¹ Ja̧'hua̧nö̧ ja̧'a̧ recuo mo̧ro̧ 'cuäopinö o'ca'a, TÖ̧Ä̧NÄ̧HUA̧ Israel ttö̧ja̧rö̧ ttaboiyotöttö ttippeyänä sobutätöttö 'cuä'ächi'ö ttö̧jö̧ jeinö o'ca'amä, Josuémä täcö bö̧o̧sa̧ pinö. ² Josuémä Israel ttö̧ja̧ o'catoi'önä̧rö̧ huopinö, böecuächätörö'i̧nä̧, ttö̧ja̧ tturuhuotörö'i̧nä̧, ruji pähuä ttö̧ja̧rö̧'i̧nö̧ ja̧'hua̧ta̧nö̧ su̧ro̧da̧u̧ tturuhuotörö'i̧nä̧ jahuätörömä pä'inö: Ttömä täcö bö̧o̧sa̧sä̧. ³ Ucutumä topinä̧tö̧ TÖ̧Ä̧NÄ̧HUA̧ jȩi̧nö̧mä̧ o'catoi'önä cuippeyänä ka̧cuä̧tö̧rö̧ ucuturu adiu jȩpö̧mä̧, isopäi'önä TÖ̧Ä̧NÄ̧HUA̧ Diostä jä̧'i̧ja̧'a̧ rohuäu ucuturu ppä'ädömä. ⁴ ¡Topätucui ttömä hue'inösä̧ ucuturumä ttö̧ja̧rö̧ rohuäu icu 'cho'ipö cuiyätucua pä'ö cuahuaruhuä tti̧rȩjä̧ päi'önä, ttö ttö̧ja̧ o'catoi'önäcu si'epö chicuinö rȩjȩmä̧, Jordán ajettö kä̧mä̧dö̧ aje de'ähuotottö kä̧hua̧ ma̧ä̧cha̧'a̧cu̧ päte'ö jubö kä'ädö. ⁵ TÖ̧Ä̧NÄ̧HUA̧ Diostä jä̧cua̧'a̧ jahuä̧tö̧rö̧ rä'epö i̧cuä̧cua̧mä̧, Ja̧u̧tä̧ jä̧cua̧ jahuätörö umicu cuä'catucu jo̧mȩttö̧ rä'epö i̧cuä̧cua̧, Ja̧u̧tä̧ i̧rȩjä̧ päi'omenä, ucutumä cui̧rȩjä̧tu̧cu̧ päi'önä 'chocuipäcuotöjä, TÖ̧Ä̧NÄ̧HUA̧ Dios jȩchä̧cua̧sä̧ päinö'acuä̧tä̧. ⁶ Juruhuätucui, 'quiyönä cu̧jä̧tu̧cuä̧cua'anö ja̧'hua̧ta̧nö̧ hueähuä huȩnȩ Moisés i̧huȩyu̧ti̧nä̧'tänä huȩyu̧cuä̧mä̧, cu̧huo̧jua̧'a̧cu̧'i̧nä̧ cu'ohuetucu'i̧nä̧ pärotäcuähuä juiyönä, ⁷ ji̧nä̧ ka̧cui̧pi̧nä̧tu̧cu̧ ucutu'i̧nä̧ cuihuacuächätucu juiyäcua'anö ja̧'hua̧ta̧nö̧ ttö̧ä̧huo̧tö̧ tti̧mi̧'i̧nä̧ ottö juiyäcua'a, jahuätö tti̧mi̧nä̧ huȩnȩtö̧ pättö juiyäcua'anö, ucuo te'äu'i̧nä̧ ja̧rȩyu̧ pätti'ö juiyäcua'anö jahuätörö. ⁸ TÖ̧Ä̧NÄ̧HUA̧RÖ̧ ucuo te'äu jitä mo̧ro̧ jȩ'cuä̧tu̧cu̧ ta̧'a̧nö̧ jȩ'cuä̧tu̧cu̧ttö̧tä̧ adihua'anö ja̧'a̧. ⁹ Isopäi'önä TÖ̧Ä̧NÄ̧HUA̧MÄ̧ tä̧mö̧rö̧'inä juruhuätörö'inä cuä̧'ca̧tu̧cu̧ jo̧mȩttö̧mä̧ rä'epö icuinö, ucutu cutu'cötucumä yorö'iso jahuatö ttä'ca jo̧mȩ cu̧jä̧mä̧dä̧tu̧cua̧ pä'ömä juiyä'ija'a jitä mo̧ro̧ jubö päi'önä. ¹⁰ Ya̧tȩmä̧ milmnö huotör'i̧nä̧ dö̧ttȩcuä̧chö̧nä̧ ya'opö icu'anö ja̧'a̧, juhua'amä TÖ̧Ä̧NÄ̧HUA̧ ja̧'a̧ttö̧ ucutunä rohuäumä, chutä chu̧ro̧huä̧huä̧cua̧sä̧ päinöta'anö. ¹¹ Adiu ä̧ju̧cuä̧tu̧cui̧ TÖ̧Ä̧NÄ̧HUA̧RÖ̧ repe'ö ku̧jä̧tu̧cuä̧cua'anö. ¹² Ja̧'hua̧nö̧ ja̧'a̧nä̧ kärächi'ö pitö ttö̧ja̧ ucutucu ka̧cui̧pi̧u̧nä̧tö̧rö̧ ja̧rȩyu̧ päcui'ä'chätucuttömäcö̧, jahuätucu cuirecuomö päi'önä cuȩmä̧huä̧tu̧cu̧ttö̧cö̧, jahuätucu ppäcuächi'ätucuttöcö̧, jitö'i̧nä̧ ucutucu, ¹³ ja̧'hua̧nö̧ jö̧ttö̧mä̧ huo̧juä̧tu̧cui̧jó TÖ̧Ä̧NÄ̧HUA̧ Diosmä pitö ttö̧ja̧rö̧ ucututtömä rä'epö iciocö jä̧cua̧. Ja̧'hua̧nö̧ ja̧juäimä, jahuätömä ucutu cuabo jähuä jö̧nä̧tä̧ ttö̧jä̧cuo̧tö̧, cu'upi'quiyutucunä cuäcuäpätö jö̧nä̧tä̧ ja̧'hua̧ta̧nö̧ cui'äriyätucunä so̧a̧ri̧ jö̧nä̧tä̧, TÖ̧Ä̧NÄ̧HUA̧ cu̧ru̧hua̧tu̧cu̧ Dios cui̧rȩjä̧tu̧cu̧ adihuä̧jä̧ i̧yi̧nä̧jä̧ttö̧ hua'ö cuicuätucuome jubö päi'önä. ¹⁴ Ja̧'hua̧nö̧ ja̧'a̧ jitämä täcö pi̧jä̧ttö̧ o'catoi'önä 'chä̧cuä̧huä̧mä̧nä̧ 'chö̧sä̧, ja̧'hua̧ta̧nö̧ ucutumä cuami iso'quitucu o'cajuiyönä ja̧'hua̧ta̧nö̧ cua̧'cua̧rö̧tu̧cu̧'i̧nä̧ o'cajuiyönä ji̧yȩtȩ huȩnȩ'i̧nä̧ jäyämä jȩpo̧co̧tö̧ pä'ijätujä, TÖ̧Ä̧NÄ̧HUA̧ cu̧ru̧hua̧tu̧cu̧ Dios jȩchä̧cua̧sä̧ päinö ji̧nö̧mä̧ isojuoina'a ucutunämä. Ji̧yȩtȩ'i̧nä̧ hueyecuoca'atä. ¹⁵ Ja̧'hua̧nö̧ ja̧'a̧nä̧ ja̧'hua̧ta̧nö̧ TÖ̧Ä̧NÄ̧HUA̧ jȩchä̧cua̧sä̧ päinöta'anö, ja̧'hua̧nö̧tä̧ TÖ̧Ä̧NÄ̧HUA̧MÄ̧ surojömä o'cajuiyönä i̧'cä̧chä̧cua̧ Ja̧u̧ si'epö icuome jubö ja̧huä̧jä̧ TÖ̧Ä̧NÄ̧HUA̧ Dios i̧yi̧nä̧jä̧ a̧di̧huä̧jä̧ttö̧mä̧. ¹⁶ Ja̧u̧mä̧ jȩä̧cua̧tó TÖ̧Ä̧NÄ̧HUA̧ cu̧ru̧hua̧tu̧cu̧ Dios ucutucu esecu 'quiyönä 'chu̧'ä̧rä̧cuä̧u̧ cu̧jä̧tu̧cua̧ja̧ päinö 'to'ocu cuicuätucuttömä. Ucutu koro ttö̧ä̧nä̧huo̧tö̧rö̧ ucuo te'äu ja̧rȩyu̧ jȩ'cuä̧'chä̧tu̧cu̧ttö̧mä̧, TÖ̧Ä̧NÄ̧HUA̧ ö̧'ä̧i̧mä̧ rȩdȩcuä̧chä̧cua̧'a̧ ucuturu ja̧'hua̧nö̧ jo̧mȩnä̧ ucutumä jurunä hua'ö cuicuäcuotöjä rȩjȩ a̧di̧huä̧jä̧ ucuturu i̧yi̧nä̧jä̧ttö̧mä̧."