̧ttö̧ tȩminöji̧nömä ti̧ä̧ru̧huä̧u̧ru̧tö̧ iyähui'a'a; ujutu toju ode'ínä jahuätö ichäcuähuotörötä. ³ Reyotö jö̧nä̧tä̧ huotöjä, tä̧'o̧tö̧'i̧nä̧ toönätä̧, ja̧'hua̧ta̧nö̧ ujutu ta̧ju̧tu̧mä̧ recuatö̧tä̧ huotö. ⁴ Ajiya tahua pä'ö'inä pärätä timita pä'ötä ja̧'a̧ ja̧'hua̧ta̧nö̧ tamonä tö̧to̧mi'inä timita pä'ötä ja̧'a̧. ⁵ Jitö ujuturu ru̧huä̧rä̧tö̧mä̧, ujutu tabo ja̧'a̧nä̧ tö'cö ko̧cuä̧tö̧; täcö 'cuä'ächäcätöjä ja̧hua̧nä̧ jo̧mȩnä̧ 'cuä'ächö tö̧'a̧mä̧dö̧ juiyönä ja̧'a̧. ⁶ Ja̧'hua̧nö̧ jo̧mȩnä̧ esecuinätö̧jä̧ Egiptocu ja̧'hua̧ta̧'a̧nö̧ Asiriarö'inä tu̧cuä̧ttö̧ rö̧ä̧nä̧nö̧ tu̧ju̧nä̧ra̧ pä'ö. ⁷ Tä̧'o̧tö̧ ji̧na̧'a̧ suronä jȩpi̧nä̧tö̧mä̧, jitä ja'huätömä toa'a, ja̧'hua̧nö̧ ja̧'a̧tö̧ ja'huätö suronä jȩtti̧nö̧tä̧ cue'ädätöjä. ⁸ Pä̧i̧cu̧nä̧ huȩttä̧u̧ aditä'ijätötä huȩttä̧u̧jä̧ ujutumä, ya̧tȩ'i̧nä̧ toa'a ja'huätö hue'ö̧ ttö̧jo̧mettö̧ ppädö'anö hua̧mä̧. ⁹ Pan tucua pä'ömä ro̧huä̧pi̧ja̧'a̧ 'chä̧nö̧ ȩmö̧ cuätöjä, de'a jui̧yä̧jä̧ra̧'a̧mä̧ curä'chunä cuä'äu icuätö ttö̧jo̧cua̧'a̧ttö̧. ¹⁰ Ti̧jȩta̧mä̧ juiyó duhua'a ocurä a̧'cua̧rö̧nä̧ tucua ppäittömä. ¹¹ Nä̧tö̧mä̧ ttöjö'coca'anä suronä jȩtä̧u̧ Sió̧ntö̧mä̧, ja̧'hua̧ta̧'a̧nö̧tä̧ nä̧tö̧ uborö jerupätörö'inä Judattömä. ¹² Ruhuotö tti̧tti̧mömä ttu̧mu̧nä̧ ti̧'ä̧dö̧ rö̧nä̧huo̧tö̧ ja̧'a̧, ja'huätömä buäcuächätörö'inä ttucuo juiyönätä jȩpä̧tö̧. ¹³ U̧mä̧tö̧ muäyotömä pä̧i̧cu̧nä̧ huȩtti̧nä̧u̧ ote ttöjära pä'ö inäyuttu kärähuä'canä, ja̧'hua̧ta̧'a̧nö̧ ppo̧'ä̧tö̧'i̧nä̧ mamapö̧kä̧nö̧ dauhuiyä rö̧ä̧nä̧ bo'epinätö̧. ¹⁴ Buäcuächätö'inä apate ä'ca'inä toina'a, ja̧'hua̧ta̧'a̧nö̧ u̧mä̧tö̧ muäyotö'inä musica jaropi'inätö. ¹⁵ tamiso'quinä eseu tö̧jä̧'i̧jö̧mä̧ juiya'a ja̧'hua̧ta̧'a̧nö̧ baile tötä'ijö'inä tta̧'cua̧tta̧huȩpö̧nä̧tä̧ ja̧'a̧. ¹⁶ Ȩ'u̧ tuhuo'chenä chu̧nä̧hui̧'ö̧ tö̧jä̧'i̧jö̧'i̧nä̧ juiya'a; ¡Äyó ujutuhue, surojötä jȩpä̧tö̧jä̧! ¹⁷ Ja̧'hua̧nö̧ ja̧'a̧ttö̧ na̧a̧chä̧'i̧jä̧tö̧jä̧ ujutu tamiso'quinämä, ja̧'hua̧ta̧'a̧nö̧ tiäriyänä'i̧nä̧ totiyönä päinäu̧jä̧, ja̧'hua̧nö̧ jo̧mȩnä̧ jua̧a̧nö̧tä̧ totönä joächinätö̧jä̧, ¹⁸ Ja̧'hua̧nö̧ ja̧'a̧ttö̧ Jerusalén mu̧ä̧'camä toächometä̧ ki̧i̧na̧a̧, ahuari̧tö̧tä̧ cuettächinäjä̧ juȩnȩmä̧. ¹⁹ Ja'hua̧'a̧nö̧ ja̧'a̧ Ucumä, 'cuä'opunättä hue'öjä, ja̧'hua̧'a̧nö̧ ja̧'a̧ttö̧ cu̧'ä̧mä̧dä̧cua̧jjä̧ huecuomä huä̧mä̧ cui̧tti̧mu̧ ju̧hua̧'a yabo tti̧tti̧mu̧ ruhuo hue'täcuottö 'cuä'opunä. ²⁰ TTä̧'a̧nö̧ pä'ö cunichi'ättö 'cuä'opunämä. Däbö̧ cuicuipättö recu'o mo̧ro̧mä̧. ²¹ Ucucuttä ppa̧ttä̧chi̧ö̧nä̧ jȩpi̧tö̧, TTU̧RU̧HUA̧, ja̧'hua̧ta̧'a̧nö̧ ujutumä ppä̧ttä̧chä̧cuo̧ttö̧jä̧. PPa̧'a̧di̧ttö̧ ttö̧jö̧ mo̧ro̧ ä̧cuo̧mȩnä̧ ji̧nö̧'a̧nö̧. ²² Ya'ocuäjijä o'ca juiyönättä ja̧'hua̧ta̧'a̧nö̧ ucumä ujuturu cuami̧ suräcujä ujutucumä rö'änättä.